MAUDI A DUTY TI NGO NURSES ITI BRGY. BACLIG ITA A LAWAS

Cabugao, Ilocos Sur – Naaramid ti panageksamen dagiti NGO Nurses ti Marie Stopes International kadagiti kababaihan ti Brgy. Baclig, Cabugao, Ilocos Sur ita a Hunio 30, 2012. Pinansangbay  ni On-Duty Chief Tanod Arian Segui dagiti sangaili iti Barangay Hall ket dagus a nagtrabaho dagiti Nurses apaman a simmangpet dagiti agparikna nga inna ken babbai.

Timmarabay met da Brgy. Captain Ely S. Savella, Brgy. Treasurer  Veronica S. Pacag ken Mrs. Gloria T. Segui, Barangay Health Worker  kadagiti sangaili.

Idauluan ni Brgy. Captain Ely S. Savella dagiti kabarangayanna nga agyaman iti  Gobierno Munisipal ta simmangbay dagitoy a pagimbagan a mangtaming kadagiti pakaseknan dagiti  babbai. # (Web In-Action)

PERSON WITH DISABILITY, NAORGANISA DITOY CABUGAO

Cabugao, Ilocos Sur – Naorganisa ti sektor ti adda an-annayenna nga umili ti Cabugao ita nga aldaw, Hunio 29, 2012 iti Municipal Conference Hall  babaen ti panangigannuat ti  Opisina ti DOLE-Vigan City ken LGU-Cabugao nga idauluan ni Mayor Edgardo “Ediboy” S. Cobangbang, Jr. babaen iti panangimaton ti  MSWDO-Cabugao.

Kalikaguman ti DOLE-Vigan City a mangted ti livelihood assistance kadagiti “disable” ket kayatda a maisadag iti organisasion. Daytoy a gay-at ket mayataday iti direktiba ni Mayor Ediboy a masapul a probitsaren dagiti asosasion ti serbisio ti  nadumaduma a sektor dagiti maseknan nga Ahensia a makatulong kadakuada.

Kadua ni Mrs. Nora Reintar, Assistant MSWD Officer ti DOLE Officer a nangilawlawag ti panggep ti panagtitipon ken naelektaran dagiti opisiales ti asosasion idi agangay. Dagiti napili nga agtakem iti 2012-2013 ket isuda: Dante Ullero, Presidente; Magno Carbonel, Bise Presidente; Norma Pastor, Sekretario; Celestino Baclig, Sub-Sek.; Preny Rondon, Treasurer; Arland Valencia, Assistant Treas.; Marilyn Sajonia, PRO; Christian Sinco, Auditor.

Umuna nga addang nga ipatungpalda ti pannakabukel ti Constitution and By-Laws-da ken iti pannakairehistroda iti DOLE-Vigan City ken pannakaakreditar ti asosasionda iti LGU-Cabugao. Umabot nga 80 ti kameng ti nasao nga asosasion. # (Web In-Action)

TEST REGISTRANT TI A&E TI ALS, MASAGAT TI AGEKSAMEN

Cabugao, Ilocos Sur – Naisayangkat ita nga aldaw Hunio 29, 2012 ti panageksamen dagiti agad-adal iti Accreditation and Equivalency Program ti Alternative Learning System (ALS) ti Cabugao DepEd District.

Imbatad ni Mr. Warren Sumibcay, ALS Mobile Teacher, a daytoy ti karigatan a parte ti panagadal ta adda inyetnag ti ngato a reglamento  a masapul a mapaadda dagitoy a requirements tapno  makapageksamen dagiti nagenrol/agad-adal iti  ituyang ti ALS babaen kadagiti sumaganad:
NSO Birth Certificate
Drivers License
Brgy. Certification
Postal ID
Voters ID
2x2 Picture, 2 pieces with name tag

Innayon ni Mr. Sumibcay a napaigetan ti panageksamen dagiti agad-adal gapu iti rimsua a problema iti kallabes iti sabali a pagadalan a saan a pannakailanad  dagiti pudno a datos  iti biag dagiti agad-adal.

Innayon ni Maestro Warren nga umad-adu ti agadal iti umay a tawen gapu ta maamirisdan ti pateg daytoy  ken umad-adun ti makaawat ti panggep daytoy a pannakaedukar dagiti dropouts babaen ti suporta ti LGU-Cabugao ken Cabugao DepEd District Office. # (Web In-Action)

NAG-DUTY TI NGO NURSES ITI UPPAT A BARANGAY

Cabugao, Ilocos Sur – Nag-duty ti innem nga NGO Nurses iti uppat  a barangay ita a Hunio 29, 2012 babaen ti panangkuyog dagiti Cabugao RHU Midwives a napan iti Barangay Rizal,  Quezon, Turod- Patac ken Bonifacio.

