NAURNOS A PANAGPASADA, TULOY NGA IPATUNGPAL TI CISTODAI

Cabugao, Ilocos Sur – Iti pannakiuman ti Web In-Action idi Hulio 29, 2014, impakaammo  ni Mr. Mario Roxas, Treasurer ti CISTODAI-Saranay Association a kabayatan ti panagmonitorda ket  nadlawda nga adda metten nagdur-asan iti napagmimitingan/napagkaykaysaanda iti kallabes  a   kas iti sumaganad:

1.Pannakairehistro ti amin a traysikelan ken motor  idiay LTO ken maipabaro ti prangkisada iti Munisipio.

2.Masurot dagiti mapagtutulagan a Boundary ti pagpasadaan.

3.Matungpal ti P12 a plete ti maymaysa a pasahero, P10 ti maysa  no ad-adu ti pasahero. 

4.   20% Discount wenno P10 ti Senior Citizen/Disabled nga adda ID-na.

5.P7 ti tunggal agbasbasa (Pre-School, Elementary, High School).

6.Lima laeng a pasahero  ti maipalubos a kargaen tapno maliklikan ti “overloading”.

Dagitoy nga annuroten ket naibasar iti Fare Guide nga inaprobaran ti Sangguniang Bayan idi Setiembre 19, 2011.
Innayon pay ni Mr. Roxas a naregget ti panagopisinada iti NISTC Public Market  ta kayatda a maatendaran ti kasapulan dagiti kakaduada ken maipatungpal a naiget dagiti pammilin ti LGU-Cabugao iti maximum a multa dagiti aglabsing ken pannakairehistro ti amin a motor ken traysikel tapno maliklikan ti kolorum a lugan. # (Web Situational Report)

NUTRITION LECTURES, NAILEPPASSEN KADAGITI FDS TI BARANGAY

Cabugao, Ilocos Sur – Iti pannakiuman ti Web In-Action iti Hulio 31, 2014, impakaammo  ti  
Opisina ti Municipal Operation Office (MOO) ti 4 P’s Program, Municipal Link-Cabugao a nairakurakdan  dagiti pakabuklan ti programa ti Nutrision kadagiti barangay a pagnaedan dagiti kameng ti 4 P’s iti Munisipalidad ti Cabugao iti bulan ti Hulio  2014.

Innayon ni Miss Aida S. Cueto, Municipal 4 P’s Focal Person  a makiko-koordinarda  manen  kadagiti Opisiales ti Barangay a katinnulongda  a mangorganisar iti Family Development Session (FDS) para iti Topiko nga imitingda kadagiti 4 P’s para iti Agosto 2014 maipapan iti Disaster Preparedness.

Insupusop ni Mis Jessie Ann O. Tabut, Municipal Link - 4 P’s a napagkaykaysaanda a maysa a Topiko laeng ti binsabinsaenda kadagiti Family Development Session-da tapno nalaklakada a tingitingen ti pagpigsaan ti programa babaen iti evaluation ken assessment a maisayangkat. Nalaklaka pay a makaawat ken makatarus dagiti adalanda a 4 P’s no dagitay kabisadoda a Topiko iti maiyad-adal kas parte  iti Education Formation ti Programa.

Dagitoy nga aksion ket maigapu iti agtultuloy a panangilungalong ti Gobierno Munisipal a mangipaganetget iti napintas a maaramidan  dagiti programa a maisaksaknap kadagiti barangay tapno maragpat iti sapasap a panagrang-ay. # (Web In-Action)

HEPE TI PAO, BIMMISITA DITOY LGU-CABUGAO

Cabugao, Ilocos Sur – Maysa ti ili ti Cabugao, Ilocos Sur kadagiti Itineraria wenno binisita ni Hon. Persida V. Rueda-Acosta, Chief Public Attorney, Public Attorney’s  Office (PAO) iti panagturongna iti Rehion Uno idi Hulio 28, 2014.

Iti dayta a petsa, naaramid ti panag-courtesy call ni Atty. Acosta ken ni Mayor Edgardo S. Cobangbang, Jr. iti mismo nga Opisina ti Municipal Chief Executive iti Ground Floor, Municipal Hall Building, Cabugao, Ilocos Sur. Binayabay dagiti pannakabagi ti  PAO Cabugao nga isuda Atty. Rosario F. Vitamog-Palisoc ken ni Mrs. Rosalina R. de la Cruz iti Abogada a pangulo ti PAO a  bimmisita ken nakisarsarita ken ni Mayor Ediboy  agraman  dagiti naitaripnong a kameng ti Konseho Munisipal.

