Friday, May 31, 2013

CORONATION NIGHT TI MAYFLOWER, NAANGAY

Cabugao, Ilocos Sur – Naangay ti Coronation Night 2013 ti Mayflower Festival ti Iglesia Filipina Independiente (IFI), Brgy. Quezon, Cabugao, Ilocos Sur a nagpartisiparan dagiti Parishioners ken lumugar ti Brgy. Quezon idi rabii ti Mayo 30, 2013 iti compound ti IFI Church.

Iti Welcome Address, impeksa ni Mr. Fidel Sinampaga, LAYPIC Leader  ti pannakaawis  ti sangka-simbaanan ti IFI-Cabugao  a mangimatang iti kulminasion ti Mayflower Festival 2013 a tinawen a maar-aramid iti Simbaan-Aglipayano  kas panagpipinnatalged, panangpairut ti panagsisinninged ken panangpataud ti pundo a mangpasayaat ti Simbaan.

Nakikaysa ken kinoronaan da Vice Mayor Danny Q. Gazmen ken MSWD Officer Mrs. Lydia S. Gazmen ni Reyna Jenby Grace Somera  1st a nangituray kadagiti pito a prinsesa a da: 1st Princess Christine Mae Paras; 2nd Princess Remalyn Segui; 3rd Princess Jenny Basuil; 4rth Princess Kriza Mae Suniega; 5th Princess Winnielyn Saupan; 6th Princess Roxette Sapinoso; ken 7th Princess Nicole Tabangin.


Makaparay-aw met dagiti naiballaet nga  intermission number dagiti Youth of Iglesia Filipina Independiente (YIFI) ken iti  IFI Cabugao Choir  babaen kadagiti moderno  a sala ken panagtokar ti banda.

Imbanda  dagiti nagannak dagiti Sashes kadagiti Prinsesa idinto ta da Mr. & Mrs. Jufel Glenn Somera ti nangted ti Sash ken Capa ken ni Reyna Jenby Grace 1st. Nakoronaan met dagiti Prinsesa babaen kadagiti natudingan a sangaili iti dayta nga okasion.

Iti Mensahe ni Vice Mayor Danny Q. Gazmen, kimmablaaw ken nagyaman iti pannakaawisda iti okasion ti Simbaan IFI. Innayonna a napateg met kadakuada ti Simbaan gapu ta nakipagbangon  dagiti appoda a lallakay iti pannakaipasdek daytoy a pammati.

Dinayaw ti Bise Mayor iti natanipkel a panagtitipon dagiti Parishioners ken iti panagkaykaysada iti aniaman nga igannuatda a mangpasayaat ti sektorda.
Ni Ms. Arcelie Sonido 1st ti Outgoing Queen.


Nangipaay ti Closing Remarks ni Rev. Fr. Joseph Badua, Parish Priest ket kimmablaaw  ken nagyaman met kadagiti Parishioners, Opisiales ti LAYPIC, WOPIC ken YIFI iti pannakabuangay daytoy nga aktibidad. Pinagyamananna pay ti LGU-Cabugao nga imbagian ni Vice Mayor & Mrs. Danny Q. Gazmen iti pannakikaysada ken tultulongda kadagiti programa ken aktibidades ti Simbaan-Aglipayano iti Cabugao, Ilocos Sur.

Nagpaay nga Emcee da Mrs. Judelyn Marzo, Mrs. Myrna Jara ken ni  Mrs. Mayflor Sumoba. # (Web In-Action) 

UPDATE DAGITI PHILHEALTH CARD HOLDER ITI CABUGAO

Cabugao, Ilocos Sur – Seguridad ti Salun-at ti kaipapanan iti pannakairehistro dagiti  kaamaan iti 33 a barangay  iti ili ti Cabugao, Ilocos Sur iti programa ti Philippine Health Insurance Corporation (Philhealth) a nangrugi idi Tawen 2008 ngem  nairugi a naisaknap iti  Tawen 2010 agingga iti agdama. 

