Thursday, March 28, 2013

NAM-AY TI LUMUGAR DAGITI CONCRETE ROADS TI BRGY. MAR-GAAY

Cabugao, Ilocos Sur – Iti pannaki-amad ti Web In-Action iti Marso 27, 2013, imbatad ni Mr. Leoncio Sajor iti Brgy. Marga-ay, Cabugao, Ilocos Sur a mapagnumaranda metten ti pannakasemento dagiti kalsadada iti barangayda. 
Innayonna pay ti adu a nagbalbaliwan ti dalanda manipud idi a maysa a lipit a dalan agingga itan a nawanag a mapagdaliasatan. Impeksa pay ‘toy maysa a kalakayan itoy a lugar iti panagyamanna kadagiti agdama a lideres ti Gobierno Lokal ta maipaayan dagiti sumaruno a kaputotan iti napintas a pagnaan.

“Saanen a kas idi a nalutlot no agtudo ken nalikkaong ti dalan. Pagyamananmi kada  Kapitan James  ken ni Apo Mayor Ediboy ta naasikaso dagitoy a pagnaanmi,” kinuna met ni Mrs. Liza G. Simbe, lumugar iti nasao a barangay.


Ti Barangay Marga-ay ket maysa kadagiti barangay ti ili a Cabugao a dandanin agkakamang ti sementado a kalsadana. Idauluan ni Brgy. Captain James Sera ti Barangay Marga-ay. # (Web In-Action)



Wednesday, March 27, 2013

DIPUTADO RYAN KEN VICE GOV. DV, NAGBISITADA DITOY CABUGAO

Cabugao, Ilocos Sur – Nagkuyog  a bimmisita ti grupo da Vice Governor Deogracias Victor “DV” B. Savellano ken Congressman Ryan Luis V. Singson ditoy ili ti Cabugao, Ilocos Sur idi Marso 26, 2013. Sinarabo dagiti Opisiales ti ili nga idauluan ni Mayor Edgardo “Ediboy” S. Cobangbang, Jr. dagiti nadakamat nga Opisiales.

Naangay ti panagsasarita iti SB-ABC Hall nga inatendaran dagiti Brgy. Captains ti nadumaduma a barangay agraman dagiti Brgy. Treasurers kasta met dagiti pannakabagi ti Opisina ti  Munisipio.



Kangrunaan a panggep ti panagbisita ket iti maipapan iti pannakaruk-at ti Provincial Aid kadagiti barangays a paspasungaden dagiti Barangay Captains ken dagiti kalugaranda.


Napagsasaritaan pay dagiti proyekto  a maipaay a pagsayaatan dagiti bumarangay ken dadduma pay a sektor ti kagimongan  para iti agtultuloy a panagdur-as iti ili a Cabugao, Ilocos Sur.


Nakikaysa met iti nasao a taripnong da Board Member Jeremias “Jerry” Singson, Board Member Ismael Baterina, Ex-Mayor Edgar Yabes, Ex-Board Member Constante Oandasan,  Ex-Vice Mayor Atty. Rex Augustus S. Morales kasta met dagiti Opisiales ti  Gobierno Lokal ti  Cabugao nga idauluan da Mayor Edgardo “Ediboy” S. Cobangbang, Jr. ken ni  Vice Mayor Danny Q. Gazmen. Indauluan met ni ABC President, Brgy. Captain Teddy U. Soller dagiti Opisiales ti Barangay iti Munisipalidad. # (Web In-Action)


RIC MEETING, PANAGSAGANA ITI UMAY A PIESTA TI ILI

Cabugao, Ilocos Sur – Naaramid ti Emergency Meeting dagiti Opisiales ti Cabugao Federated Rural Improvement Club  nga idauluan ni Mrs. Grenalyn Amoroso idi Marso 26, 2013 iti Municipal Conference Hall, Cabugao, Ilocos Sur.

Dagiti napagnanamingan iti nasao a miting:
1. Pannakaisubmiter ti updated masterlist ti RIC Members.
2. Partisipasion iti Farm/Fishing Family Day ti Piesta  ket maisagana ti lima a grupo ti RIC iti ipabuyada iti karabiyan dayta nga aldaw.
3. Panagatendarda amin nga RIC Members  iti Parada.
4. Maaramid ti Raffle Draw iti dayta a rabii ket maiserbi iti RIC Livelihood Projects ti mapastrek.
5. Pannakaisubmiter ti Annual Financial Statement Report ken Accomplishment & Fund Utilization Report iti Financial Assistance a naited iti kada asosasion  manipud iti LGU.


