PALARONG PAMASKO ’10, ESPONSOR TI LGU, DEP Ed, KEN PASDEK-NEGOSIO

Cabugao, Ilocos Sur (Disiembre 30, 2010)-  Inikkan ti Gobierno Munisipal, Dep Ed Cabugao District  ken nadumaduma a pasdek-negosio ti pakakumikoman  dagiti agad-adal iti pannakaasa ti kabaelanda iti sports tapno agbalin a produktiboda  iti atiddog a  bakasionda iti panawen ti Paskua.
    

Dagiti napagsasalipan nga ay-ayam ket  iti  basketball, table tennis, badminton ken chess.
    

Sangapulo a teams  ti nagsasalip ket dagitoy ti eskuela-elementaria iti  Cabugao North Central School,   Cabugao  South Central School, Salapasap, Bungro, Salomague, Dardarat, Reppa-ac, Pug-os, Cuantacla, SADACNAM (Sabang, Daclapan, Namruangan), CMCS (Cael-layan, Maradodon, Catucdaan, Sisim), Turod, Pila ken Sagayaden.
    

Ni Mayor Ediboy S. Cobangbang, Jr. ti nangaramid  ti ceremonial toss iti pormal a panangrugi ti 12 nga aldaw (Disiembre 19-31) a pay-ayam a nabansagan iti “Palarong Pamasko 2010” ken naangay iti Cabugao Cultural and Sports Complex.
    

Ti SADACNAM nga inesponsoran ti Cabugao Shell Station ti nangyalat  ti kampeonato iti torneo, 1stRunner Up ti Turod Elementary School nga inesponsoran ti LG Drugstore , 2nd Runner Up ti  Reppa-ac-Pug-os nga  inesponsoran ti Cindy’s Bakeshop   ken 3rd Runner-Up ti Salomague-Dardarat nga inesponsoran ti Namnama Trading.
    

Immawat dagiti uppat a kangrunaan a nangabak iti premio a cash a nakategoria   manipud 9,000 agpababa iti 2,000 ket  naangay ti awarding of prizes idi Rizal Day, Disiembre 30, 2010.
    

Naikkan met ti libre  a uniporme, pagmerienda ken pagplete dagiti coaches ken nagay-ayam.
    

Dagiti sumaganad a pasdek-negosio ti nangesponsor pay  ti pay-ayam: Kambal Lumber and Hardware, Vicky’s  Pawnshop, Namnama Trading, Cindy’s Bakeshop, Maxx Ionized Alkaline Water, Bonicab Builders, Cabugo Shell Station,  Marian’s Lechon Manok, LG Drugstore ken 5 Brothers  Marketing.
    

Paset ti programa ti Gobierno Munisipal iti panangidaulo ni Mayor Ediboy ti pannakigamulo dagiti patron ti pay-ayam ken  pannakaikintal ti pateg ti  isports iti panunot dagiti agtutubo tapno  maasada  ken maparang-ay ti kaammuanda  ken teknik ti naballigi nga umaayam a mangted pay iti nayon a panagtalek ti bagi ken kabaelanda  a makikompetensia iti aniaman a tay-ak ti salip.#  ( Source,  Anaraa-ar, Nov.- Dec. 2010)

PASKUA 2010, PAMILIA-LGU KEN DAGITI UMILI, NAKIPAGSELEBRAR

Cabugao, Ilocos Sur (Disiembre 23, 2010) – Naipamatmat  ti kaipapanan ti Paskua kas iti ayat, nabuslon nga isem ken sagana, panangpabaro ken panangpatibker ti linnangen, sagsagut, ken nangayed a panagrambak.

Naaramid ti “Christmas Program”  ti Gobierno Munisipal ti ili a Cabugao, Ilocos Sur  idi Disiembre 23, 2010 a nagpartisiparan dagiti amin nga empleado ken agob-obra iti salinong ti LGU-Cabugao,  ti sibubukel a kameng ti Sangguniang Bayan, opisiales ti nadumaduma nga opisina ken Ahensia ti Gobierno, Barangay Officials ti 33 a barangays, kamkameng ti NGO’s,  sangaili manipud iti pribado a sektor ken umili ti Cabugao, Ilocos Sur.

Mismo nga iti sango ti Presidencia  (Municipal Hall)  ti nakaaramidan ti programa ti Paskua ken napattopattok ti nagplastaran dagiti agbuybuya kabayatan a sanguenda dagiti nabuslon a sagana.
 Tunggal departamento ket adda naisaganada a pabuya a pangragsakda iti Paskua. Panagkanta  wenno panagsala iti kaaduan a naipabuya.

Naaramid pay ti parlor games ket tunggal malpas a may-ayam ket maited dagiti sagut ken premio dagiti nakaigasat.

Kalpasan ti programa ken panangrabii, nagibunong  da Mayor Ediboy ken Ma’am Jerlie a kapisi ti pusona  iti sagut: napintas a bag a napunno ti kompleto a pag-“noche buenaan!” kadagiti nagatendar. # (Source, Anara-ar, Nov.-Dec. 2010)

DEMO-FARM TI HYBRID A MAIS, RUGIAN TI DA-LGU

Cabugao, Ilocos Sur  (Disiembre 25, 2010) 

KANAYNAYON ti panangparegta ti Gobierno Munisipal nga idauluan ni Mayor Ediboy S. Cobangbang, Jr. ti panagtakuat ti DA-LGU  kadagiti naipanawen a  maimula a mangnayon ti masapulan dagiti mannalon tapno maprobitsarda dagiti suksukayenda a daga.

Nangiyusuat ti DA-LGU nga idauluan ni Mrs. Zenaida S. Andrada, Municipal Agriculturist ti ili a Cabugao  iti proyekto a panagmula ti hybrid a mais ket naikeddeng  ti pangrugian  a pagmulaan iti Sitio Balungabing, Barangay Turod-Patac, Cabugao, Ilocos Sur.

Aglawa  iti 1,280 metro-kuadrado ti demo-farm ket iti guduana, 640 sq. meters ti pakaimulaan ti Pioneer Hybrid Yellow Corn a manamnama a pakaapitan ti 8-10 Tonelada kada ektaria a pagbasaran   idinto ta iti sabali a guduana  ket maimula ti kadawyan a klase ti mais ken gagangay a wagas ti panagmula ti mais ti mausar.

