CUTTING OF RIBBON TI BARO A BRGY. HALL, NASANGAILI NI MAYOR EDIBOY

Cabugao, Ilocos Sur – Immuna a binendisionan ni Rev. Fr. Felix Costales, Kura Paroko, St. Mark the Evangelist Parish, Roman Catholic Church, Cabugao, Ilocos Sur ti kabarbaro a pasdek ti Barangay Hall ti Barangay Turod  a binayabay dagiti mangisursuro iti Cabugao National High School ken Turod Elementary School ken Opisiales ti Brgy. Turod nga idauluan ni Brgy. Captain Inocencio S. Sadac idi Hunio 28, 2013. 

Simmaganad ti naangay a Cutting of Ribbon ti nasao a pasdek ti barangay babaen ti panangaramid ni Mayor Edgardo “Ediboy” S. Cobangbang, Jr. a binayabay ti sapasap a naitallaong iti nasao nga okasion ti barangay.

Iti panagsarita ni Brgy. Captain Sadac, pinagyamananna ken kadagiti kalugaranna  iti Gobierno Munisipal nga idauluan ni Mayor Ediboy ti pannakaipatakder ti baro a Barangay Hall-da.

Kimmablaaw  ni Mayor Ediboy kadagiti lumugar ken mangisursuro ti dua a pagadalan (high school  ken elementaria) ti barangay a nakipaset iti cutting of ribbon. Pinagyamanan pay ti Alkalde Munisipal iti reggetda a lumugar iti pannakaadda kadaytoy a pasdek a mangipakita iti agtultuloy a panagkakammayetda a manggun-od kadagiti kaibatoganda a serbisio ken proyekto tapno manaynayonan pay ti progreso a natun-oyanen iti barangay iti agdama.

Nakikaysa met ken ni Mayor Ediboy da Vice Mayor Danny Q. Gazmen, SB Member Benedict M. Savellano, ABC President, Brgy. Captain Teddy U. Soller ken SB Member Carlos V. Sison.

Nasangaili pay da Mr. Jeremy Seguban, Brgy. Captain Fermin Sarinas, Brgy. Captain Bernardo Salom ken Municipal Agriculturist Mrs. Zenaida S. Andrada ken dagiti kakaduana iti DA-LGU.

Kalpasan ti ababa a programa, napagsasanguan ti naisagana a pangaldaw iti sango ti Barangay Hall ken Multi-purpose Building ti Barangay Turod. # (Web In-Action)

PANAGBAKUNA TI DINGUEN, IDANON TI DA-LGU

Cabugao, Ilocos Sur – Iti pannaki-amad ti Web In-Action idi Hunio 27, 2013, impakaammo  ni Dr. Melvin G. Castro, Veterinarian  ti DA-LGU Cabugao nga idanonda ti panagbakuna dagiti ayup ken dinguen kadagiti barangay tapno masigud a maprebentaran dagiti rumsua a sakit ti animales no umay ti tudtudo.

Immuna a napanan ti grupo ni Dr. Castro iti Brgy. Arnap. Nakikoordinarda iti Barangay Captain wenno lumugar a kabaelanna a mobilisaren dagiti adda ayup ken dinguenna tapno mabakunaanda kontra iti sakit.

Simmaruno a napananda ti Brgy. Sisim, Brgy. Bato ken Brgy. Nagsantaan. Maysa nga aldawda ti kada barangay. Dagitoy a barangay ket impakaammoda a masango dagiti tarakenda a mapabakunaan. Sumarsaruno dagiti dadduma a barangay nga agkiddaw ti papan da Dr. Castro. 

Dagitoy nga aksion ken inisiatiba ket gubuay ti napintek a programa iti Animal Care and Disease Prevention  ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakaidur-as ti livestock  sector  tapno  mapapigsa ti  panagtartaraken a katulongan ti panagmulmula a pamastrekan dagiti mannalon. # (Web In-Action)

MAKE-UP SESSION TI 4 P’s, NAIWAYAT

Cabugao, Ilocos Sur – Naangay ti make-up session iti  Family Development Session (FDS) iti Pantawid Pamilyang Pilipino Program (4 P’s) Members iti  Barangay Turod Patac, Cabugao, Ilocos Sur ken kameng ti dadduma pay a barangay a di nakadar-ay iti naigannuat nga FDS babaen kadagiti Personnel ti Municipal Social Welfare and Development Office (MSWDO) ken Municipal Link  kadagiti barangay a nagpatingga idi Hunio 26, 2013. Naudi ti Barangay Salomague a nakaeskediulan  dagiti MSWDO Personnel a napanan ken  naglektiuran.

