Monday, September 30, 2013

MOBILE OUTREACH SERVICES TI PRC DITOY CABUGAO

Cabugao, Ilocos Sur – Nayeskediul ti Setiembre 27, 2013 iti Araw ng Propesyonal (Mobile Outreach Program) ti Professional Regulations Commission (PRC) tapno dumanon dagiti Propesional a mangipabaro ti lisensiada, agaplikar iti eksaminasion wenno Board Examination kadagiti Kurso a lineppasda kasta metten  a pasingkedanda no nakaruarda iti napalabas nga eksaminasion ken pa-authenticate-da dagiti dokumentoda iti PRC. 


Dadduma pay a panggep/serbisio nga itden ti PRC Baguio ket dagiti sumaganad: 

1.Initial Registration for Licensure Examination passers;
2.Application for licensure examinations;
3 Renewal of Professional ID/License;
4.Release of Professional ID Card and 
5.Certificate of Registration (per prior request by the professional and subject to availability); and
6.Issuance (upon request) of Certification of Good Standing.


Umuna manen a mapasamak ditoy ili ti Cabugao iti intero nga Ilocos Region (region 1)  ket agpatingga daytoy a programa  inton Disiembre 12, 2013 idiay Candon City.

Sakbayna, nag-courtesy call ti PRC Team nga idauluan ni Mr. Russell Jucotan ken ni Mayor Edgardo “Ediboy” S. Cobangbang, Jr. sakbay a naaramid ti transaksion kadagiti Professionals iti  Municipal Conference Bulding iti Setiembre 27, 2013. 

Dadduma pay nga impormasion a kayat nga ammuen ket ag-log on iti PRC Website: prc_baguio.blogspot.com. # (Web In-Action) 

COOK-OUT TI GIRL SCOUTS, NAANGAY

Cabugao, Ilocos Sur -Naangay ti Cook-out Activities ti Girl Scouts of the Philippines (GSP)-Cabugao South Central School Chapter  a nagatendaran dagiti Twinkler Scouts, Star Scouts ken Girl Scouts iti pagadalan ti Cabugao South CS nga idauluan ita ni OIC Edgardo P. Sajonia.


Iti pannakiuman ti Web In-Action iti Setiembre 27, 2013, inyuna daytoy a pagadalan ti nangigannuat ti kastoy nga aktibidad iti Cabugao DepED District  kas pangkulminar ti Scouting Month a nangitampok ti kabibiag ni Josefa Llanes Escoda, mabigbig  a Pundador  ken Ina ti Scouting iti pagilian.


Innayon dagiti mangisursuro a nangtarawidwid kadaytoy nga aktibidad nga idauluan ni Mrs. Edith Savellano a babaen itoy nga aktibidad ket mapadasanda, maisaganada nga agakem iti responsibilidad iti panagluto iti pagtaengan ken kalpasanna ket  maangay ti salu-salo a pakasursuruanda iti mayataday a pannakilangen iti padada a Girl Scout.


Maysa nga aldaw nga aktibidad daytoy a mapasamak ngem napnuan ti kaipapanan ti  maalada nga eksperiensia dagiti ubbing gapu ta paset daytoy ti kurikulum-da nga agad-adal a mangtubay pay kadakuada iti disiplina ken panangipateg iti Kultura a Pilipino. # (Web In-Action)

Friday, September 27, 2013

PENSION TI SENIOR CITIZENS, NAITED

Cabugao, Ilocos Sur – Naangay ti pay-out ti Social Pension ti Senior Citizens idi Setiembre 26, 2013 iti Cabugao Cultural and Sports Complex, Brgy. Rizal, Cabugao, Ilocos Sur a nagatendaran dagiti beneficiaries manipud iti 33 a barangay ti Munisipalidad ti Cabugao.

Umabot ti P1,500 ti awaten ti tunggal recipient a saklawenna  ti bulan ti Hulio, Agosto ken Setiembre 2013. P500 ti awaten ti tunggal Senior Citizen (Beneficiary) iti kada bulan. Adda 220 a bilang ti Beneficiaries (Senior Citizen Card Holder)  nga immawat ti kantidad babaen kadagiti taga-DSWD Regional Office nga idauluan ni Mrs. Teresita Emock ken iti MSWDO-Cabugao nga idauluan ni Mrs. Lydia S. Gazmen, Municipal Social Welfare Officer a kaduada dagiti MSWDO Personnel.


