PANAGSAPATA 2013, NAANGAY DITOY CABUGAO

Cabugao, Ilocos Sur – Naangay ti panagsapata dagiti naelektaran a Barangay  Officials iti 33 a barangay ti ili a Cabugao, Iloco Sur (231 Kagawad ken 33 a Punong Barangay) iti Nobiembre 29, 2013 iti sango ti Munisipio.

Immuna a naaramid ti Nasantuan a Misa iti Cabugao Catholic Church a nagatendaran dagiti Opisiales ti Barangay sa naaramid ti seremonia ti panagsapata iti Munisipio.

Kalpasan a binsaen ni SB Secretary Maxfel S. Suboc iti punganay ti pakabuklan ti  “Barangay”, nag-Welcome Remarks ni Vice Mayor Deogracias Jose H. Savellano. Bininsana ti pateg ti panagkaykaysa a mayataday iti “One Cabugao” a panggep dagiti agdama a lideres para iti naprogreso nga umili ti Cabugao.

Nagsaganad met a nangipaay ti Mensahe da SP Member Constante Oandasan ken ni SP Member Edgar Yabes. Anag dagiti mensaheda iti pannakaited ti talek dagiti kalugaran dagiti agsapata kadakuada ket isublida met babaen iti napudno a panagserbida.

Naisaruno ti panagsapata dagiti 33 a  naelektaran a Punong Barangay ken naisublat met dagiti  231 a naelektaran a Barangay Kagawad babaen iti panamagsapata kadakuada ni Mayor Edgardo S. Cobangbang, Jr.

Simmaruno ti panangipaayna  ti Mensahe ni Mayor Ediboy. Kimmablaaw ken nagyaman iti amin a naitallaong a kangrunaan dagiti naelektaran a Barangay Officials ta makipagtrabahoda iti Munisipio iti pannakaipaay kadagiti serbisio kadagiti umili nangruna iti barangay.

Inimatangan pay ti kaaduan iti panangiyallawat ti Association of Barangay Captains/Councils ti donasionda  a pangtulong kadagiti naapektaran ti “Typhoon Yolanda” babaen iti panangawat ni Mr. Bryan Realgo, pannakabagi ti ABS-CBN Ilocos a natudingan a pakaitalkan dagiti maur-or a tulong para kadagiti nabiktima ti kalamidad.

Kalpasan ti programa ket naaramid ti Pictorials dagiti Opisiales ti Barangay ken dagiti Opisiales ti LGU-Cabugao. # (Web In-Action)

4-DAY SEMINAR TI PARENT-LEADERS, NALPAS

Cabugao, Ilocos Sur – Nagatendar dagiti 51 a Parent-Leaders ti Pantawid Pamilyang Pilipino Program (4 P’s) iti ili a Cabugao, Ilocos Sur iti uppat nga aldaw iti Alad Bar Resort, Cauayan, Ilocos Sur nangrugi idi Nobiembre 25 agingga iti Nobiembre 28, 2013.

Kangrunaan a nataming iti nadakamat a seminar ti Capability Build-up dagiti Parent-Leaders kas pangulo iti Clustering Group ti 4 P’s ken naipunganay no ania ti kaipapanan ti programa a para kadagiti marigrigat a benneg ti kagimongan.

Kabayatanna, dimmagas ti grupo dagiti nagseminar ket nagtitiponda iti Municipal Conference Building idi Nobiembre 28, 2013  ket nagtutulaganda iti disso a pakaangayanto  ti Christmas Program ti tunggal Cluster-da. Tinarawidwidan ni Ms.Juliet Madriaga, Social Welfare Officer, Municipal Link Cabugao ti panagmiting dagiti Parent-Leaders iti nasao a pasdek ti Munisipio. # (Web In-Action)

SEEDLINGS TI NATENG, AGTULTULOY A MAIWARAS

Cabugao, Ilocos Sur –Agtultuloy latta  a   maiwaras dagiti masetas a nateng iti Greenhouse babaen iti DA-LGU Cabugao.

Agtultuloy met a maitandudo ti panagpamulada  kadagiti nagduduma ti klasena a hybrid a bukel ti nateng a manipud iti High Value Commercial Development Program ti DA-RFO 1, San Fernando City, La Union tapno agtultuloy latta a maiwarasan ti imula dagiti interesado a mannalon  iti las-ud ti 33 a barangay ti ili ti Cabugao, Ilocos Sur.

Kabayatanna, impakaammo ti DA-LGU Cabugao a kangrunaan a nakaisentruan ti programa iti panagmulmula ti nateng ket dagiti barangay/asosasion  tapno masustener ti Gulayan Program/Backyard Gardening a maipakat iti programa a  pakaseknan ti Nutrision ken Salun-at.

