MAINAYON A MAKINARIA, NAISANGPET

Cabugao, Ilocos Sur – Naisangpet ti ginatang ti Munisipio a  Grader babaen ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. idi Pebrero 28, 2012 ditoy mismo nga arubayan ti Municipal Hall.

Mausar daytoy a ramit iti pannnakasimpa dagiti  kalsada a saan  pay a nakongkreto ken katulongan ti buldoser iti pannakalukat ken pannakakadas dagiti baro a kalsada ken kanaigna a pakasapulan ti LGU iti matrabaho iti babaen ti makinaria. # (Web In-Action)

SERBISIO-DENTAL KEN MEDIKAL, NAGGIDDAN A NAARAMID ITI BARANGAY

Cabugao, Ilocos Sur – Naggiddan ti eskediul ti serbisio Dental (Information on Dental Health Care)  ken Medikal (Barangay Health Clinic) idi Pebrero 28, 2012 babaen ti Rural Health Unit, LGU Cabugao nga indauluan da Dra. Lotgarda Tayao ken Dr. Magno Sol, DMD kadagiti ad-adayo  a barangay manipud ti Poblasion ti ili a Cabugao, Ilocos Sur.

Daytoy a krusada para iti napintas a salun-at ket paset ti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a kakibinna  ti Sangguniang Bayan, Komite ti Salun-at ken Serbisio-Sosial iti  panangitandudo da Vice Mayor Danny Q. Gazmen ken SB Member Carlito S, Pano, M.D., Chairman ti dua a Komite.

 
Iti bigat ti Pebrero 28, 2012,  nagserbisio  ti  Information on Dental  Health Care Group iti Barangays  Arnap, Carusipan ken Cuantacla. Naserbisyuan dagiti Day Care Children kadagitoy a nasao a barangay idinto ta tinurong met ti Barangay Health Clinic Group iti Rebba-Cacadiran a nagbakunaan ken nagagasanda kadagiti agindeg ditoy. Naituloy ti aktibidadda iti Barangay Nagsincaoan iti malem.

Iti serbisio medikal, kaaduan a nabakunaan ti ubbing iti kontra ti sakit a kamuras ken kabbi. Kasta met kadagiti nataengan a nabakunaan  ti Pneumo 23 a para iti anti-penumonia ken kanaigna a sakit ti pagangsan.  Segun ken ni Dr. Tayao, agtultuloy daytoy nga eskediulda/aramidenda  kadagiti barangay agingga iti maileppas amin dagiti 33 a barangays  ngem regular latta met ti pannakaited ti serbisio-medikal iti Municipal RHU ti ili.

Kastoy met ti mapasamak iti serbisio-dental. Dakkel ti panagyaman dagiti nabenepisiaran kadaytoy nga outreach program ti LGU ta saandan nga agpaili ken napalag-ananda kadagiti naited a  balakad medikal ken  pannakatamingda. # (Web In-Action)

KONTROL KEN RE-CHANNELING TI KARAYAN, TALGED TI BRGY. CARUSIPAN

Cabugao, Ilocos Sur – Maysa kadagiti kangrunaan  a proyekto a naipatungpal ita iti Brgy. Carusipan ket  ti pannakaaramid ti River Control (rubble masonry)  iti umabot ti 200 a metros a naipaurnos iti karayan ken 50 metros a  pabaribar tapno maiturong ti ayus no addanton  danum ti karayan ket maprotektaran dagiti sanikua ti bumarangay iti igid  ken pasilidad ti barangay a dumna a  kurukoren ti danum no pumigsa ti ayus.  

“Pagyamananmi unay  a lumugar ken   ni Mayor Ediboy ta adda  makinaria ti Munisipio  a nakabael a mangkadkad ti gabor ti karayan ken ti naaramid a river control a mangneutralisa  ti ayus. Mangnamnamakami a maisarunonto  ti pagballasiwan,” imbatad ni Punong Barangay Oscar Pula.

Innayon ni Kapitan Pula a katulongan daytoy ti hanging bridge-da ta makadaliasatda latta koma nga agpaili nangruna no adda dagiti emergency wenno  pagteng ti biag dagiti  lumugar uray tiempo ti nepnep.