Daytoy a social pension ket naisangrat a maitulong kadagiti nataengan a kualipikado nga umawat maibasar iti pagbatayan ti Ahensia ken naregget a tartarabayen ti LGU-Cabugao nga idauluan ni Mayor Edgardo “Ediboy” S. Cobangbang, Jr. iti naannayas a pannakaipatungpal daytoy a programa ti Gobierno Nasional para kadagiti nataengan iti ili a Cabugao, Ilocos Sur. # (Web In-Action)


MASIGSIGUD TI MASAKIT ITI RHU

Cabugao, Ilocos Sur – Iti pannakiuman ti Web In-Action idi Setiembre 25, 2013, imbatad ni Dr. Bernardino M. De Gracia, Medical Officer III, OIC RHU-MHO Cabugao a madagdagus a matungday ti sagubanit ken rumsua a sakit ti umili no la ket agturong iti RHU-Cabugao kadagiti lawlawasna a kaadda dagiti Medical Personnel nga idauluanna.

Innayon ni Dr. De Gracia a maysa ti diarrhea a naruay a rikriknaen ti tao iti panagbalbaliw ti tiempo ngem gapu ta naikkanda met iti praktikal nga adal iti pananglapped nangruna iti dehydration ket awan ti napalpalalo ti mapasaranna ngem ketdi nalanay laeng ti marikrikna ti pasiente no adda man.

Insupusop pay  ni Dr. De Gracia nga adda pay laeng saggaysa a matamaan ti dengue ngem saan a nakaro ket kaaduan ti uyek, gurigor ken nalalag-an a sagubanit ti madukduktalanna kadagiti agparikna a pasiente.

Nupay kasta, iti kaadda ti madagdagus nga agas a maited iti pasiente ket masigsigud dagiti sakit a maiturong kenkuana iti Balay-Pagagasan ti ili (RHU Clinic). # (Web In-Action)



FULL-TIME DAGITI AGTARTARABAHO ITI ECOLOGY CENTER

Cabugao, Ilocos Sur – Iti pannakiuman ti Web In-Action idi Setiembre 27, 2013, imbatad dagiti pannakabagi ti Luzon Green Art Technology, Inc. a mangtartarawidwid ti pannakaisapribado ti dumpsite a gudua ti aldaw-da nga agbunag ti basura kadagiti service area ken gudua met ti aldaw-da ti ag-aclassify kadagiti basura iti Ecology Center.

Innayonna a madagdagus a maipan iti Sanitary Land Fill dagiti non-biodegradable objects a bunagen ti service car-da. Maisamsamira met  ti panagaramidda iti carbonized rice hull a mailaok iti napaglalasin a basura tapno nadardaras a mapagbalin nga organiko a ganagan kalpasanna.

Iti pannaki-amad ti Web In-Action kadagiti LGA Tech Personnel, imbatadda a naannayas ti panagtrabahoda ta matarusanda daytoy gapu ta siguden daytoy a trabahoda iti kaaddada  iti LGU-Cabugao a naggapuanda. # (Web In-Action)


Thursday, September 26, 2013

PROYEKTO TI DA KEN LGU TI BRGY. SALAPASAP, NALPAS

Cabugao, Ilocos Sur – Nairingpasen ti nakongkreto a kalsada ti Brgy. Salapasap, Cabugao, Ilocos Sur babaen ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken impatungpal ti DPWH iti pannakatrabahona.


Iti pannakiuman ti Web In-Action idi Setiembre 25, 2013, imbatad ni Pasado Kapitan Marcos Tacuboy a dakkel ti maitulongna ti pannakapasayaat ti nasao a kalsada nangruna kadagiti mannalon ta asideg iti nagkalawaan  a pagmulmulaanda  ti nateng kadaytoy a dalan.