Manamnama nga iti agtultuloy a pannakaitandudo ti panagmula ti nateng ket makatulong iti agtultuloy a  pannakapasalun-at dagiti ubbing ken dagiti  umili nangruna kadagiti agnanaed iti aw-away. # (Web Situational Report)

LAUNCHING TI PROYEKTO TI BFAR ITI BRGY. SABANG

Cabugao, Ilocos Sur – Naangay ti Launching ti panagpatan-ay ti Sea Urchin ken Kanut-Kanot (Seaweeds) idi Nobiembre 26, 2013 iti Multipurpose Building, Brgy. Sabang, Cabugao, Ilocos Sur.

Daytoy a pannakailunsad ti nadakamat a proyekto ket dinar-ayan dagiti dadaulo ti mangngalap iti 5 nga ili ti First District, Ilocos Sur kas iti Sinait, Cabugao, San Juan, Magsingal ken Sto. Domingo nga  inimatangan da Gov. Ryan Luis V.  Singson ken ni Diputado Ronald V. Singson, First District, Ilocos Sur.

Iti naaramid a programa sakbay a naiyallawat ti proyekto, impeksa ni Brgy. Captain Edgardo S. Cobangbang, Sr. ti Brgy. Sabang iti panagyaman dagiti umili ti Cabugao, Ilocos Sur iti pannakaangay dagiti kakastoy a panagtitipon iti Barangay Sabang a pakairusatan dagiti proyekto a mangtulong iti kabibiag dagiti mangngalap.

Binagi met ni BFAR Regional Director Nestor D. Domenden, CESO V ti Opening Remarks ken Project Rationale.

Kalpasanna, naiyallawat ti pakabuklan dagiti proyekto babaen kadagiti nadakamat nga Opisiales ti Gobierno, pannakabagi ti LGU-Cabugao ken dagiti dadaulo ti mangngalap. Naangay pay ti Ceremonial Stocking/Planting kalpasan ti naaramid a MOA Signing dagiti Opisiales ti Gobierno ken dagiti Opisiales ti BFAR ken mangngalap ti nadumaduma nga LGU’s. # (Web In-Action)

PANAGSAGANA TI PASKUA 2013, NAILUNSAD

Cabugao, Ilocos Sur – Agtultuloy a maigannuat ti panagdaldalus/panangpapintas ti buya ti aglawlaw  babaen ti panangiyusuat dagiti pannakabagi ti ti Munisipio iti  iyaasideg ti Paskua 2013 a panagsangpet pay dagiti Bakasionista, Balikbayan ken Turista ditoy ili a Cabugao, Ilocos Sur.

Segun ken ni MENRO Edgar S. Balangatan, AT, kaduana da Municipal Engineer Crescencio C. Formoso,  Mr. Richard Pula ken ni Mr. Donnell Peralta a mangtartarawidwid kadagiti LGU Personnel nga agtitinnulong ken agtultuloy  nga agdalus kadagiti pampubliko a disso kas iti Parke, Plaza, Government Center ken ti National/Provincial  Highway tapno agtultuloy a napintas ti buya ti aglawlaw.

Kabayatanna, naiplastaren ken maar-aramiden dagiti mayannatup a dekorasion para iti pannakaselebrar ti Paskua 2013 iti biang ti Munisipio kadagiti  umisu a pakaipananda kangrunaan iti ikub ti Municipal Garden iti  sango ti Munisipio (Presidencia).

Manamnama nga  iti napintas a kooperasion dagiti pannakabagi ti LGU-Cabugao a mangituyang kadagitoy a trabaho ket naballigi latta ti pagbanagan dagiti trabaho ken programa a mailunsad iti salinong ti Gobierno Lokal ti ili a Cabugao a para iti pannakaisagana dagiti pampubliko a pasilidades para iti selebrasion ti Paskua 2013. # (Web In-Action)

ALAD TI MONUMENTO NI GEN. A. LUNA, NAISAAD

Cabugao, Ilocos Sur – Naisaad ti Monument Fence ni General Antonio A. Luna iti pagdulonan ti Cabugao Catholic Church ken ti Munisipio ti Cabugao, Ilocos Sur.

Sakbayna, naisaad ti Monumento ni General A. Luna ditoy a disso maibasar iti Historikal a kabibiagna a nagdaldaliasat daytoy a natured a Filipino a Heneral kadaytoy a direksion idi panawenna.

Segun kadagiti pannakabagi ti LGU-Cabugao a nangtarawidwid ti pannakaalad ti Monumento, mainumo laeng a maikkan ti alad ti aglawlaw ti patakder agsipud ta maibilang a pampubliko a disso ken tapno maprotektaran ti pakabuklan ti Monumento.