Daytoy a panagmula ti mais ket maisamira ti panagbasa (Farmers’ Field School)  dagiti mangipatungpal  a mannalon iti pakabuklan ti teknolohia kasta met nga adda pasetna nga IPM (Integrated Pest Management)  ken maipakapet ti maadal  iti tunggal  addang a suroten. Ti kurikulum a maited  ket naggapu iti Agricultural Training Institute (ATI) babaen iti panagiyadal da Mr. Nereo T. Daproza ken Mrs. Dionicia Seatriz, agpada a  Municipal Technologist ti DA-LGU.

Iti kadagupan ti 45 a nagenrol, 35 ti nagtultuloy ken manamnama a  makaturpos iti uppat a bulan (16 a lawas) a panagbasa. Lima nga oras ti maysa a sesion ti kada lawas.

Naikeddeng nga iti  Abril 8, 2011 ti pannakaapitna. 

Nangrugi met  ti panagadal idi Disiembre 25, 2010 ken  aggibus iti Abril 15, 2011 a pagturposan  dagiti nagadal a mannalon.

Agtinnulong dagiti pannakabagi ti DA-Probinsial ken DA-ATI a mangmonitor ti nasao a demo-farm ket ibaklay met ti Gobierno Munisipal ti teknikal ken pinansial a kasapulan ti proyekto. #  (Source, Anara-ar,  Nov.-Dec. 2010)

PANAGPIESTA TI BRGY. BACLIG, MAYOR EDIBOY KEN MA’AM JERLIE, NANGORONADA

Cabugao, Ilocos Sur (Disiembre  17, 2010) – Innem (6) nga aldaw a rinambakan ti Barangay Baclig ti panagpiestada manipud Disiembre 12-17, 2010. Naitampok kadagitoy nga aldaw dagiti aktibidadesda a kas iti basketball tournament, Miss Gay ( Dec. 15), Barangay Night (Dec. 16) ken SK Night (Dec.17).

Ti pannakakorona ti Mr. & Ms. Day Care 2010 ti naipangruna a paset ti panagrambak. Da Arjay Tapuro, Ari, ken Danielle Monicque Sevilla, Reyna dagiti napagasatan a nangrienda ti imatang ti tao kadayta a rabii.

Ni Mayor Ediboy ken ti kapisi ti pusona, Ma’am Jerlie Seguban-Cobangbang ti nangisaad ti korona da Arjay ken Reyna Danielle Monicque. Kimmablaaw ken dinayaw ni Mayor Ediboy ti natimpuyog, naragsak ken nabunga a panagpiesta ti barangay. Innayonna a napintas a pagulidanan  daytoy a kinaurnos nga impakita dagiti Bacligeneans ti ili ti Cabugao.

Kagiddan itoy, pinagsapata ni Mayor Ediboy dagiti naisaad a Barangay Tanod, miembros ti Lupong Tagapamayapa, ken Baclig Senior Citizens ken Saranay Officers. Iti maudi nga aldaw  ti piestada, naiwayat  ti Feeding Program ken Operation Timbang kadagiti agtawen ti 6 nga  agpababa nga ubbing.

Ti naballigi a panagrambakda ket indauluan ni Punong Barangay Ely S. Savella ket impeksa met ti Kapitan ti nalaus a panagyamanna kadagiti amin a timmaripnong iti panagpiestada. # (Source, Anara-ar Magazine, Nov. – Dec. 2010)

IPM-Kasakalikasan joint programs with LGU launched

The Integrated Pest Management-Kasakalikasan,  a program from the national government, recently established programs complementing with the Local Government Unit’s programs on agriculture.

Most noted program is the Farmer’s Field School on Corn Production held in Sitio Balungabing, Turod Patac which was launched last December 25, 2010. Thirty five farmer participants successfully completed the curriculum introduced by the Agricultural Training Institute primarily on Adragogy. It is the aim of this project to equip farmers from the said barangay with innovative technologies and know-how specifically on corn production.

Technology Demonstration projects are also in cooperation with IPM-Kasakalikasan like the Hybrid and Inbred Production of Rice established in Barangays Cuancabal, Pila and Pug-os in 2010 and in Barangays Namruangan and Bungro in 2011. Every demonstration site has five hectare clusters funded by the Department of Agriculture Regional Office while 10 one-hectare sites were funded by the LGU.

The IPM-Kasakalikasan program instills in the farmers the usage of organic pesticides although it affirms the utilization of chemicals only as a last resort.

ELEKSION TI ABC KEN SK PARA ITI 2010-2013, NAARAMID DITOY CABUGAO

Cabugao, Ilocos Sur – Iti nagsina a sesion ti Association of Barangay Captains (ABC) ken Sangguniang Kabataan Federation (SK) ket naaramid ti eleksion ti opisiales ti pederasionda.

Dagiti nabutosan nga agtakem para iti 2010-2013:

ABC:  Presidente , Thaddeus Soller (Rizal); Bise Presidente, Edgardo Cobangbang, Sr. (Sabang); Auditor, Modesto Ronque (Aragan); ken walo (8) a Board of Directors:  Danny Garcia, Dardarat; Mario Peralta, Nagsantaan; Virgilio Piros, Sagayaden; Inocencio Sadac, Turod; Charlie Siruno, Cacadiran; James Sera, Marga-ay; Edgardo Sonido, Turod-Patac; ken Valentin Tuyor, Jr., Bonifacio.

Iti sabali a bangir, naelektaran met dagiti opisiales ti pederasion ti SK ket dagiti sumaganad ti nabutosan: Presidente, Benazir Sarmiento, (Rizal); Bise Presidente, Arvin Jay Manauis (Bonifacio); Sekretario, Arjay Socias (Baclig); Tesorero, Princess Monique Feria (Turod); Auditor, Dyna Lae-Anne Sapon (Daclapan); Press Relation Officer, Jecchonias Alejandro (Sagayaden);  Sgt. At Arms, Janvier Baclig (Salomague).

Da Brgy. Captain Thaddeus Soller ken SK Federation President Benazir Sarmiento ket makipasetda iti sesion kas kameng ti Sangguniang Bayan ti ili.