 

“Dakkel a trinsera ti kalamidad nangruna ti layus daytoy nga  pannakaasikaso ti pangtiped ken pangiturong ti ayus ti karayan. Bigbigenmi unay a proyekto daytoy ket agyamankami kada Mayor Ediboy, ni Kapitanmi ken ni Apo Diputado Rayan,” kinuna met ni Mr. Genaro Valencia,  lumugar iti nasao   a barangay.

Dinakamat pay ni Kapitan Pula a maisarsaruno ita  a mabuldoser ti karayan a  batog ti Barangay Arnap.

Ti Barangay Carusipan ket pagnaedan ti 600 a katao. # (Web In-Action)

MAKALUBAN A KANAL TI BARANGAY RIZAL, NAPASUBLI

Cabugao, Ilocos Sur – Ti covered canal ti Barangay Rizal ket naiproyekto babaen ti panangyimplimentar ti napalabas nga Administrasion ti Gobierno Lokal ti Cabugao, Ilocos Sur.

Naiwayat  ti  inspeksion ti Commission on Audit (COA) ken Project Monitoring Committee (PMC) iti babaen ti liderato ti  agdama  a nakatugaw  a Mayor Edgardo “Ediboy” S. Cobangbang, Jr.

Natakuatan ti COA ken PMC  a mapukpukaw ti nadakamat a proyekto a napunduan ti P700,000 (Pito Gasut a Ribu a Pisos) manipud iti Municipal Share ti R.A. 7171 ti ili. 

Gapu itoy, nainayon a pagrebbengan ni Mayor Ediboy ti nangbirok kadaytoy a napukaw a proyekto.
Nupay kasta,  segun ken ni Engr. Crescencio C. Formoso, Municipal Engineer, nabirokanen daytoy a proyekto ket agdama a maitartarabaho iti  babaen ti  N. Ibarra Construction  iti  Barangay Rizal, Cabugao, Ilocos Sur. # (Web Team)

CABUGAO BASKETBALL TOURNAMENT 2012, NARUGIAN!

Cabugao, Ilocos Sur  – Narugian ti Cabugao Basketball Tournament 2012 kas maikadua nga aktibidad a pangpasangbay  nga aktibidad iti masungad  a  panagpiesta ti ili a Cabugao iti bulan ti Abril 2012. Immuna ti Bingo Bonanza a naangay idi Pebrero 25, 2012 (Sabado) iti met laeng Cabugao Cultural and Sports Complex a nakaipaimaan  kadagiti nakaigasat  iti  gatad nga inabakda.

Immuna a naaramid ti parada a nagpartisiparan dagiti Team Officials   ken Players ti tunggal barangay ken Marching Band ti Cabugao South Central School ken Cabugao Institute. Kalpasan ti parada, nagtuloy  dagiti umaayam iti uneg ti Sports Complex ket na-briefingda ken nagkumitda a tungpalenda dagiti naibasa  nga annuroten ti panagay-ayamda.

Nangted ti mensahe ni Mayor Edgardo “Ediboy” S. Cobangbang, Jr. kadagiti naitallaong iti  complex.  Kimmablaaw ken binigbigna ti tunos   dagiti agtutubo iti panangipatungpalda  ti   responsibilidadda a mangaramid  kadaytoy a  salip  ti ay-ayam. Dagiti ar-aramidenda ita dagiti agtutubo  ket  mainayon a  pakamulianda  ken puonan ti napintas a  masakbayan ti ili a Cabugao . Innayon ti Alkalde a no  mataginayon ti kastoy a  bilang  dagiti nagpartisipar ket addanto maited kadakuada a sorpresa inton malpas ti liga.

 Impalagip pay  ni Mayor Ediboy kadagiti agsasalip/agbuybuya  a bisitaenda  ti Municipal Website babaen ti www.cabugao.gov.ph para iti detalye ken resulta ti inaldaw nga ay-ayam.

 Immuna a nagsalisal  a Team ket dagiti umaayam nga agtutubo ti Barangay Lipit ken Barangay Salapasap. Inannong ni Mayor Ediboy ti ceremonial toss iti panangrugi ti ay-ayam.