Dinanonda dagiti pasienteda iti Barangay Hall a kaaduan ti inna ken nagasistir met dagiti Barangay Health Worker ken Barangay Nutrition Scholar kadagita a barangay. Iti kamalmanna, nabara ti panangsarabo da  Brgy. Captain Valentin S. Tuyor, Jr. agraman opisiales a babbai  ti Brgy. Bonifacio kadagitoy a sangaili nga umay mangtulong kadagiti kalugaranda a babbai.

Imbatad dagiti opisiales  ti barangay a napanan dagiti Nurses a  naipakaammo daytoy sakbayna   ti  yuumay dagiti agagas ket masagsaganad ti yaay dagiti inna a manamnama nga adda pakaseknanna nga ipariknada kadagitoy nga eksperto iti sakit ti babbai. # (Web In-Action)

PULIDO TI PANNAKAARAMID DAGITI COVERED CANAL ITI BRGY. RIZAL

Cabugao, Ilocos Sur – Naaramid  dagiti covered canal kadagiti kalye ti Brgy. Rizal, Cabugao, Ilocos Sur iti napintas a panagkammayet ti Sangguniang Barangay nga idauluan ni Brgy. Captain Teddy U. Soller ken ti Gobierno Munisipal nga idauluan ni Mayor Edgardo “Ediboy” S. Cobangbang, Jr.
Malaksid a napalawa ti kalsada, pimmintas ti buya ti agsumbangirna gapu ta napintaandan  nangruna iti Pacis Street. Napasingkedan ti nasayud a panagtaray ti danum iti tudtudona iti dua a napalabas bagyo.

Imbatad ni Kagawad Gabriel “Gabby” G. Sunio a makipagtamingda iti trabaho ti agtultuloy a pannakakalub  ti agsumbangir a kanal   kadagiti  kalye ti barangay tapno sapasap a mabenepisiaran dagiti bumarangay. Iti agdama, tartarimaanenda   dagiti kanal a napunduan manipud  ken ni Diputado Ryan Luis V. Singson, First District, Ilocos Sur.

Manamnama a maragsakan ken agyaman dagiti agindeg a makawidawid kadagitoy a kalsada ta ibilangda a ti napintas a kalsada ken dranaige facilities ti maysa a  mangpanam-ay kadagiti agindeg iti  naprogreso a komunidad. # (Web In-Action)

EMERGENCY MEETING TI FEDERATED BRGY. TREASURERS, NAANGAY

Cabugao, Ilocos Sur – Nagmiting ti Federated    Barangay Treasurers  ti ili a Cabugao, Ilocos Sur babaen ti panag-Preside ni Mr. Fernando Duque, Presidente ken  Barangay Treasurer ti Brgy. Cuantacla idi Hunio 29, 2012 iti SB-ABC Hall  tapno tamingenda ti singasing a pannakipasetda iti  seminar iti ruar ti Munisipalidad ti Cabugao.

Nupay determinado ti Federated Brgy. Secretaries a mangipatungpal kadaytoy a gannuat, kayat met  dagiti Tesorero a maala ti konsensus a pagnunumuanda  ti kaaduan tapno nasaysayud ti panagtutulagda maipanggep kadaytoy a gay-at.

Aktibo ti Liga ti Tesorero a mangannong iti pagrebbenganda iti barangay ken iti pederasionda iti agdama. # (Web In-Action)

MDRRMC, NAKASAGANA NO RUMSUA TI KALAMIDAD

Cabugao, Ilocos Sur – Nagaksion idi  Hunio 28, 2012  ti Skeleton Force ti    Municipal Disaster Risk Reduction Management Council (MDRRMC) a nangpadaan no   inkaso a kumaro ti madi a panawen (Bagyo Dindo, Signal No. 1), segun ken ni Mr. Nestor B. Somera, pangulo ti MDRRMC-LGU-Cabugao.

Sakbayna, inaprobaran ni Mayor Edgardo “Ediboy” S. Cobangbang, Jr. ti Skeleton Force ti MDRRMC ita a Tawen 2012 a mangtaming ken  mangsaluad kadagiti umili iti idadateng ti kalamidad/didigra.  Ti surat ti MDRRMC ken ni Mayor Ediboy ket   nakaipalaonan pay ti annuroten a binukel ti nasao a Konseho kas iti sumaganad:

• Agaktuar dagiti kameng sakbay ken kalpasan ti sumungad a  bagyo/kalamidad. Dagiti empleado ti Munisipio a kabilang ti Konseho ti MDRRMC ket agreportda iti Munisipio ken  pokusanda  dagiti maireport nga agpeggad a disso ken asistiranda ti maireport a pagkasapulan ti tulong ti dadduma nga MDRRMC Teams. 
• Dagiti adda iti barangay ket tulonganda dagiti kameng ti Barangay Disaster Risk Reduction Management Council (BDRRMC) ket mapusganda nga agireport iti Munisipio ti napasamak iti lugarda ket maipaay ti umisu a tulong para kadagitoy.

