Saturday, December 31, 2011

STREET PARTY, ISAGUT TI KONSEHO KEN SK, BARANGAY RIZAL KADAGITI UMILI NGA AGBUYA!

Cabugao, Ilocos Sur – Iti maudi nga aldaw ti Fiesta ti Barangay Rizal, karabiyan ti  Disiembre 30, 2011, inesponsoran ti Sangguniang Barangay nga idauluan ni ABC President, Rizal Brgy. Captain Teddy U. Soller ken  Sangguniang Kabataan nga idauluan ni SK Federated President/ Chairman Benazir B.  Sarmiento ti “Street Party” a nagpabuyaan ti live band ken Performers iti sango ti Cabugao Cultural and Sports Complex  iti imatang  dagiti lumugar, ubbing, agtutubo, nataengan, balikbayans ken dadduma pay a naisar-ong a bisita  iti ili ti Cabugao kadayta a gundaway.

Panggep ti panagselebrar nga ipakita dagiti kabaruanan nga estilo ti panagkanta/makanta ken panagrambak babaen ti musika ken mangipaay ti ray-aw ken liwliwa kadagiti agbuya a mangrelaks kadakuada manipud iti adu a “pressures ken kettang” a pinarnuay  ti pannakakumikomda  iti obrada   iti panaggibus ti Tawen 2011.

Immandingay met dagiti opisiales ti Gobierno Munisipal, Barangay Captains, BPATS (Barangay Tanod),  kameng ti PNP ken  nadumaduma a sektor a timmaripnong kadaytoy a panagselebrar iti maika-150 a pannakalagip ti ipapatay ni Dr. Jose P. Rizal.

Iti Disiembre 30 a kaudian nga aldaw ti Piesta, naaramid ti Nasantuan a Misa iti Simbaan Romano Katoliko iti 5:30 A.M. a nakaramidan pay  ti mass wedding, naisaruno ti pannakaidaton ti sabsabong iti sakaanan ti Monumento ti Nailian a Bannuar iti tengnga ti Barangay Rizal Parke.

Kalpasanna, naaramid ti “Free Breakfast”  ken Parlor Games iti 8:30 A.M. kadagiti ubbing.  Kamalmanna, napunno ken dupudop  ti tao iti pasdek ti Complex  a nakipaset iti Coca Cola Bingo a nakagun-odan dagiti nagabak iti agkakapateg a premio. # (Insurat ken rinetrato ni JOED S. SAJONIA)

 

Friday, December 30, 2011

BARANGAY RIZAL FIESTA 2O11, NAIDUMA TI PANAGRAMBAKDA!

Cabugao, Ilocos Sur (Disiembre 30, 2011) – Sinelebraran ti Barangay Rizal, pannakakabesera ti ili a Cabugao, Ilocos Sur manipud Disiembre 28-30, 2011 a panglagip ti maika-115 a tawen (1861-1896)  manipud  ipupusay ti  “Nailian a Bannuar” ken  iti kinamaingelna a nangisalda ti  biagna   tapno  maipabigbigna iti Puli ni /Malayo ken Asiano ti  kinasiasino  ti pagilianna ken ti kalibre ti  umili a Pilipino iti imatang  dagiti  Kolonialista a pagilian.

Iti umuna nga aldaw, kamalman ti Disiembre 28, 2011, impamatmat dagiti umaayam ti Badminton kadagiti nagbuya  babaen ti panagtunos  ti Ilocos Sur Badminton Club ken Cabugao Badminton Club a nangaramid ti “Baddicts Fun Games” iti Cabugao Cultural and Sports Complex.

Kabigatan ti Disiembre 29, 2011, naaramid ti First Rizal’s Fun Run “Libre nga Pataray, Panglagip ken Rizal” a nangrugi iti sango ti Complex sada nagrikus sadiay Barangay Turod a nagpartisiparan dagiti lumugar iti Barangay Rizal, propesional, agtutubo ken kameng ti nadumaduma nga  sektor/organisasion ti ili.

Kalpasan ti Fun Run, nagballigi ti panggep daytoy nga aktibidad ken awan ti napasamak a saan a nasayaat ti panagtaray dagiti nagpartisipar a nagtitipon kamaudiananna  iti sango ti Complex a nangsango iti naisagana a pamerienda ti Barangay Rizal.

 
 
 
 


Nakipagpasungad met ni Mayor Edgardo “Ediboy” S. Cobangbang, Jr. kadagiti sumangpet a   tumataray iti Finish Line.  Naregta a timmulong dagiti Kapolisan, BPATS (Barangay Tanod), Medics a naglugan iti ambulansia ken Blue Boys a nangiwardas ti trapiko iti sumrekan iti agpa-Port Salomague ken iti busy street ti Sitio Callaguip, Barangay Baclig via Barangay Turod  ken iti National Highway a naglasatan dagiti tumataray.
Nagyaman  ni Rizal Brgy. Captain Teddy U. Soller kadagiti amin a nakipaset iti aktibidad ti Piesta ti Barangay Rizal.

Iti karabiyan ti Disiembre 29, 2011, naaramid ti coronation ceremonies ti Mr. & Ms. NISTC Day Care 2011 a nagbidaan da King Neil Kim ken  Queen Lea Mae.

Kangrunaan a nasangaili ket  ni Mayor Edgardo ‘Ediboy” S. Cobangbang, Jr. ti ili a Cabugao ket kimmablaaw ken dinayawna ti kinamananglaglagip ti taga-Rizal a nakaipuonan ti nakapanaganan ti barangayda iti “Nailian a Bannuar”,  Dr. Jose Paciano Rizal y Mercado.

Imbatad ni Mayor Ediboy a kaikarian ti Barangay Rizal a pagwadan dagiti padana a Barangay ti Munisipalidad ta daytoy ti pannaka-kabesera ti ili. Pinadayawan ni Mayor Ediboy ti nasamay  a panangidaulo ni Brgy. Captain Teddy U. Soller agraman kakaduana iti Sangguniang Barangay  ti Barangay Rizal ken ti pananguggorna pay  ti 33 a barangays a masakupanna a kas ABC & Councils President ti ili a Cabugao, Ilocos Sur.


 

 

Iti seremonia ti koronasion, naimatangan ti panagmartsa da Andrei Marsh Cueto, Mr. Day Care 2010 ken Shaine Gorospe, Ms. Day Care 2010 ken Investiture ken da  King Neil Kim Parbo, Jr. ken Queen Lea Mae Aguilar a kas Mr. Day Care 2011 ken Ms. Day Care 2011 kas panagsaganadda.
Kinoronaan ken insaadda dagiti kapa ti Ari  babaen kada Mayor Ediboy ken SBM Vicky S. Serna. Binagi met a kinoronaan ken insaadan ti kapa ti Reyna babaen kada agkasimpungalan  Vice Mayor Danny Q. Gazmen ken MSWD Officer Lydia S. Gazmen. Sash ken Trophy met ti inyawat dagiti nagannak ti Ari a da Mr. & Mrs.  Rodolfo Parbo, Jr.  idinto ta  Bouquet met ti inyawat dagiti nagannak ti Reyna a da Mr. & Mrs.  Alfredo Aguilar.