Babaen iti agtultuloy a panangilungalong  ti LGU-Cabugao nga idauluan ni Mayor Edgardo “Ediboy” S. Cobangbang, Jr. iti programa ti salun-at, dagiti sumaganad  ti Philhealth Enrollees manipud 2010 agingga iti agdama:


Tawen
Tripartite
LGU
Pantawid/NHTS
2010
4,000
2,294

2011
2,000
2,294

2012

3,294
2,271
2013
2508
3294
2.271


Iti pannaki-amad ti Web In-Action idi Mayo 30, 2013, imbatad ni Mrs. Lydia S. Gazmen, Municipal Social Welfare Development Officer a kaaduan  a bilang ti rehistrado iti Philhealth nga umili ti Cabugao, Ilocos Sur iti agdama.

Dagiti Konsehales ti Ili nga idauluan ni Vice Mayor Danny Q. Gazmen ken  inyuna  ni SBM Dr. Carlito S. Pano, Committee Chair on Health ti   nangpaaprobar ti gakat a mangipaay iti Premium Payment dagiti kualipikado a recipients ti Philhealth. Gapu itoy, natun-oyan ti arapaap dagiti mangidadaulo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a maipaayan dagiti umili iti madadaan a pagsammakedanda no agpa-ospitalda ta naseknan ida ti  sakit.

Babaen iti pannakaiprayoridad ti programa a pannakapasayaat ti salun-at
dagiti umili ket ad-adu ita ti panawenda a  makapagtrabaho ken makategged a mangital-o ti kasasaad ti panagbiagda ken makatulong metten iti pannakaidur-as ti ekonomia ti ili. # (Web Situational Report)

AGLEPLEPPASEN TI PANAGBUNONG TI GANAGAN KADAGITI MANNALON

Cabugao, Ilocos Sur – Iti pannaki-amad ti Web In-Action idi Mayo 30, 2013, imbatad dagiti Personnel ti DA-LGU Cabugao nga aglepleppasen ti pannakaibunong dagiti subsidized fertilizers a buklen ti Ammonium Sulfate ken Organic Fertilizers agraman dagiti ramit agrikultura a naisangrat para kadagiti mannalon ken bumarangay.

Iti Mayo 30, inasistiran ti DA-LGU nga idauluan ni Mr. Edgar S. Balangatan, Destino a Teknisian kasta met ken ni Mrs. Marjorie Castillo  iti maikadua a bansada a panagibunong kadagiti libre a ganagan kadagiti mannalon iti Brgy. Cuancabal, Cabugao, Ilocos Sur a kaduada ni Brgy. Captain Rogelio S. Siruno.
 

Iti 33 a barangays ti ili ti Cabugao iti agdama, ti laengen Brgy. Carusipan ti saan a naaramid ti distribusionna iti 125 a bilang dagiti mannalonna. Nupay kasta, imbatad dagiti DA-LGU Staff a makompleto ti pannakaibunong dagiti subsidized fertilizers iti daytoy maudi a lawas ti Mayo 2013.

Maibatay iti rekord ti DA-LGU Cabugao, nangrugi ti distribution idi Mayo 16, 2013 ket umabot iti 4,300 a mannalon (ID Holder) ti bilang dagiti nai-masterlist a mannalon a maka-avail kadaytoy a programa ti LGU-Cabugao.

Ti agtultuloy a pannakaitandudo ti Agrikultura ken pannakatulong dagiti mannalon a mangiragpat iti kasasaadda iti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. # (Web In-Action)
 

Thursday, May 30, 2013

HANDOG TITULO PROGRAM, NARUGIAN ITI POBLASION

Cabugao, Ilocos Sur – Naangay ti Pre-Titling kadagiti Free Patent Applicants (Residential Lot) iti uppat  a barangay ti Poblasion: Brgys. Rizal, Quezon, Baclig ken Bonifacio, Cabugao, Ilocos Sur idi Mayo 29, 2013 iti Cabugao Cultural and Sports Complex, Brgy. Rizal, Cabugao, Ilocos Sur.

Naaramid ti one-stop shop a panangasikaso kadagiti kasapulan a papeles tapno mapadaras ti pannakalpas ti amin nga aplikasion ket mayendorso ni DENR Region 1 Technical Director for Lands Management Service Miss Lydia S. Lopez iti ngato para iti pannakaaprobarna.


Iti pannaki-uman ti Web In-Action idi Mayo 29, 2013, imbatad ni RTD Lopez nga isuda ti dumanonen kadagiti agpatitulo. Innayonna a ti  agaplikar ti patitulo ket kasapulan nga  agdalan iti proseso nga aramiden ti Municipal Assessor ken ti DENR-LMS ngem no dati a natituluan ti daga a maiyakar iti panagtagikua ket mabalinda ti agderetso iti Land Registration Authority ken Register of Deeds.


