Saturday, August 31, 2013

PREPARASION TI DATOS TI FLUP, MAAR-ARAMID

Cabugao, Ilocos Sur – Maar-aramid ita ti panagpasiar dagiti grupo ti pannakabagi  ti DENR Region 1, PENRO-Ilocos Sur babaen ti panangtarabay ni MENRO Edgar S. Balangatan ti LGU-Cabugao a  panagukkonda kadagiti mayataday a datos a kasapulan babaen ti panagusarda iti sopistikado a ramit (Geographic Positioning System) wenno GPS babaen iti panangsurotda iti amin a road network ken disso dagiti kangrunaan nga  impraestruktura ti Munisipalidad tapno makabukelda iti eksakto a mapa.

Iti pannakiuman ti Web In-Action iti Agosto 29, 2013, impakaammo ni MENRO  Balangatan a nangrugida idi Agosto 20, 2013 a nagrekurida ken nagala ti datos ket manamnama a dagiti “raw data”  a nakalapda ket mausar babaen  iti Geographical Information System tapno makaaramidda iti napintas a resulta. # (Web In-Action)

Friday, August 30, 2013

SYMPOSIUM TI KALINTEGAN TI BABBAI KEN UBBING, NAANGAY

Cabugao, Ilocos Sur – Naangay ti maysa nga aldaw  a Symposium kadagiti kalintegan dagiti babbai ken ubbing nga inwayat ti DSWD Region 1 ken pannakikammayet ti MSWDO-LGU Cabugao kadagiti partisipante manipud iti nadumaduma a sector ti Munisipalidad ti Cabugao idi Agosto 29, 2013 iti Municipal Conference Building.

Iti Words of Welcome ni Vice Mayor Deogracias Jose Vctorino H. Savellano, kimmablaaw ken nagyaman iti nayusuat a pannakatratar ti kalintegan ti babbai ken ubbing ditoy Cabugao.

CLICK HERE TO VIEW MORE PHOTOS
Inkumitna a babaen iti ibagbagianna a pagpandayan ti linteg ket sisasaganada a tumulong a saan a mapasamak daytoy a pannakaabusoti kalintegan  dagiti maseknan ditoy nga ili. Innayonna a babaen kadaytoy a programa ti DSWD ket makaited ti panagbalbaliw iti pagtaktakderan ti ubbing ken kababaihan iti hanayda.

Naisaganad ti panangyam-ammo ni MSWD Officer Mrs.  Lydia S. Gazmen kadagiti amin a timmalantan iti nasao a symposium a kaaduanna ti naggapu iti barangay: Brgy. Officials, BHW’s, BNS, RIC kasta met dagiti pannakabagi ti DepED (elementary ken high school) ken dadduma pay a sector a maseknan kadagiti maiyadal nga Akta Republika a pinanday ti Kongreso ti Pilipinas a mangsalaknib ti karbengan/kalintegan dagiti babbai ken ub-ubbing.


Nagmensahe ni Mayor Edgardo “Ediboy” S. Cobangbang, Jr. Kimmablaaw kadagiti pannakabagi ti DSWD Regional Office ken ti amin a timmaripnong kadaytoy a panagtitipon. Dinakamat ni Mayor Ediboy ti pateg daytoy a maiyadal ken iti obligasion ti Ahensia ti DSWD a tumulong babaen ti panangkomplementar ti nadumaduma a sector. Dinakamatna pay ti pateg ti akem dagiti Brgy. Captains a parupa ti Munisipio a mangipatungpal ti sinaguday dagiti linteg a mangtubngar kadaytoy human trafficking. Inawis ti Alkalde Munisipal ti pannakikaysa ti amin ken iti pannakaisaknap ti damag daytoy a krusada tapno maalay-ayan ti trauma a sinagaba dagiti maseknan a nabiktima  ken maminpinsan a manglapped  kadaytoy a sakit ti kagimongan.