Daytoy nga aksion ken inisiatiba ket gubuay ti gannuat a panangpreserbar iti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti kaipapanan dagiti historikal a pakairamanan ti ili ken iti mayataday a pannakaiplastar dagiti pampubliko a pasilidad para iti masa. # (Web In-Action)

MAITULTULOY A MAARAMID TI CABUGAO ATHLETIC GROUND

Cabugao, Ilocos Sur – Maitultuloy ti pannakaaramid ti Track and Oval babaen ti Gobierno Lokal ti Ili ti Cabugao iti panangilungalong ni Mayor Edgardo “Ediboy” S. Cobangbang, Jr. a pakabuklan ti Athletic Ground (Track and Oval) iti abagatan a paset  ti Cabugao South Central School, Brgy. Bonifacio, Cabugao, Ilocos Sur.

Segun ken ni Municipal Engineer Crescencio Marcos Formoso, maitultuloy a maaramid ti nasao a pasilidad babaen iti Magsaysay Construction. Ti usar     daytoy a pasilidad ket maisagana/naisangrat  a pagay-ayaman dagiti ubbing ken agtutubo  tapno mamulida  para iti masanguanan a pasalip ken  nangatngato a benneg ti pagbabalubalan iti Sports, segun ken ni Mr. Ronel M. Ubaldo, Cabugao DepED Sports Coordinator. # (Web In-Action)

TAKBO PARA SA TACLOBAN, NAANGAY

Cabugao, Ilocos Sur – Naangay ti pataray a napanaganan ti “Takbo Para Sa Tacloban” babaen iti panangesponsor ti Gobierno Probinsial ti Ilocos Sur idi Nobiembre 24, 2013 a nangrugi iti Cabugao Central Park (CCP)  ket tinaray dagiti Male Runners ti 10 kilometro a kawatiwatna agingga iti Salomague Elementary School, Brgy. Salomague, Cabugao, Ilocos Sur.

 

Nagpartisipar ti 186 a Male Runners idinto ta 34 ti bilang ti nakibalubal  iti 5 Kilometers Female Category manipud iti nadumaduma nga ili ken 2 a Siudad ti Probinsia.

Kalpasanna, inyawat da Vice Mayor Deogracias Jose H. Savellano  a binayabay ni Dr. Cesar Soller, DVM, Barang-ay Farm Manager, ISCC  dagiti premio dagiti nangabak.
Dagiti nangabak ket dagiti sumaganad:

Male
1st- Archie Patubo, Santa, Ilocos Sur
2nd- Reynaldo Pascua, Magsingal
3rd- Julius Torano- Candon City
4th- Ricky Gagarin – Sto.  Domingo
5th- Jay Viloria - Lidlidda

Female
1st- Myrna Caliboso - Caoayan
2nd- Rosel Sesuca- Dardarat,  Cabugao
3rd- Analiza Fetalvero- Vigan City
4th-Diane Quitoriano - Caoayan
5th-Julie Anne Alibin - Caoayan

Consolation Prize each  for the 1st 100 Finishers.

SEMINAR TI SLP, NAANGAY MET ITI BRGY. SABANG

Cabugao, Ilocos Sur – Naangay ti  Sustainable Livelihood Program Seminar dagiti 4 P’s Beneficiaries ti Barangay Sabang, Cabugao, Ilocos Sur iti Nobiembre 26, 2013 babaen iti panangiwayat ti DSWD-Region 1 ken iti Staff ti MSWDO-LGU Cabugao nga idauluan ni MSWD Officer Mrs. Lydia S. Gazmen.

Naglektiur ni Mr. Jay Estrada, pannakabagi ti DSWD Region 1 kasta met da Ms. Jessie Anne O. Tabut ken ni  Ms. Juliet Madriaga, Municipal Link ti LGU-Cabugao maipapan iti Gabay Para sa  mga Benepisyaryo ng Sustainable Livelihood Program (SLP)  at Mga Pagsasanay sa Pagbuo ng Negosyo.
Ti 4 P’s –Brgy. Sabang ket addadan iti Stage 2-3  a pakabuklan ti Social Preparations ken Training Skills ket maisagsaganada iti panagsanayda kas sagudayen ti napagnamingan a  MOA iti  DSWD ken ti LGU-Cabugao.

Segun ken ni Mr. Estrada, panggep pay  ti programa a masustener iti pannakatarabay dagiti 4 P’s Recipients tapno maan-anay ti pannakatulongda babaen kadagiti nagkakammayet nga Ahensia ken Opisina iti salinong  ti Gobierno Nasional ken Lokal kabayatan  a maileppas ti 5 a tawen a panagawatda iti Conditional Cash Grant. # (Web In-Action)

PUNDO TI VEGETABLE GROWERS, NAKASAGANA

Cabugao, Ilocos Sur – Naangay ti Emergency Meeting ti Cabugao Vegetable Growers and Traders Association idi Nobiembre 26, 2013 iti Municipal Building, Cabugao, Ilocos Sur.