Kabayatan ti FDS iti Municipal Conference Hall idi Hunio 27, 2013, naglektiur ti pannakabagi ti RN-Heals  ti RHU-Cabugao maipapan iti Gabay at Alintuntunin sa Philhealth kadagiti nagatendar a  kameng ti 4 P’s. Maiyataday dagiti recipients a Philhealth  Card Holder  gapu iti health care a masakupanna  iti nayenrol a pamilia ken ti ubing nga agbasa. Nadaras a naawatan ken nakikaysa  dagiti maseknan iti annurotenda  a kas beneficiaries ti Philhealth.

Naglektiur met ni Miss Aida Cueto, Municipal Link and Focal Person ti 4 P’s  iti maipapan  ti edukasion dagiti ubbing a nayenrol iti nadakamat a programa agraman dagiti benepisio a maawatda. Naibinsabinsa ti pateg ken usar ti awatenda a gatad a maiserbi iti umisu a panggep ken katukad a pagrebbenganda  nga aramiden ken ikumit  kanaig iti pasetda iti programa.

Ti naipalawa a masakupan ti  programa ti 4 P’s iti Munisipalidad ti Cabugao ket gubuay iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  tapno sapasap a mairaman dagiti kualipikado a pamilia a makasagrap kadaytoy a pro-poor program ti Gobierno Nasional a maipatpatungpal iti  agdama iti kaaduan a Pilipino. # (Web In-Action)

ELEVATED TANK TI 2 A BRGY., SOLBAR TI KURANG A DANUM

Cabugao, Ilocos Sur – Immuna a nainstolaran ti dua nga Elevated Tank ti Brgy. Reppa-ac, maysa iti Purok Kabidayan ken iti Reppa-ac Centro iti kallabes a tawen gapu iti panagkrisis ti danum nangruna iti pagsareb ken mainum kadagiti bulan ti tikag.

Dagitoy a pangtulong  ket impaay ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  iti panangilungalong dagiti Opisiales ti Barangay nga idauluan ni Brgy. Captain June Basquez ti Brgy. Reppa-ac. Babaen ngarud  ti kooperasion dagiti pumurok a makasapul  kadaytoy a tangke, naalay-ayanda iti problema  nga imbunga ti  panagkiddit ti danum ditoy a deppaar.

Kabayatanna, naikkan met ti Elevated Tank ti Brgy. Nagsantaan iti panagkalikagum dagiti lumugar nga idauluan ni Brgy. Captain Mario Peralta. Naisaad  iti napantok a disso ti abay ti Brgy. Hall-da ket manamnama a kabaelan  ti tangke a suplayan  ti  kasapulan a danum   iti aglawlaw a purok ti barangay.

 Manamnama a no makargaan ti tangke ken iti semento a deposito ti danum iti abayna ket masuplayanna ti kasapulan dagiti pumurok uray mausarda iti pangsibogda ti mulada.

“Pagyamananmi unay kadagiti Appo nga Opisiales ti Munisipio nangruna ken ni Mayor Ediboy  kadaytoy a proyekto ditoy barangaymi  a pangsolbarmi ti gawat ti danum,” kinuna ni Brgy. Tanod Morales idi kauman ti Web In-Action bayat ti panag-dutyna iti Brgy. Hall-da.

Dagiti lumugar ti Brgy. Reppa-ac ken Brgy.Nagsantaan ket mapaspasaranda ti tinawen a  panagkurang   ti  mausar a  danum nangruna no nainit a bulbulan ket daytoy a  pannakaited dagiti elevated tank ti nakasagana  a  maitulong ti Munisipio  iti pakaseknanda iti pagkasapulanda ti danum. # (Web In-Action)

PAY-OUT TI SOCIAL PENSION TI SENIOR CITIZENS, NAANGAY

Cabugao, Ilocos Sur – Naangay ti pay-out wenno pannakaited  ti Social Pension  ti 205 a  beneficiaries (babbaket ken lallakay)  a kameng ti Senior Citizens  ti  Cabugao ket inawatda ti 3-bulan   para iti 2nd Quarter ti 2013 (Abril-Hunio) a pensionda manipud iti DSWD Region 1 iti Municipal Conference Hall, Cabugao, Ilocos Sur idi Hunio 26, 2013.