Napigsa  a tudtudo ti nasagrap ti Munisipalidad ti Cabugao iti nasibet a  Bagyo Dindo, awan pay laeng  ti nakaro a naireport a nadadael malaksid iti nagabgaboran a bunubon a pagay idiay Barangay Maradodon.   # (Web In-Action)

DAGITI MANGBUKEL TI MDRRMC-LGU Cabugao:

Nagan	Base
Engr. Crescencio Formoso	Municipal Hall
Nestor Somera	Municipal Hall
Melvin Castro	Municipal Hall
Donnell Peralta	Municipal Hall
Noriel Fernandez	Municipal Hall
Bobby Rey Naval	Muniipal Hall
Jeff Bryan Sonico	Municipal Hall
Reynold Cruz	Municipal Hall
Gerry Salom	Municipal Hall
Honorato Castillo	Municipal Hall
Modesto Somera	Municipal Hall
Crescencio Azcueta	Municipal Hall
Rexor Abara	Municipal Hall
Hermes Asit	Cuancabal
Conrado Segui	Arnap
Marlon Ramos	Cuantacla
Melito Asuncion	Lipit
Renato Roman	Cuancabal
Edgar Balangatan	Sagayaden
Obas Bill Baclig	Pug-os
Jonell Castillo	Reppaac
Stephen Suboc	Maradodon

NAG-FIELD DAGITI NGO NURSES URAY AGBAGYO

Cabugao, Ilocos Sur – Maikatlo nga aldaw ita a Hunio 28, 2012  dagiti NGO Nurses (innemda) nga umay agamiris  ti  pakaseknan dagiti inna/babbai kas paset ti nasamay a pannakaidur-as ti Family Planning  iti Munisipalidad ti Cabugao babaen ti pannakikammayyetda iti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Kalikagum dagiti Nurses a maserbisyuanda dagiti barangay a nayeskediulda a papanan kas iti Brgys. Pila, Reppa-ac ken Sisim idi Hunio 26, 2012; Brgys. Cuancabal ken  Salapasap idi Hunio 27, 2012; ken Brgys. Catucdaan ken Bungro ita a Hunio 28, 2012. Determinadoda a maileppasda dagitoy nga ayan dagiti addaan ti  pakaseknan  a babbai maibasar iti sensus ti RHU tapno adda magapuananda  iti panag-outreach-da iti makalawas.

Ti Marie Stopes International (Population Services  Pilippinas, Incorporated)  ket addaan ti 11 nga Opisina iti Pilipinas. Masarakan ditoy Luzon idiay Brgy. Bayaoas, Urdaneta City, Pangasinan.  Nangrugi daytoy a mission idi 1990 ditoy Pilipinas. Naka-base idiay London, UK daytoy nga NGO  ken addaan iti agdama iti 42 a nasion a  sangana  ken addaan pay iti 600 nga Centers iti sangalubongan.

Ni Ms. Joan Casildo, Senior Service Provider (Urdaneta Branch) ti mangtarawidwid kadagiti nagbisita a Nurses. Ni met Mr. Virgilio Pernito ti Chief Executive ti Marie Stopes Clinic (Philippines). # (Web In-Action)

ASOSASION TI MANNALON TI BRGY. CATUCDAAN, NABUANGAY

Cabugao, Ilocos Sur – Naorganisar dagiti mannalon iti Barangay Catucdaan idi Hunio 26,  2012 babaen ti panangasistir dagiti pannakabagi ti DA-LGU nga imbagian ni Mr. Robert S. Savella, AT; Mr. Obas Bill Y. Baclig, AT; ken Miss Kathryn Tapuro, JO,  iti Barangay Hall  ken nakitaripnong met  ni Brgy. Captain Dominador Seguritan.

Dagiti naelektaran nga agtakem ita a Tawen 2012-2013: Jesus Sambilin, Presidente; Edito Sapinoso, Bise Presidente; Elmer Sedantes, Sekretario; Marlon Seguritan, Treasurer; Brando Morales, Auditor; Regie Seguritan ken Robert Seguritan, P.I.O.

Maangay ti regular meeting-da iti kada maudi a Domingo ti bulan iti ala una ti malem (1:00 pm). Agbayadda ti Membership Fee a P50 ken Annual Fee a P120. Addaan ti Catucdaan Farmer’s Association iti 64 a miembros iti agdama.

