Cabugao, Ilocos Sur (Hulio 2010) – Paset dagiti maiprayoridad a mataming ket ti Agrikultura babaen ti baro nga administrasion ti Gobierno Munisipal ti ili a Cabugao babaen iti liderato ni Mayor Edgardo “Ediboy” S. Cobangbang, Jr. Iti Wet Season Crop 2010 (Hunio-Nobiembre), umuna nga addang a naaramid ti pannakapasalista dagiti mannalon, mairehistroda iti DA-LGU ken maikkanda ti ID a kasapulan iti pannakasagrapda kadagiti “subsidies” a maited kadakuada.
Segun ken ni Mr. Edgar S. Balangatan, Municipal Technologist ken Techno-Demo Coordinator, inyusuat ti opisina ti DA-LGU ti Techno-Demo In Hybrid Rice Cum Palay Check System kadagiti 10 a barbarangays ti ili a Cabugao kas iti Brgys. Cuancabal, Lipit, Cael-layan, Salomague, Rizal, Aragan, Cacadiran, Sagayaden, Pug-os ken Turod. Daytoy ket pinunduan ti Gobierno Munisipal ket agarup maysa ektaria ti kalawa ti tunggal demo-farm. Narugian ti panagbunubon idi Hunio 16-18, 2010.
Sabali laeng ti pinunduan ti Departamento ti Agrikultura (DA) iti Hybrid Rice Cluster Demo a buklen ti lima (5) ektaria ti tunggal disso. Napili ti Brgy. Cuancabal ken Sisim a nakaaramidan ti demo-farm. Adda met latta programa ti DA-LGU maipapan iti panagmula ti nateng ket maaramid ti Hybrid Vegetable Seeds Distribution kadagiti mannalon nga agmulmula ti nateng nangruna iti in-between ken off-season (agtultuloy).
Nabenneg ti dua a cropping seasons ti panagmula dagiti mannalon. Iti Wet Season, Hunio-Nobiembre, pagay ti kaaduan a maimula, nateng ken mais dagiti nangato a disso ken um-uma idinto ta iti Dry Season Crop, Nobiembre-Mayo, ket tabako, mais, sandia, bawang, lasona, agduduma a nateng ken adda met latta masasao a 2nd crop ti pagay a kaaduanna nga inbred ti klasena.
Saan met a paudi ti pannakaasikaso dagiti ayup ket segun ken ni Dr. Melvin Castro, DVM, Livestock Inspector ti LGU, agtultuloy ti panagbakuna dagiti dadakkel nga ayup iti HEMO-SEP Vaccine, pannakaited pay ti anti-rabies kadagiti aso, kasta pay iti branding ti baka ken nuang.# (Insurat ni Joed Sajonia)
No comments:
Post a Comment