Inyawat met da ABC President & Councils, Rizal  Brgy. Captain Teddy U. Soller ken ti kapisi ti pusona ti Lei ni King Neil Kim. Scepter met ti inyawat da Andrei Marsh Cueto ken Shane Gorospe iti Ari ken Reyna 2011.  Nagatendar met ken nangisaad ti Coronet ti 1st Princess ni SBM Josefina S.  Vallejo nga inasmangan ni Mayor Ediboy.

Iti investiture ti 6 nga  agparis a Prinsipe ken Prinsesa, naisaad ti Sash ken  Coronet-da babaen kadagiti nagannak, Barangay Captains a nakitinnakunaynay a kas kada Turod Brgy. Captain Inocencio Sadac, Bungro Brgy. Captain Fermin Sarinas, Marga-ay Brgy. Captain James Sera, ken kasta met da  Rizal Kagawad Gabby Sunio, Rizal Kagawad Gloria  Cobangbang,  Rizal Brgy. Treasurer Lutgarda Galamgam ken  Cabugao Ex-SB Member Carlos Sison. Nagpaay nga  emcee da Mr. Rudy Ilar ken Joe S. Singson, Jr.

Tunggal pannakaisaad ti Coronet, maiballaet ti piesa ti musika  a pagsalaan dagiti opisiales ti ili, barangay, RIC, sangaili ken lumugar ti Barangay Rizal. Kalpasanna, mabunot ti lima a nagasat a  numero babaen ti matudingan nga agbunot  a  manipud   iti Raffle Draw. Namin-adu a nagrikus ti panagbunot  a nakagun-odan dagiti nagasat a mabunot ti numerona iti agkakapateg a premio.
Kamaudianan a grupo ti numero a nabunot ket naigasatan ni Mrs. Marissa Sajonia-Sumagit ti Barangay Rizal ti  nakapunta  ti 1 sako a bagas a premiona. Naragsak ken natalinaay a nagsisina dagiti amin a  nakidanggay kadagiti aktibidades ti Koronasion ti ubbing iti dayta a rabii. # (Insurat ken rinetrato ni JOED S. SAJONIA) 

 
 
TALDIAP-NAPALABAS TI BARANGAY RIZAL

Ti Barangay Rizal ket San Markos ti dati a naganna idi un-unana a panawen.  Nabuangay a kas barangay babaen ti Akta Republika 3590 idi 1959 a panagmayor  daydi Dios ti aluadna a Lucio Zabala.  Naadaw ti nagan ti barangay iti nagan iti Nailian a Bannuar, Dr. Jose Paciano Rizal ket naipasdek ti monumentona iti pannakaplasa/parke  ti Barangay iti sidiran ti pasdek ti Simbaan Romano Katoliko ti ili.

Masarakan ti barangay iti mismo a poblasion ti ili ket buklen ti tallo a benneg: ti Cacantorisan, abagatan ti Manila North Road (National Highway) ket naadaw daytoy a nagan iti sao a “Cacantores” agsipud ta ditoy a nagnaed dagiti kumakanta iti simbaan idi un-unana a panawen ken uray iti agdama.

Ti Centro ket masarakan met iti amianan ti National Highway ken abagatan ti Cabugao River a dineppaan  ti nabileg nga Osmena Bridge ken  nakaipasdekan ti istraktura ti penned ken irigasion ti Communal Irrigation System  (CIS) ti National Irrigation Administration wenno (NIA).

Mainumo unay a maawagan a kabesera ti ili agsipud ta ditoy centro ti pakasarakan ti pasdek ti munisipio, ti historikal a Simbaan Romano Katoliko, Cabugao Cultural and Sports Complex, Municipal Police Station, Municipal Fire Station, Municipal Rural Health Unit a pakabangbangonan ita iti Cabugao Rural Health Unit-Lying in Center, New Cabugao Public Market ( Northern Ilocos Sur Trade Center) ken  Main Office ti Rural Bank of Cabugao, Inc. ken dadduma pay nga opisina ti sanga ti Gobierno ken pribado a sektor.

Ti Bessang ket masarakan met iti amianan ti baro a merkado publiko ti ili ket gapu ta bineltak ti National Highway ket natural  a nagtubuan iti adu a pasdek-negosio ken napipintas ken moderno a pagtaengan. Regular met latta a masukay ken mamulmulaan dagiti talon ken bangkag a di pay nadissuan ti pasdek wenno establisimiento iti amianan-a-daya ti tiendaan.
Ti  Barangay Hall ti Barangay Rizal
Ti Barangay Rizal ket aglawa iti 33 ektarias  ken addaan iti 1,106 a bilang ti populasion. Addaan ita a tawen CY 2011  iti  P884,536.00  nga Internal Revenue Allotment (IRA) ken pakadagupan ti P1,085,294.34 nga Annual Budget ti  CY 2011. Ti 20% Development Fund nga aganay a P186,575.00 ket maiserbi kadagiti sumaganad:  Services/Development Projects; Garbage Collection; Clean and Green; Maintenance of Peace and Order; Anti-rabies vaccination; dengue prevention, ken Infrastructure Services. 

Maibilang   ti Barangay Rizal kadagiti uppat a barangays a nangbukel ti poblasion ket kaaduan  kadagiti agindeg  ti propesional, retirado,agnegnegosio, ken adda ti kaamaanda iti ballasiw-taaw kas iti USA, Canada, Hawaii, UK ken dadduma pay a pagilian ti Asia, Europa ken Middle East. Ilokano ti kaaduan nga agnanaed ken adda  met  ti Tagalog ken Muslim. Dagiti Ilokano ket natibo/naisiguddan  ken kaaduan kadakuada ti agtagikua ti nalawa a  talon ken bangkag iti nadumaduma a disso iti  ili.

Di mapagduaduaan a ditoy a barangay ti pakasarakan ti kaamaan a nagpatanor kadagiti mabigbig a lider ti politika ken dadduma a pagsaadan ti kagimongan. Iti benneg ti Clergy, nakapatanor ti Barangay Rizal ti lima a padi ken maysa a madre nga agserserbi iti Nadiosan nga ayab ti Ebanghelio. Isuda dagiti sumaganad kas panagsaganadda:  Rev. Fr. Rafael Oliver (pimmusayen); Rev. Fr. Andronico M. Pahed, Jr.; Rev. Fr. Lovell U. Soller; Rev. Fr. Reginald Paul S. Pira; Rev. Fr. Moises S. Andrada II ken Sister Virginia S. Azcueta.

Ditoy Barangay Rizal ti rimmusingan ti  kapuonan ti  nangrienda ti turay ti ili. Dagiti nagmayor: Hons. Simeon Soller, Victorino A. Savellano, Alberto A. Soller, Cresencio S. Azcueta, Sr., Andrea Soller G. Tan, Bendell Soller Tan,  Diocaesar S. Suero ken Edgardo S. Cobangbang, Jr. iti agdama.
Mairaman met ditoy a madakamat  da: Nag-Bise Mayor Rex Augustus S. Morales, nag- OIC-Bise Mayor Cresencio S. Sumagit, Sr.,  nag-Bokal Francisco A. Savellano ken dagiti agassawa a Sangguniang Bayan Members, Former SB Member Luciamar Santella-Pano ken agdama nga SB Member Dr. Carlito S. Pano. Nangidayaw met iti barangay ken ti ili iti nangatngato nga agpang dagiti agama a nagsaad ti turay ti Gobierno Probinsial ken Nasional ket da: Ex-Comelec Chairman Victorino A. Savellano ken Naggobernador  ken agdama ita a Bise Gobernador Deogracias Victor B. Savellano.  