Naaramid ti panagsapata dagitoy nga opisiales agraman dagiti babaenda  idi Disiembre 3 ken 7, 2010 babaen ti panamagsapata kadakuada  ni Mayor Ediboy S. Cobangbang, Jr.   # (Source, Anara-ar, Nov.-Dec. 2010)

MANGROVE PROJECT OF OISCA AT BRGY. DARDARAT, CABUGAO

Cabugao, Ilocos Sur (December 7, 2010)  – The Overseas of International Service Cultural Academy  or OISCA (a Japanese institution)  established their linkage at Barangay Dardarat through then Brgy. Captain Alberto Solis in 1998   to put up a mangrove project at the shorelines of said barangay and neighboring  Sabang and Salapasap. 

The OISCAN's during the mangrove planting at Brgy. Dardarat, Cabugao, Ilocos Sur

 These were  materialized through the cooperation and efforts  of barangay officials and residents as well. On December 5-6, 2010, the Japanese   visited  their mangrove project in Barangay Dardarat, Cabugao, Ilocos Sur. The Japanese Professors  paid courtesy to Mayor Edgardo “Ediboy” S. Cobangbang, Jr. and informed the latter about their frequent visits to monitor and   to  add  their mangrove plants  in these barangays.

Mayor Ediboy warmly  welcomed them.  The Mayor  has been  also  appreciated   their endeavor because it  is very vital in maintaining a balance marine environment in the area.

Mayor Ediboy with the OISCAN's during their visits

According to Brgy. Captain Danny Garcia of Barangay Dardarat, he supports  the mangrove project.  He commended also the assistance extended by the  LGU-Cabugao  and the OISCAN’s.  

On the other hand, the  Japanese institution also  donated  a Day Care Center building in the barangay as part of their cultural programs.

Finally,   according to an  Environmentalist  the  mangrove plant is found effective to regulate soil erosion and siltation, effective sea waves breaker, sanctuary of birds, rendezvous of marine animals and fish and other marine lifes’ shelter that contribute to  a balance marine ecosystem. # (Other source,  Anara-ar Nov.-Dec. 2010)

Mr. Ronie Solar, Day Care Teacher poses infront of the OISCA Day Care Center Building at Barangay Dardarat

7,000 A BILANG TI BOY SCOUTS, NAKIPASET ITI BSP REGIONAL JAMBOREE

Cabugao, Ilocos Sur (Disiembre 6, 2010) -  AGANAY  a  7,000 a Boy Scouts, Senior Scouts ken Scout Masters manipud iti Rehion 1, 2, 3 ken Cordillera Administrative Region (CAR)  ti dimmar-ay iti 4th Joint Ilocos Region and North Eastern Luzon Regional Jamboree manipud Disiembre 1-5, 2010. Naangay ti nasao nga scouting event iti Bgrys. Daclapan ken Namruangan, Cabugao, Ilocos Sur.
     

Dimmar-ay dagiti BSP Councils manipud iti Probinsia ti  Abra, Batanes, Cagayan, Kalinga, Apayao, Isabela, Ifugao, Ilocos Norte-Laoag City, Ilocos Sur, La Union, Nueva Vizcaya, Mountain Province, Benguet, Quirino, Tuguegarao City, Eastern Pangasinan-Dagupan City, North Eastern Pangasinan-San Carlos City, Baguio City, Santiago City, Cauayan City ken ti guest council ti Nueva Ecija.
    

Da BSP Ilocos Sur Chairman ken Ilocos Sur Vice Governor Deogracias Victor “DV” Savellano ken Cabugao Mayor Edgardo “Ediboy” S. Cobangbang, Jr. ti nanglukat iti Regional Jamboree babaen ti panangingatoda iti official logo bayat ti opening program.
    

Iti panagsarita ni Hon.  Jose Rizal C. Pangilinan, Secretary General iti Boy Scouts of the Philippines (BSP), kinunana a maysa daytoy a naisangsangayan a gapuanan ti BSP  iti Ilocos Region ken North Eastern Luzon ta agbalin daytoy a nakallalagip ken nabunga a padas dagiti dimmar-ay.
    

“Masapul a makigayyemtayo kadagiti padatayo nga scouts ken agsursurotayo bayat ti jamboree. Babaen itoy, makapagtitinnulongtayo a mangpasayaat iti masakbayan” kinuna ni Pangilinan.
    “Scouts Build Tomorrow Today” iti tema ti nadakamat nga aktibidad. # (Reposted, Tawidnews)

PROYEKTO NI CONG. RONALD V. SINGSON ITI CABUGAO, NAINAGURASIONAN

Cabugao, Ilocos Sur (Nobiembre 26, 2010) -  Naluktan ken nainogararan ti tallo a kadisso  a  proyekto a naggapu iti Congressional Fund ni Congressman Ronald V. Singson kas iti Multipurpose Building ti Barangay Sisim a nakaigastuan ti P300,000.00, ti  Drainage System ti Barangay Daclapan a napunduan ti  P540,000.00  ken lima a Farm-to-market roads a masarakan  iti Brgys. Salapasap, Daclapan, Arnap, Turod-Patac ken Sisim a napunduan ti sag-P 1 Milion  babaen ti panangbendision ni Rev. Fr. Juan Joyful Taqueban  iti panangimatang dagiti Barangay Officials ken mannalon kadagita a nadakamat a barangay.
    

Naaramid pay iti cutting of ribbon iti nadakamat nga inaugural blessings babaen ti panagtinnulong da Vigan City Vice Mayor Ryan Luis V. Singson, a nangirepresentar ken ni Congressman Ronald V. Singson , ken ni  Mayor Edgardo “Ediboy” S. Cobangbang, Jr. Adda met iti nasao nga okasion da Ilocos Sur SK Federated President DJ Savellano ken ni Vice Mayor Danny Q. Gazmen.
    

