Cabugao, Ilocos Sur – Iti pannaki-amad ti Web In-Action, impakaammo ni Mr. Edgar S. Balangatan a madagdagus a naidalimanek dagiti nausar iti kalepleppas a selebrasion ti panagpiesta ti ili: Abril 24 -Abril 26, 2019.
Insupusop ni Mr. Balangatan a madagdagus ti clearing ken pannakadalus ti agsumbangir a paset ti Kalsada Nasional manipud Brgy. Sagayaden agingga iti Brgy. Pug-os agraman dagiti Kalsada (Salomague Bound ken Cuancabal to Nagsincaoan Road) kasta metten kadagiti lugar-pampubliko iti Poblasion (Parke, Plaza, Processional Route ken NISTC Public Market) tapno agtultuloy a nadalus ken napintas ti buya iti aglawlaw ti ili.
Ti madagdagus nga aksion dagiti maseknan nga LGU Personnel para iti “Clean and Clearing Activities” apaman a malpas dagiti dadakkel nga aktibidad ket paset iti panangipatungpalda iti agtultuloy a direktiba ni Mayor Josh Edward S. Cobangbang iti pannakamantener ti kinadalus ti aglawlaw iti Munisipalidad ken sanitasion para iti umili ken agbisbisita latta a Balikbayan iti ili ti Cabugao. # (Web Situational Report)
Monday, April 29, 2019
CABUGAO MOUNTAIN BIKE RACE 2019, NAANGAY MANEN
Cabugao, Ilocos Sur – Kas maysa a naisangayan a pakontes a mangparagsak manen iti maikatlo nga aldaw (Abril 26, 2019) iti panagpiesta ti ili a Cabugao, Ilocos Sur, naaramid ti lumba ti bisikleta (mountain bike) wenno maaw-awagan iti “Laspagan 2019” a nakisalipan iti 145 a Bikers ken naipakaammo kadagiti siklista dagiti pagannurotan ken kualipikasion dagiti makisalip sakbayna.
Nangrugi ti lumba iti Cabugao Central Park (CCP), Barangay Bonifacio, Cabugao, Ilocos Sur ket dinaliasatda ti
rota iti kalsada ti 16 a barangays ti ili.
Dagiti Premio dagiti nangabak ket dagiti sumaganad: Champion – 3,000 ken Medalia; 2nd Place – 2,000 ken Medalia; 3rd Place – 1,000 ken Medalia; 4rth Place – 750; 5th Place – 500 ken Medalia; 6th Place to 10th, Medalia.
Ti “Laspagan 2019, Cabugao Mountain Bike Race” ket inisiatiba ti LGU-Cabugao nga idauluan ni Mayor Josh Edward S. Cobangbang a kapartnerna ti Cabugao Cycling Club (CCC) ita a Tawen 2019 a panagpiesta ti ili. # (Web In-Action)