Buklen dagiti mangitrabaho ti panagpatitulo iti 5 nga Staff ti DENR-Land Management Service (LMS)  nga idauluan ni RTD Miss Lydia S. Lopez, 9 a kameng ti CENRO-Bantay nga idauluan ni CENR Officer Florencio P. Soliven. Jr. ken dagiti  Personnel ti Municipal Assessor’s Office ti LGU-Cabugao  nga idauluan ni Mrs. Lilia S. Flores  kasta met nga immasistir dagiti Opisiales kadagiti nadakamat a barangay ti Poblasion. # (Web In-Action) 

SABANG E/S, MAYAT TI DANGGAY TI PTA KEN MANGISURSURO

Cabugao, Ilocos Sur – Iti pannaki-uman ti Web In-Action idi Mayo 29, 2013, imbatad dagiti mangisursuro iti nasao a pagadalan nga idauluan ni Head Teacher Mr.  Edison S.  Solatre iti nabukel nga inisiatibada a mangpasayaat iti panagisuro ken  pagadalanda.

Umuna, babaen iti panagtinnulong ti PTA ken Teaching Staff ket napasimpada ti nalawa a Multi-purpose Building  iti tengnga ti compound ti pagadalan.

Maikadua, natarimaan ti atep ti Home Economics Building iti asideg ti School Stage  babaen ti pundo ti DepED.

Maikatlo, napintaan ti atep ken bakrang dagiti pasdek-pagadalan tapno malapdan ti nadaras a panaglati ken panagdaan.

Maang-angay pay ti regular coastal clean-up a pagpartisiparan  dagiti mangisursuro, 4 P’s Members,  ubbing ken nagannak a mangdalus iti parte ti baybay a batog ti eskuela.

Manamnama nga iti panagrugi ti panagbabasa ket masukatanda dagiti imulada iti school garden kas iti mayiras a panagmula ti pagay, nateng ken rootcrops. Tarimaanenda pay ti Nursery-da, Herbary, Compost Pit, Segregation of Waste (Nabubulok/Di nabubulok) ken ti  inaladan ti eskuela.

Impalgak dagiti mangisursuro nga iti mabatayanda iti Special Education Fund (SEF) ket maus-usar dagiti ubbing a mapan makikontes ken agatendar ti nadumaduma nga aktibidad nga iwayat ti DepED iti nadumaduma a lugar  a pakamulian  ti kinataoda nga agad-adal nga agbalin a produktibo nga umili.

Malaksid iti PTA, makidindinnanggay met  ti Konseho ti Barangay nga idauluan ni Brgy. Captain Edgardo S. Cobangbang, Sr. kadagiti aktibidad  a para iti pagsayaatan ti pageskuelaan ti Barangay Sabang, Cabugao, Ilocos Sur.

Dagiti mangbukel iti Teaching Force ti Sabang Elementary School ket dagiti sumaganad: Mr. Edison S.  Solatre, Head Teacher, dagiti mangisursuro: Mrs. Olivia S. Atiburcio, Grade 1; Mrs. Rowena S. Espiritu, Grade II; Mrs. Caroline P. Mina, Grade III; Mr. Randy A. Somera, Grade IV; Mrs. Nora R. Quibilan, Grade V; Mr. Pacifico R. Soto, Grade VI; Mrs. Rachel D. Somera, Relieving Teacher; ken ni Ms. Mercy Valorozo, Kindergarten Teacher.  # (Web In-Action)

Wednesday, May 29, 2013

MAKAPARAGSAK MET TI MAPAGLAKUAN TI VERMICOMPOST

Cabugao, Ilocos Sur – Iti pannaki-amad ti Web In-Action iti Mayo 29, 2013, imbatad ni Mr. Nathaniel Galamgam, Organic Farming Focal Person, DA-LGU a makaay-ayo met ti panagtarakenna ti alinta (Night Crawler) ta adda met agas ti bannog nga isu ti rag-o nga ipaay ti mapaglakuan iti Vermicompost. Innayon ni Mr. Galamgam a manipud naipadamag dagiti umay aggatang iti vermicompost iti Vermicompost Bin iti uneg ti Municipal and Plant Nursery ket agsasaruno ti umay aggatang iti usarenda kadaytoy a panagtatalon iti Wet Season 2013 (Hunio-Nobiembre).