Maibasar iti sertipikasion nga imparuar ti Municipal Treasury ket addaanen  ti Asosasion ti pakabuklana .5 Milion iti agdama.

Kangrunaan pay  a natratar ken napagkaykaysaan iti pannakataming ti pundo ti asosasion a nangruna kadagiti sumagmamano pay a di nakaited ti nabulodda itay napalabas a panagnanateng.

Nag-Preside ti miting ni Kagawad Armando Azcueta, Presidente,  ket dagiti sumaganad ti natratar ken napagkaykaysaan:

1.Pannakaipalubos ti ibubulod manen dagiti kameng ken aggatgatang ti nateng iti nasao a pundo babaen iti umisu a kolateral.

2.Maikkan ti Promissory Note dagiti adda pay laeng balansena ket naituding a  deadline ti panagbayad ti daan nga utang agingga iti Nobiembre 30, 2013.

3.Update ti dadduma pay a pakabuklan ti Financial Record ti Asosasion. 

Naballigi met a napagpapatangan dagiti dadduma pay a naidatag a pakaseknan dagiti kameng.
Naaramid ti Adjournment ti Meeting  iti 11:30 A.M. # (Web In-Action)

LYING-IN CLINIC, AGTULTULOY TI IPAAYNA A SERBISIO

Cabugao, Ilocos Sur – Iti pannaki-amad ti Web In-Action kadagiti Attending Nurses/Midwives itay nabiit iti nasao a paganakan, agtultuloy nga adda tamingenda a masikog ken aganak iti kada lawas ti bulan .

Innayon dagiti Midwives a maanninawan ti amin a datos maipapan iti masikog ken ti ubing iti Early Childhood Care and Development Card ket dagiti sumaganad iti proseso a maaramid ditoy a paganakan:

1.Amirisenda ti agdisnudo a mapan aganak iti lying-in no kualipikado/kabalinanna met laeng ti aganak ditoy lyin-in.

2.No maawagan ti risky-mai-refer iti Doktor ti kasasaadna.

3.No OK, aganak ditoy ket tarabayen dagiti Lying-in Personnel iti 24 oras.

4.Follow-up Check up kalpasan ti makalawas ti panagpasngay.

Innayonda pay a maipasagepsep ti kaipapanan ti “An Early Childhood Screening Tool ken Feeding Recommendations for a Healthy Child.

Itugotda ti nasao a Card kadarato a mapanda iti Rural Health Center a katinnulong ti Lying-in a mangpasayaat ti kasasaadda a kaan-anak. # (Web In-Action)

LUMAWLAWA TI NETWORK DAGITI KORIDOR

Cabugao, Ilocos Sur – Iti pannakiuman ti Web In-Action idi Nobiembre 25, 2013, imbatad ni Dr. Melvin G. Castro, DVM, Municipal Livestock Coordinator nga immadu ti transaksion a napasamak iti Cabugao Dayo idi Nobiembre 23, 2013.

Innayon ni Dr. Castro a no agtultuloy daytoy a kasasaad ti maki-dayo ket maparegget dagiti  Koridor tapno maipamaysa a magatang dagiti maipasirpat nga ayup iti kaaldawan ti Dayo.

Kabayatanna, agtultuloy latta a nagaget dagiti Koridor ken agtagikua ti ayup a mangipan kadagiti animales-da ta in-inuten a maestablisar ti nalawa a  networking dagiti Koridor ken aglako ti animales  iti pagdadayoan iti kaaldawan ti Dayo. Agtultuloy latta met a  naregget  ti panangtarabay ti Management ti Cabugao Dayo ken dagiti pannakabagi ti Municipal Livestock Office a Personnel ti Munisipio tapno mamantener iti episiente a pannakamanehar daytoy a sektor ti Agrikultura. # (Web In-Action)

FAMILY DEVELOPMENT SESSION TI BRGY. BACLIG, NAANGAY

Cabugao, Ilocos Sur – Naangay ti Family Development Session (FDS) dagiti kameng ti Pantawid Pamilyang Pilipino Program (4 P’s) ti Brgy. Baclig iti Nobiembre 25, 2013 iti Municipal Conference Building.

Parte ti pakabuklan ti programa iti agtultuloy  a pannakaisuro kadagiti 4 P’s Members partikular iti Budgeting iti masanguanan a bulan a paggastuanda  iti panagbalinda a Recipients iti nasao a programa ti Gobierno Nasional ken ti LGU-Cabugao.