P500 ti kada bulan ti naituding nga awaten ti maysa a Beneficiary. Agdagup ti P1,500 iti tallo a bulan  ti naawatda  iti tunggal maysa.

Iti pannaki-amad ti Web In-Action idi Hunio 26, 203, impakaammo  ni Mrs. Lydia S. Gazmen, Municipal Social  Welfare Development Officer ti LGU-Cabugao nga umabot ti P307,500.00 ti dagup ti gatad a naited kadagiti 205 a benepisiario.

Nagatendar  met iti nasao a pay-out activity da SB Member Dr. Carlito S. Pano, Committee Chair on Social Services ken dagiti pannakabagi ti DSWD Region 1 ken kameng ti MSWD Office ti LGU-Cabugao. # (Web In-Action

ENVIRONMENT MONTH, NAOBSERBAR ITI TAKDANG KEN KABAYBAYAN

Cabugao, Ilocos Sur – Kangrunaan a nangpasingked ti panangobserbar ti umili ti Cabugao iti bulan ti Hunio kas “Environment Month”. a Naisayangkat ti nasaknap a Tree Planting activities  iti panangidaulo ti Ahensia ti  LGU-Cabugao nga idauluan ni Mayor Edgardo “Ediboy” S. Cobangbang, Jr. iti kaaldawan ti Independence day (Hunio 12, 2013)  a nakikammayyetan ti amin nga Ahensia ken Sektor ti ili a Cabugao. Naigiddan pay ti bukod a tree planting dagiti  barangays iti dayta a petsa a kas pangalagadda ti Arbor Day.

Idi Hunio 26, 2013, sinelebraran ken indauluan  ti Provincial Environment Natural Resources and Management Office ti Ilocos Sur  iti “Environment Month”  babaen iti coastal awareness babaen  iti coastal clean-up a nagkakammayetan dagiti nadumaduma nga asosasion ken sektor ket napili ti Barangay Namruangan a  nakaipatungpalan daytoy nga aktibidad.    

Nupay kasta, impakaammo ni MENRO Edgar S. Balangatan, AT a regular sakbayna a maar-aramid ti Coastal Clean-up iti pito a Coastal barangays babaen ti panangidaulo dagiti Opisiales ti barangay ken nadumaduma nga organisasion iti uneg ti barangay-da. Innayon ti MENRO nga agtultuloy latta met ti panagmulada ti mangrove seedlings nga aggapu iti BFAR. Kadua ti MENRO ni Mrs. Milagros R. Paz, AT, Municipal Fisheries Program Coordinator a mangkitkita ti pannakaipakat ti programa ti Environment kas iti pannakaimula ti 180,000 a mangrove seedlings iti igid ti baybay ti  Barangay Pug-os, pannakanayon ti maimula  25,000 a mangrove seedlings iti siguden a  lumawlawa  a namulaan a paset ti kabaybayan ti Barangay Sabang kasta pay ti pannakanayon ti maimulmula a mangrove seedlings  iti parte ti baybay ti Barangay Salomague a pampamulaan ni Mrs. Paz a baybayabayen dagiti opisiales ti barangay ditoy a lugar.

Insupusop pay ni MENRO Balangatan a maar-aramid pay ti pannakaprotektar dagiti watershed area, dredging ti waig ken karayan, pannakadalus dagiti igid ti  kalsada, pampubliko a pasilidades ken lugar, pannakakontrol ti slash and burn ken illegal cutting of trees kadagiti barangay a dagitoy ket maysa pay a wagas a mangprotektar  ti aglawlaw.