Impeksa dagiti opisiales ti barangay ken mannalon ti panagyamanda iti naited a pagimbagan ti komunidadda. Naaramid  ti pangngaldaw iti pagtaengan ni Brgy. Captain Ruben Siruno iti Barangay Sisim kalpasanna. # (Printed, Anara-ar Nov.-Dec. 2010)

MAYOR EDIBOY, NAAWIS A NAGATENDAR TI ANIBERSARIO TI BALAY TARIPATO

Cabugao, Ilocos Sur (Nobiembre 25, 2010) –     Naawis ni  Mayor Ediboy S. Cobangbang, Jr. a nagatendar  iti pannakaselebrar ti umuna nga anibersario ti Balay Taripato Annex iti ili idi Nobiembre 24, 2010.
    

Impeksa ni Mayor Ediboy ti panangbigbigna ti pateg ti kakastoy a programa ti Gobierno a pannakaipamaysa ti pakaseknan dagiti nataengan tapno maiparikna ti ayat ken dungngo a kaikarian da lolo ken lola a saan koma  a mabaybay-an ti kasasaadda  tapno mananamda  pay ti sam-it ti biag.
    

Innayon ni Mayor Ediboy a maibilang dagiti senior citizen a kangrunaan a maasikaso  ti pakaseknan ken pagsayaatanda manipud nagtugaw a mangidaulo iti ili. Ingunamgunamna ti pannakitinnulong met dagiti umili a makidanggay  kadaytoy a naindaklan a gannuat para kadagiti kumapsuten a nataengan.
   

Nupay kasta, imbatad ni Provincial Social Welfare and Development Officer Ferdinand “Joy”  R. Concepcion nga agtultuloy nga agawat ti Balay Taripato kadagiti nataengan nga awan ti pagtaenganna, mabaybay-an ken manamnama a mangasikaso kenkuana.
     

Maited  ti  kasapulan dagiti residente a  nataengan nupay inamin ti PSDWO nga saan  nga umdas  ti  bilang dagiti  Caregiver ken Nurses nga agasikaso iti unos ti 24 nga oras. Nupay kasta, idawdawat met ti DSWD Officer kadagiti agas-asikaso  iti Balay Taripato nga ipanda koma ti amin a kabaelanda nga agserbi kadagiti residente a nataengan.
   

Innayon pay ti PSWDO a sakbay a maiserrek ti nataengan iti Balay Taripato, maiyasideg pay nga umuna iti opisina ti Municipal Social Welfare Development Office tapno maamiris no kaikarianna ti maikkan ti pannakaasikaso babaen itoy a programa ti Gobierno Probinsial.
    

Iti agdama, adda duapulo a residente iti  Balay Taripato nga as-asikasuen ti sangapulo ket dua (12) a caregivers ken nurses. # (Reprinted, Tawidnews 2010)

TARAY BARANG-AY ITI KASANGAY NI VICE GOV DV, NAKIPASET NI MAYOR EDIBOY

Cabugao, Ilocos Sur (Nobiembre 25, 2010) –Paset ti pannakaipromot ti Demonstration Farm ti Gobierno Probinsial ti Brgy. Labnig, San Juan, Ilocos Sur kas maysa nga eco-tourism, inorganisar ti Development of Vigorous Body Thru Sports (DVBS) ti Taray Barang-ay a mangpangayed ti selebrasion ti panagkasangay ni Vice Governor DV Savellano.

Mismo a nakiraman  da Vice Gov. DV Savellano ken Mayor Ediboy S. Cobangbang, Jr. iti 12 kilometros   a  kawatiwat  ti  dinaliasatda  a panangtarabayda kadagiti   189 a nagrehistro a marathoners a nakisalip.  Naimbitaran dagiti empleado  ti Municipal Hall ti Cabugao a nakipartisipar  babaen iti panangidaulo ni Mayor Ediboy.

Nangrugi ti  grupo dagiti  nagtaray manipud iti Demo-Farm ti Barangay Labnig a nagturong iti  poblasion ti ili a San Juan, Ilocos Sur sada nagrikus iti poblasion ti ili ti Cabugao ken nagtungpalda iti disso ti Demo-Farm. Makapnek dagiti naited a gunggona dagiti nangabak.

Ti Barang-ay ket agpapaay a demo-farm campus ti Ilocos Sur Community College, Vigan City a no  sadino a ditoy ket nairubuat ti Ladderized Agriculture Course ken pagpatanoran kadagiti nangato ti pulina a dinguen ken nakalidad a  mulmula a mangbagnos  iti pannakaidur-as ti Agrikultura  babaen iti programa ti Gobierno Probinsial nga idadauluan da Governor Luis “Chavit” Singson ken Vice Governor DV Savellano. # (Source, Anara-ar, Nov.-Dec. 2010) 

BILANG TI 5,000 A MANNALON, NAIKKAN TI LIBRE NGA ABUNO

Cabugao, Ilocos Sur – Aganay a P2.5 milion ti pategna nga Ammonium Phosphate ti naited, saggaysa a sako ti tunggal mannalon babaen ti Municipal Share ti pundo ti RA 7171 idi Nobiembre 8, 2010 sadiay Cabugao Cultural and Sports Complex, Brgy. Rizal, Cabugao, Ilocos Sur.

Iti simple a seremonia, naited ti libre a ganagan iti 5,000 a bilang ti mannalon babaen ti panagibunong dagiti pannakabagi ti DA-LGU iti imatang ti Ama ti Probinsia, Gobernador Luis “Chavit” Singson a kaduana da Vice Governor Deogracias Victor Savellano ken Mayor Edgardo “Ediboy” S. Cobangbang, Jr.

Imbatad ni Mayor Ediboy a dagiti mannalon ti nakaigapuan ti pannakapaadda daytoy a pundo ti RA 7171 ket isuda ti umuna a mangsagrap ngem dagiti laeng hushusto nga agtaltalon ti makaawat kas ipasingked ti Farmers’ ID System a programa ti DA-LGU ken ti Gobierno Lokal a pannaka-masterlist dagiti mannalon. Ti Farmers’ ID nga ikutda ket ipakitada tapno mabenepisiaranda iti daytoy a proyekto ken iti amin a subsidies nga itden pay ti Gobierno Lokal ken dagiti maseknan nga Ahensia a tumultulong kadagiti mannalon.