Kabayatanna, inasistiran met ti Opisina ti  MSWDO-Cabugao dagiti Opisiales (51 Parent-Leaders) ti 4 P’s a napan nagseminar ti uppat nga aldaw idiay Alad Bar Resort, Cauayan, Ilocos Sur mangrugi iti Nobiembre 25, 2013. Manamnama nga adu ti maadal ken magun-od dagiti agseminar para iti pagsayaatan ti kabukbukodanda ken iti asosasionda, segun ken ni Miss Aida Cueto, pannakabagi ti MSWDO.

Daytoy a seminar ket naisangrat para kadagiti Parent-Leaders tapno maorientasionanda iti pakaseknan ti panangidauloda kadagiti kakaduada a 4 P’s Members.  # (Web In-Action)

BHW’s MEETING, NAANGAY DITOY MUNISIPIO

Cabugao, Ilocos Sur – Naangay ti Emergency Meeting dagiti kameng ti Barangay Health Workers (BHW’s) Association  ti 33 a barangay ti ili idi Nobiembre 22, 2013 iti Municipal Conference Building.

Dagiti natratar ken napagnanamingan:

1.Update ti rekord dagiti BHW’s kasta met iti pannnakabayad dagiti Monthly Dues ken Contributions-da iti asosasionda.
2.Pannaki-koordinarda kadagiti baro nga Opisiales ti Barangay a sumaruno nga agtakem.

3.Pannakaipakaammo kadakuada kadagiti baro a pammilin manipud iti DOH ken RHU-MHO.

Manamnama nga agtutuloy a sumaysayaat ti serbisio dagiti BHW’s gapu iti nasiken a pannakikammayetda kadagiti Opisiales ti Barangay ken iti Gobierno Lokal iti panangipatungpalda ti pagrebbenganda a kas pannakabagi ti Sektor-Salun-at iti Barangay, segun ken ni Mrs. Janet Sison, Public Health Nurse, RHU-MHO Cabugao a maysa kadagiti nangmiting kadakuada. # (Web In-Action)

SEEDLINGS TI MUN. NURSERY, MANAYNAYONAN

Cabugao, Ilocos Sur – Iti pannakiuman ti Web In-Action itay nabiit, imbatad ni Municipal Nursery Coordinator Robert S. Savella, AT nga insardengda ti apagapaman iti agited ti seedlings kadagiti ag-request nga umili ken grupo  malaksid ti “Love Tree” a maituding  kadagiti apagkasar ta nayonanda ti nagyan ti Municipal Nursery sakbay manen a maikasada iti panagmula ti kayo iti umay a panagtutudo a bulbulan.

Innayon ni Mr. Savella a papaaduenda ita ti agmasetas iti hybrid a papaya a maiwarasto  kadagiti umili nga agnaed iti 33 a barangay kas pangkomplementar ti LGU-Cabugao iti programa ti Nutrision ken Salun-at.

Kabayatanna, impakaammo ni MENRO Edgar S. Balangatan, AT a monmonitorenda met dagiti naited a seedlings iti barangay malaksid iti inted ti NTA-Vigan City a Giant Ipil-ipil Seedlings ken ti Barang-ay Farm, ISCC-Vigan City  nga agduduma ti klasena a seedlings kadagiti barangay.

Babaen ti pannakaipakat ti pagannurotan iti opisinana iti  pakaseknan ti pannakaipatungpal ti Environment Management Program ti LGU-Cabugao, masaludaran dagiti maimula a seedlings no ania ti survivability rate dagitoy a naited a pagsayaatan dagiti umili a rebbengna nga inda taripatuen. # (Web In-Action)

FLOOD CONTROL, NAIRINGPAS

Cabugao, Iloco Sur –Nairingpasen ti Flood Control System  ti Quezon-Alina-ay Road a mabatogan ti Cabugao River  babaen iti panangilungalong ti Gobierno Lokal ti ili a Cabugao, Ilocos Sur.

Naaramid  ti proyekto babaen iti Slope Protection Structure ken iti Gabion Wire tapno agwara ti  danum no tuparen ti ayus ket malunitan inton agangay ti iniket a barut  nga agbalin a  nasiken a sarapa ti umay a layus. Daytoy a proyekto ket impatungpal ti DPWH-1st Engineering Office, Bantay, Ilocos Sur.

Kanaig daytoy, epektibo ti naiwayat sakbayna  a re-channeling ti ayus ti karayan a makabatog ditoy a disso babaen iti makinaria ti Munisipio  tapno saan a dumupir ti ayus iti disso a  nakaaramidan ti istraktura a tiped ti layus.