Dagiti sumaganad met ti nagan dagiti mararaem a tattao a nangidaulo ti Barangay:  Don Pacifico Sison, Filemon Sison, Dr. Francisco G. Soller, Floro C. Soller, Jay Gazmen  Soller, Ferdinand Julio Trinidad, Romulo B.  Naval  ken Thaddeus U.  Soller iti agdama.

Ti Monumento ni Dr. Jose P. Rizal a nagsaad ti katengngaan ti Parke ti Barangay
PROYEKTO KEN GAPUANAN TI KONSEHO TI BARANGAY RIZAL

Napili ken nabutosan dagiti agdama nga opisiales ti Barangay Rizal idi eleksion ti barangay, Oktubre 25,  2010 ket apaman a nakapagsapatada, indauluan  ni Kapitan Thaddeus “Teddy” Ugalino Soller iti pannakaipatungpal dagiti programa ken proyekto para iti Barangay Rizal iti dayta a gundaway ken iti  sumaruno a tawtawen.

Umuna a naipatungpal ti naurnos a turnover ti records  ken pinansial a kasasaad ti barangay. Napusgan ni Kagawad Gabriel “Gabby” G. Sunio a nangiwardas ti “cleanliness activities” iti amin a kalsada ti barangay ken pannakatadaw dagiti nagruyag a sanga ti kaykayo kadagiti kalsada ti barangay.

Naannayas met ti pannakaiwardas ti pagrebbengan dagiti kagawad, amin a naapointaran nga opisiales ti barangay ken aktibo a nagtrabaho dagiti kameng ti komite a nadutokan iti  babaen   ni Kapitan Teddy Soller.

Napatakder   dagiti street signs dagiti kanto ti kalsada ken  nasemento ti side  drains dagiti kalsada ti barangay  ta isu pay a  paglawaan ti dalan   babaen ti panangiwardas  ni Kagawad Gabby Sunio ken kakaduana a Kagawad ti pannakatrabahona nga imonmonitor met laeng ni Brgy. Captain Teddy U. Soller. Sumarsaruno a maipatungpal ti house numbering tapno maup-date ti bilang ti balbalay ken pasdek tapno sistematiko ti kinaurnos ken  nalaka a mabirokan ti lokasion no adda agbirok ken  nadardaras pay nga iyusuat ti pannakapabaro ti census ti lumugar. 

Adun  ti pammadayaw a  nagun-od ti Barangay Rizal.  Iti panagtugaw ni Kapitan Teddy, nagsasaruno manen  dagiti naragpat ti Barangay Rizal a pammadayaw a kas iti “Best in Solid Waste Management Implementer 2011”, “LAING TI BARANGAY TI CABUGAO 2011”   kadagiti 33 a Barangays ti ili a Cabugao ken 1st Place  iti “Lantern Parade Competition” kadagiti 33 a Barangays ti ili met laeng itay sakbay ti Paskua.
DAGITI AGDAMA NGA OPISIALES TI BARANGAY RIZAL

Hon. Thaddeus “Teddy”  U. Soller – Punong Barangay/ABC & Councils  Chairman(Ex-Officio, Member,  SB)

KAGAWAD:
Gabriel G. Sunio
Gloria S. Cobangbang
Isidro S. Velasco, Jr.
Marina G. Acosta
Benigno S. Piros
Julius S. Morales
Victorino S. Sonido
Benazir B. Sarmiento – SK Chairman
Rodrigo T. Abad – Barangay Secretary
Lutgarda N. Galamgam – Barangay Treasurer
Amada A. Cobangbang – Barangay Nutrition Scholar
Lorenza A. Galamgam – Barangay Health Worker

DINTO MAUMAG TI LAGIP KEN GAPUANAN NI DR. JOSE P. RIZAL!

Cabugao, Ilocos Sur (Disiembre 30, 2011) – Sinelebraran ti sibubukel a pagilian ti Pilipinas a kas kangrunaan a Piesta Opisial ti pannakaselebrar ti 115 a  tawenen ti napalabas  a pannakalagip ti ipapatay  ti kalatakan nga Asiano: Dr. Jose Paciano Rizal y Mercado, agtawen idi ti 35 (nayanak, Hunio 19, 1861)  manipud iti Kolonial a Kastila idi Disiembre 30, 1896 sadiay Bagumbayan Field (Luneta itan) iti 7:03 A. M. ti bigat iti dayta nga aldaw.

Nupay awan ti serrek ti opisina, naisa latta ti Bandera kas panglugay ti pammateg ti sangkailian a Pilipino   kadaytoy Nailian a Bannuar. Naisentro ti dadakkel ken nangayed  a panagselebrar iti kabesera-Probinsial ken iti Kamanilaan a sentro ti Gobierno Nasional agraman Sosio-Sibiko a Gunglo.


KAPANUNOTAN KEN TALDIAP-KABIBIAG TI NAILIAN A BANNUAR

Awan ngatan  ti makaartap ti kinabannuar nga impamatmat ni Dr. Jose P. Rizal kas kangrunaan nga Asiano a nangidaton ti biagna tapno mawayawayaan ti pagilianna. Iti panagbannawag ti sibilisasion iti tawen 1800’s, imet pay  laeng sumagmamano a pagilian ti kultura ti kadaanan a rikna  ken galad a panangpasuko  gapu iti panggep a panangpalawada ti teritorioda. Dida inggingina ti kalintegan ken karbengan ti tao gapu ta saan pay idi a nadur-as ti pannakaammo iti masasao a human rights ken nalukay ti pannakakontrol dagiti nasnasion gapu ta di pay naipasdek ti United Nation ngem main-inaw idin ti Union of Nation a pakpakauna ken namunganayan ti UN.

Ngem napateg a nagbasaran dagiti mammanday ti linteg iti impamatmat ni Dr. Jose Rizal a kalintegan ti tao a panangsupring ti asinoman a parsua a mangilupek ti karbengan ti padana a parsua iti saan a nainkalintegan a rason.

Napalabasen dagita a panawen ngem dakkel koma a panagkarkarawa no awan  ti paspasamak a pagibasaran dagiti napanday a pagannurotan ken nangpaamnut ti kaammuan a paset ti linteg ti nakaparsuaan ti panangrespeto ti kalintegan ti pada a tao.

Iti kasasaad ti panagbiag ken edukasion ni Dr. Rizal ken ti pamiliana kadagidi a panawen, nawaya koma a liklikanna wenno pumanawda a sangapamilia tapno saanda a maikompromiso iti agdama a sistema, ngem saanna nga inaramid ta nakaukit ti kaunggan ti pusona ti nadarisay ken napnuan pammateg iti tinaudanna a daga ken kakailianna. Dayta ti saan a maawatan ti kaaduan a kinasiasinona  ta apay nga isakripisiona ti biagna iti pakaseknan ti kaaduan ken sangkataw-an? 
Kayatna a mapasamak ti maysa a panagbalbaliw ket inusarna ti tadem ti plumana a nangkalampag iti  mapaspasamak kadagidi a panawen.

Iti sabali a bangir, adda met dagiti panirigan  a maysa  a kinalupoy ti inaramid ni Dr. Rizal ta nagsebba iti likudan ti pannakaammona nga isikat ti kabusor a rehimen ket saan a makagaway ta armas kontra pluma ket  napatawan la ket ngarud ti dusa a bitay ta talaga nga awan ti maaramidannan kadagita a panawen.