Ita pay, innayon ni Mayor Ediboy a naaprobaranen babaen ti Sangguniang Bayan ti P7.5 milion a pundo para kadagiti mannalon itoy a Dry Season Crop 2010-2011 (Nobiembre-Mayo) tapno mayagpang ni mannalon ti kalidad ti produktona. Naituding daytoy a pundo a maaramat tunggal cropping season tapno saan a marigatan dagiti mannalon nga agbirok ti puonan ngem maipannuray ti umuna nga implementasionna ken kadagiti sumagsaganad a panagtatalon kadagiti rehistrado a gunglo dagiti mannalon.

Dinayaw ni Gov. Chavit Singson ti impamatmat ti LGU Cabugao a pannakaurnos ti mannalon ti ili ket mamati ti Gobernador nga agbanag a naballigi daytoy a gannuat gapu ta marikna dagiti mannalon ti pannakatulong ken pannakaipangrunada.

Binigbig met ni Vice Gov. DV Savellano daytoy a gannuat ti Gobierno Lokal ti Cabugao a pannakaipamaysa ti pakaseknan dagiti mannalon ket dinakamatna ti sangkamaysa a direksion a taluntonen ti Gobierno Lokal ken Gobierno Probinsial no proyekto a para iti umili ti mapagsasaritaan.# ( Insurat ni Joed Sajonia/Anara-ar)

ELEKSION TI BARANGAY TI OKTUBRE 25, 2010: NABALLIGI ITI ILI A CABUGAO

Cabugao, Ilocos Sur – Naisayangkat ti Nailian nga eleksion ti opisiales ti Barangay idi Oktubre 25, 2010 a no  sadino a  ditoy ket nagpartisiparan dagiti nagpaidasig a bumarangay ken dati nga opisiales ti 33 a barangays ti ili.

Nagturong dagiti botantes kadagiti naituding a polling places iti dayta nga aldaw. Naiyeskediul ti panagbutos manipud 7:00 a.m. ket nagpatingga iti 3:00 p.m. Tunggal pagbutosan ket tinarawidwidan ti Board of Election Inspectors a buklen ti public school teachers. Awan ti naireport a madi a  napagteng kadagiti nagbutosan. Ti panagbilangan ti butos ket napasamak kalpasan ti panagserra ti panagbutos.

Dagiti nangabak: Alina-ay, Melanio Santella; Aragan, Modesto Ronque; Arnap, Teodoro Tabula; Baclig, Ely Savella; Bato, Santos Aquino; Bonifacio, Valentin Tuyor, Jr.; Bungro, Fermin Sarinas; Cacadiran, Alex Siruno; Cael-layan, Margie Zabala; Carusipan, Oscar Pula; Catucdaan, Dominador Seguritan; Cuancabal, Rogelio Siruno; Cuantacla, Charlie Siruno, ; Daclapan, Wilfredo Terrago; Dardarat, Danny Garcia;  Lipit, Bernardo Salom; Maradodon, Geogie Benavidez; Marga-ay, James Sera; Nagsantaan, Mario Peralta; Nagsincaoan, Philip Bringas; Namruangan, Robertson Gorospe; Pila, Romeo Galamgam; Pug-os, Arnold Yangat; Quezon, Dodgie Santella; Reppa-ac, June Basquez; Rizal, Thaddeus Soller; Sabang, Edgardo Cobangbang, Sr.; Sagayaden, Virgilio Piros; Salapasap, Ronel Zamora; Salomague, Eligio Serrano; Sisim, Ruben Siruno; Turod, Inocencio Sadac; Turod-Patac, Edgardo Sonido. # (Source, Anara-ar, Sept.-Oct. 2010)

TUBO TI MAINUM A DANUM, IMPAAY NI CONG. RONALD ITI BRGY. ARNAP

Cabugao, Ilocos Sur (Setiembre 23, 2010) – Pormal  nga inyawat ni Mayor Ediboy S. Cobangbang, Jr.  kadagiti bumarangay iti Barangay  Arnap iti panangidaulo ni Barangay Captain Teodoro Tabula  ti 1,800 metros ti kaatiddogna a High Density Polyetylene Tube (HDPE Tube), 30 rolls x 60 cm.

 

Ti High Density Polyetylene Tube (HDPE Tube) nga inpaay ni Cong. Ronald V. Singson iti Brgy. Arnap, Cabugao, Ilocos Sur.

Indatag  ni Mayor Ediboy ti resolusion ti Barangay Arnap ken ni  Congressman Ronald V. Singson sadiay Hongkong idi  Setiembre 5, 2010 ta kalikagum dagiti bumarangay ti  pannakaadda ti water system-da manipud iti Cabugao Waterworks System.
    

Imbatad ni Waterwoks Superintendent Nestor Somera a  babaen ti pannakausar ti tubo a hose,  natalged daytoy  ta narigat a kapten ti lati ken  lumot iti  pagdaliasatan ti mainum a danum.
    

Imbaga ni Mayor Ediboy nga  adda matudingan a dua nga empleado ti Cabugao Waterworks System a mangisuro iti pannakaikabit ken pannakainstolar dagitoy  a tubo iti Barangay Arnap.
    

Impeksa ni   Kapitan Tabula ti dakkel unay a panagyamanna ken ni Diputado Ronald  ken kasta met ken ni Mayor Ediboy ta napatgan daras daytoy a  kalikagumda. Innayon ti Kapitan a salwadanda ti naited kadakuada a pagimbagan ken mangnamnamada latta ti sumarsaruno pay a pagsayaatan nga itden ti Gobierno iti barangayda. # (Printed, Anara-ar Sept.-Oct. 2010) 

Ti napalaus a panagyaman ni Brgy. Capt. Teodoro Tabula (R) kenni Mayor Ediboy (L) gapu ti tulong a naipaay ti barangayda.

COMPREHENSIVE LAND USE PLAN, MAPABARO KUNA NI MAYOR EDIBOY

Cabugao, Ilocos Sur – Naangay ti Orientation Meeting ti amin nga opisiales ti Gobierno Munisipal pakairamanan ti kapitanes ti 33 a barangays ti ili kasta met iti pannakabagi ti Non-Government Organizations (NGO’s) ken taga-Media.

Kalikaguman  ni Mayor Ediboy S. Cobangbang, Jr. ti pannaka-update  ti CLUP babaen ti opisina ti Municipal Planning and Development Coordinator.