Kabayatanna, impeksa met ni Brgy. Captain Ronel Zamora iti nasged a panagyamanda agraman kadagiti kakaduana nga Opisiales ken  kalugaranna iti Brgy. Salapasap iti pagnam-ayan a naipaay kadakuada babaen iti panagbinnulig ti DA  ken  ti LGU-Cabugao a nangpasimpa kadaytoy a kalsada iti barangay. # (Web In-Action)

ASSESSMENT TI MANICURE/PEDICURE, NABALLIGI MET

Cabugao, Ilocos Sur – Naaramid ti Assessment dagiti nagsanay iti Manicure/Pedicure a nagkammayetan nga inwayat ti Technical Education and Skills Development Authority  (TESDA)-Vigan City  ken ti MSWDO-LGU Cabugao kadagiti nagsanay iti nasao nga ababa a kurso.

Itay nabiit, naipaayan dagiti nagsanay iti kompleto a ramit tapno mausarda ti inadalda iti Manicure/Pedicure.     Iti pannakiuman ti Web In-Action iti Assessor idi Setiembre 24, 2013, kunana nga ibabaon ida ti TESDA-Vigan City a mangpasingked ti kabaelan dagiti nagsanay tapno mairamanda iti Certification Program ti TESDA-National Office.

Innayon ti Assessor a no maaddaanda ti sertipiko ket maikkanda ti titulo nga adda karbenganda a kas nagadal itoy a paglaingan a mangted ti mainugot a serbisio iti kaaduan a makasapul itoy.

Insupusop pay ti Assessor a kaaduan ita ti agkasapulan ti serbisio ti manicure/pedicure ket saanda a kabaelan amin  a sakupen isu a napintas met no umadu ti agtrabaho ken  maidur-as daytoy a  pagsapulan.

Iti na-assessed kalpasan ti aktual a panangipakatda ti naadalda, nagraduanda ti Competent a kayatna a sawen a kabaelandan nga ipakat ti inadalda.

Dagitoy nga  aksion ken inisiatiba ket resulta ti nadigem a pannakikammayet ti LGU-Cabugao nga idauluan  ni Mayor Edgardo “Ediboy” S. Cobangbang, Jr.  kadagiti Ahensia/Opisina  a makatulong kadagiti agtutubo nga agkasapulan ti adal ken trabaho tapno  agbalinda a produktibo nga a makipagili. # (Web In-Action)

CONSULTATION/DIALOG TI DA-LGU KEN TI NTA, NAANGAY

Cabugao, Ilocos Sur – Naaramid ti Consultation/Dialog ti nagbaetan dagiit pannakabagi ti Departamento ti Agrikultura (DA)-Provincial ken Munisipal a Benneg ti pakaseknan  ti resulta ti pannakaanalisar iti maikombiene a ganagan kadagiti pagtatalonan, bangkag ken pananuman iti Munisipalidad ti Cabugao a pakabuklan ti 33 a barangays  ken naaramid sakbayna.

Nagpaay a resource speaker ni Mrs. Eugenia A. Briones, BSWM-CO ken Team Leader ti Soil Fertility Mapping and Water Sampling Project ti LGU-Cabugao ket bininsana ti pakabuklan ti resulta ti panaganalisar  ken  maiyannatup a ganagan ken kaadu a mausar (recommended  rate)   iti pagay.

Iti pannakiuman ti Web In-Action ken ni NTA Deputy Administrator Atty. Everin Molina, imbatadna a napateg unay ti pannakipasetda iti nasao a konsultasion ken dialog tapno mapasingkedan ti nangatngato nga agpang ti koordinasionda iti DA-LGU  ken iti Bureau of Soils and Water Management (BSWM)-CO iti  pakaseknan ti pannakairaman ti produkto a tabako kadaytoy a gannuat ti LGU-Cabugao. 

Babaen iti agdama a resulta ti soil analysis ti BSWM iti pagay ket adaptarenda met daytoy a takuatda  tapno agdalan met iti pannakaadal kadagiti eksperto iti daga  iti Ahensiada. Ti kangrunaan ket iti sientipiko a pannakaadal ti sapasap a mausar a ganagan iti pagay ken tabako tapno mapalag-anan ti kasasaad dagiti mannalon.

Innayon ni Atty. Molina a napateg a maikkan ti importansia ti produksion a tabako agsipud ta daytoy ti maysa a kadakkelan a produksion dagiti mannalon iti panawen ti Main Crop ditoy nga ili.