Nakikaysa met dagiti kameng ti Sangguniang Bayan nga isuda SBM Dr. Jemaima S. Tan Yee; SBM Benedicto M. Savellano; SBM Atty. Bryan Jett S. Pano; SBM Vicky S. Serna ken ni SBM Jayhan Alcid-Tan a nangpasangbay iti PAO Chief Attorney.

Paset ti panagbisita ni Chief Attorney Acosta iti maar-aramid  nga Assessment kadagiti District Offices ti PAO a pakairamanan ti PAO-Cabugao iti intero a Region 1. 

Sakbayna,  napan  ni Atty. Acosta  ken dagiti kakaduana iti kabarbaro a pasdek ken Opisina ti PAO iti ili ti Cabugao a nakipagkitaanna kadagiti empleado ti PAO-Cabugao.

Ti PAO-Cabugao ket buklen dagiti empleadona a da: Atty. Rosario F. Vitamog-Palisoc, Public Attorney III; Atty. Jeofrey R. Alapot, Public Attorney II; Mr. Ronald T. Gasmen, Administrative Assistant 1 ken ni Mrs. Rosalina R. de la Cruz, Administrative Aide IV. # (Web In-Action)

RATIPIKASION TI BY-LAWS, NAARAMID

Cabugao, Ilocos Sur – Kalpasan ti pannakaistudiar dagiti nasken a pakabuklan ti Constitution and By-Laws ti Cabugao Onion and Garlic Growers Association, ket naratipikaran wenno nabutosan iti mayoria a miembros ti pannakaaprobarna sakbay a mairehistroda iti Department of Labor and Employment (DOLE)-Vigan City. 

Kabayatanna, maaramidto met iti pannakairehistrona iti Pederasion ti Asosasion kasta met iti LGU-Cabugao para iti Accreditation Status-na tapno adda naan-anay a juridical identity daytoy nga Asosasion a maki-transact kadagiti Opisina ken Ahensia a nangruna iti Gobierno pakaseknan iti serbisio a maipaay kadakuada.

Segun ken ni Mrs. Ester P. Aguimbag, Municipal High Value Crops Development Program (HVCDP) Coordinator a kabayatan ti panangirehistroda ket planplanuenda metten  ti mangipasa iti Project Proposal iti maseknan nga Ahensia babaen iti panangyendorso ti LGU-Cabugao tapno maipasakbay a magun-odda dagiti kasapulanda iti umay a panagmula ti bawang ken lasona.

Ti nasao nga Asosasion ket idauluan ni Mr. Henry Saliganan, Presidente kasta met a maysa isuna a Local Farmer Technician a tartarabayen ti DA-LGU Cabugao iti agdama. # (Web In-Action)

GOV. RYAN RICE, PAMUONAN A NAIMULA DITOY CABUGAO

Cabugao, Ilocos Sur – Nadutokan ni Mr. Dominador Reynold S. Sabio, Presidente ti BACALL MPA a mangidemonstrar /nangiraep ti Gov. Ryan Rice Variety ita a Wet Season 2014 (Hunio-Nobiembre) iti 1,000 Metro-Kuadrado  a talonna a masarakan iti Sitio Lusong Suyo, Barangay Baclig, Cabugo, Ilocos Sur.

Segun ken ni Mr. Sabio, adda kaduana a Cooperator kadaytoy a mapatpatanor a mula idiay Barangay Turod, Cabugao, Ilocos Sur ket planona a pagmodeluen daytoy a kita ti bin-i ti pagay a nayam-ammo ditoy Cabugao babaen iti programa ti Agrikultura (Palay Production) ti  LGU-Cabugao ken iti Gobierno Probinsial babaen iti Office of the Provincial Agriculture (OPAG).

Kabayatanna, umad-adu ti nakatalonen maigapu iti nagdadaraddan a panagtudona. Segun ken ni Municipal Rice Program Coordinator Nereo S. Daproza, AT, madama manen ti  panagrikus ken panagmonitorna kadagiti barangay tapno tarabayenda ken dagiti kakaduana a Teknisian dagiti mannalon a nakatalonen ken saan pay a nakatalon.