Nagmensahe met ni Mrs. Teresita Emock, Focal Person, DSWD-FOI. Naisaruno ti Symposium Proper. Immuna a nagsarita ni Ms. Connie L. Quinola, MLG Officer V ti LGU-Cabugao. Trinatarna ti pannakabuangay ti Local Council on Anti-Trafficking and Violence Against Women and their Children (LCAT-VAWC) babaen iti nabukel nga  Executive Order ti Municipal Mayor nga intuyang ti Joint MC 2010-01 ti DILG ken DSWD. Inlawlawg pay ti DILG Officer ti pakabuklan daytoy a nabuangay a Konseho ken dagiti akemda a mangipatungpal kadagiti linteg iti pakaseknan ti Anti-Human Trafficking.


Naglektiur met da Mrs. Jocelyn P. Mariano, SWO II, SWAD Team; PO3 Janice Oligario, Cabugao WCPD/PNP;  ken Mrs. Edith A. Gorospe, SWO II, SWAD.

 Natratar ken naibuksilan dagiti sinaguday ti linteg ti RA 9208; RA 9262; RA 9775; RA 7610; ken RA 10365.
Naited dagiti Certificate of Appreciation kalpasanna. Closing Remarks ti binagi ni SB Member Dr. Carlito S. Pano, Committee Chair on Social Services.

Nakikaysa met da SBM Danny Q. Gazmen, SBM Jayhan Alcid-Tan; SBM Dr. Jemaima S.  Tan-Yee; Dr. Bernardino M. De Gracia, OIC Municipal Health Officer  ken ni  Municipal Treasurer Mrs. Lourdes A.  Azcueta.

Nagpaay nga Emcee ni Mr. Dario Roy A. Siruno, Municipal Information Officer ti LGU-Cabugao. # (Web In-Action) 

Thursday, August 29, 2013

SLOPE PROTECTION, NALPAS A PROYEKTO TI BRGY. RIZAL

Cabugao, Ilocos Sur – Iti pannakiuman ti Web In-Action ken ni Municipal Engineer Crescencio C. Formoso ti LGU-Cabugao  itay nabiit, pinasingkedanna a nairingpasen ti proyekto ti Slope Protection/Flood Control  iti ampir ti Karayan Cabugao a mabatogan ti Brgy. Rizal iti daya ti Osmena Bridge. Daytoy ket naisangrat a mangprotektar iti panagreggaay ti igid ti karayan no pumigsa ti ayus.


Daytoy a proyekto ket nailungalong babaen kadagiti Opisiales ti Barangay Rizal nga idauluan ni Brgy. Captain Teddy U. Soller, ABC President  ken napunduan ti pannakaaramidna babaen iti Municipal Share ti RA 7171  ti LGU-Cabugao nga idauluan ni Mayor Edgardo “Ediboy” S. Cobangbang, Jr.

Insupusop ni Municipal Engineer Crescencio C. Formoso a naan-anayen  a nalpas ti pakabuklan daytoy a proyekto  a nangpapintas ti buya iti dayaen ti rangtay a masakupan ti Barangay Rizal. # (Web In-Action)

BAGYO NANDO, NAKASAGANA LATTA TI MDRRMC

Cabugao, Ilocos Sur – Iti iseserrek ti Bagyo Nando iti Area of Responsibility (AOR)  iti Ilocos Provinces, nagalerto manen dagiti kameng ti Municipal Disaster Risk Reduction Management Council (MDRRMC)-LGU Cabugao iti aniaman nga eventualities iti umay a bagyo. Makaalarma dagiti damag  iti radio ken telebision ken uray pay iti social network media iti kinaranggas nga impalay  da nagsaruno a  Bagyo Maring ken Labuyo iti nadumaduma a lugar iti pagilian ket awan ti mayat a kastoy koma ti mapasamak iti barbarangayda nangruna ditoy Cabugao.

Iti pannakiuman ti Web In-Action idi Agosto 28, 2013 a panagkirpa ti Bagyo Nando, imbatad ni Engr. Nestor B. Somera, mangidaulo ti MDRRMC a nagrekuridada kabayatan a sumsumrek ti Bagyo Nando iti Ilokos a nangibunga manen ti nakaro a panagtudtudona (monsoon rain) a nanglippias kadagiti nababa a disso ken uray dagiti kalsada a malasatan ti drainage crossing.