Bimmayabayda ken  ni Mayor Ediboy da ABC President, Rizal Brgy. Captain Teddy U. Soller,  SK Federated President Benazir Sarmiento ken opisiales ti barangay ken pannakabagi ti LGU a nagasistir   iti panaglukat ti paay-ayam. # (Web In-Action)  

PUG-OS NHS 15TH FOUNDATION DAY, NASELEBRARAN

Cabugao, Ilocos Sur  – Naangay ti 15th Foundation Day Anniversary ti Pug-os National High School idi Pebrero 23-24, 2012. Iti Pebrero 23, 2012, naaramid ti Fun Run iti 5:00 A.M.-6:30 A.M.    a nagpartisiparan dagiti mangisursuro, PTA Officers and Members, opisiales ti Barangay, bumarangay, PNP ken NGO’s.

Iti Pebrero 24, 2012, inannong ni Rev. Fr. Felicisimo “Rudy” Ferrer, Kura Paroko ti ili ti Thanksgiving Mass ken naisaruno ti Parlor Games, Quiz Bee (Individual/Team). Iti malem, naaramid ti programa a culmination ti dua nga aldaw a panagselebrar.

Nag-Welcome Address  ni Mrs. Emilia S. Lano, T.L.E. Coordinator ken History of Pug-os NHS ti binagi nga imbinsabinsa   ni Mrs. Lilia S. Savella, Head Teacher 2.  Kalpasanna, nangipaay ti intermission number dagiti mangisursuro ti high school.

Nagpaay a Guest Speaker ni  Nag-Mayor Andrea “Dely”  Soller-Tan. Kimmablaaw ken  nagyaman  ti Pasado a Mayor  ti pannakikaysana iti selebrasion. Binigbigna met   ti akem dagiti mangisursuro  a timmulong a  nangilungalong ti pannakapatakder dagiti tallo a public high schools ti ili.

Imbasa ni Head Teacher Lilia S.  Savella  ti pakakitaan ti  pammadayaw nga inted ti Pug-os NHS  ken naiyawat ken ni Ex-Mayor Soller Tan.

Naiballaet ti Got Talents dagiti estudiante a nakaipabuyaan dagiti  kanta ken moderno a   sala a  nakaaramatan dagiti naisangsangayan nga aruat.   

Impaay   ni Mayor Edgardo “Ediboy” S. Cobangbsang, Jr. ti mensahena kadagiti amin a nagatendar iti selebrasion. Impeksa  ti Alkalde ti panagtultuloy  dagiti umili ti pammati ken pannakikammayetda iti  Gobierno Munisipal  ken  batangda met nga aramiden   ti pasetda a mangipatungpal    kadagiti kasapulan pay  a pasilidad ken serbisio para   iti pagadalan.

Imbasa met ni SB Secretary Maxfel S. Suboc ti mensahe ni Vice Mayor Danny Q. Gazmen  a nakaipalaonan ti panangkablaawna   ti naballigi  a  selebrasion ti anibersario ti eskuela-sekundaria.

Nangted met ni   Mrs. Marieta Y. Baclig, PTA Federated President ti  Words of Gratitude. Naipakaammo ken nayawat dagiti premio dagiti nangabak iti  naaramid a PNHS Got Talents. Nagpaay nga emcee da Mrs. Ria D. Samelin ken Mrs. Janine V. Pula.# (Web In-Action)  

16TH FOUNDATION CELEBRATION TI LIPIT NHS, NAISAYANGKAT

Cabugao, Ilocos Sur – Naangay  ti panangselebrar ti Lipit National High School ti maika-16 a tawenna  manipud iti pannakabuangayna  a pageskuelaan-sekundaria iti Cabugao, Ilocos Sur idi Pebrero 23-24, 2012 iti mismo a Multipurpose School Pavement  ti nasao a pageskuelaan a nagatendaran dagiti agad-adal, nagannak, mangisursuro, opisiales ti ili ken   barangay, ken lumugar  ti Barangay Lipit.