Mayannatup  ti pannakabuangay ti asosasion iti agtultuloy a programa ti Gobierno Munisipal nga idauluan   ni Mayor Edgardo “Ediboy” S. Cobangbang, Jr. a pannakapatibker ti asosasion dagiti mannalon tapno adda “juridical identity-da”  a maki-transact ken  mangprobitsar kadagiti serbisio ken pagsayaatan nga itden dagiti maseknan nga  Ahensia ti Gobierno kas iti DA ken DOLE  ken kadagiti pay  programa ti LGU-Cabugao para kadagiti mannalon iti agdama. # (Web In-Action)

MAPALAG-ANAN DAGITI AGPAPAAGAS ITI RHU-CABUGAO

Cabugao, Ilocos Sur – Inaldaw malaksid ti Sabado ken Domingo ti naruay nga umili a mapan agpaagas ken agpagabut ti ngipen iti RHU-Cabugao.

Imbatad ni Dr. Lutgarda “Loty” Tayao, Municipal Rural Health Physician  a kaaduan nga an-annayen dagiti pasiente ket uyek, panateng ken gurigor. Kangrunaan a maapektaran dagiti ubbing ken nataengan. Adu met ti bilang iti agparikna iti Pre-natal ken  OB-Gyne. Nupay kasta, mapalag-anan dagiti agpaagas ta adda latta mayawidda nga agas a maited. No adda man  nakaro ti sakitna nga agparikna, maikkan ti reseta ken pammatalged  no awan ti agasna a maited kalpasan ti konsultasionna.

Innayon ni Dr. Tayao a mainaynayon a pagserbisyuanda dagiti kameng ti 4 P’s (Pantawid Pamilyang Pilipino Program) iti Brgys. Sabang, Namruangan, Dardarat, Daclapan ken Pug-os.
Iti sabali a bangir, umad-adu met ti  bilang ti umili ti  agpagabut ti binukbok a ngipenda kadagiti Dentista ti Gobierno  nangruna iti aldaw ti Lunes ken Martes nga eskediul iti RHU.

Ti agtultuloy a pannakatagiben ti salun-at ket maysa kadagiti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno agbalin a produktibo dagiti umili para  iti pamiliada, komunidad ken iti Munisipalidad nga ayanda. # (Web In-Action)

KALSADA KEN DRAINAGE TI BRGY. BACLIG, SIMMAYAATDA

Cabugao, Ilocos Sur – Pannakalayus ti masakupan ti Brgy. Baclig ti maysa a pakaseknan dagiti bumarangay iti kallabes  no panawen ti bagyo ken napigsa a tudtudo. Maysa a makagapu ket dagiti drainage a nailet ti imbornalna ket narigat a makapagbulanos ti ayus nangruna no maappelan ti tubo ti rugit ken darat. Sagabaen ti barangay ti agtawataw a danum iti manipud iti  surong.

Imbatad ni Brgy. Captain Ely S. Savella a dakkel ti nagsayaatan dagiti box culvert a nagbalinan  dagiti imbornal. Pinagyamanan met dagiti agindeg a nakadanonan ti semento a dalan iti sentro ti barangay ken iti Sitio Callaguip. Uray iti pannakaipan ti stonelined a trinsera ti irigasion ket simmayaat ti panagtalimudok ti ayus ti irigasion.

Innayon ni Kapitan Savella a maisaruno a maaramid ti covered canal babaen ti panangipaay ti Gobierno Munisipal nga idauluan ni Mayor Edgardo “Ediboy” S. Cobangbang, Jr. Idauluanna a mangipeksa ti panagyamanda iti agdama nga administrasion iti pannakataming dagiti kasapulan a mairingpas a pagimbagan ti bumarangay iti Barangay Baclig. # (Web In-Action)

NAITED A “GRANT” TI KULIGLIG ITI REPPAAC FA

Cabugao, Ilocos Sur – Naipaayan  ti Reppa-ac Farmers Association nga idauluan ni Presidente Elmer Castillo iti maysa a unit ti Kuliglig nga addaan ti makina a Yanmar TF 70L nga inted ti DA-RFU 1 babaen ti programa ti High Value Commercial Crop (HVCCP). Naited daytoy a ramit a pagtalon a kas “Grant”,  nga awan ti nausar a gatad nga equity ti LGU ken ti asosasion ngem naibatay ti pannakaited daytoy  iti naipamatmat nga inisiatiba ken panagkaykaysa dagiti mannalon a di magatadan daytoy  iti kuarta.

Babaen iti kinatunos dagiti kameng ti Reppa-ac FA, ipakpakitada a kabaelanda a probitsaren ti serbisio nga itden dagiti maseknan nga opisina ken Ahensia.