Iti ili ti Cabugao, awan ti nakaro a napagteng nga emerhensia a napasamak malaksid iti panagbunnong dagiti drainage crossing ti Kalsada Nasional ngem nadagdagus a naaksionan babaen dagiti pannakabagi ti DPWH ken ti LGU-Cabugao.

Kanaig daytoy, nasuspender ti klase ti elementaria iti maysa nga aldaw kas panangannad iti manamnama nga ilalabas ti Bagyo Nando a napakuyogan ti nakaro a panagtudtudona.
Dagitoy nga aksion ti MDRRMC ket resulta ti sistematiko a koordinasion iti nagduduma nga Opisina ken dagiti barangay iti LGU-Cabugao nga idauluan ni Mayor Edgardo “Ediboy” S. Cobangbang, Jr.  iti sumungad ken dimtengen a kalamidad ditoy a Munisipalidad. # (Web Situational Report)

Wednesday, August 28, 2013

RICE-BASED FARMING TI BUNGRO FA, NABALLIGI

Cabugao, Ilocos Sur – Iti pannakiuman ti Web In-Action iti Agosto 28, 2013, impakaammo ni Mr. Edy L. Sevilleja, Presidente, Bungro Farmers Association a nabun-as ti mulada a pagay iti proyekto ti asosasionda iti Rice-Based Farming a nagkammayyetan ti LGU-OPAG, Ilocos Sur, DA-RFU 1 ken ti LGU-Cabugao,, Ilocos Sur nga idauluan ni Mayor Edgardo “Ediboy” S. Cobangbang, Jr.


Innayon ni Mr. Sevilleja a kabayatan a mayur-uray ti panagtan-ay ken pannakaapitto ti mulada a pagay, maisarsaruno manen nga itrabahoda ti project proposal ti panagmulada ti mais ken nateng iti umay a Main Crop (Nobiembre-Mayo).

Insupusop pay ti Presidente ti Bungro FA a pagyamyamananda agraman dagiti kamiembruanna iti agtultuloy a  suporta ti  LGU-Cabugao agraman iti DA ta naballigi amin dagiti  iyusuatda a proyekto para iti pagsayaatanda a mannalon iti barangayda. # (Web In-Action)

PROACTIVE TI SERBISIO NGA ITDEN TI RHU-MHO

Cabugao, Ilocos Sur – Iti pannakiuman ti Web In-Action ken ni Dr. Bernardino M. de Gracia, Medical Officer III, Municipal Health Office (MHO), Cabugao, Ilocos Sur idi Agosto 27, 2013, impakaammo ni Dr. De Gracia a proactive ti kalikagumanna a maiwayat a serbisio dagiti kakaduana iti medikal a benneg kadagiti barbarangay. Innayonna nga agdama a programa ita ti DOH iti pannakaidanon ken pannakaiyasideg ti serbisio ti salun-at kadagiti maseknan nga umili iti aw-away.


Daytoy met ti maysa a kalikagum a direksion a tun-oyen ti LGU-Cabugao nga idauluan ni Mayor Edgardo “Ediboy” S. Cobangbang, Jr.  para iti Benneg ti Salun-at kadagiti umili ti Cabugao iti agdama.  Banag a pangikagumaananda iti LGU-Cabugao a  mangkomplementar kadagiti maipatpatungpal a  programa ken aksion iti RHU-MHO ken  ti DOH tapno agtultuloy a mamantener ti napintas a kasasaad dagiti bumarangay ket makapagtrabahoda a para iti pagdur-asan ti panagbiagda ken iti ilida. # (Web In-Action)

SUPPLEMENTAL FEEDING TI DAY CARE, NAISAKNAP

Cabugao, Ilocos Sur – Nailunsad manen ti Supplemental Feeding program kadagiti ubbing nga imatmatonan dagiti Day Care Workers kadagiti 31 a barangay ti Munisipalidad ti Cabugao nangrugi iti maikatlo a lawas ti Agosto 2013.