Itay nabiit, adda naurnong a P6,000 a napaglakuan ken nairemit iti Tesoreria ken  adda man itan umabot ti  P6,870 a naurnong a  napaglakuan iti agdama.

Insupusop ni Mr. Galamgam a monmonitorenna met dagiti indibidual a naikkan  ti alinta a patanorenda kadagiti barangay ket kalikagumanna iti “gaya-gaya” system tapno maisaknap ti vermiculture/vermicomposting a programa ti DA ken iti LGU-Cabugao iti barangay.

Dagitoy nga inisiatiba ket ar-aramiden ti DA-LGU Cabugao a  mangkoplementar iti Organic Agriculture  a  programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno maksayan ti gastos dagiti mannalon ket maingato ti mapastrekda iti panagtalonda. # (Web In-Action)

AKTIBIDAD KEN PROYEKTO TI BARANGAY SABANG, UMAD-ADU

Cabugao, Ilocos Sur – Iti pannaki-amad ti Web In-Action iti Mayo 29, 2013, imbatad ti Officer of the Day (OD) iti Barangay Hall, Barangay Sabang, Cabugao, Ilocos Sur a tunggal aktibidad a mapasamak iti barangay-da ket sistematiko a maikoordinar kadgiti agbantay iti barangay hall tapno naurnos ken madadaan ti pannakigamulo dagiti bumarangay nga idauluan ni Brgy. Captain Edgardo S. Cobangbang, Sr.

Dagiti regular nga aktibidad-da ket  iti Clean Drive iti intero a barangay, Coastal Clean-up, Tree Planting, Distribution of Seedlings, panagdalus ti 4 P’s iti kalsada ken group works dagiti asosasion ken sektor iti barangay a pakairamanan iti eskuela.

Dagiti proyekto a naipatungpal ken nagun-od dagiti bumarangay iti agdama ket ti pannaka-instolar ti solar light iti sango ti Multi-purpose Building ken 20 pay a solar lights a maipasdek  kadagiti kalye ti barangay, 2 a Motorized Thresher a saggaysa  a maited iti Konseho ti Barangay ken Farmer’s Association, power generator nga usaren ti sangkabarangayan ken saggaysa a motor generator iti Konseho ken ti FA.

Kalepleppas pay a naiwaras iti subsidized fertilizers (Ammonium Sulfate ken Organic Fertilizers) kadagiti mannalon iti Brgy. Sabang babaen iti panangiwardas ti Konseho nga idauluan ni Punong Barangay Edgardo S. Cobangbang, Sr., FA President ken dagiti pannakabagi ti DA-LGU nga idauluan ni Municipal Agriculturist Zenaida S. Andrada. 

Impeksa dagiti Opisiales ti Barangay iti nadakamat a barangay iti panagyamanda iti Gobierno Munisipal kadagiti pannarabayda kadagiti aktibidadesda a mangpasayaat ti lugar ken dagiti proyekto a naited a mangidur-as pay ti kasasaad ti bumarangay. # (Web In-Action)

PRE-TITLING, INYUSUAT TI ASSESSOR’S OFFICE

Cabugao, Ilocos Sur – Inwayat ti grupo ti Municipal Assessor’s Office nga idauluan ni Municipal Assessor Lilia S. Flores ken ni Engr. Conrado Segui agraman dagiti kakaduana iti Free Patent Application (Residential) kadagiti agindeg iti Barangay Bonifacio, Cabugao, Ilocos Sur idi Mayo 28, 2013 iti Barangay Hall ti  nasao a barangay.


Sakbayna, maiwayat ti Pre-Titling tapno masakada dagiti aplikante dagiti kasapulan a papeles sakbay a gamuluen ti DENR Regional Office 1-Land Management Service (LMS)  iti pannakatitulo dagiti residential lots.


Kabayatanna, dagiti sumaganad ti kasapulan  a paaddaen dagiti aplikante: 1. Tax Declaration 2. Basis of Ownership:  a. Death Certificate b. Deed of Adjudication c. Deed of Donation d. Waiver of Right 3. LGU Certification (Brgy. Captain Certification) 4. RTC Clearance 5. Application Fee, P50 6. Documentary Stamp, P150 7. Duly Accomplished Free Patent Application.