Imbaga ni Mr. Florante Jara, MPDO Coordinator,  a dandanin agleppas ti 10-year long range plan ti CLUP (nangrugi idi 2001) ket kunana a kasapulanen a ma-update.

Imbinsabinsa ni Mrs. Teresita  V. Galacgac, Regional Director, Housing and   Land Use Regulatory Board-National Capital Region,  iti panagsaritana  iti nasao nga orientation meeting  ti  pateg ti zoning ordinance, sectoral studies, 12-Step  process ti CLUP  Preparation ken Action Plan ti CLUP Formulation and Updating. # (Source, Anara-ar Magazine, Sept. 22, 2010)

MEDICAL MISSION NI BOKAL JERRY, NAISAGUT ITI ILI TI CABUGAO

Cabugao, Ilocos Sur –  Pannakamantener ti salun-at ti maysa a prayoridad ti Gobierno Lokal iti panangidaulo ni Mayor Ediboy S. Cobangbang, Jr.  ta mamati a maysa daytoy kadagiti   kangrunaan a ramen  iti  panagdur-as ti ili ken kagimongan.        

Ginundawayan dagiti umili ti Cabugao ti nagpartisipar iti naaramid a panagagas  babaen iti  pannakaipatulod ti medical mission ditoy ili a Cabugao idi Setiembre 11, 2010 nga inorganisar ni Ilocos Sur Board Member Jeremias C. Singson a buklen dagiti espesialista a dodoktor  iti general medicine, pediatrics, ken optometry. Libre ti konsultasion ken naited nga agas ken anteohos ket iwayatda pay ti minor operation kas iti panagkugit ken excision.

Ti nasao a health care mission ket inesponsoran ti agduduma nga organisasion; Ti JCA Foundation, Lungsod Kabataan Nurses ti Manila. Indonar ni Gov. Luis “Chavit” Singson dagiti naited a reading glasses.

Nakitinnulong dagiti health personnel iti DOH-RHU nga idauluan ni Dr. Rudy M. Singson, Municipal Health Officer kasta met dagiti Sangguniang Bayan  Members nga  idauluan ni Vice Mayor Danny Q. Gazmen.

Mismo a nagatendar ni Senior Board Member Jeremias”Jerry” C. Singson iti nasao nga aktibidad  a nangtarabay kadagiti nagmision. # (Insurat ni Joed Sajonia)

FARMERS’ ID SYSTEM, UMUNA A GANNUAT PARA KADAGITI MANNALON

Cabugao, Ilocos Sur – Apaman a nagtugaw nga Alkalde ti ili a Cabugao, Ilocos Sur ni Mayor Ediboy S. Cobangbang, Jr., pinailunsadna ti kaadda ti  naan-anay a rekord dagiti mannalon nga agnanaed iti 33 a barangays tapno masinunuo a talaga ti bilang dagiti agtaltalon a kasapulan met ti opisinana para iti panagplano ken pannakayimplimentar dagiti  programa ken proyekto ti Gobierno Munisipal ti ili.

Babaen kadaytoy a gannuat, binilin ni Mayor Ediboy ni Mrs. Zenaida S. Andrada, Municipal Agriculturist iti pannakaipinal ti listaan dagiti mannalon iti 33 a barangays babaen kadagiti Municipal Technologists a mapmapan kadagiti barangay a nakaidestinuanda.

Buklen dagiti mannalon dagiti organisasion nga adda iti las-ud ti 33 a barangays iti ili kasta met  dagiti gunglo nga adda iti Communal Irrigation System (CIS) iti National Irrigation Administration (NIA).
Iti agdama, umaboten ti 4,108 ti bilang ti mannalon a nakarehistro iti opisina ti Municipal Agriculture Office (MAO) ken agtultuloy ti pannakalista dagiti saan pay a nairaman a mannalon, segun ken ni Mr. Robert Savella, Municipal Technologist ti DA-LGU Cabugao. # (Insurat ni Joed Sajonia)

OPISIALES TI GOBIERNO MUNISIPAL TI CABUGAO, NAGSEMINAR TI 3 NGA ALDAW

NAISAYANGKAT ti panagsanay dagiti opisiales ti Gobierno Munisipal babaen ti panangidaulo  ni Mayor Edgardo “Ediboy” S. Cobangbang, Jr., a buklen ti pannakabagi ti Sangguniang Bayan, municipal department heads, PNP Station Commander, BFP Fire Marshall, DepEd Supervisor, Principal ti uppat a pagadalan-sekundaria, ken pannakabagi ti NGO’s a pakairamanan ti 4-H Club idi Setiembre 6-8, 2010 sadiay Ilocos Norte Hotel and Convention Center, Laoag City.
    

Panggep daytoy a panagsanay nga insayangkat ti Department of Interior and Local Government (DILG) a pasingdaten ti panagtinnulong ti Ehekutibo ken Lehislatibo a  sanga ken benneg   ti Gobierno Lokal tapno maiyintek dagiti prayoridad a mataming a plano ken programa ken  pannakaipatungpalda  kadagiti  umili.
    

Iti maikadua nga aldaw ti seminar, Setiembre 7, nangted ti mensahe ni Mayor Ediboy ket impasagepsepna ti napateg a panagkakammayet dagiti opisina a mangbukel ti idauluanna. Innayon ti Mayor, nupay aggidiat ti kinatao dagiti opisiales ngem kasapulan a nakaysa ti pannakaiturong ti gobierno a buyogan ti maikanatad  a panagserbi tapno maitag-ay ti interes dagiti umili.
    

Nagpaay a resource speakers dagiti Municipal Local Government Operations Officers ti DILG:  Mrs. Vicky Ramos ti Candon City, Mr. Randy de La Rosa ti Sta. Maria ken Mrs. Constancia Quinola ti Cabugao.
    

Iti seminar, nataming dagiti pakaseknan ti pannakausar ti pundo, pannakaipatungpal ti investment plan, dagiti maitutop ken  maiprayoridad a plano ken programa ti opisina ken sektor kalpasan  iti pannakaarisit dagiti isyu ken pakaseknan, evaluation and monitoring.
   