Natratar dagiti pakaseknan a naidatag iti agsumbangir a partido kadaytoy a pasamak ket naballigi a napagnanamingan dagitoy. Kalpasan ti nasao a dialog, naangay ti Luncheon iti Municipal Conference Building. # (Web In-Action)

Wednesday, September 25, 2013

SOIL FERTILITY MAPPING, MODELO TI CABUGAO

Cabugao, Ilocos Sur – Naaramid ti Presentation of Result ti Soil Fertility Mapping and Water Sampling Project ditoy Cabugao, Ilocos Sur idi Setiembre 24, 2013 iti Municipal Conference Building a dinar-ayan dagiti Barangay Officials, Farmer- Leaders, Opisiales ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken dagiti pannakabagi ti Bureau of Soils and Water Management (BSWM) nga idauluan ni  Mr. Dominciano Ramos, Jr., Chief, Soil Survey Division, BSWM-Central Office.

CLICK HERE TO VIEW MORE PHOTOS
Iti panglukat a sarita ni SBM Benedicto M. Savellano, Committee Chair on Agriculture, bininsana ti pateg daytoy a proyekto a nainaw babaen kadakuada nga Opisiales nga idauluan ni Mayor Ediboy. Innayonna a naiteden kadagiti mannalon iti farm mechanization program, umisu a teknolohia iti panagmula babaen iti training ken seminar ket maysa a kapatgan a magun-od pay no kasano ti pananggamulo ti daga a pakaipanan ti umisu a ganagan tapno maikabassit ti magastos ken umadu ti matgedan dagiti mannalon.

Imbinsa ni Mr. Dominciano Ramos, Jr. ti BSWM-CO ti Rationale ti Proyekto.

Kimmablaaw ken nagyaman ni Mayor Ediboy iti partena a nagsarita. Naragsakan ta nagballigi daytoy a naisangayan a proyekto para kadagiti mannalon  ken naiyuna a naigannuat ditoy Cabugao ket mangnamnama ti Ama ti Ili a nga agresulta ti pannakapalag-an ti panagbiag dagiti kaaduan a  mannalon ken  pumigsa ti kabaelanda a gumatang iti pagkasapulanda a makatulong pay ti ekonomia ti ili.

Insupusop ni Mayor Ediboy a saan nga agkitakit a mangaprobar ti aniaman a gannuat  a kaasping itoy no la ket ta pagsayaatan ti kaaduan nga umili.

CLICK HERE TO VIEW MORE PHOTOS
Naikkan met ti gundaway nga agsarita  ni Atty. Everin Molina, Deputy Administrator, NTA for Support Services-OIC Manager, NTA Vigan City a nangipeksa ti kapanunotanna a nangpabileg ti rikna dagiti agmulmula ti tabako ditoy Cabugao ta daytoy soil analysis ket dakkel ti maitulongna iti napintas a produksion ti tabako a pamaltuadan ti mabingbingay ti LGU’s manipud iti RA 7171.

Dinayaw met ni Provincial Agriculturist Teofilo R. Quintal, OPAG-Ilocos Sur  ti napintas a panagtutunos ti LGU-Cabugao ken dagiti mannalon a nakikammayet iti DA ken iti Bureau of Soils and Management (BSWM)  tapno maiyusuat daytoy a proyekto. Mangnamnama ti Opisial ti DA a daytoy a nairusat ti LGU-Cabugao a naisalumina a proyekto para kadagiti mannalon ket agbanag a pagulidanan ti amin nga ili ti Probinsia.

Kangrunaan a nasangaili iti pannakaipresenta ken pannakaiyawat ti resulta ti soil and water analysis dagiti mannalon ti Cabugao ket ni Gobernador Ryan Luis V. Singson. Kalpasan a kumablaaw ken nagyaman ni Gov. Ryan ket linugayanna manen dagiti taga-Cabugao nga idauluan ni Mayor Ediboy ta ditoy nga ili ti nakairusatan ti kastoy a proyekto. Dinakamatna ti panangpatalinaedna iti puesto ken ni  Provincial Agriculturist Teofilo R. Quintal ta kayatna a maitultuloy babaen ti panangriendana ti DA-OPAG  kadagiti napapateg a proyekto para kadagiti mannalon a maysa ditoy ti Soil Fertility Mapping and Water Sampling Project nga inyuna ti ili a Cabugao.