Idi yarungaing ni Andres Bonifacio a makipaset ni Dr. Rizal iti maigannuat a rebolusion, nupay nakayakayen  ti pannakilangen ni Dr. Rizal iti Rehimen-Espaniol , maikanatad a namantener ti doktor ti kinakalmadona agsipud ta natubay iti kinadisiplina ken maysa nga Academician idinto ta kayat a dagus a ribbuoten ni Bonifacio ti kabusorna. Ti alegasion a  panaggangganat a taktika ti gubat ti ramut ti dida nagkinnaawatan ken ni Heneral Emilio Aguinaldo a puon metten ti rason ti nasapa a  pannakapapatay daytoy.

Wayawaya nga agbiag a nasimbeng ken mangnanam kadagiti parabur ti Namarsua a pagsayaatan ti kaipapanan ti kiddaw ni Dr. Rizal.

Ngem nakaisigudan/nakaiparsuaan ti rikna a sumupring no adda manggamsaw ti kalintegan ti maysa a tao. Natural dayta ta kasta ti pannakadiseniona kas kangatuan a klasena a parsua ditoy rabaw ti daga.

Iti agdama a panawen, nabiag daytoy a karit kadagiti agtutubo a sarikedked ti umay a henerasion. Ti panangtagibi ti namulagatanda a wayawaya ket daytoy koma ti pamkuatanda a mangpasayaat pay ti kasasaadda ken iti kagimongan a paggargarawanda tapno natibkerda a sumango no adda peggad a tumaud nga aggapu iti ruar ti pagilianda.
       
Makikaysatayo iti prinsipio ni Dr. Jose Rizal. Isu ti Ama ti nainkappiaan a pananggun-od ti wayawaya ken kalintegan a kas tao. Dinto agkupas ti lagip daytoy a naindaklan nga Asiano uray aglabas ti mano a kaputotan. # (Web Research 2011)

Thursday, December 29, 2011

TALLO A KURSO-TEKNIKAL, DUA A BARANGAY TI SINAGUTAN TI TESDA KEN LGU ITA A PASKUA 2011

Cabugao, Ilocos Sur -  Sibaballigi nga inleppas dagiti 58 a  recipients ti tallo nga skills training courses manipud iti dua a barangays: Barangay Turod  babaen ti liderato ni Brgy. Captain Inocencio Sadac  ken Barangay Dardarat babaen ti panangidaulo ni Brgy. Captain Danny Garcia,   ken  ingannuat  dagiti sumaganad:  NGO’s: Provincial Cooperative Union of Ilocos Sur  ken Ilocos Sur League of Civil Societies, Technical Education Skills Development  Authority (TESDA), Municipal Government of Cabugao, Municipal Association of NGO’s ken Turod Multipurpose Cooperative.

Dagiti  kurso ken panagsanay  a naisagut babaen ti TESDA ket iti Electrical Installation Skills, Meat Processing Skills, ken Catering Services Skills. Nangrugi ti panagsanay idi Disiembre 17 sa nagpatingga iti Disiembre 21, 2011 (5 aldaw).

Naangay ti Commencement Exercises idi Disiembre 28, 2011 iti Turod Barangay Hall, Barangay Turod, Cabugao, Ilocos Sur a no sadino a ditoy ket  inimatangan  dagiti lumugar ti Barangay Turod, bisita, sangaili, opisiales ti Barangay ken nadumaduma nga Ahensia  ken iti Gobierno Munisipal nga idauluan ni Mayor Edgardo “Ediboy” S. Cobangbang, Jr.  

Paset ti Mensahe ni Mayor Ediboy ti panangkablaaw ken panangbigbigna ti kabaelan dagiti nagturpos. Dinayaw ti Alkalde ti talek  ken pammati nga impakita ti dua a barangays iti TESDA kasta met iti RAFC (Regional Agricultural Development Council) nga idauluan ni Mr. Vincent Adorna nga agipaaprobar ti kakastoy a panagsanay. Anag ti mensahe ti Mayor a dagitoy a nagun-odda a kurso ket naisagutan ti tunggal nagturpos  iti nasayaat  a  masakbayanna, pamiliana,  komunidad ken ti Gobierno gapu ta agbalinda a produktibo nga umili no mausarda dagitoy a sirib ken kabaelan a nagun-odda. 


Impanamnama ti Mayor ti naan-anay a suporta ti Gobierno Munisipal ken adda maitulong ti Munisipio kadagitoy a nagturpos.

Pammasingked daytoy a gannuat,  nangisagut  ni Mayor Ediboy iti saggaysa a pliers ken cutter kadagiti nagturpos iti Electrical Installation Course  ken imbatadna a pangrugian daytoy a programa nga agallatiwto  met laeng kadagiti dadduma a barangays tapno maikkan ti kurso-teknikal ti  amin nga umili a makabael nga agadal kadagitoy.

 ”Nagasatkayo ditoy Cabugao ta adda kas ken ni Mayor Edgardo Cobangbang, Jr. a mayor-yo a makataliaw kadagiti aginteresado ken di nakangato ti adalda  a maikkan ti kurso-teknikal,” impeksa met ni Mr. Joel M.  Pilotin, Provincial Director, TESDA-Ilocos Sur.

Innayon ti Direktor ti TESDA  a naipanawen ken kasapulan dagitoy a kurso ken panagsanay kadagiti pasdek-negosio ken uray iti panagtrabaho iti abroad. Adda manen ti TESDA ditoy Cabugao gapu iti pammati ken panangyasideg ti LGU-Cabugao iti opisinana. Kunana pay a pangrugian ti 5 nga aldaw a naited a panagsanay. Ngem maalubog koma   iti pagsasao: “Education is a continuous process!”
“Kasapulan a maipakat ti inadalda ken sursuruenda  ti agbalin nga nalaing/epektibo iti naadalda  a trabaho  ken nasayaat a pannakilangenda  kadagiti kostumer/klienteyo tapno agballigikayo a mangisapul,”  impaganetget pay ni Direktor Pilotin.

Iti sabali a bangir, kasla Santa-Klaus ti kayarigan ni RAFC President Vincent Adorna a dimteng ditoy Cabugao a nakipagmiting kadagiti 10 a Farmers Associations a nagaplikar ti farm equipments a  pakairamanan ti  mini-tractors ken uppat a Multi-purpose Drying Pavement  (MPDP) nga ited  ti DARFU-1 sakbay a nagatendar iti Commencement Exercises.


Imbatad ni President Adorna a nagpaay a kas rangtay iti pannakaaprobar dagitoy a makinaria ken pasilidad babaen   ti Gobierno Munisipal nga idauluan ni Mayor Ediboy.

“Mayor Ediboy is a man of action, word of honor and achiever of this time,” panangrugi ni RAFC Adorna iti panagmensahena.

Ti kinamanagtalek ken napintas a kasasaad ti asosasion dagiti mannalon ti maysa a kangrunaan a pagbasaranna a nangaprobar kadagiti nakalikagumanda a makinaria ken pasilidad.

Impaganetget ni RAFC Adorna nga asosasion ti pangyawatanda kadagitoy a makinaria a programa ti Departamento ti Agrikultura. Agdalan iti opisinada  dagiti resolusion nga aggapu kadagiti mannalon ket isuda ti mangyendorso iti opisina wenno Ahensia a mangted kadagitoy.