Dagitoy nga aksion ken inisiatiba ket maigapu iti naipamaysa a programa ti pannakaidur-as ti Agrikultura babaen iti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno mamantener iti supisiente a pagtaraon dagiti umili iti pakaseknan ti bagas ita a Tawen 2014. # (Web In-Action)

SABALI PAY A FINANCIAL AID, INTED TI DSWD-REGION 1

Cabugao, Ilocos Sur - Inawat dagiti uppat a maseknan nga umili ti Financial Assistance a dagitoy a natulongan  a Pamilia  ket agnanaedda  iti Brgy. Baclig, Dardarat, Arnap ken Bungro nga umabot iti gatad a  P70,000 ti inawatda  a naggapu iti DSWD Regional Field Office 1, San Fernando City, La Union.

Inimatangan dagiti Opisiales Lokal ti ili  nga idauluan ni Mayor Edgardo S. Cobangbang, Jr. idi Hulyo 28, 2014 ken naangay ti Turnover iti Opisina ti Municipal Chief Executive.

Nagtaud daytoy a tulong manipud iti Extended Aid to Individual  in Crisis Situation (AICS) ket dagiti maseknan nga immawat ket nagtaudda iti marigrigat a pamilia a maibasar iti  resulta ti Assessment ti  National Household Targeting (NHTS)  System iti nasao nga Ahensia.

Naiserbi ti nadakamat a gatad nga inawat dagiti uppat a Recipients a  para iti gastos ti Kidney Dialysis ken ti  Burial Assistance.

Nakikaysa met kadaytoy a turnover ti gatad ni Mrs. Lydia S. Gazmen, Municipal Social Welfare Officer ti ili a Cabugao, Ilocos Sur. # (Web In-Action)

BARO A KAGAWAD, NAGSAPATA KEN NI MAYOR EDIBOY

Cabugao, Ilocos Sur -  Nagsapata ni Kagawad John Louie B. Salas, kabarbaro a Kagawad iti Sangguniang Barangay ti  Barangay Nagsincaoan, Cabugao, Ilocos Sur idi Hulio 28, 2014 iti Opisina ti  Municipal Chief Executive iti Municipal Hall ti ili. 

Pinagsapata ni Mayor Edgardo S. Cobangbang, Jr. ni Kagawad John Louie B. Salas iti imatang dagiti Opisiales Lokal ti ili agraman  dagiti Opisiales ti Barangay iti Brgy. Nagsincaoan nga idauluan ni Brgy. Captain Modesto Bringas.

Agepekto ti pannakaapointar ni Kagawad Salas a mangannong iti pagrebbenganna iti barangay-da inton Agosto 1, 2014. # (Web In-Action)

MENTENENSIA TI SANGO TI TIENDAAN, AGTULTULOY

Cabugao, Ilocos Sur – Iti pannakiuman ti Web In-Action ken ni Kagawad Arnel Ilar, Committee Chair on Environment and Solid Waste Management, Barangay Baclig, Cabugao, Ilocos Sur itay nabiit, impakaammona a kaduana ti Sangguniang Barangay ti  Barangay Baclig a mangkitkita iti  nasayaat a  resulta iti pannakaipailawa ken pannakaipan ti pasetna iti  reinforce concrete pipes  a dadakkel ti ag-70 metros ti kaatiddogna   iti Drainage Canal iti Kalsada Nasional a maysa pay kadagiti drainage outlet ti danum nga aggapu iti Tiendaan. Insupusop ni Kagawad Ilar a napintas latta met  ti panagbulanos ti danum   iti 40 meters a  drainage culvert  canal ken 30 meters ti kaatiddogna  a nasakaban a  dadakkel nga imbornal a naitapuak ti danumna  iti irrigation main canal ti NIA-SIMABUSA. Daytoy a pammasingked ket pampaneknekan ni Municipal Engineer Crescencio C. Formoso idi makauman ti Web In-Action maipanggep kadaytoy a proyekto ti LGU-Cabugao.