CLICK HERE TO VIEW MORE PHOTOS
Naisaganad a naited dagiti Certificate of Training kadagiti kadua ti BSWM-CO Staff a nangipatungpal ti proyekto babaen ken ni Mrs. Eugenia A. Briones, Project Team Leader, BSWM-CO. Naaramid pay  ti Land Use Updating kadagiti nagdengngeg  babaen ken ni Mr. Andy Calimutan, Land Use Expert, BSWM-CO.

Naaramid ti Luncheon iti SB-ABC Hall ken iti Municipal Conference Building. Kalpasanna, naaramid ti Open Forum kadagiti Opisiales ti BSWM-CO ken dagiti nagpartisipar iti programa.

Naballigi a nasungbatan/naaksionan  dagiti limtuad a pakaseknan dagiti nagatendar iti nasao a panagtitipon. 

CLICK HERE TO VIEW MORE PHOTOS
Nakikaysa pay iti nasao a programa da SBM Danny Q. Gazmen, ABC President Teddy U. Soller,  Ms. Elizabeth Pablico, Ph. D.-Caretaker, MARO-Cabugao; SBM Dr. Carlito S. Pano, SBM Dr. Jemaima S.  Tan-Yee, SBM Josefina S. Vallejo, SBM Jayhan Alcid Tan, SBM Vicky S. Serna, Empleado ti DA-LGU Cabugao, ken Department Heads ti LGU-Cabugao. 

Nagpaay nga Emcee/Facilitator  ni Mr. Dario Roy A. Siruno, Municipal Information Officer. # (Web In-Action)


MANGROVE PLANTING & COASTAL CLEAN-UP, NAANGAY

Cabugao, Ilocos Sur -  Naaramid ti Mangrove Planting and Coastal Clean-up  a tinarawidwidan ti Philippine Civil Service Commission (CSC), Vigan City a nagpartisiparan dagiti pannakabagi ti nadumaduma nga Opisina/Ahensia iti Public Sector kas iti LGU-Ilocos Sur, LGU-Cabugao, PNP, BFP, BJMP Region 01, Government Hospitals, RHU-DOH, UNP, DENR-CENRO-ENMRO, DepED, Barangay Officials ti ili a Cabugao, 4 P’s, Government Officials ken  iti LGU-Cabugao nga idauluan ni Mayor Edgardo “Ediboy” S. Cobangbang, Jr.
Indauluan met ni Miss Mimi S. Sison, Human Resource Management Officer (HRMO)-LGU Cabugao dagiti empleado ti Munisipio a nakipaset kadaytoy nga aktibidad a parte ti panagselebrar ti CSC-Vigan City.


Iti Setiembre 25, 2013, nasapa a nagturong dagiti nagpartisipar iti Salapasap Coastline ket nagbingay dagiti grupo a nagpidut ti rugit ken nagmula ti mangrove seedlings iti aplaya ti Barangay Salapsap, Cabugao, Ilocos Sur.

Iti pannaki-amad ti Web In-Action kadagiti dadaulo ti grupo a simmangbay ditoy Cabugao, dinayawda ti kinatunos ti amin a sektor a makikammayet kadagiti nadumaduma a pannakabagi ti ahensia a dumar-ay iti kas itoy a panagtataripnong iti ilida.


Napili ti Cabugao, Ilocos Sur a pakaisayangkatan daytoy nga aktibidad a pangkulminar iti nasao a pannakaselebrar ti 113th Anniversary ti PCSC nga addaan ti Tema: “Tatak Lingkod Bayani, Isabuhay, Ipagmalaki at Ipagbunyi”.

Naregget dagiti nagpartisipar a nangimula kadagiti naited kadakuada a quota wenno bilang ti mangrove seedlings ket kalpasan ti nasao nga aktibidad ket  nagatendar ti kaaduan iti naangay a Nasantuan a Misa babaen ti panangannong ti Kura Paroko ti Iglesia Romana Katolika ti ili a Cabugao, Ilocos Sur iti Barangay Hall ti Barangay Salapsap.