Dagitoy nga aksion ken inisiatiba ket gubuay ti napintek a programa  iti Environment Management ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno maannurot dagiti programa ti DENR ken Gobierno Nasional ket matignay ti sapasap nga  umili a makikammayet kadagiti Opisiales iti agtultuloy a pannakatagiben ti kasasaad ti aglawlaw. # (Web Situational Report)

NAGBUNUBONEN TI FFS-BRGY. REPPA-AC PARA ITI LEARNING FIELD

Cabugao, Ilocos Sur – Naaramiden ti pannakaibunubon ti hybrid rice seeds a mausar iti 16 weeks nga implementasion ti Farmers Field School ti proyekto a para iti rainfed area a pagtatalonan a  masakupan  ti programa ti DA-RFU 1 iti Brgy. Reppa-ac, Cabugao, Ilocos Sur.

Kanaig daytoy, mangrugi ti panagklase dagiti Farmer’s Enrollees nga agdagup iti 45 a kameng a makasakup ti 15 ektarias a rainfed area iti nadakamat a barangay inton Hulio 11, 2013 iti Learning Center (Rang-ay ti Away Multipurpose Building), Brgy. Reppa-ac, Cabugao, Ilocos Sur.

Manamnama nga iti pannakairusat daytoy a programa iti Brgy. Reppa-ac ket maulit manen iti sabali a barangay a disso ti rainfed area tapno agbalin a pakarainudan dagiti bumarangay imbes nga agbakante iti maysa a planting season.

Dagitoy nga aksion ken inisiatiba ket gubuay iti di agsarday a panagtakuat ken panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a pannakaited ti umisu a pannakatulong  dagiti rainfed area farmers kadagiti amin a barangay iti ili  ti  Cabugao, Ilocos Sur. # (Web In-Action)

AGTULTULOY A PANAGMULA TI NATENG, INGANNUAT TI 4-H CLUB

Cabugao, Ilocos Sur- Inrusat ti 4-H Club ti  Barangay Pug-os, Cabugao, Ilocos Sur nga idauluan ni Mr. Apa Y. Baclig, Presidente iti panagmula ti hybrid a tarong, utong, sili, karabasa ken kamatis  iti  bakante a lote  ti Brgy. Pug-os, Cabugao, Ilocos Sur.

Iti pannaki-uman ti Web In-Action idi Hunio 26, 2013, imbatad ni Mr. Obas Bill Y. Baclig, AT/Municipal 4-H Club Coordinator a kalikaguman dagiti 4-H Club Members nga ipakita ti agtultuloy a panagpatanor ti nateng tapno adda latta madadaan a nayon ti pagtaraon iti rabaw ti lamisaan. Daytoy a rusuat ket kayat ni Mr. Baclig a tuladen ti dadduma pay a 4-H Club ti dadduma a barangay.

Kanaig daytoy, agtultuloy met a lumuklukmeg dagiti pupokda a lames iti piskeriada iti matapliakan ti apgad ken tamnay iti Barangay Pug-os iti  asideg ti Karayan Bimmeclat.

Ti piskeriada ket naipalawa ken manaynayonan ti maipupok nga aggapu iti BFAR, DA-Provincial   ken Municipal  Fishpond tapno adda met proyektoda ken pagkakitaanda a pakagunggonaanda iti panagsakripisioda.

Dagitoy nga aksion ken inisiatiba ket gubuay ti panangpapigsa ti asosasion dagiti agtutubo a karaman ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno maiparikna ti kaadda ti importansia dagiti agtutubo  ken mapagbalinda a nabunga dagiti panawenda babaen ti panangprobitsarda ti serbisio ken tulong dagiti maseknan nga ahensia ti Gobierno kadakuada. # (Web In-Action)

LOCAL GOVERNANCE TRANSITION TEAM, NAGMITING

Cabugao, Ilocos Sur – Nagmiting dagiti kameng ti Local Governance Transition Team ti LGU-Cabugao, Ilocos Sur nga idauluan ni Mayor Edgardo S. Cobangbang, Jr. idi Hunio 24, 2013 iti SB-ABC Hall, Cabugao, Ilocos Sur.

Nabukel ti Local Governance Transition Team babaen iti  Executive Order No. 1, Series of 2013 babaen iti Local Chief Executive, LGU Cabugao  idi Mayo 8, 2013.

Naibasar daytoy a pagalagadan iti DILG MC No. 2013-33 a mabukel ti Team kadagiti LGU’s  iti naangay a National and Local Elections 2013 ken mangisaguday ti pannakaisagana ti turn-over  iti rienda ti turay dagiti baro a nabutosan nga Opisiales Lokal.