Ti Flood Control System   ket naipamaysa a naaramid babaen iti panangitandudo ti LGU-Cabugao nga idauluan ni  Mayor Edgardo “Ediboy” S. Cobangbang, Jr. tapno maliklikan ti panagreggaay ti kalsada nga asideg ti karayan a matupar no dumakkel ti ayus. # (Web In-Action)

2013 DISTRICT ENGLISH OLYMPICS, NAANGAY

Cabugao, Ilocos Sur – Naangay ti 2013 District English Olympics babaen ti Cabugao DepED District a nagpartisiparan ti 26 a pageskuelaan ti Cabugao, Ilocos Sur itay nabiit. Ti nasao nga aktibidad ket addaan ti Tema: “Developing Oral Fluency Through English Activities”.

Naangay ti ababa a programa sakbay a naaramid ti Contest Proper iti Declamation, Poem Recitation, Quiz Bee and Retelling, Essay, Spelling, ken Oral Reading  Interpretation.

Kalpasan ti Welcome Talk ni Mrs. Melvi S. Sajonia, Principal II, CSCS, nangipaay ti Mensahe ni SBM Dr. Jemaima S. Tan-Yee, Committee Chair on Education a nangdakamatanna iti pateg ti English Subject a patan-ayen ti maysa nga agad-adal tapno mapatasanna dagiti maadal iti yaagpangda iti nangatngato a benneg ti pagadalan.

Nagsarita met ni Mrs. Estrellita M. Siruno, Principal II, CNCS ken OIC District Supervisor. Kalpasan dagiti maiballaet nga intermission number, naipresenta dagiti makikontes ken dagiti nagserbi a Hurado. Inted ni Miss Jennifer D. Savellano, English District Coordinator ti Orientation, Guidelines ken Criteria iti maangay a salip. Naggigiddan a naipatungpal dagiti napagkokontesan nga aktibidad.

Simmaruno a naipakaammo dagiti nangabak iti pakontes ken naited dagiti awards ken certificates kalpasanna.

Buklen dagiti Hurado da: Dr. Lynn Bueno, Dr. Ruel Sunio, Mr. Romeo Solar, Miss Naira Segui, Miss Maria Rondon, Mr. Fahd Agbulos, Mr. Dario Roy A. Siruno, Ms. Maritess  Rojas, Atty.  Bryan Jet S. Pano, Mrs. Dinia S. Azcueta, Mrs. Erlinda Guerrero ken ni  Mrs. Eufrocina N. Pante.

Nagpaay a Hurado da SBM Dr. Jemaima S. Tan-Yee, SBM Benedicto M. Savellano, SBM Josefina S. Vallejo, SBM Vicky S. Serna ken ni Ms. Jennifer D. Savellano iti Search for the Best Reading Center. # (Web In-Action)

BUKEL TI MAIS PARA ITI FFS CORN, NAITEDEN

Cabugao, Ilocos Sur – Ti panagmula ti mais ti maysa ita a direksion ti programa ti LGU-Cabugao a maipakat  iti benneg ti Agrikultura ken  mayannurot iti Agri-Pinoy Program nga ipatpatungpal ti DA-LGU Cabugao malaksid iti Ryan Corn a naited kadagiti mannalon itay nabiit.

Babaen ti programa a Farmers Field School-Corn Category a nagkammayetan ti LGU-Cabugao ken ti DA-RFO 1, San Fernando City, La Union, naited ti dua a bags (20 kilos kada bag) ti puraw a mais (open pollinated) nga imula dagiti Recipients iti Brgy. Reppa-ac, Cabugao, Ilocos Sur iti talonda. Kalpasan ti pagay nga immulada iti Learning Field-da a 5,000 metro-kuadrado a kalawanana itay Wet Season 2013, mulaanda ita ti puraw a mais a nabiit ti pannakaapitna ken pagkakitaanda agsipud ta nalaka a malako a kas saramsam iti sapasap.

Tinarabay ni Mr. Obas Bill Y. Baclig, AT-DA LGU Cabugao ti panangimula ken panangpatan-ayda kadagitoy a klase ti mais tapno agballigi ti panggep ti DA-RFO 1 ken ti LGU-Cabugao nga agpatulad kadagiti sabali pay a grupo ti mannalon a mayat a mangnayon ti matgedanda iti babaen iti panagmulada kadagitoy a cash crop ita a malas-udan ti  Main Crop 2013-2014 (Nobiembre-Mayo). Segun pay ken ni Mr. Baclig, mabalinen a maapit dagitoy a variety ti mais a pangbiitan iti unos ti 65 nga aldaw manipud iti pannakaimulana.