Mismo a dagiti Day Care Worker ti immay nagala ti kaibatogan nga alaenda a bagas a para iti  panagpa-Feeding-da iti ituyangda nga eskediul. Rinuk-atan met dagiti pannakabagi ti MSWDO dagiti naited a kasapulan dagiti Day Care Workers kadaytoy nga usuat.

Iti pannakiuman ti Web In-Action ken ni MSWD Officer Mrs. Lydia S. Gazmen itay nabiit, tinawen a maar-aramid daytoy a programa a para kadagiti ubbing ket inaldaw a maikkanda ti suplementar a pagtaraon babaen ti panangisagana dagiti Day Care Workers kadagiti maluto a maipasango.

Kabayatanna, dinayaw ken kayat a maitultuloy  ni Dr. Bernardino M. De Gracia, Medical Officer III ti Municipal Health Office (MHO) dagitoy a gannuat ti MSWDO ken dagiti Barangay Day Care Workers a katulongan iti pannakatagiben ti salun-at  iti barangay tapno mapapigsa ti resistansia dagitoy nga ubbing kadagiti tumaud a saksakit a patauden ti panagbalbaliw ti klima. Innayon ni Dr.  De Gracia a kalikagumanna a mamantener daytoy a programa kadagiti barangay tapno pumigsa ti pamuonan a pundasion ti salun-at dagiti agtan-ay nga ubbing para iti masanguanan a kasasaadda.

Iti sabali a bangir, naiwayat metten ti Feeding kadagiti underweight children kadagiti barangay a nakaeskediul babaen ti grupo ti Municipal Nutrition Action Office nga imatonan ni Mrs. Joenah G. Sevilleja, AT/DA-LGU. Daytoy a gannuat ket mangnayon pay iti pagsayaatan ti ubbing nga  ipatpatungpal ti MSWDO kadagiti ubbing iti barangay.  # (Web In-Action)

Tuesday, August 27, 2013

MATH CLASS TI UBBING, DANDANIN MALPAS

Cabugao, Ilocos Sur – Naangay manen  ti Math Class ti napilpili nga ubbing iti 26 a pageskuelaan ti Cabugao DepED District idi Agosto 24, 2013 iti Cabugao South Central School, Brgy. Bonifacio, Cabugao, Ilocos Sur a nangkuyogan dagiti nagannak/Guardians kadagiti napili nga ubbing nga agadal iti Matematika iti maikalima a Sabado nga inda panagbasa kadaytoy nga asignatura.


Daytoy a petsa ket maikalima a Sabadon  a panagbasada ket agleppas iti maikanem a Sabado inton  Agosto 31, 2013.
Kabayatanna, masansanay metten dagiti kangrunaan a mapili nga ubbing iti tunggal pageskuelaan a maisangal iti MTAP, Math Quiz ken Math Challenge a maangayto ditoy ili ti Cabugao a pakasagatan dagiti dakkel ti kabaelanna nga agpangato agingga iti rehional a benneg.

Daytoy a programa ket paset ti panangpadigem ti kabaelan dagiti ubbing babaen iti panangirusat ti Departamento ti Edukasion (DepED) tapno maisaganada para iti masanguanan a pannakatennebda iti daytoy a paglaingan dagiti agbasbasa. # (Web In-Action)

DRAINAGE TI SANGO TI TIENDAAN, MAIKALAWA

Cabugao, Ilocos Sur – Madama a matartarimaan/maikalkalawa ti Drainage Canal ti asideg ti NISTC-Public Market a masakupan pay laeng ti Brgy. Baclig, Cabugao, Ilocos Sur iti dumna ti Kalsada Nasional.