Iti Local Governance Transition Team ti LGU-Cabugao ket  idauluan da Mayor Edgardo S. Cobangbang, Jr., kas Chairperson  ken Vice Mayor Danilo Q. Gazmen, kas Vice Chairperson ken  kaduada ti 14 a dadaulo ti Departamento ti LGU, pannakabagi ti COA ken NGO a mangbukel ti Team.

Sinaguday ti napagmimitingan ti Team iti naannayas a pannakai-turn over dagiti sanikua, report  ken papeles/dokumento  ti Gobierno Lokal iti ili a Cabugao kadagiti kabarbaro nga agtakem nga Opisiales ti ili inton Hunio 30, 2013.  # (Web In-Action)

GENERAL ASSEMBLY TI CABUGAO SOUTH CS, NAANGAY

Cabugao, Ilocos Sur – Naangay ti General Assembly ti  Federation of Homeroom Parent Teacher’s Association (FPTA) ti Cabugao South Central School idi Hunio 25, 2013 iti Social Hall, Cabugao South Central School, Brgy. Bobifacio, Cabugao, Ilocos Sur.

Nagatendar dagiti  nagannak iti amin a year-level nga idauluan ni Kagawad Percival Somera, Federated Homeroom  PTA President, Teaching Staff nga idauluan ni Mrs. Melvi S. Sajonia, Principal II ken ni Public Schools District Supervisor Helen V. Siruno ti Cabugao DepED District.

Pinagsapata ni District Supervisor Mrs. Siruno dagiti kabarbaro nga Opisiales ti Pederasion,  ken Homeroom PTA Officers. Iti mensahena, kinaritna ida nga itultuloyda ti pannakikammayetda iti DepED kadagiti programa ken proyekto a mangpasayaat ti eskuela, napintas a pannakikoordinar  iti amin a makatulong nga ahensia ken institusion tapno agkaykaysada amin a mangital-o ti kalidad ti masursuro ken pisikal a kasasaad ti pagadalan ti South ken mairaman metten dagiti  dadduma pay nga eskuela ti Distrito.
Nagyaman met ni Kagawad Percival Somera, Federated Homeroom  PTA President ta naikkan ti gundaway nga agserbi ket kangrunaan nga itandudona ti pannakaalay-ay ti bulos nga animales a sumrek iti pageskuelaan tapno malapdan ti panagdadaelda.

Nagyaman met ni Brgy. Captain Valentin S. Tuyor ti Barangay Bonifacio ta naawis ti sibubukel a Konsehona nga umimdeng iti nasao a miting. Inkumitna ti agtultuloy a panangtarabayda iti pagadalan.

Impresenta ni Mrs. Melvi S. Sajonia, Principal II babaen iti Powerpoint dagiti nagbaliwan ti eskuela, plano a pangpadur-as pay,  balligi dagiti ubbing iti nadumaduma a tay-ak ti salip iti distrito ken iti benneg probinsial.

Tunggal mangisursuro ket napusgan a nangipaay ti reportda nangruna dagiti maseknan iti pinansial a kasasaad ti eskuela, school canteen ken kanaigna a pundo ti  Federation ken Homeroom PTA. Maysa kadagiti kangrunaan a natratar ken napagnunumuan iti uniporme ti ubbing iti panagbasada.

Kalpasan ti miting, natratar pay dagiti plano ti Pederasion a pannakapasayaat ti arubayan ti pagadalan kas iti pannakatarimaan  ti Compost Pit, Nursery, Herbary, School Garden, pannakaaramid ti Material Recovery Facility (MRF) tapno maannurotda ti Environmental Management a programa ti Munisipio ken ti Greening Program ti Gobierno Nasional. Dagitoy nga inisiatiba ket ilungalong ni Federated President Somera malaksid iti pananglappedna ti panagdadael dagiti bulos a taraken iti uneg ti pagadalan. # (Web In-Action)

STREETLIGHTS PROJECT TI BRGY. PILA, MAPAGNUMARAN

Cabugao, Ilocos Sur -  Iti pannaki-amad ti Web In-Action kadagiti lumugar ti Brgy. Pila, Cabugao, Ilocos Sur idi Hunio 25, 2013, maragsakanda iti pannakanayon ti pagsilawanda iti kalsada kas iti solar light-da a naipasdek iti nagsapalan dagiti kalsada-da nga agturong kadagiti purokda.