Ti Barangay Salapasap ket maibilang kadagiti Coastal Barangays ti ili ti Cabugao a pakaipatpatungpalan dagiti proyekto ken aktibidad ti MFARMC ken BFAR a tartarabayen ti LGU-Cabugao kangrunaan ti panagmula ti mangrove seedlings iti shorelines  tapno maikkan ti naan-anay a pannakatulong dagiti agindeg  a buklen  met laeng dagiti mannalon ken mangngalap. Maibilbilang pay ti Brgy. Salapasap a “Vegetable Bowl” ti ili a Cabugao gapu iti di agressat a panagmulada kadagiti dekalidad a produksionda iti nateng. Iti agdama, idadauluan ni Brgy. Captain Ronel Zamora daytoy a naprogreso a barangay.   # (Web In-Action)

ORIENTATION TI SOLID WASTE MANAGEMENT, MAITULTULOY

Cabugao, Ilocos Sur – Naaramid  ti Orientation and Briefing ti Operasion ti  pannakaisapribado ti Solid Waste Management Program ti LGU-Cabugao kadagiti pannakabagi ti nadumaduma a sektor kadagiti service barangays  ti ili idi Setiembre 24, 2013 iti Municipal Hall , Cabugao, Ilocos Sur.


Naglektiur ni Ms. Revelina Bayona, Solid Waste Management Specialist ti LGA Tech., Inc. kadagiti nagatendar pakaseknan iti pannakabunag ken pannakaidalimanek ti basura idiay Ecology Center ken Sanitary Landfill, Sitio Baliw, Brgy. Quezon, Cabugao, Ilocos Sur.

Impakaammo ni Ms. Bayona a makatawen ti termino ti kontrada iti LGU-Cabugao ngem  innem  a barangay ti ikonsentrarda: uppat iti Poblasion kasta met iti  Brgy. Turod ken Pug-os.

Innayon ni Ms. Bayona nga i-turnoverda amin a maprobitsarda nga organic matter iti LGU-Cabugao ket kangrunaan iti pannakapapintas ti operasion ti solid wastes management  ti ipamaysada iti ili ti Cabugao, Ilocos Sur.

Nagatendar ken nagsarita met iti  pakaseknan ti Orientation/Briefing  iti nasao a  taripnong da SBM Dr. Jemaima S. Tan Yee, Commitee Chair on Environment and Solid Waste Management; SBM Josefina S. Vallejo ken MPDC Florante Jara.  # (Web In-Action)

Tuesday, September 24, 2013

SPORTS GADGET, NAITED KADAGITI ATLETA

Cabugao, Ilocos Sur – Indauluan ni Mayor Edgardo “Ediboy” S. Cobangbang, Jr. a nangiyallawat kadagiti sports materials kadagiti kameng ti Cabugao Athletes manipud iti Cabugao DepED District.

Naiyawat dagiti sports gadgets iti sango ti Municipal Building ket kadua ni Mayor Ediboy da SBM Dr. Jemaima S. Tan-Yee; SBM Benedict M. Savellano: SBM Josefina S. Vallejo; Cabugao DepED Sports Coordinator Ronel M. Ubaldo; OIC Edgardo  P. Sajonia ti Cabugao South Central School  ken District Property Custodian  Edison Solatre a nangimatang ti panangawat dagiti ubbing nga atleta kadagitoy a ramit pang-sports.


Buklen dagiti sports gadgets dagiti sumaganad: Baseball Gloves (1 set) 16; Baseball Balls, 20; Body Protector, 3 pairs; Catcher’s Helmet, 3; Batter’s Helmet, 6; Knee Protector, 3; Archery (bow and arrow) 6 units. Dagitoy ket naisangrat a para kadagiti umaayam nga ubbing iti Cabugao DepED District.


Iti pannakiuman ti Web In-Action iti Setiembre 23, 2013, sangsangkamaysa a nagyaman dagiti pannakabagi ti Cabugao DepED nga idauluan da Mr. Sajonia ken Mr. Ubaldo ken ni Mayor Ediboy agraman dagiti LGU Officials ta maaddaandan iti masagsagana nga usaren iti panagsanayda ken mapasayaatda iti performance-da kadagiti athlete competition kas iti Zone Meet, District Meet, Unit Meet ken nangatngato pay a pagsasalipan ti Sports iti DepEd. 