Nakitinnulong a nakipagtaming kadagiti  naballigi ti resultana nga agenda a napagmitingan ni Municipal RIC Coordinator Mrs. Joenah G. Sevilleja. # (Web In-Action)   


Tuesday, March 26, 2013

66TH CLOSING EXERCISES TI SALOMAGUE E/S, NAANGAY

Cabugao, Ilocos Sur – Naangay ti 66th Closing Exercises  ti Salomague Elementary School nga idauluan ni Mr. Ronel M. Ubaldo, Head Teacher III idi Marso 19, 2013 babaen ti Tema: “Building the Nation’s  Future Leaders through the K to 12 Basic Education Program”.

Impresentar ni Mrs. Imelda A. Quinsaat, T-3, Class Adviser dagiti naggraduar:  18 Boys ken 11 a Girls.


Kinompirma ida  ni Mrs. Estrellita M. Siruno, Principal II, Cabugao North Central School. Nasangaili pay iti Closing Exercises da SBM Vicky S. Serna, Committee Chair on Education, Mrs. Jerlie S. Cobangbang a nangi-award ti Medalia ken kasta met ken ni Mr. Edwin S. Savellano, Head Teacher, Daclapan Elementary  School.
 

Nagpaay a Guest of Honor and Speaker ni Ms. Jennifer B. Concepcion, Class Valedictorian 1996 ket trinatarna ti kinapateg ti adal a gun-oden dagiti agturpos tapno maibagayda ti kabaelanda iti dumurdur-as a sistema ti Edukasion.  Naited ken ni Ms. Concepcion ti Certificate of Appreciation babaen kadagiti Teaching Staff ti Salomague ES.


Naisaruno ti Pinning of Ribbons to Honor Graduates babaen kadagiti nagannak/Guardians. Nai-award dagiti Awards ken Medals kadagiti Honor Graduates babaen kadagiti Donors.


Naited pay dagiti Special Awards kadagiti naggraduar babaen met laeng  kadagiti Donors. Kalpasanna, naited dagiti Recognition kadagiti  undergraduate manipud iti Kindergarten agingga iti Grade V.


Iti Closing Remarks, pinagyamanan ni Mr. Ronel M. Ubaldo, Head Teacher III iti panagballigi ti programa babaen iti natunos a panagkakammayet dagiti mangisursuro ken ti PTA nga  idauluan ni Mr. Reymundo R. Lagua. # (Web In-Action)



SUMMER JOB STUDENTS, NANGRUGIDAN DITOY LGU-CABUGAO

Cabugao, Ilocos Sur – Nangrugi a nagtrabaho dagiti  estudiante a makipaset iti Special Program for Employment of Students (SPES) ita a summer months nga addaan ti 25 a bilang  babaen ti panangesponsor ti Department of Labor and Employment (DOLE) ken ti Local Government Unit (LGU) Cabugao, Ilocos Sur nga idauluan ni Mayor Edgardo “Ediboy” S. Cobangbang, Jr.

Nangrugi a nagtrabaho dagiti estudiante idi Marso 25, 2013 ket naidestinoda kadagiti nadumaduma nga Opisina ti LGU-Cabugao  tapno makipagtrabahoda kadagiti LGU Personnel  iti unos ti 25 nga aldaw a naisangrat para iti SPES.


Daytoy a programa ket nagkammayet nga ipatungpal  ti DOLE ken ti  LGU babaen iti panangaprobar ni Mayor Ediboy  a maipaay nga oportunidad kadagiti  estudiante (15-25 years old) iti high school ken college tapno makatgedda iti mainayon nga usarenda iti panagbasada iti sumaruno nga School Year. # (Web In-Action) 



FAMILY DEVELOPMENT SESSION TI DUA A BARANGAY, NAANGAY

Cabugao, Ilocos Sur – Naangay ti Family Development Session dagiti recipients ti Pantawid Pamilyang Pilipino Program (4 P’s) iti Brgy. Rizal ken Barangay Baclig idi Marso 25, 2013 iti Municipal Conference Hall, Cabugao, Ilocos Sur.

Nailawlawag kadakuada dagiti naituyang nga annuroten ti panagkamengda iti Cash Conditional Grant nga ipaay ti Department of Social Welfare and Development (DSWD) ken ipatungpal ti LGU-Cabugao nga idauluan ni Mayor Edgardo “Ediboy” S. Cobangbang, Jr.


Malaksid kadagiti benepisio nga awatenda kas iti pannakaited ti cash (for health and education) dagiti ubbing, maipaganetget met dagiti pagrebbengan nga annuroten dagiti benepisiario kabayatan a sagrapenda daytoy a pagsayaatan nga itden ti Gobierno.