Innayonda a babaen iti panangtarabay ti Konseho ti Barangay nga idauluan  ni Brgy. Captain Romeo S. Galamgam, naiyusuat ti panagproyekto ti Sangguniang Kabataan iti nasao a barangay iti pannakanayon dagiti streetlights-da.

Pinagyamanan dagiti lumugar iti naraniag a pagdaliasatanda  kadagiti barangay road-da iti rabii nangruna  no adda emerhensiada.

Malaksid iti napintas a  kaaduan a nakongkreto a kalsadada, naraniag pay ti pagnaanda a mangpatalinaay ti kapampanunotanda nga agallatiw iti papananda. # (Web In-Action) 

BARO A KAGAWAD, NAGSAPATA KEN NI MAYOR EDIBOY

Cabugao, Ilocos Sur – Nagsapata ni Mr. Marino T. Valle kas kabarbaro a Sangguniang Barangay Member ti Brgy. Salomague, Cabugao, Ilocos Sur iti Opisina ti Mayor iti Hunio 25, 2013.

Pinagsapata ni Mayor Edgardo  S. Cobangbang, Jr. ni Incoming Kagawad  Valle iti imatang da Ms. Constancia L. Quiñola, LGO  Officer V, Municipal Local Government Operations  Officer ti Cabugao kasta metten ni Brgy. Captain Eliseo R. Serrano ti Barangay Salomague.

Ni Mr. Valle ket agepekto ti pannakaapointarna  a kas kameng ti Sangguniang Barangay  inton Hulio 1, 2013 iti Barangay Salomague, Cabugao, Ilocos Sur. # (Web In-Action) 

SMALL FARM RESERVOIRS, MANGRUGI A PAKAIRANUDAN

Cabugao, Ilocos Sur – Iti panagbisita ti Web In-Action idi Hunio 24, 2013, napasingkedan  iti naan-anay a panagurnong  ti danum dagiti nakali nga abut a nagbuligan ti LGU-Cabugao ken Bureau of Soils and Water Management (BSWM) a pinaaramid para kadagiti mannalon  ita a Wet Season Crop 2013 partikular iti nagbedngan ti Brgy. Pila ken Brgy. Dardarat, Cabugao, Ilocos Sur.

Iti Brgy. Pila, imbatad ni Barangay Tanod Silario a kabaelan ti maysa  a pagurnongan nga abut a suportaran ti padanum  ti umabot a 15 ektaria iti pagtatalonanda. Innayonna nga agsipud ta saan a patag ti plastar ti kaaduan a  talonda ket awan ti masnop a pananumanda ta naun-uneg ti disso ti waig a pagliasan ti danum no agtudo ket marigatanda nga ipasagpat ti ayus. Nabayagen a takuatda a babaen iti maaramid nga abut a pagurnonganda ti danum ket epektibo daytoy ta adda in-inut a pakunotanda  ti hose wenno motoranda no kasapulanen  ti raep ti danum wenno agtikag ti  daga.  Saan met a kaskarina a lumned ti naurnong a danum iti abut ta rimmabawen  ti dam-eg ken napintas nga agtengngel ti dam-eg ti klase ti dagana ta nakilnet.

Dagitoy nga aksion ken inisiatiba ket gubuay ti di agsarday a panangikalikagum ti LGU-Cabugao nga idauluan ni Mayor Edgardo “Ediboy” S. Cobangbang, Jr. a mangilungalong iti panagsayaat dagiti mannalon a marigatan ti pagpadanumanda tapno mabukibok ken mamulaan  dagiti pagtatalonanda  a tumulong a mangingato ti maapit ken masapulan dagiti mannalon iti nadakamat a  rainfed area. # (Web In-Action)

SCHOOL FENCE REHABILITATION TI CABUGAO SOUTH CS, NAILEPPAS

Cabugao, Ilocos Sur -  Naileppasen ti paset ti  School Fence ti sango ti Cabugao South Central School, Cabugao, Ilocos Sur itay nabiit babaen iti pannakaigastos ti pundo ti Parent Teacher’s Association  (PTA) iti pagadalan, Donasion dagiti Alumni ti eskuela  ken nasayaat ti panagpuspusona nga indibidual ken grupo  a mangisaksakit iti pagsayaatan ti  pagadalan.