Nakikaysa ni Mayor Edgardo “Ediboy” S. Cobangbang, Jr. kadagiti opisiales ti nasao nga asosasion a namasangbay  daytoy a ramit iti Munisipio. Dinayaw ti Alkalde ti galad ti asosasion a nagbasaran ti DA-RFU 1 a nakaipaayan   ti “grant” ket kalikagumanna a matulad met dagiti dadduma  nga asosasion daytoy a talugading.

Indauluan ni Mr. Elmer Castillo, Presidente ti nangipeksa ti panagyamanda iti DA-RFU 1, DA-Provincial ken LGU Cabugao nga idauluan ni Mayor Ediboy iti akemda met a timmulong  kadaytoy a nagun-odda a balligi. Innayon ni Presidente Castillo a sumarsaruno nga awatenda ti 7 a Knapsack Sprayer para iti asosasionda, segun ken ni Miss Edith Castillo, Assistant Provincial Agriculturist a tumartarabay met iti asosasionda.

Ti nasao a ramit ket aywanan ti asosasion ngem barangay-based ti pannakausarna maibasar iti  mapagnunumuan nga    annuroten    ken  iti  pannakamantenerna. # (Web In-Action)

PAKASEKNAN TI KABABAIHAN, MISION DAYTOY NGA NGO

Cabugao, Ilocos Sur – Simmangbay ti innem a Nurses a pannakabagi  ti Population Services Pilipinas, Inc. (London-based NGO) ken adda ti opisinada iti Urdaneta City, Pangasinan  ditoy ili ti Cabugao iti maikadua a gundaway ita a Hunio 26, 2012 ket nagtarusda iti RHU-Cabugao tapno ipaloapda ti nagdur-asan dagiti inamirisda a kababaihan iti immuna a yuumayda a ditoy a nakikoordinarda ken nakasarsaritada  ni Mayor Edgardo “Ediboy” S. Cobangbang, Jr. maipapan iti panagserbisioda iti salun-at ti sektor ti babbai iti Munisipalidad.

 
Kinuyog dagiti RHU Midwives a nagturong iti Brgy. Reppa-ac, Pila ken Sisim ita nga aldaw.
Ti serbisio nga itdenda ket iti pakaseknan ti Family Planning kas iti Marie Stopes Ligation, IUD Insertion/Removal, Pap Smear Plus ken Other Family Planning Services. Dagitoy a panagamiris ket napateg unay kadagiti inna nangruna iti barbarangay agsipud ta agraira dagiti sakit a kabaelanda nga agasan. Ti pagsayaatanna, masigud a maagasan no adda maduktalan a sakit ket maliklikan  ti gastos ti maseknan inton maidagelen.

 
Ti nasao nga NGO ket umayda kada 4-6 a lawas ti mapalabas  tapno makitada/matingitingda  ti pagdur-asan dagiti nagparikna nga inna.

 
Iti maikadua a batch ti Nurses nga immay ket isuda: Aileen Savella, Aiza Ibea, Delyn Arrocena, Michelle Annayasan, Mae Angelica Amoroso,  ken Honey Paulene Arcega. # (Web In-Action)

2012 LIKAS YAMAN AWARDEE, INYALAT TI BRGY. DARDARAT

Cabugao, Ilocos Sur – Babaen ti surat nga impatulod ni  DENR  Regional Executive Director Samuel R. Penafiel, CESO 111 ken ni Brgy. Captain Danny S. Garcia ti Barangay Dardarat, nagun-od ti Barangay Dardarat ti “Likas Yaman Awardee for Environmental Excellence for Best Community-Based Coastal Project iti intero a Rehion Uno ita a tawen 2012.

Nabigbig ti Brgy. Dardarat gapu iti panangtagibenna ti katangriban ken kabaybayan babaen ti panagmulada ti mangrove ken naisalumina ti asosasionda a katulongan ti barangay ken ti Munisipalidad a mangprotektar ti rekursos naturales iti igid ti baybay.

Mapadayawan ti Brgy. Dardarat inton Hunio 29, 2012 sadiay Oasis Country Resort, San Fernando City, La Union.

Imbatad ni MENRO/AT Edgar S. Balangatan a  daytoy a pammadayaw ket bunga met ti agtultuloy a panangtarabay ti DA-LGU ken panangitandudo ti Gobierno Munisipal  nga idauluan ni Mayor Edgardo “Ediboy” S. Cobangbang, Jr. iti pannakataming iti kasasaad dagiti komunidad iti igid ti baybay ken pannakasaluad dagiti napateg a rekursos naturales a puon ti pagbibiaganda. # (Web In-Action)

GOVERNMENT INTERNSHIP PROGRAM (GIP) TI MSWDO, NAIPATUNGPAL

Cabugao, Ilocos Sur – Naipatungpal ti Government Internship Program (GIP) kadagiti agtutubo a nagsardeng a nagadal ket nangrugida a nagobra idi Mayo 2, 2012. 52 nga aldaw ti maited kadagiti 36 a madama ita nga agtartarabaho iti salinong ti opisina ti MSWDO nga idauluan ni MSWD Officer Lydia S. Gazmen.

