Cabugao, Ilocos Sur - Nairubuat ti Operation Coastal Clean-up a programa ni Congressman Ryan Luis V. Singson, First District, Ilocos Sur iti Pug-os Beach, Brgy. Pug-os, Cabugao, Ilocos Sur ita a Mayo 18, 2012 ket indauluan ni Diputado Ryan iti partisipasion ti nadumaduma a sectors: Barangay Officials, Sangguniang Bayan, bumarangay, agad-adal nga ub-ubbing ken pannakabagi ti BFAR Regional Office 1 ken taga-Media.
Kadua ni Diputado Ryan da Mr. Dario P. Tacad, Regional Fisherfolk Director, BFAR-RFO 1 a nangibagi ken ni BFAR Regional Director Nestor Domenden ken Mr. Belmor Bugaoan, Provincial Fishery Officer, Ilocos Sur a nangilunsad ti maikadua a Coastal Clean-up ditoy 1st District, Ilocos Sur para iti “Farmers’ and Fisherfolk’s Month” ti bulan ti Mayo.
Inimatangan ti Diputado ti naregta a panagdalus dagiti nagpartisipar ken ti pannakairubuat ti maimula a mangrove seedlings nga inallawat ti bumarangay ti Pug-os kasta met iti Brgy. Salapasap babaen kada Kapitan Ronel Zamora ken Kapitan Arnold Yangat.
Kalpasan ti panangyawat ni Diputado Ryan kadagiti mangrove seedlings, nakigrupo ti Congressman para iti pakalaglagipan a ladawan kadagiti opisiales ti Gobierno Lokal ti Cabugao ken dadduma pay a nakiragup itoy nga aktibidad.
Nakikaysa met da SB Member Vicky S. Serna, SB Member Josefina S. Vallejo, SB Member Benedict Savellano, ABC President, Brgy. Captain Teddy U. Soller, Mr. DJ Savellano, MENRO Edgar S. Balangatan ken Federated Farmers President Elmer Bromeo.
Daytoy a napintas a gannuat ni Diputado Ryan ket mayataday iti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a pannakadalus ken pannakatagiben ti kabaybayan a masakupan ti Munisipalidad tapno mamantener ti kinadalus ken maprotektaran dagiti rekursos- naturales a mangpasayaat ti kabibiag dagiti mangngalap. # (Web In-Action)
No comments:
Post a Comment