Innayon ni Kagawad Ilar a manam-ayan ita dagiti kapurokanna ti saandan a pannakalayus no kapigsa ti danum gapu iti pannakaipalawa ti nasao a drainage canal. Pinagyamananna pay  iti Gobierno Munisipal nga idauluan ni Mayor Edgardo “Ediboy” S. Cobangbang, Jr. ta naaksionan daras dagitoy a kalikagumda a pumurok ken bumarangay ken simmayaat metten  ti panagdaliasat dagiti dadduma nga umili kadaytoy a pagbunnongan ti danum no agpigsa ti tudo. Kabayatanna, madama manen a maipatpatungpal ti Road Widening and Construction babaen iti Ahensia ti DPWH iti National Highway a masakupan pay laeng ti Brgy. Baclig, Cabugao, Ilocos Sur iti batog ti Tiendaan. # (Web Situational Report)

UPDATE TI CATTLE PROJECT TI 4-H CLUB

Cabugao, Ilocos Sur – Iti pannaki-amad ti Web In-Action iti Hulio 28, 2014, imbatad ni Mr. Obas Bill Y. Baclig/AT, agak-akem ita  a Municipal 4-H Club Coordinator a kankanayonna a monitoren dagiti asosasion ti 4-H Club a nakaitedan dagiti baka a paset ti Performance Challenge Fund ti Munisipio a naipaay kadagiti agtutubo kas proyektoda iti cattle production a nangrugi idi Tawen 2013.

Innayon ni Mr. Baclig nga addan makatawen dagiti naipataraken  iti 12 a Barangay a dagitoy ket iti Brgys. Bonifacio, Arnap, Nagsincaoan, Cacadiran, Cuancabal, Salomague, Cael-layan, Pug-os, Bato, Namruangan, Bungro ken Reppa-ac a naed iti  dagiti  kameng ti 4-H Club a nakaipaimaan dagitoy a nataraken a baka.

Insupusop pay ni Mr. Baclig a patinayon a palpalagipanna dagiti agtartaraken a saanda a baybay-an dagitoy nga inawatda a responsibilidad agsipud ta paset iti programa ti Gobierno Munisipal  ti  panangsursuro kadagiti agtutubo nga agtaraken a maysa a napaneknekan a napintas a pamataudan ti nayon a matgedanda  a mangtulong iti indibidual a kameng ti 4-H Club ken iti pamiliana.

Manamnama a mairaman latta met dagitoy a baka a mabakunaan/mapurga  iti maangay a massive vaccination/deworming nga isaysayangkat   ti Municipal Livestock Office nga idauluan ni Dr. Melvin G. Castro, DVM. # (Web In-Action)

MAAR-ARAMID TI LANDSCAPING KADAGITI SANGO TI PASDEK KEN PASILIDAD TI MUNISIPIO

Cabugao, Ilocos Sur – Iti pannaki-amad ti Web In-Action idi Hulio 27, 2014, imbatad ni Mr. Edgar  S. Balangatan, AT, Municipal Clean and Green Program Coordinator, ket    agtultuloy ti panang-landscape-da (panangpapintasda)  kadagiti pampubliko a disso ken sango ti pasdek ken pasilidad ti LGU-Cabugao ken agtultuloy iti pannakadalusda babaen iti programa ti Clean and Green ken Environmental Management ti Munisipio.

Maysa kadagiti as-asikasuen  ti grupoda iti regular a pannaka-landscape ti sango ti Municipal Garden, dagiti kabarbaro a pasdek iti masakupan  ti Municipal Hall, uneg ken iti ruar ti Cabugao Central Parke (CCP),  sakaanan dagiti monumento  dagiti bannuar ken pannakamantener iti sango ti Food Court iti NISTC-Public Market.

Dagitoy nga aksion ken inisiatiba ket maigapu iti napintas  a programa ti Clean and Green ken    Environmental Management ti LGU-Cabugao tapno mapagtalinaed ti kinadalus ken napintas a mabuybuya iti aglawlaw. # (Web Situational Report)

54 PORSIENTO TI NARAEPAN, KAPIGSA LATTA TI PANAGTALON

Cabugao, Ilocos Sur – Iti pannaki-amad ti Web In-Action iti Hulio 25, 2014, imbaga ni Municipal Rice Program Coordinator Nereo S. Daproza, AT ken dagiti kaaduan a mannalon iti panagkakarintarda ita nga agtalon ta maparuaren  ti ubbog iti lunglungog ken immadu ti ubbog ti bubon   maigapu pay iti deretso a panagtudona iti kada malem.

Innayon ni Mr. Daproza a babaen iti agtultuloy a panagmonitorna iti kada barangay ti ili ket mapatta-patta nga umaboten  iti 54 Porsiento (%) a pakaibatogan ti 1,214 Ektaria ti naraepan iti pakadagupan ti 2,247 ektaria a nai-target ti DA-LGU a mamulaan ita  a Wet Season 2014 (Hunio-Nobiembre).