Ingunamgunam pay ni RAFC Adorna a kasapulan a mannakikinnaawatan ken mannakitinnarabay kas  iti LGU-Cabugao ti kasapulan a mangtarabay kadagiti asosasion tapno maipatalged ti partnership, equity ken superbision dagiti maited a makinaria.

Iti agdama, 85 %  ti equity nga aggapu iti Gobierno (DA-RFU 1) ken 15% met ti aggapu iti Farmer Association (LGU).

Nagpaay a Trainor da Dr. Gloria Tuzon iti Meat Processing Skills, Mr. Harod D. Solis, Catering Services Skills, ken Mr. Nelson Bajet, Electrical Installation Skills. # (Insurat ken rinetrato ni JOED S. SAJONIA)

 
 
 
 
 
 
 

BARANGAY QUEZON, NAGSELEBRAR TI PIESTA 2011

Cabugao, Ilocos Sur – Nagselebrar dagiti lumugar  ti Barangay Quezon, Cabugao, Ilocos Sur idi Disiembre 28, 2011 a no sadino a ditoy ket naidaton ti maysa a Nasantuan a Misa ken naangay iti Parlor Games a nakaawatan dagiti  nagpartisipar iti premio.  Sakbayna,  kas pangparagsak ti Paskua, naangay pay ti Basketball Competition a nagpatisiparan dagiti teams ket naited ti premioda iti kaaldawan ti Piesta.

Napanaganan ti Barangay Quezon iti lagip daydi nag-Presidente Manuel L. Quezon babaen ti maysa a Resolusion a  pinanday   ti Konseho Munisipal idi panawen ni nag-Mayor Victorino A. Savellano (1960-1965) ken  ka-Presidente Daydi  Diosdado P. Macapagal.

Ti Barangay Quezon ket maysa kadagiti uppat a barangay a nangbukel ti Poblasion ti ili a Cabugao, Ilocos Sur. Addaan ti populasion a 3,194. Ditoy a nagsantak ti Iglesia Filipina Independiente (IFI), simbaan nga imbangon daydi Bishop Gregorio L. Aglipay, Military Vicar idi panawen ni Revolutionary President Emilio F. Aguinaldo ken nalatak a Labor Union Founder ken agiwarwarnak Isabelo de los Reyes. Tinarawidwidan daydi Bishop Apostol nga Ama daydi nag-Mayor Pacifico P. Apostol, patanor ti Barangay Quezon  a  nag-Alkalde  ti ili a Cabugao, Ilocos Sur.

Ditoy met  a barangay  nga agnaed da Retired MTC Judge Efren S. Ubungen ken agdama ita a Director ti Board of Trustees ti Cabugao Institute, kadaanan ken maysa kadagiti  kalatakan  iti benneg ti Pribado eskuela-sekundaria   iti Umuna a Distrito, Ilocos Sur. Ditoy met ti residensia ni nag-Bise Mayor, nag-Bokal  ken nag-Kapitan Benjamin B. Santella, Jr.   Kasta met a ditoy nga agnaed  ni agdama a   Bise Mayor  Danny Q. Gazmen ken ti pamiliana .

Iti Sitio Baliw, Barangay Quezon ken iti daya-nga-abagatan ti barangay  ti pakasarakan ti paset ti pagtatalonan a pakaimulaan ti tabako, nateng, mais, sandia ngem in-inuten  a mapagbalin a residensia ti dadduma  kadagiti sinilong gapu iti urbanisasion ken estratehiko a pagipasdekan ti negosio   ta asideg iti Merkado Publiko (NISTC).

Nupay kasta,  agduduma ti pagbiagan ti lumugar ket nabenneg ti propesional, retirado, negosiante, mannalon, karpintero ken  adda iti abroad ti pamiliana ken dadduma pay a pagsapulan a pamataudan ti pagbiag.

TALDIAP TI KABIBIAG NI NAG-PRESIDENTE MANUEL L. QUEZON

Di mapilaw ti regget ni nag-Presidente Manuel L. Quezon a nangideklara iti Pilipino wenno Tagalog a “Nailian a Pagsasao” idi panawen ti Mankomunidad gapu ta daytoy a pagsasao idi ti naruay a maus-usar.  Naipasurot iti bulan ti Agosto a pannakayanak ni nag-Presidente Quezon ti pannakaselebrar ti “Buwan  ng Wika”. Ipalnaad ti lengguahe a Tagalog a daytoy ti dominante a pagsasao ti tao aglalo iti kabesera ti pagilian kadagidi a panawen ti Commonwealth Government agingga iti agdama. 

Di marubsi ti kinapudno ti pasnek ken kinamaingel ni nag-Presidente Quezon a nangrienda ti umuna a panagbannawag ti demokrasia. Natiltil ti gubat ken panagalla-alla ti bumangbangon a Gobierno ni Hen. Emilio F. Aguinaldo  ket naipatawid ti panagtarimaan ken ni Apo Quezon.

Dakkel a responsibilidad ti inakem ni Apo Quezon iti pakabuklan  ti Historia ti Pilipinas   kabayatan ti transision ti naisibet a rebolusion ken panaglinak bassit a makuna. Ta kalpasan ti sumagmamano a tawen a pannakapanday ti 1935 Constitution, addad’ta manen ti pangta ti Maikadua a Gubat a Sangalubongan! Saririt ken Biag ti naipuonan ni Apo Quezon tapno laeng matun-oyan ti pagilian ti normalidad ti talna.

Maiyataday unay a  mataginayon ti lagip ni nag-Presidente Manuel L. Quezon  ket dinto agkupas dagitoy a gapuananna a mangpamaris ti kabibiag  ti kadaraanna a Pilipino. # (Web Research)                               
DAGITI OPISIALES TI BARANGAY QUEZON

PUNONG BARANGAY: Dodjie S. Santella
KAGAWAD         Nida S. Braceros
    -do-            Arnel S. Lopez
    -do-            Castillo, Rex     Castillo                   
    -do-            Elvira Consolacion Seguirre
    -do-            Roger B. Savella
    -do-             Adela G. Socias
    -do-            Jesus Q. Purisima
SK Chairman: Joh Paul C. Cueto
Barangay  Secretary: Sherwin S. Salvatierra       
Barangay Treasurer : Bernie C. Suero

Wednesday, December 28, 2011

ITA A PASKUA 2011, CABULIG HANDICRAFT MAKERS, NAGSELEBRAR!

Cabugao, Ilocos Sur – Naangay ti Christmas Program and Party ti Cabugao Ladies Intensified Group (CABULIG) nga idauluan ni Mrs. Jerlie Seguban-Cobangbang iti pagtaenganda iti Barangay Bonifacio, Cabugao, Ilocos Sur idi Disiembre 27, 2011  a no sadino a ditoy ket nagatendaran ti 137 a kameng ken opisiales  ti asosasion a naggapu iti 33 a barangays ti ili a Cabugao.

Immuna a naaramid ti Opening Prayer. Naisaruno ti parlor games a tinarawidwidan da Ms. Marian Sera, Presidente ti Rural Improvement Club (RIC) ti Barangay Bonifacio ken Mrs. Joenah G. Sevilleja, CABULIG Coordinator. Naregta ken naragsak dagiti inna a nagpartisipar iti paay-ayam  ket tunggal maysa kadakuada ket makaawat ti premio kalpasan ti ay-ayamenda.