Malaksid iti itutulongda nga agtrabaho iti opisina ti MSWDO, naibaonda pay a nag-census iti barangay. Ni Miss Carol Serdenia ti Brgy. Reppa-ac ti napusgan a lider dagiti agtutubo nga agob-obra. 

Ita a Hunio 25, 2012, timmaripnong ni Mayor Edgardo “Ediboy” S. Cobangbang, Jr. iti Municipal Conference Hall nga ayan dagiti agob-obra nga agtutubo. Imbaga ti Alkalde kadagiti agtutubo  a makisarita ken ni MSWD Officer Lydia S. Gazmen maipapan daytoy a programa ti MSWDO. # (Web In-Action)

NALABON TI ANGSEN TI UBBING DITOY A PAGADALAN

Cabugao, Ilocos Sur -  Pagwadan a pagadalan ti Pila Elementary School, Brgy. Pila, Cabugao, Ilocos Sur nga idauluan  ni Mr. Donato G. Sajor, Head Teacher 3 gapu ta namsek ti pinuon ti nalalayog a pinuon ti kayo kas iti narra, mahogany, ken dadduma a klase  a kayo ti  naipalawlaw iti uneg ti solar ti eskuela ken igidna  nga immula ni Head Teacher Sajor  idi damona ti agisuro kadaytoy a pagadalan.

Imbatad ni Mr. Sajor a dati a napudot ti klima ta awan ti kaykayo iti aglawlaw. Napintas ti kammayet dagiti nagannak, opisial ti barangay ken mangisursuro ditoy a barangay isu a saan a marigatan a mangigannuat iti  proyekto a kabaelanda a patauden kas iti TV/DVD  nga usarenda iti Film Viewing kadagiti ubbing, school fence, ken backyard gardening.

Compound iti Pila Elementary School

Innayon ni Sir Donato ti namnamada iti pannakaipaay ti pasdek-pagadalan a nayon ti pagbasaan ti ubbing babaen ti Gobierno Munisipal nga idauluan ni Mayor Edgardo “Ediboy” S. Cobangbang, Jr.
Napabaro ti buya dagiti pasdekda babaen ti pannakapintada nangruna iti pagopisinaanna a nabangon babaen ken ni Nag-Diputado Ronald V. Singson.

Nasalun-at dagiti agad-adal ta nabuslon ti angsenda iti sirok dagiti narukbos a kayo ken nadalus nga aglawlaw. Imbaga pay ni Sir Donat a nangabak ti pagadalanda a kas “Gulayan sa Kalusugan” iti intero a Cabugao Education District idi 2003. Nasurok a 100 ti bilang  dagiti agad-adal manipud iti Kindergarten agingga iti Grado 6. 

Ni Mr. Donato G. Sajor, Head Teacher 3

Nagiyusuat ti Feeding Program ti Free Farmers Cooperative ti Sagayaden Norte kadagiti ubbing iti kallabes ken nagidonar ti Colgate ken Toothbrush kadagiti ubbing ti DepEd Division-Regional Office itay nabiit.

Dagiti Teaching Force ti pagadalan ket isuda dagiti sumaganad: Catherine P. Silvania; Elizabeth P. Sajor, Grade 1; Luzviminda P. Rabor, Grade 2; Elvira C. Solatre, Grade 3 & 4; Arlene G. Saribay, Grade 5; Gina S. Rapin, Grade 6; ken Donato G. Sajor, Head Teacher 3. # (Web In-Action)

NAIPINAL TI PAGANNUROTAN TI FARMERS FIELD SCHOOL

Cabugao, Ilocos Sur – Nagmiting ti Pug-os Farmers Association nga idauluan ni Farmers Federated President Elmer Guerrero  Bromeo idi Hunio 24, 2012 iti Barangay Auditorium ti nasao a barangay nga inatendaran ti 38 a kameng nga agklase iti Farmers  Field School nga esponsoran ti DA-RFU 1, DA-Provincial, DA-ATI ken LGU- Cabugao nga idauluan ni Mayor Edgardo “Ediboy” S. Cobangbang, Jr.

Dagiti  napagkaykaysaan a petsa ti aktibidades:

Hulio 3- Groupings, Distribution of  School Supplies, Organization of Officers, Setting-up of School Rules and Regulations.
Hulio 11, 2012 – Transplanting.
Hulio 12, 2012 – Regular Schooling (7:00 am-11:00 am).
Hulio 23, 2012 – Distribution of   ID (9:30 am).
Napagnunumuan pay ti pannakabayad ti  annual fee  ti tunggal kameng iti  2012 ken panagbayad ti sag-P100 a kontribusion ti tunggal kameng ta adda pangrugian a pundo ti asosasion iti panagoperarna.