Nupay kasta, mangnamnama ti kaaduan a mannalon a maileppasda iti  amin a maraepanda iti bulan ti Agosto 2014 a kalkalainganna pay laeng a panawen a panaglamusada (panagleppas ti raep/talon)  iti tunggal pagtatalonan. 

Kabayatanna, impakaammo pay  ti Municipal Rice Program Coordinator ti Cabugao  nga agtultuloy latta  iti panagbisitana kadagiti barangay ken iti disso dagiti Techno-Demo ti Hybrid ken Certified Seeds agraman iti Seed Production Area ken Gov. Ryan Rice Demo-Farm Area  tapno maiwanwanna   dagiti mannalon ken Cooperators ti Techno-Demo Farms.

Dagitoy nga aksion ken inisiatiba ket maigapu iti agtultuloy a suporta ti LGU-Cabugao iti Agrikultura babaen iti liderato ni Mayor Edgardo “Ediboy” S. Cobangbang, Jr. tapno mamantener  ti “Food Sufficiency Status” para kadagiti umili ti Cabugao, Ilocos Sur. # (Web Situational Report)

CLOSING PROGRAM TI TRAINING, NAANGAY

Cabugao, Ilocos Sur – Naangay ti Closing Program ti 2-Day Training on Disaster Risk Reduction and Management/BPATS/ Tanod Training (Hulio 23-24, 20140)  a naangay iti Cabugao Cultural and Sports Complex, Brgy. Rizal, Cabugao, Ilocos Sur.

Naaramid ti Invocation babaen ken ni P03 Janice Oligario; sa indauluan ni P01 Merly Joy Raboy ti pannakakanta ti National Anthem ken Cabugao Hymn. Nag-Welcome Remarks ni Engr. Nestor B. Somera, MDRRM Officer.

Nangipaay ti Impression ni Mr. Elimar Castillo iti Brgy. Cacadiran  maipapan iti padasda iti dua nga aldaw a panagsanay ket kimmablaaw ken nagyaman iti nagun-odda nga adal kasta met iti agtultuloy a suporta ti LGU-Cabugao kadakuada a BPATS/MDRRM.

Naisaruno ti Distribution of Certificates to  Participants babaen iti panangited da  Ms. Constancia L. Quinola, MLGOO Officer ti ili a Cabugao a binayabay da ABC President, Brgy. Captain Thaddeus “Teddy” U. Soller, Police Chief William N. Nerona ken ni Engr. Somera kadagiti nagturpos iti 2-Day Seminar.

Nangipaay ti Mensahe ni ABC President Teddy Soller ket pinaregtana dagiti nagpartisipar nga iyallatiwda ti naadalda kadagiti kakaduada nga Opisiales ti Barangay ken dagiti kabarangayanda. Imbinsa ti ABC President ti pateg ti panagtitinnulong no sumangbay ti  didigra ket kangrunaan a dinakamatna ti panangipangrunada a mangilungalong iti pannakabiang ti LGU iti panangtulongda kadagiti BPATS/MDRRM.

Innayon pay ni Kapitan Soller nga iti panagkurang ti kasapulan nga aramaten dagiti nagsanay iti barangayda ket mabalinda nga usaren iti 70% ti Calamity Fund ti Barangay-da para kadaytoy a pakaseknan a sinarurongan ni MLGOO Officer Quiñola.

Insupusop pay ni Kapitan Teddy a siguden koma nga asikasuen dagiti bumarangay/opisiales  dagiti disso a malaylayus tapno makuroban  dagiti agbarado a kanal tapno iti sumaruno a panagtutudo ket masalakniban dagiti lumugar iti dayta a disso iti pannakalayusda.

Binagi met ni PCI William N. Nerona, PNP-Cabugao iti Closing Remarks ket kinablaawanna dagiti nagturpos ken nagyaman iti agtultuloy a suporta ti LGU-Cabugao babaen iti panangidaulo ni Mayor Edgardo “Ediboy” S. Cobangbang, Jr. iti pannakaisayangkat daytoy a panagsanay tapno maikkan iti naan-anay nga adal dagiti napagkaysa  nga akem dagiti agtengtengngel ti linak ken talna a mangaksion   iti isasangbay ti kalamidad ditoy lokalidad.