Iti pannakiuman ti Web In-Action ken ni Kagawad Arnel Ilar, Committee Chair on Solid Waste Management, Barangay Baclig, Cabugao, Ilocos Sur itay nabiit, imbatadna a kaduana ti Sangguniang Barangay ti Brgy. Baclig a nangidarirag ken ni Mayor Edgardo “Ediboy” S. Cobangbang, Jr. iti pannakaipailawa ken pannakaipan ti pasetna iti  reinforce concrete pipes  a dadakkel ti ag-70 metros ti kaatiddogna   ti Drainage Canal iti Kalsada Nasional a maysa pay kadagiti drainage outlet ti danum nga aggapu iti Tiendaan. Insupusop ni Kagawad Ilar nga agatiddog met  ti 40 meters ti drainage culvert  canal ket 30 meters met ti kaatiddog ti nasakaban ti dadakkel nga imbornal a maitapuak ti danumna  iti irrigation main canal ti NIA-SIMABUSA.
Innayon ni Kagawad Ilar a manam-ayan ita dagiti kapurokanna ta saandan a malayus no agpigsa ti danum gapu iti pannakaipalawa ti nasao a drainage canal. Pinagyamananna iti Gobierno Munisipal nga idauluan ni Mayor Ediboy ta naaksionan daras daytoy a kalikagumda a pumurok ken bumarangay ken sumayaat pay met  ti panagdaliasat dagiti dadduma nga umili kadaytoy a pagbunnongan ti danum no agpigsa ti tudo. # (Web In-Action)

DUMAYO DAGITI KORIDOR/PARTIDOR TI Ist DISTRICT DITOY CABUGAO

Cabugao, Ilocos Sur – Gapu iti panagkasapulan ti kaaduan a konsumidores ti karne iti nuang ken baka, inlatak ni Mr. Marciano Raciles, Presidente, Cabugao Livestock Traders Association a dumaydayon dagiti  Koridor/ Partidor ti Umuna a Distrito ti Ilocos Sur kas iti San Juan, Magsingal, Vigan City, Sto. Domingo, Bantay ken Sinait ditoy Cabugao Dayo iti tunggal aldaw ti Sabado.

Innayon ni Mr. Raciles a magustuanda ti kinalukmeg dagiti mailako a baka ken nuang ditoy pagdadayoan ket para konsumo lattan ti kaaduan a gatangenda. Patinayon met a tumartarabay ti Municipal Livestock Inspector/Veterinarian Dr. Melvin Castro, DVM a mangkitkita no umisu met laeng a masursurot ti pannakaiproseso ti papeles dagiti ayup sakbay a mairuarda  iti Dayo.

Patinayon pay a tumartarabay dagiti Opisiales ti Gobierno Lokal nga idauluan ni Mayor Edgardo “Ediboy” S. Cobangbang, Jr. tapno mapapigsa ti nakem dagiti mangipatpataray iti Dayo a mangtingiting kadagiti posible a pagdur-asan pay  ti operasionna. # (Web In-Action)

Friday, August 23, 2013

BUWAN NG WIKA, SINELEBRARAN TI CABUGAO DepED

Cabugao, Ilocos Sur – Sinelebraran ti Cabugao DepED District ti “Buwan ng Wika”  iti Tema: Wika Natin ang Daang Matuwid” ket naangay ti programa iti Sociall Hall, Cabugao South Central School, Brgy. Bonifacio, Cabugao, Ilocos Sur iti Agosto 23, 2013.

Narugian ti programa babaen iti panglukat a sarita ni Public Schools District Supervisor Helen V.  Siruno. Dinakamat ti Superbisora  iti pateg ti kabukbukodan a pagsasao a mangipasimudaag ti nabaknang a kultura ken tradision ti Pilipino. Dinakamatna ti panangipateg ti pagilian babaen iti maymaysa a pagsasao nga intakder ni Nag-Presidente Manuel L. Quezon, mabigbig nga Ama iti Nailian a Pagsasao a daytoy ti  Pilipino.


Kalpasan ti intermission number dagiti agad-adal iti Cabugao SCS, nangipaay ti Mensahe ni SB Member Dr. Jemaima S. Tan-Yee, Committee Chair on Education. Dinakamatna met ti pateg ti panangselebrar ti Nailian a Pagsasao. Panagkaykaysa a mangitunda iti pannakapasayaat ti sektor ti Edukasion ti kangrunaan nga anag ti panagsaritana.