Iti pannaki-amad ti Web In-Action iti,  Mayo 28, 2013, imbatad ti  Municipal Assessor a maipasakbay ti pannakipagkitada kadagiti aplikante tapno maikkanda ti panawen a mapan agsakada kadagiti kasapulanda a papeles sakbay nga aksionan ti DENR-LMS  ti panagpatituloda.


Kanaig daytoy, maiwaywayat ti Cabugao Cadastral Survey Project babaen iti pribado a kompania tapno lehitimo a makapatitulo dagiti lot owners  a masakupan ti Munisipalidad ti Cabugao babaen iti libre a serbisio ken nagkammayet a  programa ti DENR Regional Office 1-LMS  ken  iti LGU-Cabugao nga idauluan ni Mayor Edgardo “Ediboy” S. Cobangbang, Jr. # (Web In-Action)

Tuesday, May 28, 2013

SENSORY EVALUATION, NAANGAY KADAGITI BUNGRO FARMERS

Cabugao, Ilocos Sur – Naangay ti Sensory Evaluation babaen ti panang-grado dagiti mannalon iti naidasar  kadakuada a linabag ti naluto a  mais ken innapuy (pagay) a maysa a pangalaanda ti datos kadagiti  a wagas a pangtingitingan  ti DA-RFU 1 iti mayataday a klase ti pagay ken mais a maimula ditoy a deppaar.

Iti nasao a taripnong, imbatad ni Mr. Edwin James Franco, espesialista ti DA ken Project Coordinator iti Rice-based Farming System in  Lowland Areas babaen iti ILIARC-INPC, Batac City a malaksid iti mais nga agbalin nga alternatibo para iti staple food ti kaaduan ket posible pay dagiti maimula a kas iti mais, saba,  potato, sweet potato,   cassava, gabi  a maimula iti rainfed areas kas iti Barangay Bungro ken Barangay Pug-os, Cabugao, Ilocos Sur.

 
Kalpasan ti Sensory Evaluation, naangay ti pannakaaramid  ti Farm Plan and Budget/ Cropping Calendar dagiti nagatendar a kameng ti  asosasion para iti regular cropping (Wet Season 2013) tapno sistematiko iti pannakaipatungpal ti programa ket matun-oyan  ti naballigi a resultana.

Nagatendar dagiti Opisiales ti Barangay nga idauluan ni Brgy. Captain Fermin Sarinas, Mr. Obas Bill Y. Baclig, AT-DA LGU, Mr. Edy L. Sevilleja, Presidente, Bungro FA, Mr. Elmer G. Bromeo, Presidente ti Pug-os FA ken dadduma pay nga Opisiales ken  miembros ti nasao a dua nga asosasion.


Kamaudiananna, nagballigi dagiti panggep ti nasao a panagtataripnong dagiti mannalon  iti dayta a petsa. # (Web In-Action)

PALAY SHED ITI BUNGRO FA, MARUGRUGIANEN

Cabugao, Ilocos Sur – Narugianen ti pannakaaramid ti Palay Shed ti Bungro Farmer’s Association ket maipasdek daytoy iti asideg ti Flatbed Dryer ti asosasion a masarakan iti lote ti Barangay Bungro, Cabugao, Ilocos Sur.

Iti pannaki-amad ti Web In-Action idi Mayo 27, 2013, imbatad ni Mr. Edy L. Sevilleja, Presidente ti Bungro FA nga apaman a mausar ti Palay Shed-da ket mabalin pay ditoy nga agmiting ti gimong-da wenno maangay ti seminar. Innayon ni Mr. Sevilleja a makatulong unay ti kaadda koma ti Palay Shed ta maibilang daytoy a pannaka-Headquarters ti asosasion.


Kanaig daytoy, imbatad ti Bungro FA President nga adu met ti makikontrata a nagmais  ken aggatang a pagipamagaanda iti Flatbed Dryer-da ngem tagtagiurayda ti pannakalpas ti Palay Shed a pagilinonganda.


Malaksid iti panagmulada iti alternatibo a mais iti pagay inton  Main Crop, maigiddan pay ti panagpatanorda ti dinguen babaen iti livestock component ti brgy-based project ti DA-RFU 1 a supsuportaran ti LGU-Cabugao.