Nagpaay nga Emcee da P01 Edgardo T. Soliven ken ni SP01 Bernadette R. Aquino. # (Web In-Action) 

2nd DAY TRAINING, MDMRRM/BPATS, LEKTIUR KEN DEMO TI NAARAMID

Cabugao, Ilocos Sur – Naaramid ti  maikadua nga aldaw iti panagsanay dagiti pannakabagi ti Barangay ken MDRRMC iti Cabugao Cultural and Sports Complex, Brgy. Rizal, Cabugao, Ilocos Sur iti Hulio 24, 2014.

Naglektiur dagiti kameng ti Bureau of Fire Protection (BFP)-Cabugao Staff kadagiti sumaganad:

1.Firefighting Technique

2.Role, Duties and Responsibilities of Punong Barangay and BPATS.

3.Objective of the Course and Other Administrative Announcement,  Role of BPATS/Tanod Relations to PNP and MDRRMC.

Sakbayna, naiyadal kadagiti nag-training dagiti sumaganad kalpasan iti naangay a programa ti bigat  iti umuna nga aldaw ti panagsanay, Hulio 23, 2014:

1.Overview of the Mechanism of the Training/RA 10121 Framework.

2.Organization of Municipal and Barangay Disaster and 5% Fund Utilization.

3.Disaster Managemen Concepts and First Aid Basic Life Support.

4.Continuation of Disaster Management Concept.

5.Demonstration (Actual).

Kangrunaan a naglektiur ket iti biang ti MDRRMC babaen ken ni Engr. Nestor B. Somera; MLGOO nga isu ni MLGO Officer Constancia L. Quinola, LGOO V; pannakabagi ti Philippine National Red Cross-Vigan City a da Ms. Aubrey Marie Naynay, Chapter Nurse; Ms. Anna Castillo-Anaban, CSR-FR/143 ken ni Kenneth Rabena, Volunteer ERV. # (Web In-Action)

CERTIFICATE OF ACCREDITATION, INTED TI CSC ITI LGU-CABUGAO

Cabugao, Ilocos Sur – Naangay ti Awarding of Certificate of Accreditation babaen iti Prime-HRM nga inted  ti Civil Service Commission-Ilocos Sur Field Office iti LGU-Cabugao  idi Hulio 23, 2014 a nagatendaran dagiti Regular Employees ti Munisipio nga idauluan ni Mayor Edgardo S. Cobangbang, Jr.

Nairugi ti programa babaen iti Prayer ni Engr. Conrado Segui ken sinaruno ti Words of Welcome ni Vice Mayor Deogracias Jose Victorino H. Savellano. Kimmablaaw ken nagyaman ti Bise Mayor iti isasangbay dagiti bisita ken kadagiti amin a nagatendar iti awarding ceremony.

Binagi ni  CSC Acting Director III Hedy Jose B. Lardizabal ti Overview and Awarding of the Certificate of Appreciation.

Inakseptar ken nagyaman ni Mayor Edgardo S. Cobangbang, Jr. iti naited a panangbigbig ti Civil Service Commission (CSC) iti pakaseknan ti Serbisio Sibil  iti  Gobierno Munisipal ti ili a Cabugao, Ilocos Sur.

Binagi met ni Ms. Cecilia R. Bareng, OIC-CSC Ilocos Sur nga imbinsa dagiti Terms and Conditions iti nasao nga akreditasion.

Kangrunaan  a nangkulminar ti nasao nga awarding iti pannakapirma ti  Memorandum of Commitment iti epektibo a pannakaiyimplimentar ti PRIME-HRM Level II Accreditation ti LGU-Cabugao  babaen kada Mayor Ediboy, Acting Director III Hedy Jose B. Lardizabal, OIC Director II Cecilia R. Bareng ken ni Miss Teresita Maximina “Mimi” S. Sison, Administrative Officer V, LGU-Cabugao.

Daytoy a pammigbig a nagun-od ti LGU-Cabugao ket resulta ti naaramid  a Comprehensive HRM Assistance, Review and Monitoring (CHARM) nga inwayat ti CSC Region 01 a ditoy ket natungpal amin ti LGU-Cabugao dagiti naituyang a maaramid a daytoy ti nakaigapuan iti panangited ti CSC iti Level II Accredited Status babaen iti PRIME-HRM (Program to Institutionalize Meritocracy and Excellence in Human Resource Management). # (Web In-Action)