Dagitoy nga inisiatiba ket gubuay ti napintek a panagkammayet ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken ti DA-RFO 1 a mangipanawen kadagiti maimula a pagkakitaan dagiti mannalon iti Cabugao, Ilocos Sur. # (Web In-Action)

BASIC COOP COURSE, NAIYADAL

Cabugao, Ilocos Sur – Naangay ti dua nga aldaw (Nobiembre 19-20, 2013) a seminar-workshop  ti Basic Cooperative Course  iti panangisayangkat dagiti pannakabagi ti  Municipal Agrarian Reform Office-LGU Cabugao ken ti Provincial Agrarian Reform Office, Vigan City, Ilocos Sur.

Nagatendar ditoy dagiti kameng ti Kooperatiba ken lumugar a masakupan dagiti Agrarian Reform Communities (ARC’s) kas iti Brgy. Arnap, Aragan, Maradodon, Cuancabal, ken Lipit. Dadduma a pakabuklan ti nayadal ket iti umisu a suroten iti panangbukel ti maysa a kooperatiba ken dagiti epektibo a pamay-an iti panangmanehar/panangpaballigi ti operasionna.

Kabayatanna, naangay pay ti assessment iti pinansial a kasasaad dagiti Kooperatiba a masakupan ti DAR iti ili a Cabugao iti umuna nga aldaw ti seminar. Pinagsaludsodan dagiti pannakabagi ti DAR Provincial Office  dagiti maseknan  nga Opisiales kadagiti nadakamat a kooperatiba ket maysa ti Arnap Sunrise MPCI kadagiti natakuatan a  pagtuladan  dagiti nabatbati a kooperatiba gapu iti napintas a kasasaadna/rekordna.

Naglektiur iti naited kadakuada a Modules da Dr. Elizabeth S. Pablico, DPA, Caretaker-MARO-Cabugao,  Ms. Grace Versoza ken Maria Victoria Fines manipud iti Kapitolio Probinsial. # (Web In-Action)
 

2013 DISTRICT MATH FESTIVAL, NAANGAY

Cabugao, Ilocos Sur – Naangay  ti 2013 District Math Festival para kadagiti  napilpili nga ubbing iti 26 a pageskuelaan ti Cabugao DepED District idi Nobiembre 20, 2013 iti Cabugao South Central School, Brgy. Bonifacio, Cabugao, Ilocos Sur a nangkuyogan dagiti nagannak/Guardians kadagiti napili nga ubbing  a nangipakita ti kabaelanda babaen ti panagsasalipda kadaytoy nga asignatura.

Umuna a naangay ti ababa a programa sakbay a naaramid ti Contest Proper a pakabuklan ti Math Quiz, Damath ken Math Relay. Nangipaay iti Welcome Message ni Mrs. Melvi S. Sajonia, Principal II, CSCS ken Inspirational Message ni Mrs. Estrellita M. Siruno, Principal II ti CNCS ken OIC District Supervisor ti Cabugao DepED District.  Nadutokan dagiti Math Quiz Examiners manipud Grade 1 agingga iti Grade VI ken napusgan dagiti Damath Arbiters ken Math Relay Facilitators a buklen dagiti School Heads ken mangisursuro iti nadumaduma a pagadalan. Imbinsa ni Ms. Nora R. Quibilan, District Mathematics Coordinator ti Orientation ti pakontes.

Sakbayna, nasanay dagiti kangrunaan a napili nga ubbing iti tunggal pageskuelaan a naisangal iti MTAP, Math Quiz ken Math Challenge a nakasagatan dagiti dakkel ti kabaelanna/potensialna  nga agpangato nga ubbing  agingga iti Rehional a benneg.

Daytoy a programa ket paset ti panangpadigem ti kabaelan dagiti ubbing babaen iti panangirusat ti Departamento ti Edukasion (DepED) tapno maisaganada para iti masanguanan a pannakatennebda pay  iti daytoy a paglaingan dagiti agbasbasa.

Buklen met ditoy a benneg ti Matematika ti  DepED ti Cabugao District Matari Officers nga idauluan ni Mr. Donato Sambrana.  # (Web In-Action)

PANAGDALDALUS TI SUMRA TI SAKIT ITA

Cabugao, Ilocos Sur – Iti pannakiuman ti Web In-Action idi Nobiembre 19, 2013, imbatad ni Dr. Bernardino M. De Gracia, OIC Municipal Health Office-Cabugao nga iti isasangbay ti nalam-ek a bulan ken panawen  ket pumigsa dagiti mikrobio ti sakit ket kumapuy ti resistansia gapu iti lamiis ken dadduma pay  a mangpakapsut ti immunity.

Innayon ni Dr. De Gracia a pannangan ti balanse a taraon, regular a panagwatwat, panagdaldalus (arubayan, bagi ken idian ti stress ken negatibo a rikrikna) tapno agtultuloy a masumra ti tumaud a sakit.