Nainayon a natratar  ti pannakausar ken pagannurotan ti Mini-Tractor. Naiyetnag iti Pederasion dagiti annuroten ti panangtaripato kadagiti makinaria a naited tapno maikkan ti umdas a mentenansia ket mabayag ti usarna. Napagkaykaysaan a P.40 centavos  ti pagbayad ti tunggal square meter ti maipaarado. Bale P4,000 ti pagbayad ti maysa ektaria a matraktor. Adda porsiento a bingay  para iti banko, repair ken mentenansia, para iti indibidual a bingay ti kameng, ken management staff/fund (operator ken helper)  iti pannakausar ti mini-traktora.  # (Web In-Action)

IKKAN TI DA-RFU 1 TI BRGY. REPPA-AC TI KULIGLIG

Cabugao, Ilocos Sur – Nagmiting dagiti mannalon ti Barangay Reppa-ac, Cabugao, Ilocos Sur  idi Hunio 24, 2012 iti Brgy. Multi-purpose Hall ti barangay  ken  nakitaripnong  ni Miss Edith Castillo, Assistant Provincial Agriculturist, Probinsia ti Ilocos Sur tapno ipakaammona iti idadateng ti Kuliglig with Complete Accessories nga ited ti DAR-FU 1, San Fernando City kas “grant” iti Brgy. Reppa-ac.  Naregta dagiti mannalon a nakisarsarita ken ni Assistant PA Castillo a kaduana ni Mr. Obas Bill Y. Baclig, pannakabagi ti DA-LGU Cabugao ken Municipal Seed Inspector.

Napagkaykaysaanda a P100 ti   kontribusion ti tunggal mannalon nga agkameng iti asosasion tapno adda mausar a pangrugian a pundo iti pannakausar ti makinaria.

Inlawlawag ni Mr. Obas Bill Y.  Baclig iti pagrebbengan ken annuroten  ti tunggal indibidual  nga agusar/agiggem  iti makinaria nga ited ti Gobierno. Manamnama a no maawatda ti Kuliglig ket agmimitingda  manen tapno opisial a maaramid ti pagannurotanda iti panagusaran ken pannakamantener ti nasao a makinaria.

Inulit nga inlawlawag  ni Mr. Baclig dagiti programa ti DA-LGU kadagiti mannalon babaen ti panangilungalong ni Mayor Edgardo “Ediboy”  S. Cobangbang, Jr. kas iti ID System, Fertilizer ken Oil Subsidy, pannakaited ti equity kadagiti agtarigagay ken agkasapulan ti makinaria  nga asosasion ken dadduma pay a pannakaidur-as ti teknolohia ken programa ti DAR-FU 1 , DA-Provincial Office ken LGU-Cabugao a mangpasayaat  ti kabibiag dagiti mannalon.

Naballigi a naaramid ti Open Forum a nangipeksaan dagiti nagatendar ti saludsod ken pakaseknanda. Sinungbatan a naan-anay da Ass’t PA Castillo ken Mr. Baclig ti DA-LGU dagiti   naidatag a kapampanunotan dagiti nagatendar. Timmarabay met dagiti opisiales ti barangay ken asosasion iti nasao a miting. # (Web In-Action)

ELEKSION TI FEDERATED DAY CARE/PARENTS SERVICE GROUP

Cabugao, Ilocos Sur – Naangay ti eleksion ken miting dagiti Day Care Teachers ken Presidente ti asosasion ti Day Care ti tunggal barangay idi Hunio 22, 2012 iti SB-ABC Hall, Cabugao, Ilocos Sur.
Naluktan ti reorganizational meeting iti ababa a kararag babaen ti Day Care Teacher sa nagsarita ni Mrs. Lydia S. Gazmen, MSWD Officer ti LGU-Cabugao. Dinakamat ni Mrs. Gazmen ti agtultuloy a panagpartner ti Day Care Teacher ken nagannak a mangitandudo ti pagsayaatan dagiti ub-ubbing. Imbagana nga adda MOA ti DepEd ken ti MSWDO nga ag-kinder ti ubing no agtawenen ti 5 agsipud ta 3-4 laengen ti tawenna ti  makualipikado nga ag-Day Care. Imbagana pay a saan koma a pagdiligen ti kabaelan ti Day Care Teacher ken Kinder Teacher ta adda kabukbukodan dagitoy  a mausar iti tunggal pannakaisuroda. Naipalagip pay ti Parents Participation Fee kas rebbengen ti nagannak a pangnayon ti honorarium dagiti Day Care Teacher nga agserbi kadagiti ubbing.