Nakikaysa met da ABC President Teddy U. Soller ken SBM Dr. Jemaima S. Tan-Yee, Committee Chair on Education iti  pannakaiyawat kadagitoy a mausar iti pagay-ayaman. # (Web In-Action) 

EPEKTIBO NGA USAR TI TIEMPO,TOPIKO TI FDS

Cabugao, Ilocos Sur – Naaramid manen  ti Family Development Session (FDS) dagiti kameng ti Pantawid Pamilyang Pilipino Program (4 P’s) iti Brgy. Bonifacio ken Brgy. Baclig idi Setiembre 23, 2013 iti Municipal Conference Building, Cabugao, Ilocos Sur.


Iti pannakiuman ti Web In-Action iti nasao a petsa, impakaammo ni Miss Aida Cueto, Municipal Focal Person ti 4 P’s a naannayas ti pannakailawlawag ti Topiko a napauluan: “Ti Umisu a Panangusar ti Tiempo iti Panagtagibalay ken Komunidad”.

Innayon  ni Miss Cueto a dagiti nagannak ti kangrunaan a para-tignay ti programa ti 4 P’s ket nakadepende dagiti ubbing kadakuada. Paset ti pannakaedukarda iti pannakaisuro ti umisu a  panangusarda  ti panawenda iti panagtagibalayda ken iti pannakipasetda iti komunidadda. Malaksid iti health care ken  edukasion a kangrunaan a pakabuklan ti programa ket maipasagepsep pay  kadakuada ti pateg ti  values formation tapno agbalin a sustainable ti programa babaen iti pannakahulma a naimbag dagiti recipients kalpasanna.


Insupusop ti Focal Person a kalpasan ti 5 a tawen iti umuna a bansada ti 4 P’s   ket sirmata ti LGU-Cabugao a   maikkandanto iti Sustainable Livelihood Program dagiti immuna  a  lima a Coastal Barangays a nasakupan ti programa tapno masursuruanda nga agbiag a natalingengen  nga uray awanton ti programa ti 4 P’s. # (Web In-Action)

MULA A PAGAY, SAAN NGA AGGIGIDDAN A MAAPIT

Cabugao, Ilocos Sur – Nangiparuar ti datos ti Opisina ti Municipal Rice Program Coordinator, DA-LGU Cabugao iti pammatta-patta  nga eskediul ti panagapit iti umabot ti 2,243  ektarias a natalon a pangalaan ti pagtaraon/mailako ita a Wet Season Crop 2013 (Hunio-Nobiembre).

Iti pannakiuman ti Web In-Action idi Setiembre 23, 2013, impakaammo ni Mr. Nerio S. Daproza, Municipal Rice Program Coordinator dagiti sumaganad a duktalna iti masansan a panagmonitorna iti pinagayan:

August 2013 0 - 3 Hectares
1st Wk/Mid Sept. 1.52% -  34 Hectares
September end 3.21%- 72 Hectares
1st Wk-Mid October 13.o6% - 293 Hectares
October end 21.98% - 493 Hectares
1st Wk. November 45.16% - 1,013 Hectares
2nd Wk November 70.66% - 1,585 Has.
3rd Wk. November 71.20% - 1,597 Has.
November end to 1st wk. December 100% - 2243 Hectares

Manamnama  met nga agballigi ti Seed Production a walo ektaria ken iti 3 ektaria a nasapa a namulaan ti nateng a pangsuplementar ti kasapulan ti umili kadagiti barangay. Aganay a 2,254 ektarias ti  amin iti namulaan ita a panagaapit, segun ken ni Mr. Daproza.

Dagitoy nga inisiatiba ket resulta ti napintek a programa ti LGU-Cabugao iti Agrikultura nga idauluan ni Mayor Edgardo “Ediboy” S. Cobangbang, Jr. tapno maisaganaan ken mamantener ti rice self- sufficiency  a kayat ken agtultuloy a tun-oyen ti Gobierno Lokal ti Cabugao ita ken iti masanguanan. # (Web In-Action)