Babaen kadagitoy nga inisiatiba-da, manamnama a malitupanda dagiti saanda a matalon iti main crop babaen ti panagmulada ti mais ken nadumaduma ti klasena a nateng ken cash crops  iti brgy.-based rainfed farming system a wagas ti panagmulada.


Kanaig daytoy, imbatad pay  ni Mr. Sevilleja a ditoy Barangay Bungro ti manamnama a pakairusatan ti proyekto ti “Windmill” a para iti irigasion iti pananganamong ni Mayor Edgardo “Ediboy” S. Cobangbang, Jr.


Dagiti  agdama a proyekto dagiti mannalon ditoy a deppaar ket nagbuligan nga ipatungpal ti DA-RFU 1 ken LGU-Cabugao tapno maingato ti masapulan dagiti mannalon babaen iti pannakamula dagiti dati a di mamulmulaan iti panawen ti main Crop (Nobiembre-Mayo) a mangrimbaw iti  kakiddit  ti danum a pangbiag ti mulmula. # (Web In-Action)

KALSADA A KUMAMAMANG ITI PUROK, MAKONGKRETO

Cabugao, Ilocos Sur – Iti pannaki-amad ti Web In-Action idi Mayo 27, 2013, imbatad ni Brgy. Captain Fermin Sarinas ti Barangay Bungro, Cabugao, Ilocos Sur a marugrugianen a masimpa ti kalsada ken masemento inton agangay nga  agturong kadagiti purok ti barangay iti amianan a paset ti barangay.

Daytoy a proyekto ket napunduan babaen ken ni Diputado ken Governor-Elect Ryan Luis V. Singson iti Probinsia ti Ilocos Sur.


Impeksa ni Brgy. Captain Sarinas agraman dagiti kakaduana  iti Konseho ti Barangay ken kalugaranna iti nasged a panagyamanda kadaytoy a pagsayaatan nga ipaay ti Diputado ken naelektaran a Gobernador iti Probinsia ti Ilocos Sur iti agdama.


Kayatda met nga ipeksa ti panagyamanda iti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti panangilungalongda iti pannakapasayaat daytoy a kalsada.


“Dakami a mannalon ti kangrunaan a maisagut kadaytoy a kalsada ta asideg ti pagtatalonanmi,” impeksa ni Mr. Emigidio Jacob ti Barangay Bungro.


Ti pannakapapintas dagiti kalsada ket agtultuloy a prayoridad a programa ti Gobierno Munisipal tapno mapanam-ayan dagiti bumarangay a mangibiahe kadagiti produktoda a mangital-o ti panagbiagda ken makatulong  iti ekonomia ti ili. # (Web In-Action)

Monday, May 27, 2013

BRIGADA ESKWELA, NAGLEPPAS ITI MAYO 25

Cabugao, Ilocos Sur – Nagleppas ti Brigada Eskwela 2013 iti Mayo 25, 2013 babaen iti naruay  a gapuanan dagiti nagannak ken mangisursuro a nagurnos, nagdalus iti uneg ken arubayan ti eskuela ken nangpasimpa kadagiti pagpaknian (Comfort Rooms), alad ti eskuela ken kanaigna a banag  a natarimaan iti uneg ti pageskuelaan.

Iti pannaki-amad ti Web In-Action idi Mayo 24, 2013, imbatad dagiti mangisursuro iti Cabugao North Central School nga idauluan ni Mrs. Estrellita Siruno, Principal II nga uray nagleppas ti Brigada Eskwela ket agtultuloy latta   ti panagdalimanekda iti uneg ti kuarto. Agtultuloy latta ti panagisimpada ti arubayan  kabayatan ti pannakaaramid manen ti enrolment days manipud Mayo 27, 2013 agingga iti Mayo 30, 2013 ta mangrugi ti klase iti Hunio 3, 2013.

Iti sabali a bangir, naballigi a nayimplimentar ti Brigada Eskwela kadagiti 26 pay a pagadalan a makasakup  iti Poblasion ken 33 a barangays ti ili, segun ken  ni Public Schools District Supervisor Helen V. Siruno. 