Kalpasan pay ti sabali nga intermission number a panagsala dagiti napili nga agad-adal, naisaruno ti panagsarita ni Mayor Edgardo “Ediboy” S. Cobangbang, Jr. a mangted ti Mensahe.


Kimmablaaw ken nagyaman ni Mayor Ediboy kadagiti mangisursuro, agad-adal ken nagannak a timmalantan kadaytoy a panagselebrar ti Cabugao DepED ti Buwan ng Wika. Innayon ti Ama ti Ili a nasayaat dagitoy a bambanag a pakamulian  ti kapampanunotan dagiti naganus ti isipna nga ubbing. Ti nakaysa a panagtitinnulong a pananghulma  kadagiti ubbing ket ibungana ti nasayaat a pagbanaganda ken  iti napintas a pannakipagilida, segun pay iti Alkalde Munisipal.

Kangrunaan a naitampok kadaytoy a panagselebrar ket dagiti maigannuat a pasalip: Patimpalak sa Pagbigkas ng Tula, Solong Pag-awit  ken  Pagguhit ng Poster.
Inyam-ammo ni Ms. Josie Bisco, MT1, Cuantacla E/S dagiti mangbukel ti Hurado, pannakaibinsa met ti criteria para iti salip ti binagi  ni Ms. Marilina Salarzon, T3, Daclapan E/S ken iti Orientasion ti inlawawag ni Mr. Rommel M. Santella, District Filipino Coordinator.


Kalpasanna, maaramid ti pangserra a programa babaen ti pannakaipakaammo dagiti mangabak nga ubbing  iti nadakamat a pasalip.

Nagpaay nga Emcee da Ms. Liezel Sol, T2, CNCS ken ni Ms. Marilyn Raciles, T2, Turod E/S. # (Web In-Action)

BUWAN NG WIKA, SINELEBRARAN TI CABUGAO NORTH CS

Cabugao, Ilocos Sur – Sinelebraran ti Cabugao North Central School ti “Buwan ng Wika”  babaen  iti Tema: “Wika Natin ang Daang Matuwid” ket naangay ti programa iti Cabugao Cultural and  Sports Complex, Brgy.Rizal, Cabugao, Ilocos Sur iti Agosto 22, 2013.

Narugian ti programa babaen iti panglukat a sarita ni Mr. Maxfel S. Suboc, PTA President. Dinakamat ti Presidente iti pateg ti panangitandudo ti  kabukbukodan a pagsasao. 

Kalpasan ti intermission number dagiti agad-adal iti Cabugao NCS, pinagsapata ni Mrs. Estrellita M. Siruno, Principal II, Cabugao NCS dagiti napili nga Opisiales ti Samahan ng Inang Wika.

Kangrunaan a naitampok kadaytoy a panagselebrar ket dagiti maigannuat a pasalip: Patimpalak sa Kasuotang Pilipino, Pagbigkas ng Tula, Solong Pag-awit  ken  Paggawa  ng Poster.

Nagpaay a Hurado ti pasalip da Mr. Dario Roy Siruno, Miss Bubbles  B. Sevilleja, Mrs. Dinia S. Azcueta ken Ms. Lorna D. Salom iti dua a kategoria a napagsasalipan iti KASUOTANG PILIPINO.

Kalpasanna, naaramid ti pangserra a programa babaen iti pannakaipakaammo dagiti nangabak nga ubbing  kadagiti nadakamat a pasalip.

Impeksa ni Ms. Liezel C. Sol, Filipino Coordinator ti panagyamanna kadagiti mangisursuro, ub-ubbing a nagpartisipar iti programa, dagiti nagannak a nagbuya ken dadduma pay a sangaili nga adda akemda iti naballigi a pannakaipatungpal ti programa ti selebrasion ti pageskuelaan. # (Web In-Action)