Iti maudi nga aldaw ti seminar, Setiembre 8, naaramid ti workshop ket tunggal nagpartisipar ket nangaramid ti commitment-na para iti pannakaidur-as ti Munisipalidad  a maisubmiter iti Opisina ti Mayor. # (Source, Anara-ar Magazine, Sept-Oct. 2010)

PANAGIDONAR TI KUARTA ITI RHU, PINAISARDENG NI MAYOR EDIBOY

Cabugao, Ilocos Sur – Pinaisardeng ni Mayor Ediboy S. Cobangbang, Jr. ti pannakaadda ti donation box iti pasdek ti Rural Health Unit ti ili a Cabugao, Ilocos Sur gapu ta kaaduan iti mapan agpaagas ket marigrigat ket saan a maibagay a maobligar pay dagiti pasiente    a mangted aglalo no nakapulpulos la ngaruden. Segun iti Mayor, dina  kayat a gapu daytoy a banag ti pagtukiadan dagiti maseknan nga umili ti panagpakitada ditoy balay ti pagagasan ti ili.

Paset ti programa ni Mayor Ediboy ti naan-anay a pannakatagiben ti salun-at dagiti umili ket nagkiddaw ti ad-adu pay nga agas kadagiti civic-minded citizens ti pannakaidonar ti agas tapno adda masagsagana a maited kadagiti agkasapulan a pasiente iti RHU. # (Reposted, Tawidnews, September  5, 2010) 

CHIEF GIRL SCOUT MEDAL SCHEME, SUPORTARAN NI MAYOR EDIBOY

Cabugao, Ilocos Sur – Kandidata ni Miss Naczarina Castillo Nerona, 3rd year High School ti Cabugao National High School, Turod, Cabugao, Ilocos Sur a Chief Girl Scout Medal Scheme ket nairubuat  ken napatalgedan  idi Agosto 30, 2010 sadiay Namruangan Barangay Hall, Cabugao, Ilocos Sur.

Indauluan ni Mayor Ediboy S. Cobangbang, Jr. dagiti nagatendar iti launching program a kaduana da SB  Members Vicky S. Serna ken Dr. Carlito S. Pano, Mrs. Zenita Mosico, Ilocos Sur Girl Scout Coordinator, Mrs. Felipa B. Asuncion, CNHS Principal ken dagiti Girl Scout Troop Leaders, Rosario Taberna, Maricel Ballete, ken  Rocilyn Sabaten, Brgy. Captain Raymond Sapla ken 20 a Day Care Pupils a recipients ti Supplemental Feeding Program.

Kas Girl Scout Leader, pinili ni Miss Nerona ti community service a kas ipangrunana babaen ti pannakaaramid ti feeding program ti 20 a Day Care pupils ti Barangay Namruangan a nayeskediul iti tunggal aldaw ti Domingo ken agpatingga iti  Abril 2011.

Imbatad met da Mayor Ediboy, SBM Vicky Serna ken Dr. Pano iti suportada iti aramiden ni Girl Scout Nerona ket binigbigda a naindaklan daytoy a pagrebbengan ken makatulong ken mayataday unay iti programa ti Gobierno Munisipal iti pannakalapped ti problema ti malnutrision.

Ni Chief Girl Scout Nerona ket anak da Police Chief Inspector William Nerona ti ili a Cabugao ken ni dati a Nancy Castillo.# (Source, Anara-ar Magazine, Sept.-Oct. 2010)

MUNICIPAL DEVELOPMENT COUNCIL (MDC) MEETING, UMUNA BABAEN TI BARO NGA ADMINISTRASION

Cabugao, Ilocos Sur – Naaramid ti panagmiting ti Municipal Development Council (MDC) idi Agosto 27, 2010 a no sadino a nagatendar ditoy dagiti  Kapitanes ti 33 a barangays ti ili ti Cabugao, pangulo dagiti departamento ken opisina ti LGU babaen ti panangmobilisar ni Mr. Florante Jara,  Municipal Planning Development Coordinator kasta met dagiti  Presidente ti nadumaduma nga NGO’s.  

Umuna a natratar ti Annual Investment Plan ket ditoy a nataming  dagiti kangrunaan a plano ken programa a kasapulan ken pakabenepisiaran dagiti umili.

Iti panglukat a mensahe ni Mayor Edgardo “Ediboy” S. Cobangbang, Jr.,  kalikagumanna a mamindua nga agmiting ti Konseho iti makatawen ken pinalagipanna dagiti Kapitanes ti panagisubmiterda kadagiti resolusionda tapno mairamanda iti programa babaen ti pundo ti RA 7171 iti Annual Investment Plan.

Dagiti natratar ket dagiti proyekto a mapunduan  iti Congressional Fund  ni  Diputado Ronald V. Singson ti Umuna a Distrito, Probinsia ti Ilocos Sur kas iti sumaganad: Concreting ti Farm-to-market road, Barangay Sisim, Repair ti Multipurpose Hall, Barangay Sisim, Construction ti Drainage iti Barangay Daclapan, Concreting ti Farm-to-market  road  ti Brgy. Turod-Patac, Concreting ti Farm-to-market  road, Barangay Salapasap.

Dagiti proyekto nga idarirag ni Mayor Ediboy a maaramid:    

     

Pannakapasayaat ti disso a pakaaramnidan ti Regional Jamboree, pannakaaramid ti Day Care Center ti amin a barangay, pannakapasayaat ti dalan ti Sabang-Daclapan Road, pannakaitag-ay ti industria ti turismo a pamataudan ti pagkakitaan ken pagsapulan, pannakapasayaat ti slaughterhouse,

pannakaipasdek ti Dayo, Tree Nursery, Fish Nursery ken “Sinanglawan Idiay Karayan” nga asideg ti pag-Dadayoan.