Innayon ti Superbisor a napateg a bigbigen ti sakripisio dagiti nagannak agraman ti pundo ti PTA a nausar ken tulong a naggapu iti Alumni kadagita a pagadalan ken dadduma pay a tulong  dagiti naayat ti panagpuspusona nga indibidual ken grupo para iti interes dagiti ubbing nga agbasa.

Impeksa  ni District Supervisor Siruno  ti panangbigbig ken panagyamyamanda   iti Dep-ED Cabugao  iti agtultuloy a panangsuporta ti LGU-Cabugao nga idauluan ni Mayor Edgardo “Ediboy” S. Cobangbang, Jr. kadagiti programa ken irusat  ti DepED a  pakaseknan ti pannakapasayaat  dagiti pageskuelaan iti intero a Munisipalidad. # (Web In-Action)

TI AKEM TI JUNK SHOP ITI PANNAKASIMPA DAGITI BASURA

Cabugao, Ilocos Sur -  Nupay maibilang a pribado a negosio ti panaggatang ti bote, rakrak nga appliances, ken retaso a landok dagiti Junk Shop a masarakan iti Poblasion, maibilang met daytoy a makatulong iti pannakaibassit ti basura gapu ta magatangda ken mailakoda para iti recycled purposes.

Malaksid ti panagbalaybalay dagiti junk shop workers, mabalinda lattan ti agderetso kadagiti Material Recovery Facility ti tunggal barangay a nakaurnongan ti waste materials a mabalinda a gatangen.

Kabayatanna, naregget met dagiti scavengers a mangagsaw kadagiti mabalin nga ilakoda idiay disso ti Dumpsite ti Ecology Center ti Munisipio tapno makraayan dagiti wara ken basura a maurnong iti inaldaw a panagbiag dagiti umili.

Iti pannaki-amad ti Web In-Action idi Mayo 26, 2013, imbatad ti maysa Junkshop Owner ti Barangay Bonidfacio, Cabugao, Ilocos Sur a pagyamananda ti LGU-Cabugao ta mapalubosanda nga agrekurida iti Poblasion nga agsursor ti magatangda a bote ken retaso ti bambanag a pangsustenerda ti negosioda kas pangalapkapanda ti pagbiag-da babaen iti panamagbalin a pagkakitaan ti panangurnong kadagiti waste materials. # (Web Situational Report)

MAIMULA A SEEDLINGS, KASAPULAN A MAMONITOR

Cabugao, Ilocos Sur – Agtultuloy a komkomplementaran  ti Clean and Green Program ti Munisipio ti Re-Greening Program ti Gobierno Nasional babaen kadagiti manamnama a maiwayat a panagmula ti seedlings a nadumaduma ti klasena ita a panagtutudo  a paset ti Tawen 2013.

Iti pannaki-amad ti Web In-Action idi Mayo 24, 2013, imbatad ni Mr. Robert S. Savella, Caretaker ti Municipal Plant and Nursery a narugianen nga agiparuk-atda ti seedlings kas iti Manila Palm (Butsina), Mahogany, G-melina ken Logo kadagiti organisasion ken indibidual a makualipikado a makapagmula ti kayo.

Iti dayta nga aldaw, immay nagkiddaw ti seedlings nga imulada ti 4-H Club Brgy. Cael-layan nga idauluan ni Ms. Francelita Morales kadagiti naidesignar kadakuada a pagmulaan iti barangay-da.

Insupusop met ni MENRO Edgar S. Balangatan nga uray naregget ti umay-da panagala ti seedlings ket kasapulan ti naiget a pannakamonitor dagiti maimula tapno manamnama ti ad-adu a survivability percent ti naimula. Dinakamat pay ni MENRO Balangatan a mairaman dagitoy nga akem dagiti Barangay Officials (Elective ken Appointive) a mangmonitor kadagiti maimula a seedlings nangruna kadagiti naiparuar  iti Municipal Plant and Nursery.
Dagitoy nga inisiatiba ket paset ti pannakaipatungpal ti programa ti Clean and Green ti Munisipio tapno masulnitan dagiti napukan  a pinuon ti kayo tapno mataginayon ti kalkalainganna a temperatura iti aglawlaw. # (Web Situational Report)


Friday, May 24, 2013

CORN-LIVESTOCK SEMINAR, NAANGAY ITI BARANGAY BUNGRO

Cabugao, Ilocos Sur – Naangay ti Corn-Livestock Integrated Farming System Training iti dua nga aldaw (Mayo 22-23, 2013) iti Barangay Bungro, Cabugao, Ilocos Sur a nagpartisiparan dagiti kameng ti Bungro Farmer’s Association nga idauluan ni Mr. Edy L. Sevilleja, Presidente  ken iti Pug-os Farmer’s Association nga idauluan ni Mr. Elmer G. Bromeo, Presidente.