Naangay ti panagpipili ket dagitoy ti nabutosan para iti Tawen 2012-2013:
Presidente – Elizabeth de la Cruz, Day Care-NISTC
Bise Presidente – Luzviminda Solima, Brgy. Quezon
Secretary – Aileen Sonico,  Brgy. Turod-Patac
Treasurer – Maricar Torres, Brgy. Bonifacio
Auditor – Jayson Argel, Brgy. Pila
PIO – Judith Serrano, Brgy. Baclig; Bernalyn Siembre, Brgy. Maradodon; Cynthia Villegas, Brgy. Reppa-ac; ken Jommel Sabugo- Brgy. Sabang.

Business Managers – Elsie Siruno, Brgy. Sisim; Dahlia Sinco, Brgy. Nagsantaan; Jerry Ramos, Brgy. Salomague; ken Francis Morales, Brgy. Cael-layan.

Nagkaykaysaan pay a maigannuat ti Feeding Program iti umuna a lawas ti Hulio 2012. Agmiting ti baro a set-up inton Agosto 2012, mapabaro ti Membership Fee: P200 ti Opisial ken P100 ti Miembro.

Naiyadal kadagiti nagatendar ti sinaguday ti RA 9262 (Violence Against Women and Children) babaen ken ni LGO Officer  5  Ms. Connie Quinola ti MLGOO Cabugao sakbay a nagsisina dagiti nagatendar. # (Web In-Action)

MAPARTI NGA AYUP TI KAADUAN ITA A MAGATANG ITI DAYO

Cabugao, Ilocos Sur – Umad-adu ti malako nga ayup iti Dayo-Cabugao gapu iti pagkasapulan ti maparti ken mailako a karne iti tiendaan ti NISTC-Cabugao  ken kadagiti tiendaan ti   kabangibang nga ili.

Imbatad ni Mr. Dante Naval,  Municipal Meat Inspector  a manmano ti malako a para iti pagtrabaho iti talon. No laeng ta lumakayen ti ayup a maisukat wenno mailako ta gumatang ti mannalon ti naub-ubing. Nupay kaaduan a makinaria ti us-usaren dagiti mannalon iti agdama, adda latta paset a maitulong ti nuang a saan a maaramid ti makina. Daytoy ti gapuna nga adda latta maysa a kalantangan nga uggor ti mannalon.

Iti pannakiuman ti Web In-Action kadagiti naki-Dayo idi Hunio 23, 2012,  natakuatan iti napintas a panagkammayet dagiti mangiwarwardas ti Dayo-Cabugao  kas iti Municipal Livestock Office, Cabugao Livestock Traders Association, Municipal Meat Inspector Office  ken Meat Vendors.

Mayataday ti direktiba ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ti  agtultuloy a  pannakapasayaat ti serbisio para  iti benneg ti Dayo ken ti Slaughterhouse a mangipaay ti kasapulan a  pagtaraon ti karne  iti sapasap nga umili. # (Web In-Action)

NAGITED TI SEEDLINGS NGA NGO’S, BIMMISITADA DITOY MUNISIPIO

Cabugao, Ilocos Sur – Upland Agro Forestry ti programa nga ipakpakat ti FOCUS ON DEVELOPMENT GOALS FOUNDATION, INC. ken PHILIPPINE FOREST CORPORATION, konektado  iti Department of Environment and Natural Resources (DENR) kadagiti lugar a mayannatup a pagmulaan ti seedlings ti nadumaduma a kita ti mula kas iti Munisipalidad ti Cabugao.

Immuna a nangitedda ti 1,000 a seedlings ditoy Munisipio ti Cabugao  a kas iti Mangga, Mahogany, Guyabano ken Jackfruit idi  Marso 20, 2012 idiay Sinait, Ilocos Sur  a nakaangayan ti paseminarda.

Inawat  ni MENRO-Designate  Edgar S. Balangatan dagiti naited a seedlings  a segun kenkuana ket naideposito iti Municipal Nursery ket in-inut a  kiniddaw dagiti umili nga interesado a nagimula kadagitoy a seedlings. Kadua ni MENRO Balangatan a nagatendar ti nasao a paseminar dagitoy nga NGO’s  agraman dagiti Kapitanes ti Barangay, Chairman,  Committee on Agriculture/Environment a Kagawad  ti kada barangay.

Ni ABC President,  Brgy. Captain Teddy U. Soller ti  nangsango kadagiti pannakabagi ti dua nga NGO’s a  kaduada ti kameng ti Commission on Audit (COA) idi Hunio 22, 2012 kabayatan nga inurayda ti idadateng  ni Mayor Ediboy iti opisinana. # (Web In-Action)