 
Naaramid ti Nasantuan a Misa idi Pebrero 23, 2012 kas umuna a parte ti selebrasion. Napasamak  ti seremonia ti pagadalan iti Pebrero 24, 2012 a no sadino a ditoy ket nakoronaan da Miss High School  Day 2012, Her Majesty Queen Pamela 1st  ken Mr. High School  Day 2012, His Royal Highness King  Patrick 1st.

 
Insaad ni Mayor Edgardo “Ediboy” S. Cobangbang, Jr. ken kaduana ni  SB Member Vicky S. Serna, Chairman, Committee on Education, ti korona ni Queen Pamela 1st  ken King Patrick 1st . Ni SB Member  Jemaima Tan-Yee, M.D. ti nangipan ti Cape, binagi met da Mr. & Mrs.  Arnel Pines ken Mr. & Mrs. Sesinando Rosales ti Sash, Buttoner ni Mr. Arnold Pines ken Bouquet ni Mrs. Myrna Valera.

 
Kalpasanna, impaay ni Mayor Ediboy ti mensahena. Kimmablaaw ken dinayawna ti kinatunos dagiti mangisursuro, nagannak  ken estudiante a nangigannuat  daytoy a panagselebrar. Innayon  ti Alkalde  a babaen ti edukasion ket   maisaganaan   dagiti agtutubo a mangannong  ti akemda iti  masakbayan babaen ti  pannakamuli ti panunot ken kabaelanda  kadagitoy  a napintas nga  aramid. 

  
Imbatad met ni Mr. Rodolfo F. Ponce, Head Teacher 2  ti Lipit National High School ti panagyamanda kadagiti nagatendar nga  opisiales ti Gobierno Lokal nga idauluan ni Mayor Ediboy. Kayatda met  a ragpaten ti dadduma pay a  pagsayaatan  ti pageskuelaan ket babaen ti tunosda kadagiti nagannak ken agad-adal ket matun-oyandanto iti tulong ti Gobierno Lokal.

 
Naituloy ti  maikatlo a parte ti   selebrasion iti kamalmanna babaen iti pannakaangay ti  programa  para iti Juniors-Seniors Prom  dagiti agad-adal ti nasao a pagadalan.  # (Web In-Action)

DADDUMA A NAGSAAD ITI ROYAL COURT:

1st Princess, Reyna Cristel Pula      
1st Prince , Alden Seguba      
2nd Princess, Janice Savellano      
2nd Prince Antonio Alvarez      
3rd Princess Jozell Diane Salem      
3rd Prince Jayser Paul Padua      
4rth Princess Ellysa Mae Vallangca      
4rth Prince Kieth Howel Villalon     

BRIEFING, NATRATAR TI PAKASEKNAN TI BFP

Cabugao, Ilocos Sur – Naaramid ti Briefing   dagiti opisina ti Bureau of Fire Protection,  Municipal Treasurer’s Office, Municipal Budget Office, Municipal Engineering Office ken Municipal  Assessor’s Office pakaseknan  ti   Building  and  Occupancy Permit ken Fire Inspection Certificate a pagrebbengan a bayadan  dagiti umili   a mangipatakder  ti pasdek  ken negosio iti ili a Cabugao idi Pebrero 24,  2012 iti Opisina ti Mayor. 

Daytoy a kalikagum ni    Fire Marshal, BFP  Inspector  Elmer C.  Acapuyan   ket paset  ti panag-update ti opisinada  kas  baro  a mangidaulo ti BFPCabugao.

Nagatendar da Municipal Treasurer Lourdes A. Azcueta, Fire Marshal Elmer Acapuyan ken dua nga adda iti babaenna,  Municipal Engineer Crescencio C. Formoso, Budget Office  Assistant Lolita S.  Sunio,  Mrs. Meselyn S. Cachapero  ti Local Assessor’s Office ken   Personnel  ti  Municipal Treasurer’s Office,  da:  Mr. Marlon Ramos ken Ms. Buena Sinco.