Naglektiur da Miss Aida Cueto, Staff ti MSWDO kasta met ni Mrs. Wilma Cruz a katulonganna.  Inyadal pay ni Police Officer Bernadette Aquino  ti sinaguday ti RA 9262 a maipapan iti kalintegan dagiti babbai a maiyataday iti  pannakaselebrar ti  Women’s Month ti bulan ti Marso 2013. Tumartarabay met da MSWD Officer Lydia S. Gazmen ken ti DSWD Municipal Link.  Ti Family Development Session ket binulan a maar-aramid kadagiti  barangay a pagnaedan dagiti  kameng ti 4 P’s. # (Web In-Action)


Monday, March 25, 2013

SUPPLEMENTAL FEEDING PROGRAM, MAIYUS-USUAT

Cabugao, Ilocos Sur – Maang-angay ti Supplemental Feeding Activity  kadagiti ubbing  ti Day Care iti bulan ti Marso 2013. Idi Marso 22, 2013, naaramid daytoy nga aktibidad iti  Barangay Turod Patac, Cabugao, Ilocos Sur.  Daytoy a programa ket maisangrat  pay kadagiti ubbing nga underweight tapno marimbawanda ti  malnutrision.


Inimatangan ni MSWD Officer Mrs. Lydia S. Gazmen ti pannakapakan dagiti ubbing babaen iti panagtinnulong ti Day Care Teacher, Barangay Nutrition Scholar iti naisagana a nadumaduma a menu ti taraon.
Daytoy a programa ket itantandudo ti DSWD tapno maaramid ti 120 days rehabilitation feeding program kadagiti ubb ing iti 33 a barangay ti ili  a Cabugao, Ilocos Sur.


Kabayatanna, nairamen met daytoy a pakaseknan ken programa iti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno mamantener ti health and nutrition status dagiti tumanor nga ubbing a pamuonan ken  sarikedked ti sumarsaruno a henerasion. # (Web In-Action)



DOMINGO RAMOS, RINAMBAKAN TI PAROKIA NI SAN MARKOS

Cabugao, Ilocos Sur – Nagdupudop dagiti kameng ti  Iglesia Romano Katolika a nagatendar iti pannakarambak  ti Domingo Ramos iti  Parokia ni San Markos Ebanghelista, Simbaan Romano Katolika, Cabugao, Ilocos Sur idi Marso 24, 2015. Naaramid ti panangbendision ni Apo Padi kadagiti  Palmas/Ramos  iti ruar ti Simbaan sakbay  a  naaramid ti  Nasantuan a Misa.

Inatendaranda pay ti nasao a Misa dagiti  agkakatakneng a personalidad iti kagimongan  agraman  dagiti bakasionista ken umili ti Cabugao, Ilocos Sur kadaytoy pakauna nga aldaw iti pannakarambak ti Semana Santa 2013.


Kanaig daytoy, iti pannaki-amad ti Web In-Action iti Simbaan Romano Katolika, iti Huwebes Santo (Marso 28, 2013),  maaramid ti Pammuggo iti 12 nga  agakem nga Apostoles nga idauluan da Mayor Edgardo “Ediboy” S. Cobangbang, Jr, (Mangidaulo kadagiti agserserbi ti Gobierno) kasta met ken  ni Vice Mayor Danny Q. Gazmen a mangidaulo kadagiti agpanpanday ti Linteg. Napusgan pay dagiti dadduma a dadaulo iti  nadumaduma a  sector  a makikaysa kadaytoy a napateg a  ritual ti Semana Santa. # (Web In-Action)


AGSAGSAGANA DAGITI CATTLE TRADERS PARA ITI PANAGPIESTA TI ILI

Cabugao, Ilocos Sur -  Naaramid ti kaaldawan ti Cabugao Dayo idi Marso 23, 2013 a nagpartisiparan dagiti Koridor, aglako ken aggatang ti animales ken dinguen, gumatang ti patan-ayenna a pagtrabaho wenno mailako ken kaaduan ti nagatang a para pauraga ken konsumo.

Kabayatan ti pannakaiwayat ti Dayo, imbatad ni Mr. Mariano Raciles, Jr. nga agsagsagana met ti asosasionda para iti naisangrat nga aldawda ti 2013 Ragsak Cabugao Festival inton Abril 20, 2013 ta maangay ti pakontes ti kinnapintasan ti maisalip nga animales a mapremiuan ken mangaramidda ti pagraragsakan a pakaaramidan pay ti Raffle Draw iti agkakapateg a premio.


Innayonna a kayatda a paragsaken  ti aldawda iti Piesta kas panglinglingayda a makigamgamulo iti operasion ti Cabugao Dayo.


Kanaig daytoy,  manarimaan a mapasimpa ti ruangan ti Municipal Livestock and Slaughterhouse  Office tapno nasayaat ti pagdaliasatan dagiti mapan agpakilo ti ilakoda a dinguen ken large cattle iti ayan ti moderno a pagkiluan  ti Munisipio.
Iti  aldaw ti Dayo, nakipagdanggay met da Mayor Edgardo “Ediboy”  S. Cobangbang, Jr., Vice Mayor Danny Q. Gazmen, SBM Carlos V. Sison ken dadduma pay a sangaili a nakipaset iti kaaldawan ti Dayo. # (Web  In-Action)