Nakitaripnong met ni Mayor Edgardo “Ediboy” S. Cobangbang, Jr. ket nakikinnablaaw kadagiti inna a nagatendar. Impadamag ni Mayor Ediboy a nakadanonen idiay Hawaii, USA dagiti gapuananda a ginansilio a bag agsipud ta nagustuan ken naipabalon kadagiti delegasion ti Ilocos Surian of Hawaii (ISAH) nga immay nag-Medical Mission idi Disiembre 21, 2011 ditoy Cabugao.

Innayon ni Mayor Ediboy nga itultuloy dagiti kameng  ken mantenerenda ti kapabilidadda nga agpartuat ti magansilio a “recycled cellophane”  ta adda itdenna a pakalag-anan ti biag ken makatulongda pay iti pannakaikabassit daytoy a narigat a marunot a material a mangdangran ti daga ken aglawlaw  no agtultuloy  a maurnongan ti pagusaran. 

Iti umad-adu a bilang ti agkolekta ti recycled wastes para iti handycraft making, natakuatan iti inisial a surbey a kumirang ti cellophane a maiwarwara iti kapanagan ken idiay igid ti karayan.


“Makikaysatayo iti programa ni Mayor Ediboy a pannakadalus ti aglawlaw. Daytoy ti kangrunaan nga objective ti Cabulig, maikadua met ti hanapbuhay ken pagsayaatantayo a kameng,” imbatad ni Dr. Margarita Santella-Jara, Adviser, CABULIG, iti panagsaritana.

Innayon ti Doktora a puminpintas ti gapuanan dagiti miembros ket mainayon a pangpadur-as ti panangiyetnag ti Management ti asosasion ti dadduma a pagalagadan tapno umag-agpang ti kalidad ken gapuananda a kas iti sumaganad:
  • No mabalin, puro recycled ti mausar agsipud ta nabengbengbeng ti linabagna  ken nalaglagda ti pakabuklan ti masangal  a bag, pitaka, wenno dadduma a kayatda  a partuaten.
  • Pang-export quality mangrugi iti Tawen 2012 ti panggep ti asosasion agsipud ta agkalikagumda ti maorder a bag manipud iti sabali a pagilian ken  mangrugi ti Balikbayan Months ditoy Cabugao  inton Pebrero 2012. 
  • Paset pay ti panangyanunsio ti asosasion ti mas nakalidad a partuat tapno nadaras a malako ken nanginngina  ket  agsubli a mainayon a pagimbagan ti nagaramid ti mapaglakuan.
  • Mangrugi inton Enero 2012, maawat ngem saan a mabayadan dagiti saan a mangsurot iti maipaulog a rekisitos (requirements) iti panagaramidan.
  • Regular a ma-evaluate ti gapuanan ti tunggal kameng tapno dumur-as ti kabaelanda ket addanto maigannuat a salip ti tunggal barangay tapno matingiting ti pagsaltekan ti kapabilidad ti tunggal kameng.
  • Maipalubos a maisubmiter ken mabayadan ti 10x10x3.5 a rukod ti naaramid a  bag iti damo ngem maobligarda a masurot ti 14 by 16 (standard size)  a rukod ti mapartuat a bag iti umay a Tawen 2012.
  • Maisubmiter dagiti gapuanan nga awan ti “lining-na” ta agpapadanto ti maipan a lining-na.
  • Maisubmiter ti gapuanan (segun iti kapardas ken kaadu) manipud Lunes agingga ti Biyernes sakbay ti 9:00 a.m. ken uray iti bigat ti Domingo. No awan ni Ma’am Marian, ni Ma’am Jerlie ti pagitedan ti naaramid a bag.
Impaganetget pay ni Dra. Jara a maisentro pay  daytoy a programa iti Coastal Barangays tapno matulongan dagiti inna ditoy ta ad-adu ti panawen nga awan ti maobrada aglalo no awan ti  makatapog nga agkalap ta   nadawel ti baybay.


Kalikaguman ti  CABULIG Management nga idauluan da  Cabulig President, Ma’am   Jerlie S. Cobangbang ken Dr. Margarita Santella-Jara, Adviser,   a maidur-as dagiti pagannurotan tapno sumayaat ti gapuanan dagiti miembros ket kabaelandanto ti makikompetensia iti kalidad  ken gapuanan iti pannakayeksport dagiti produktoda a bag  tapno iti sumarsaruno a Paskua ket ad-adu ti masapulanda ken naragragsakto manen dagiti kameng a kangrunaan a mabenepisiaran.

Naragsak dagiti nagpartisipar iti maysa nga aldaw a panagselebrar ken nakiranud iti naisagana a napagsasanguan ket   nagsisinada  nga imetda ti narayray a  namnama ken na-Paskuaanda a sagut. # (Web Situational Report,  X’mas 2011)

Tuesday, December 27, 2011

DISCIPLINE ORDERS TO PNP/BFP PERSONNEL , STRICTLY OBSERVE THIS YULETIDE SEASON

Cabugao, Ilocos Sur – The  Municipal Police Station (MPS) and the  Bureau of Fire Protection (BFP) this Municipality   headed by Police Chief Inspector  William N. Nerona and Fire Marshall SFO2 Rodrigo Garcia respectively held a joint meeting with their personnel  to  discuss  and  disseminate to the public about  the Rules and Regulations of Republic Act 7183 and Guidelines on Firecrackers and Pyrotechnic Devices, the Requirements/Permits   to all dealer/sellers and users as well in connection with the “Implan Yuletide Season”   to prevent the loss of lives and damage to property.

On the other hand, the Chief of Police and the Operation, PNCO, SPO4 Nestor S. Savellano conducted a   muzzle taping/sealing of the individual issued firearm of every PNP and BFP Personnel to  observe the strict implementation of the DOH “Iwas Paputok/Disgrasya” and “Implan Yuletide Season”  to ensure the successful celebration of this year’s holiday season,
Furthermore, COP PCI William N. Nerona also reminded  the abovementioned  personnel  to refrain firing their firearms during the New Year revelry and further warned same personnel that  whoever  violate  this directive (Ban on Firing Firearms during New Year Celebration) will be dealt in accordance with laws.

These informations/reminders are contained  in  a Memorandum Order coming from the Chief of Police, this Municipality, and have  relayed to the public for reference.  # (Web Team) 


Monday, December 26, 2011

DAYO, ILADAWANNA TI KASASAAD TI PANAWEN KEN TI TAO

Cabugao, Ilocos Sur  – Ad-adda ketdi a sumayaat ti bilang ti maki-Dayo no aldaw ti Piesta Opisial, segun ti   pammaliiw ti  maysa a regular a Duma-dayo kas iti napasamak idi Disiembre 24, 2011 (Sabado)  iti Cabugao-DAYO a masakupan ti Barangay Baclig, Cabugao, Ilocos Sur iti asideg ti makaatrakar  nga  Osmena Bridge ken igid ti Karayan Cabugao.

Umuna a gundaway nga immay ti trakan a naggapu iti Brgy. Guiddam, Abulog, Cagayan a nagkarga ti nuang ken baka. Nabun-as  dagiti lakoda nga ayup  ta napintas met ti pamastoran iti ili nga Abulog, Cagayan ken kaparangetna nga il-ili  sa nagbalinen a taraken/dinguen  a madaldalingdingan ti dadakkel nga ayup gapu ta saandan  a maritur gapu iti panagdominar ti makinaria a mausar iti Agrikultura ditoy a deppaar.