Iti pannaki-amad ti Web In-Action iti Hunio 25, 2013, imbatad ni Mrs. Melvi S. Sajonia, Principal II ti GSCS a kalikagumanda met a mapasayaat ti inaladan ti eskuela nangruna iti sango a parupa ti pagadalan ken tapno maproteksionan pay  ti seguridad dagiti ubbing ken sanikua ti pagadalan.

Nupay kasta, na-repair laengen ti inaladan tapno mapreserba ti historikal a kalalanga ti dati nga alad ti nadakamat nga eskuela. Kanaig daytoy, napapintaan met dagiti bakrang dagiti pasdek agraman dagiti Gabaldon Buildings  a nangpangayed ti buyada ken timmingra ti historikal  dagiti buya ti  kadaanan a pasdekda a nabangon idi panawen ti  Commonwealth Government.

Ti pannakapasayaat ken pannakapapintas ti kalalanga ti pagadalan ket paset ti programa ti DepED District nga idauluan ni Public Schools District Supervisor Helen V. Siruno tapno maa-ayo dagiti ubbing nga agadal ken mangital-o ti kalidad ti pagbasaan ken kabuybuyogna metten  dagiti  maadalda. # (Web In-Action)

MATHEMATICS ENHANCEMENT SEMINAR, MAANGAY ITI 2-ALDAW

Cabugao, Ilocos Sur – Naangay iti Mathematics  Enhancement District Seminar dagiti mangisursuro kadaytoy nga asignatura iti Cabugao DepED District  (26 a pagskuelaan)  babaen iti panangtarabay  dagiti School Heads/Principals agraman ni Public Schools District Supervisor Helen V. Siruno.

Iti mensahe ti dadaulo ti DepED District, kinaritna dagiti Mathematics Teacher a maparegget koma ti panangipategda iti skills training tapno matubay ti kabaelan dagiti ubbing iti Math Classes  nga  isuroda   a pakaasaan ti kabaelanda kadaytoy a kangrunaan nga asignatura ti elementaria a paset ti Siensia ken kurikulum.

Innayon ni Mrs. Siruno a saan laeng a pammadayaw ti napateg a magun-od iti panangsanay ti kabaelan dagiti teachers ken  ubbing no di  pay ket napigsa a kalasagda nga umagpang iti adalda nangruna iti  pakaisangalanda a nailian nga eksaminasion iti masakbayan.

Naglektiur dagiti natudingan a resource persons ken naaramid pay dagiti  workshop (problem solving ken computation)  kasta met iti pannakaiyintek iti Knowledge and Understanding iti panangpapigsa ti kabaelan dagiti ubbing a mangadal iti Mathematics.

Maangay  ti nasao a seminar iti  dua nga  aldaw  (Hunio 22 ken Hulio 6) iti Conference Hall, Cabugao South Central School, Brgy. Bonifacio, Cabugao, Ilocos Sur. # (Web In-Action)

AGBUELO MANEN TI TRANSAKSION ITI DAYO

Cabugao, Ilocos Sur –Puminpintas ti kasasaad ti transaksion a mapasamak iti panaggiginnatang dagiti koridor ken dumadayo iti Cabugao Dayo a  mangrugi iti Hunio 22, 2013 a kaaldawan ti Cabugao Dayo.

Daytoy ti inlatak  ni Mr. Marciano Raciles, Jr., Presidente, Cabugao Livestock Traders Association iti pannakiuman ti Web  In-Action iti dayta a petsa.

Kas iti sigud, nabun-as dagiti nuang ken baka a nai-dayo ket kaaduan ti nagatang a para-parti babaen kadagiti kameng ti Cabugao Meat Vendors Association iti NISTC- Public Market, Cabugao, Ilocos Sur.