Insupusop pay ti Doktor ti Medisina nga awan ti makaperpekto iti mataginayon a salun-at ngem dakdakkel ti posibilidadna nga agtalinaed ti kinasalun-at ti tao no aramiden dagiti nadakamatna a pormula ti panagpasalun-at.

Inapresiar manen ti OIC Municipal Health Officer ti nasayud a panagkakammayet dagiti sektor a mangitantandudo ti salun-at ken sanitasion nangruna iti aw-away babaen iti suporta ti LGU-Cabugao  ta napintas ti resulta dagiti Feedback a mapan iti Opisinana iti pannakataming  ti salun-at ken panangsarapa kadagiti tumaud a saan a nakaro a saksakit iti agdama. # (Web In-Action)

BEAUTIFICATION AND CLEAN DRIVE, AGTULTULOY

Cabugao, Ilocos Sur – Agtultuloy a maigannuat ti panagdaldalus babaen ti panangiyusuat dagiti pannakabagi ti Clean and Green Program ti Munisipio nangruna ita ta mapaspasungadan ti yaadani ti Paskua 2013 a panagsangpet pay dagiti Bakasionista, Balikbayan ken Turista ditoy ili a Cabugao, Ilocos Sur.

Segun ken ni MENRO Edgar S. Balangatan, AT, kaduana da Mr. Richard Pula ken ni Mr. Donnell Peralta a mangtartarawidwid kadagiti LGU Personnel nga agtitinnulong nga agdalus kadagiti pampubliko a disso kas iti Parke, Plaza, Government Center ken ti National/Provincial  Highway tapno agtultuloy a napintas ti mabuybuya iti man aldaw wenno rabii.
Kabayatanna, maiplasplastaren ken maar-aramiden dagiti mayannatup a dekorasion para iti pannakaselebrar ti Paskua 2013 iti biang ti Munisipio kadagiti estratehiko a pakaipananda kangrunaan iti ikub ti Municipal Garden iti  sango ti Munisipio (Presidencia).

Kanaig daytoy, kinuna ni Mr. Balangatan nga uray naisapribadon ti pannakaidalimanek ti basura ket agtultuloy latta nga agaksionda babaen iti monitoring ken evaluation tapno mapasayaat pay ti panagkammayetda iti LGA Technology, Inc.  a nangkontrata ti pannakaidalimanek ti basura ket pabor latta met iti pagsayaatan dagiti umili.

Manamnama nga  iti napintas a kooperasion dagiti pannakabagi ti LGU-Cabugao a mangituyang itoy a trabaho ket naballigi latta ti pagbanagan dagiti trabaho ken programa a mailunsad iti salinong ti Gobierno Lokal ti ili a Cabugao. # (Web In-Action)

MULTI-CROP THRESHER, NAGUN-OD TI BUNGRO FA

Cabugao, Ilocos Sur – Nagun-od ti Bungro Farmers Association nga idauluan ni Mr. Edy L. Sevilleja Presidente, ti Multi-crop Thresher with Yanmar Generator babaen iti 85-15 % Counterparting Scheme iti nagbaetan ti FA ken ti DA-RFO 1, San Fernando City, La Union. Tinarabay ida ni Mr. Obas Bill Y. Baclig, AT, pannakabagi ti DA-LGU Cabugao dagiti kameng ti Bungro FA a napan nangala ti nasao a Farm Machinery  idiay Ilocos Norte DA  Provincial Center, Batac City, Ilocos Norte idi Nobiembre 19, 2013.

Segun ken ni Mr. Sevilleja, nausar ti natgedan ti Rice Thresher nga inted ti LGU-Cabugao iti asosasion a pinag-counterpart-da tapno magun-odda daytoy a makinaria.

Innayon ni Mr. Sevilleja a babaen ti anus ken regtada a nangisapul iti rice thresher-da ket in-inut met a nakaurnongda ti nayon ti pundo-da a nausarda tapno maipakita a naprobitsarda ti naited kadakuada a ramit ken pagkakitaan.

Mismo a ni Mayor Edgardo “Ediboy” S. Cobangbang, Jr. ti nangiyallawat kadagiti Opisiales ti Bungro FA iti panagtagikua kadagiti ramit  iti  malem ti Nobiembre 19, 2013 kadagiti naidagas iti Munisipio a pakabuklan ti ramit-agrikultura a nagun-od ti asosasion.

Impeksa pay ti FA President iti nasged a panagyamanda agraman kadagiti kakaduana ti asosasion iti LGU-Cabugao a nangguyugoy kadakuada nga agagawa ken mangmantener kadagiti ramit-agrikultura a naited kadakuada tapno napapaut nga usarenda ken mangipaay iti pagimbaganda a sapasap. # (Web In-Action)