“Nadamagmi kadagitoy   pada a Duma-dayo idiay Badoc ken San Nicolas a rumangrangpaya ti Dayo-yo ditoy Cabugao, Apo, isu nga umaymi met padasen ti agipasirpat ti animalesmi. Nupay natrapikkami, ingay-atmi ti umay ta maipadpadamag met a nainayon ken napintas  a pag-Dayoan daytoy ayanyo ket agpayso gayam a nagpintas ti disso ti Dayo-yo ta nalawa ti pagrekuridaan, adda madadaan a pagkalduan, mannakigayyem met ti tao ken asideg ti karayan,” imbatad ti maysa kadagiti manarawidwid ti trakan  a kukua ti agnagan ti  Rocel de Ocampo.


“Maysaak a beterano a duma-dayo, Bro,” kuna ni Apo Rizalino Sagun, taga-Brgy. Jordan, Sinait, Ilocos Sur. “Inkakabannuagak ti naggatang ti ayup ket ukod-pinnagnaan pay la idi ti papanmi pannakidayo idiay Badoc. Nasursuruanak a nag-Dayo ket adu met ti sinursuruak ken naballigi met itan a komersiante ti nuang ket kaasi ti Apo, kunaek met a nagballigi ti sasaadek a duma-dayo. Kasta met ti Dayo, in-inut la ti panagprogresona. Mayat met ti buelona ditoy aglalo ta suportado ti Gobierno Lokal: ti Munisipal ken Probinsial.Mausatan ti balligi gapu ta regular ti operasion, ngem no itulok nga agpugsat gapu ti upay gapu la ti komporme a rason, awan maganab no kastoy. Ngem napingettayo amin ta sapasap met a pakairanudan daytoy aktibidades ti panag-Dayo. Dakkel ti maitedna a pagsayaatan ti kagimongan ken Gobiernotayo. Barter trade ti nagbiagan dagidi immuna a komersiante, kasta met ti ag-dayo. Estratehia laeng ti masapul tapno mapasayaat met ti sistema ti linnako ken ginnatang.”

Nadaras a naibus ti lako a nabiag a  kalding ket gapu ta kasapulanda la unay ti maparti a mapagsasanguanda  iti umadani a Noche Buena ken Misa de Gallo ken aldaw ti Paskua, burias a leletsonen ken pangubingen a baka wenno nuang ti ginatang dagiti bakasionista a mapagsasanguanda iti maaramid nga okasionda iti kaaldawan ti Paskua.

“Daytoy panag-Dayo ti nasursuromi a pamataudan ti nayon a  masapsapulanmi  ket nakaysakami a makikammayet kada Mayor Ediboy ken Sir Teddy a mangkita ken mangilungalong ti panagdur-asna,” kuna  ni Apo Marciano Raciles, Presidente ti Cabugao Livestock Traders Association. “Dimi itulok a mapugsat  ti operasion ti Dayo.”

Iti 2012, manamnama nga ad-adu ti umay maki-dayo nangruna iti deppaarna ti Cagayan ket mayataday unay a kasapulan ti adu nga agrikus a puonan tapno ad-adda a maayo-ayo dagiti maki-Dayo no adda malakuanda ken makagatangda, makasinnukatda met iti kursonadada a pudos ken kalalanga ti ayup a kalikagumanda a tagikuaen. # (Web Research)

PANAGSELEBRAR TI KAALDAWAN TI PASKUA 2011: NATALNA KEN NARAGSAK!

Cabugao, Ilocos Sur – Napnuan rag-o ken ragsak dagiti umili ti Cabugao a nagselebrar ti dua a kagrunaan nga aldaw ti panangrambak ti pannakaiyanak ti Mannubbot a Mesias iti Sangkataw-an idi Disiembre 24-25, 2011.

Iti panagtapos ti Simbang Gabi (Disiembre 16-24) iti karabiyan ti Disiembre 24, 2011, saanen a maibalay dagiti ubbing ken agtutubo a mapan agkaroling wenno ag-stroll. Nabiag met ti katkatawa ken innestoria dagiti nataengan iti kaaduan a pagtaengan ta adda dimteng a kabagyan, kaarruba, bakasionista nga umay maki-Paskua. Kalpasan ti Misa, deretso daytan a panagrambak agingga iti aldaw-rabii ti Disiembre 25, 2011.

Kaaduan a timmayaktak a kaamaan iti kaaldawan ti Paskua: adda nagturong iti Vigan City, malls, parke, piknik iti beach resorts, immaway a napan nakiinniliw /nakipaskua pammarayanda nakiranud ti nagaramid ti kankanen kas iti tupig, dudol, baduya, suman, patupat, pinaltaw, ginettaan a naaramid idi 24 ken kilawen a karne ti kalding ken letson a manok ken baboy a kaaduanna a naidasar iti 25.Adda met latta nagselebrar iti uneg ti balayda ken arubayanda gapu ta nairana iti napateg nga okasion kas iti birthday, pabunar, pa-blessing, reunion ken kaarngina a pasken a mangiladawan ti maiduma a Kultura ni Ilokano partikular dagiti (Cabugenians ditoy ken abroad).

Ti kapaliiwan ti kaaduan, naisalumina ti ikukurib ti lamiis/lam-ek ti rabii ngem di latta nagressat ti nagkaroling (aldaw-rabii): adda grupo-nga-agsisina-no madamdama, maymaysa, sagdudua, saggatlo ken nagusar ken nagtokar ala- banda, nagpaskuada: taga-Cabugao ken daydayo manipud sabali nga ili ken uray pay probinsia. Adu ti nagdayaw a manag-Paspaskua ti taga-Cabugao isu a dumayoda ditoy! Iti kaaduan a lugar, sada la mapalubosan nga agkaroling no eksakto a kaaldawan ti Paskua (Disiembre 25 (half-day pay a !). 

Nupay nasapa a nagserra ti kaaduan a pasdek-negosio ken establisimiento (nangruna iti 25), adu met latta ti naglukat/naglako ta kasapulan met ti tao dagiti magatang. Napaspas ti panagwerret ti ligay ti negosio ta kaabunaw/kabuslon ti gastosen ti tao nga aggatang nangruna idiay tiendaan ken malls.
Iti biang ti linak ken talna, awan ti nakana a naireport nga insidente. Segun iti Kuerpo ti Polisia ti Cabugao, 100 a porsiento ti kinatalna ken kinaurnos ti umili a nagselebrar ti Paskua 2011. 

Nupay kasta, nakaalerto/nakasagana latta dagiti kapolisan, BPATS (Barangay Tanod) ken Blue Boys (Traffic Law Enforcers/Officers) a mangannong kadagiti pagrebbenganda a 
mangtengngel/mangmantener ti linak, urnos ken talna iti umili nanipud panangrugi ti panagselebrarda ti Paskua ken iti nasamay a pannakaipatungpal/monitor ti “APIR”: “Aksyon Paputok Injury Reduction” nga inesponsoran ti 15 nga Ahensia/Organisasion-Sibiko a pakairamanan metten ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken ti Municipal Police Station iti liderato ni Police Chief Inspector William Nacionales Nerona agingga iti madanon ti Baro a Tawen 2012.