Kalpasan ti Acknowledgment of the Participants ni Mr. Edy L. Sevilleja, nangipaay ti mensahe ni Mr. Teofilo R. Quintal, Provincial Agriculturist. Kimmablaaw ken dinayawna ti madadaan a panangsarabo dagiti mannalon iti mayataday ken naipanawen a programa ti pagbiagan a maimula a mais nga ipaay ti DA. Imbatad ti Opisial ti DA Provincial a mamati nga agballigi ti amin a component ti proyekto ken  gannuat ditoy gapu iti agtultuloy a kinatunos ken suporta ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  para kadagiti programa ti Agrikultura a mangtulong kadagiti mannalon.


Sinarurongan met ni Mr. Oscar Tobia, DA Provincial Corn Coordinator iti napintas a maipakpakita a partnership ti DA ken ti LGU-Cabugao  a daytoy ti gubuay ti panagsagrap dagiti mannalon iti napipintas a resulta dagiti  proyekto ti DA. 

Impaay ni Mrs. Rhoda A. Galban, Corn Training Coordinator ti Overview of the Training. Iti Training Proper, inlektiur ni Ms.  Jean B. Abella, R & D  Corn Focal Person ti topiko nga Introduction to Corn-based Farming System; binagi met ni Dr. Larina G. Zaballa, Livestock Staff, R & D dagiti Topiko ti Crop Livestock Integration, Corn Forage Conservation & Utilization, Diseases of Large and Small Ruminants; Prevention & Control of Aflatoxin ti inyadal da Ms. Helen Salinas ken Ms. Aileen Millare, agpada a Feed Laboratory Staff.


Iti Day 2 (Mayo 23, 2013), binagi ni Dr. Jovita Datuin,  Agricultural Center Chief nga inyadal/indemonstrar  ti Feed Formulation and Mixing using By-Product. Naaramid ti aktual a pannakaidemonstrar ti pakabuklan ti topiko.

Nakikaysa met iti nasao a seminar da Bungro Brgy. Captain Fermin Sarinas, Mr. Obas Bill Y. Baclig, Miss Katryn Tapuro ken Opisiales ti Barangay iti nasao a lugar . Naballigi ti dua nga aldaw a seminar.


Daytoy a gannuat ket paset ti alternatibo pay a maimula iti proyekto ti rainfed farming a maipatpatungpal a kadagiti dua nga asosasion agraman iti livestock component daytoy a mangkomplementar iti sustenable a turongen ti proyekto dagiti mannalon ditoy a deppaar. (Web In-Action)

FERTILIZER DISTRIBUTION, ADDAN 24 A BARANGAY A NALPAS

Cabugao, Ilocos Sur – Iti pannaki-amad ti Web in-Action iti Cabugao DA-LGU Office idi Mayo 23, 2013, nairekord nga addan 24 a barangay a nalpas a nakaibunongan dagiti ganaganda (Ammonium Sulfate ken Organic Fertilizer) babaen kadagiti Opisiales ti Barangay ken Farmer’s Association nga inasistiran dagiti pannakabagi ti DA-LGU Cabugao.

Dagitoy a subsidized inputs ket paset ti programa iti pannakaidur-as ti Agrikultura ti LGU-Cabugao   nga idauluan ni Mayor Edgardo “Ediboy” S. Cobangbang, Jr. a panangtulong kadagiti sapasap a mannalon iti inda manen panagtalon iti Wet Season 2013 (Hunio-Nobiembre).

Iti Mayo 23, 2013, naaramid ti distribution kadagiti barangay ti Baclig, Salomague, Quezon, Namruangan, Bonifacio ken Arnap.

Innayon ti DA-LGU Office nga adda pay siam (9) a barangay a saan a nagibunong ket manamnama a maigannuat  daytoy dagiti sumarsaruno nga  eskediulda ken  mairingpas daytoy nga aktibidad iti kabiitan a panawen. # (Web In-Action)