Re-validation ti P53 Milion a naiparuar a  pundo ti 1^st Quarter 2010 manipud iti RA 7171 ken mangbukel ni Mayor Ediboy  iti  Project Monitoring Committee (PMC) a mangtaming kadaytoy kasta met a kiniddawna iti Commission on Audit (COA) a mangtaming    ti  maysa a P29 Milion a “suspension” ti pundo  ken ag-audit ken ag-inspeksion kadagiti proyekto a naaramiden a kadwana ti PMC., Re-alignment ti P900,000 a para koma iti Namruangan-Salapasap Hanging Bridge iti  proyekto a kasapulan  iti dua a barangay maibasar iti bingayda, Stone Masonry iti Nagkamaligan Road, Barangay Namruangan, Construction ti Farm-to market road ti Barangay Salapasap, re-enlistment ti Philhealth Beneficiaries ket impasingked ni Mayor Ediboy nga agbirok ti pundo para itoy  ken  imbalakadna ti maysa a tripartite program (Philhealth-Local Government, Member) iti nalawlawa a sakupenna ken nalaklaka a mabayadan, naregget a tax-mapping ken pannakaammo ti eksakto a masakupan ti tunggal barangay, pannakaipatungpal ti Farmers’ ID System dagiti mannalon nga agsagrap ti subsidies, baro a lay-out ken re-location ti nadumaduma nga  opisina ti LGU offices, manipud 2^nd floor ti Municipal Building, mayakar ti Opisina ti Mayor iti dati a Municipal Library iti baba, LGU offices iti 1^st floor (air conditioned), pagopisinaan ti Gobierno Nasional iti 1^st floor, pannakagatang ti baro  a maisukat kadagiti daan a ramit.# ( Source,  Anaraa-ar, Sept.-Oct. 2010)

MAYOR EDIBOY, NABUTOSAN A BISE PRESIDENTE TI LIGA TI MAYORES TI ILOCOS SUR

Cabugao, Ilocos Sur – Iti naangay nga eleksion dagiti opisiales ti League of Municipalities of the Philippines, Ilocos Sur Chapter idi Agosto 2010, nabutosan ni Mayor Edgardo “Ediboy” S. Cobangbang, Jr. ti ili a Cabugao a Vice President (1^st District). Dagiti kakaduana a napili a mangrienda ti Liga ken kamkameng a Mayores ket dagiti sumaganad:

LEAGUE OF MUNICIPALITIES OF THE PHILIPPINES OFFICERS, ILOCOS SUR CHAPTER

President - HON. GERMELINA S. GOULART(Caoayan)

Exec. Vice President - HON. ZURIEL S. ZARAGOZA (Narvacan)

Vice President (1^st District) - HON. EDGARDO S. COBANGBANG, JR. (Cabugao)

Vice President (2^st District) - HON. ESTRELLA F. HERNAEZ (Sta.Lucia)

Vice President (Upland) - HON. LEONOFRE G. GIRONELLA (Salcedo)

Secretary - HON. TERESITA C. VALLE (Sta. Cruz)

Treasurer - HON. NANCY D. TABANDA (San Vicente)

P.R.O. - HON. EDGAR C. FLORENDO (Sta. Maria)

BOARD OF DIRECTORS

HON. CARLOS R. ASUNCION (Sta. Catalina)
HON. CHESTER A. ELAYDO (San Esteban)
HON. BENJAMIN N. MAGGAY (Cervantes)
HON. SAMUEL C. PARILLA (Bantay)
HON. JESSIE B. BALINGSAT (Galimuyod)
HON. BERNARD. D. SARMIENTO (San Juan)
HON. TIMOTEO M. CABRERA (Nagbukel)
HON. FERNANDO C. QUITON (Sugpon)
  
OTHER MEMBERS

       HON. MAR RUEL P. SUMABAT (Alilem)

       HON. SEVERINO P. GALANGA (Banayoyo)

       HON. RIOLITO R. BALBALAN (Burgos)

       HON. LUZ C.VILLALOBOS (G. del Pilar)

       HON. CONSTANTE G. SEGUNDO (Lidlidda)

       HON. JESUS JEREMY P. BUENO III (Santa)

       HON. MICHAEL S. MIRANDA (Santiago)

       HON. AMADO T. TADENA (Sto. Domingo)

       HON. ARIES D. GAERLAN (Sigay)

       HON. MARLON B. INES (Sinait)

ECOLOGY CENTER, SOLID WASTE MANAGEMENT, MAPASAYAAT

Cabugao, Ilocos Sur – Inangay ti Municipal Planning and Development Office (MPDO)  ti miting  maipapan  iti Open Solid Waste Management sadiay Municipal Conference Hall a nagatendaran dagiti pannakabagi ti barangay ken eskuela a nakairamanan dagiti agkolkolekta ti basura  idi Agosto 19, 2010.

Kangrunaan a natratar ket dagiti timmaud a problema  iti ugali dagiti umili pakaseknan daytoy nga aktibidad, pannakaikabassit ti rugit (waste reduction) ken panagkolekta ti basura (garbage collection).

Tinarawidwidan da MPDO Coordinator Florante Jara, Solid Waste Management Officer Edgar S. Balangatan ken dati nga SB Member Thaddeus U. Soller ti nasao a miting.

Napagkaykaysaan kalpasan ti miting a maestriktuan ti pannakaipatungpal ti panamaglalasin (segregation) kadagiti basura ket kasapulan nga adda met garbage pit ti tunggal pagtaengan ken Material Recovery Facility wenno MRF ti pageskuelaan.

Imbaga ni MPDC Jara a  kasapulan ti pannakapasayaat ti Municipal MRF iti Sitio Baliw, Barangay Quezon ket  kuna met ni SBM Soller a ti nadakamat nga MRF ket maysa nga open dumpsite a kasapulanen a mapasayaat.

Insingasing pay ni MPDC Jara nga agaramid ti opisinana iti pagbasaan (fliers) a mangimpormar kadagiti umili nangruna iti barbarangay maipapan iti umisu a panangmanehar ti basura ken panamaglalasin kadagitoy iti “di nabubulok” ken “nabubulok” a kasasaad dagiti rugit a makolekta kadagiti pagtaengan ken kalsada.   

Kabulbulon ti umad-adu a pagkasapulan ti umili iti mainaynayon met a basura a maurnong ken maidalimanek iti inaldaw   tapno agtalinaed ti kinadalus ti arubayan ken aglikmut a paset ti pannakatagiben ti sanitasion ti aglikmut.

Daytoy a pakaseknan ket itultuloy a pasayaaten  ti baro nga administrasion babaen ti programa ti panagdaldalus  iti panangidaulo ni Mayor Edgardo  “Ediboy”  S. Cobangbang, Jr. ken dagiti maseknan nga opisina iti Gobierno Munisipal. # (Source, Anara-ar, P-9, Agosto  2010)