Kalpasan ti panagmiting dagiti kameng ti livestock association itay nabiit, napatibker manen ti panagkakaduada ken pannakaibaut dagiti puonan iti panaggatang nga agtultuloy a mangingato ti masapulan ti asosasion  ken pakabenepisiaran met dagiti kameng iti  agdama. # (Web In-Action)

MUNICIPAL FISHPOND, NAPUPOKAN TI TILAPIA FINGERLINGS

Cabugao, Ilocos Sur – Iti pannaki-amad ti Web In-Action idi Hunio 24, 2013, imbatad ni Municipal Fisheries Program Coordinator Milagros  R.  Paz, AT  a napupokanen  ti lames ti Municipal Fishpond gapu ta nadanonan ti pannakaapit dagiti  dati a naipupok a Tilapia.

Innayon ni Mrs. Paz  nga umabot ti 100,000  a Tilapia Fingerlings ti baro a  naipupok iti Municipal Fishpond a naggapu idiay BFAR, Munoz City, Nueva Ecija.

Nupay kasta, adu a fishpond owners kadagiti barangay ti Cabugao  iti nabenepisiaran kadagiti  napataud a fingerlings ti tilapia  iti kallabes a tawen babaen iti produksion  ti Municipal Fishpond iti panangilungalong  iti LGU-Cabugao nga idauluan ni Mayor Edgardo “Ediboy” S. Cobangbang, Jr.  ken nangipaay met  ti  Bureau of Fisheries and Aquatic Resources (BFAR).

Dagitoy a serbisio a  pannakaidur-as ti panagpupokan  ken panagtaraken ti lames ket kalikagum  pay  ti LGU-Cabugao  a mangipakita iti pagtuladan ken tumulongda  a mangpataud iti fingerlings tapno maidur-as met ti panagsaknap ti  pagikanan iti tamnay ken  manayonan iti masapulan dagiti mannalon. # (Web Situational Report)

PAY-OUT TI CASH GRANT KADAGITI 4 P’s MEMBERS, NAANGAY

Cabugao, Ilocos Sur – Naangay ti pay-out wenno pannakaited dagiti gatad nga awaten dagiti benepisiario ti Pantawid Pamilyang Pilipino Program (4 P’s) nga umabot ti 534 a kameng a naggapu iti nadumaduma a barangay ti Munisipalidad ti Cabugao  idi Hunio 20, 2013 iti Cabugao Cultural and Sports Complex, Brgy. Rizal, Cabugao, Ilocos Sur.

Nasapa a dimteng dagiti 4 P’s Members ket naaramid ti panagliniada a mangala iti Acknowledgment Receipt (AR)  kadagiti natudingan a DSWD Personnel pambaranda beripikaren iti masterlist babaen iti ID-da a kameng   sada manen makilinia iti pakabayadanda a lamisaan. Nagtinnulong dagiti Personnel ti MSWDO, DSWD ken Philpost nga imbagian ni Cabugao Postmaster Cesar Sivila.

Iti pannaki-amad ti Web In-Action idi Hunio 20, 2013, imbatad ni Mr. Gary Vicerra, Municipal Link nga adda pay maur-uray a 668 a baro a kameng ti 4 P’s ti Cabugao  a mabayadan ti  cash card-na  ken sabali laeng ti Set 3 a a makasakup dagiti kameng a mapan mangala ti biangda a gatad idiay Land Bank of the Philippines (LBP), Vigan City.

Iti Opening Program, impeksa ni SB Member Dr. Carlito S. Pano, Committee Chair on Social Services iti panangipateg dagiti grantees iti pannakausar ti awatenda a gatad ken ikagumaananda koma  nga aramiden dagiti pagrebbenganda  nga ipaannurot ti DSWD kadakuada. Nakikaysa met ni SB Member Dr. Jemaima S. Tan-Yee ken ni MSWD Officer Mrs. Lydia S. Gazmen ken dagiti MSWDO Staff iti nasao nga aktibidad. Nagpaay nga Emcee/Facilitator ni SB Secretary Maxfel S. Suboc.

Dagitoy a pagsayaatan dagiti recipients   a pamilia ket nailungalong babaen iti programa ti Gobierno Munisipal nga idauluan  ni Mayor Edgardo “Ediboy” S. Cobangbang, Jr. a matulongan  ti  sapasap ken kualipikado nga  agkasapulan babaen iti programa ti DSWD iti Cash Conditional Transfer nga itandudo ti Gobierno Nasional. # (Web In-Action)