Maipagpannakkel ti kaaduan a pammaliiw nga iti ili a Cabugao ti maysa a kapasnekan nga agselebrar (mariknam a talaga ti Espiritu ti Paskua) ken katalnaan ti umilina a nagselebrar kadagiti kangrunaan nga aldaw (Disiembre 24-25, 2011), Paskua 2011. # (Web Situational Report)

Naespirituan a panagraragup ti dadduma a sekta/denominasion a  Kristiano ken  umarngi iti “Simbang Gabi”  ti Romano Katoliko  ken Aglipayano
LGU Cabugao-Parlor Games
Nagtitipon dagiti nabayag a di nagkikita nga agkakabagyan gapu iti Espiritu ti Paskua

Saturday, December 24, 2011

PAMASKUA A SAGUT, NANGTED TI PAMILIA DA MAYOR EDIBOY KEN MA’AM JERLIE

Cabugao, Ilocos Sur – Paset ti pannakipagriknada  ti pannakaobserbar ken panagselebrar iti Paskua 2011 ken Baro a Tawen 2012, nangipaay met iti napnuan pammateg a  sagut ti Pamilia ni Mayor Edgardo “Ediboy” S. Cobangbang, Jr. ken ti kapisi ti pusona, Mrs. Jerlie Seguban-Cobangbang  iti saggaysa a  kalalainganna ti kadakkel a bag a  naglaon iti mausar a  ramen ti maaramid a mapagsasanguan (spaghetti ken macaroni),  pang-Noche Buena a naibunong   kadagiti amin a personnel ti LGU-Cabugao ken agob-obra iti salinong ti Gobierno Munisipal idi Disiembre 23, 2011 ditoy mismo a Munisipio.

Malaksid iti personal a sagut nga impaay ni Mayor Ediboy kadagiti umili a makipaskua iti opisinana ken iti pagtaenganda, nangted pay ti sagsagut kadagiti pamilia ti LGU  babaen iti papremio kadagiti parlor games nga insayangkat dagiti empleado kas nayon  ti Christmas Program and Party a naaramid iti karabiyan idi Disiembre 23, 2011 sadiay Cabugao Central Park (CCP), Brgy. Bonifacio, Cabugao,Ilocos Sur a no sadino a ditoy a naangay  ti kulminasion  ti Ragsak Cabugao Paskua Festival 2011 a nakaaramidan ti Choir Competition a nagpartisiparan ti grupo dagiti kumakanta iti benneg ti Elementaria ti DepEd Cabugao  District  ken Haiskul iti Public ken Private Sector ,  LGU Inter-Office Talents  Show Competition, ken nakaipakaammuan/nakaitedan dagiti  premio iti nangabak a Barangays iti Lantern Parade ken LAING TI BARANGAY 2011.

“Sabagay, ayat ken panagsisinnagut ti kaipapanan ti Paskua. Ngem uray saan a Paskua, ited latta ni Mayor Ediboy ti kabaelanna nga itulong no ibagam ti pakaseknam  kenkuana,” kuna ti maysa a natakneng nga indibidual  ken ti kaaduan nga umili.

Iti sabali a bangir, kas mayalubog iti linteg, inawat pay dagiti empleado-regular iti Munisipio dagiti Cash  Gift-da manipud  iti Opisina ti Tesoreria ti Ili ken napapaskuaan met iti mayataday a sagut dagiti kasual nga empleado.

Gapu itoy, naragsak ken natalinaay ti panunotda a nakipagselebrar iti panawen ti Paskua 2011. # (Web Situational Report)

Friday, December 23, 2011

RAGSAK CABUGAO PASKUA FESTIVAL 2011: NANGAYED A PANAGRAMBAK!

Cabugao, Ilocos Sur – Naangay ti Christmas Program and Party ti Gobierno Munisipal ti ili a Cabugao nga idauluan ni Mayor  Edgardo “Ediboy” S. Cobangbang, Jr. iti Cabugao Cultural Center (CCP), Barangay Bonifacio, Ilocos Sur a no sadino a ditoy ket kangrunaan a  tinabunuan dagiti umili ti Cabugao,  ubbing ken agtutubo iti elementaria ken haiskul ken mangisursuro iti babaen ti DepEd District,  Cabugao a nakisalipanda  iti Choir Competition, kasta met iti LGU inter-department Talents Show Competition, opisiales ti barangays a nangabak iti Laing ti Barangay 2011, sangaili ken ti grupo iti Samiweng Singers, Ilocos Norte National High School nga idauluan ni Mr. Sherbert Cabrales.

Panglukat a sarita ti impaay ni Vice Mayor Danny Q. Gazmen. Kimmablaaw ken binigbigna ti kinaayat dagiti adu nga umili a nakipagrambak ti Paskua 2011ket dinakamatna ti mensahe ti panagselebrar babaen iti panangited ti ayat, panagririnnanud, pinnakawan, panagsisinnakit, panagtutunos ken panagkaykaysa a mangidur-as ti ili a Cabugao babaen ti  panangtimonda ken   ni Mayor Ediboy.

Kinablaawanna met dagiti padana nga opisiales ti Sangguniang Bayan: SB Members Vicky S. Serna, Josefina S. Vallejo, Richard T.  Alcid, Dr. Jemaima Tan-Yee, ken  Dr. Carlito S. Pano, M.D. a naitallaong iti programa.

Naaramid ti salip ti Choir iti tallo a kategoria: Elementaria a buklen ti uppat a grupo/zona nga agsasalip; Sekundaria: buklen ti lima a haiskul nga agsasalip; ken 6 a grupo iti inter-department talents  show competition iti LGU-Cabugao.

Kalpasan ti salip, naited dagiti premio a cash  kadagiti kalalaingan a Choir Group. Nagun-od ti Zone 3 ti Umuna a Premio iti kategoria ti Elementaria idinto ta binagi met ti Cabugao Institute iti High School Category. Naisaruno ti pannakaited ti premio a cash ken tropeo kadagiti nangabak a barangays iti LAING TI BARANGAY 2011 a nangrangkonan ti Barangay Pug-os ken Barangay Bonifacio awards ken  premio. Automatiko a maiserrek a Finalist  ti Barangay Pug-os iti SIGLAT Awards iti Provincial Government, Ilocos Sur.

Inyalat met ti Barangay Rizal  nga idauluan ni ABC President, Brgy. Captain Teddy U. Soller ti Umuna a Puesto iti Lantern Parade  Competition  a naaramid idi Disiembre 1, 2011.  Maikadua ti Barangay Baclig ken maikatlo iti Barangay Cuancabal.

Impeksa ni Mayor Ediboy iti panagyamanna iti  kaadu dagiti  umili a nakipagrambak ti Ragsak Cabugao Paskua Festival 2011 kasta met iti sibubukel a DepEd District a nakikaysa kadagiti pasalip a naaramid.  Dinayawna met ti tunos dagiti empleado ti LGU a nagiparang ti pabuyada. Impanamnama ti Alkalde a maselebraran iti kastoy a wagas ti Paskua iti tinawen ken impagtengna ti  kablaawna  ken   agraman ti sibubukel a pamiliana iti Naragsak a Paskua ken Nagasat a Baro a Tawen ti amin nga umili ti Cabugao!

Naited met ti premio dagiti nangabak iti LGU Talents Show Competition a  nagpartisiparan ti innem a grupo. Inyalat ti Group 2 (DA-LGU, MPDC, Engineering) ti premio a P10,000 Cash Prize. # (Insurat ni JOED S. SAJONIA/ab photography)