Kalpasan a trinatarda dagiti pakaseknan ti BFP, napagkaykaysaanda idi agangay nga agtitinnulongda a mangpasayaat ti koleksionda kadagitoy nadakamat  a mabayadan.  # (Web In-Action)

MAYOR EDIBOY, NANGORONA DIAY SALOMAGUE ELEMENTARY SCHOOL

Cabugao, Ilocos Sur – Naaramid ti coronation ceremonies ti popularity contest nga insayangkat dagiti mangisursuro ti Salomague Elementary School nga idauluan ni Mr. Ronel M. Ubaldo, Head Teacher 3 ken Parent-Teacher Association (PTA) nga ipanguluan ni Mr. Reynaldo Lagua idi Pebrero 24, 2012 a no sadino a  ditoy ket nakoronaan ni  His Royal Highness King John Joshua Serrano ken Her Majesty Queen Shenalyn Mendoza babaen ti panangisaad da  Mayor Edgardo “Ediboy” S. Cobangbang, Jr. ken OIC District Supervisor for Public Schools Mrs. Helen V. Siruno. Da met Vice Mayor Danny Q. Gazmen ken SB Member Vicky S. Serna ti nangipan ti Capa ti Ari idinto ta da Principal Estrelita Siruno ken Salomague Brgy. Captain Eliseo Serrano ti Capa ti Reyna.

Daytoy  a panagpakandidata ket paset ti proyekto ti Federated PTA iti DepEd District ti Cabugao tapno adda mausar a pangsupusop kadagiti kasapulan dagiti agad-adal.

Iti mensahe ni Mayor Ediboy, kimmablaaw ken nagyaman iti kinatunos dagiti nagannak ken mangisursuro a nangiyusuat daytoy a pasamak ditoy a pagadalan. Batang met ti Gobierno Munisipal ita a mataming ti pakaseknan ti Edukasion a maysa a kapatgan a ragpaten dagiti umili. # (Web In-Action)

DADDUMA PAY A NAISAAD ITI ROYAL COURT:

Jhonwin Escobar, 1st Prince      
Nikka Valdez, 1st Princess      
Ira Bradley Castro, 2nd Prince      
Reanne Corrales, 2nd Princess      
Jovan  Ubaldo, 3rd Prince      
Derlie Jane Tolentino, 3rd Princess      
Ronnie Jun S. Serrano, 4rth Prince      
Kimberly Ann S. Modesto, 4rth Princess      
Marlou Tisbe, 5th Prince      
Kinkinrose Alteran, 5th Princess      
Chevey M. Serrano, 6th Prince      
Nayumi Nicole Alicante, 6th Princess      
John Edrick Primor, 7th Prince      
Charlotte May Vallejo, 7th Princess   

NAGBAKUNA DAGITI TAGA-BALAY TARIPATO

Cabugao, Ilocos Sur – Nagturong ti grupo ni Dr. Lotgarda Tayao, Municipal Rural Health Physician ti ili a Cabugao iti Balay Taripato a masarakan iti Barangay Bonifacio, Cabugao, Ilocos Sur idi Pebrero 23, 2012  tapno mangtedda ti serbisio-medikal babaen ti panagbakunada iti “pneumococcal vaccine”   kadagiti nataengan (lallaki ken babbai) ken mairaman metten dagiti personnel.

Nakikammayet dagiti medical attendants  ditoy nga institusion iti grupo ni Dra. Tayao ket inamirisda ti kasasaad ti salun-at  dagiti agindeg agraman dagiti agtartarabaho ditoy a patinayon a kalanglangen dagiti  a nataengan.

Nabakunaan dagiti  nataengan agraman  dagiti empleado ti balay-pagtaraknan tapno adda proteksionda iti sakit a kakuykuyog  ti panagbaket/panaglakay kas gagangay a mapasamak.  Adda 36  ti bilang ti nabakunaan.   Nagyaman dagiti mangtartarawidwid iti Balay Taripato-Cabugao kasta met dagiti empleado a nabakunaan  iti RHU Cabugao ken iti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti health care program and assistance  a mait-ited kadakuada.
Nagasistir met da Mrs. Mylene S. Garcia, Miss Joy Sayo ken Miss Giline Castillo, agpapada a pannakabagi ti RHU Cabugao. # (Web In-Action)