Tuesday, April 30, 2013

FDS KEN RE-VALIDATION TI 4 P’S, NAIWAYAT

Cabugao, Ilocos Sur-Naangay ti Family Development Session (FDS) ken Re-validation dagiti agdama ken baro a recipients ti Pantawid Pamilyang Pilipino Program (4 P’s) iti 33 a barangay ti Munisipalidad idi Abril 29, 2013 iti Municipal Conference Hall, Cabugao, Ilocos Sur.

Kabayatan a maipatpatungpal ti health care  and education a kangrunaan a ramen ti programa, agtultuloy met a maedukaran dagiti kameng iti pagrebbenganda kadagiti ubbingda ken pamiliada ken kasta met iti komunidadda a pgnanaedanda.


Iti Re-validation, maestudiar met a naimbag ti kasasaad  ti tunggal maseknan a kameng ket maiwayat ti regular update dagiti mainugot a papeles a maaramat dagiti kameng iti pannakaipatungpal ti programa.

Naglektiur da Miss Aida Cueto, Municipal Link ken Focal Person ti 4 P’s ti Cabugao kasta met kada Ms. Jessie Ann O. Tabut, Municipal Link, Ms. Juliet P.  Madriaga, Social Welfare Assistant ken Mrs. Wilma S. Cruz, MSWDO Staff ti Cabugao.

Tumartarabay met da MSWD Officer Mrs. Lydia S. Gazmen, MSWD Social Welfare Assistant Leonora G. Reintar ken Mr. Gary Vicerra, Municipal Link.

Ti 4 P’s ket programa ti Gobierno Nasional nga  ipatungpal ti LGU-Cabugao nga idauluan ni Mayor Edgardo “Ediboy” S. Cobangbang, Jr.  kas kabinnuligna a mangipagteng ti serbisio kadagiti nakurapay a pamilia a  pakaseknan ti edukasion ti annak ken ti salun-atda. # (Web In-Action)


TECHNO-DEMO KEN FARMERS PRACTICE, NAPAGDILIG

Cabugao, Ilocos Sur- Iti pannaki-amad ti Web In-Action iti Abril 30, 2013, imbatad ni Mr. Edgar S. Balangatan, AT/Techno-Demo Farm Coordinator iti Sagayaden Municipal Techno-Demo Farm, napaneknekan a nalaplapsat ken ad-adu ken nagaygayad  ti bunga dagiti balatong a nagpadasanda iti wagas ti pannakataming ti Techno-Demo.

Innayon ni Mr. Balangatan a nalangto met ti Farmer’s Practice ngem napampandek ken babbabassit ti bunga ti balatong a napagpadasanda.


Kabayatanna, maiwaywayat  met ti pannakaburas dagiti nagango a bunga ti balatong iti agdama. Insupusop ni Mr. Balangatan a napagballigianda ti epekto ti tikag ita a panagmumula (Dry Season 2013)  ket ikagumaanna nga iyallatiw daytoy a kapadasan ti DA-LGU kadagiti vegetable growers iti kastoy a bulbulan iti sumarsaruno a tawen.


Iti  di agsarday a panagtakuat kadagiti wagas a mangpasayaat ti panagmulmula para kadagiti mannalon ket paset ti direktiba ni Mayor Edgardo “Ediboy” S. Cobangbang, Jr. iti DA-LGU tapno  agtultuloy  ti suplay a nateng a pagtaraon ti sapasap a mangingato ti matgedan dagiti mannalon. # (Web In-Action)

Monday, April 29, 2013

MEDICAL MISSION, ADU TI NAGPAAGAS KEN NABALLIGI

Cabugao, Ilocos Sur – Naangay ti Medical Mission a nagbuligan ti ROPHEH (Reaching out to Peoples Health Through Entrusted Hands) Medical Mission Group, Maru Bagac Foundation babaen ti panangtarabay ni Dr.  Margarita Santella-Jara  ken iti Local Government Unit (LGU)-Cabugao nga idaluan ni Mayor Edgardo “Ediboy” S. Cobangbang, Jr.

Nasapa a nagturong dagiti agpaagas iti Cabugao Rural Health Unit ket madagdagus met nga inrehistro dagiti RHU Personnel a nakadestino kadagiti naituding a lamisaan.

 Naigannuat  ti Medical Mission idi Abril 27, 2013. Naggapu dagiti Medical Staff iti Metro Manila. Imbatad ni SB Member Dr. Carlito S. Pano, Committee Chair on Health  a sigsigud a  mangipapaay ti Medical Mission ditoy ili ti Cabugao iti kallabes a tawen ti ROPHEH.

Iti pannaki-amad ti Web In-Action kadagiti Medical Staff and Personnel a nangtarawidwid ti panagagas, nairehistro  dagiti nagpaagas iti benneg ti  Medical (saan unay a nadagsen a sakit),  Dental, Minor Surgery (saan unay a nakaro a sakit),  ken  Circumcision.

Ti pannakaitandudo ti sapasap a salun-at kadagiti umili ket prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno agtultuloy a naragsak dagiti umili a mangsagrap iti gin-awa  nga itden ti agtultuloy a panagdur-as ti ili. # (Web In-Action) 

TI PUROK NAMNAMA KEN SITIO SAB-ONG TI BRGY. NAGSANTAAN

Cabugao, Ilocos Sur – Iti pannaki-amad ti Web In-Action idi Abril 27, 2013, imbatad ni Brgy. Captain Mario Peralta ti Brgy. Nagsantaan, Cabugao, Ilocos Sur  a kalpasan a makongkreto dagiti Main Roads iti barangayda kas koma kadagiti kumamang  iti eskuela ken barangay hall-da, narugian met a pinasementoda dagiti dalan a mapan iti purok-da a disso ti kabalbalayan ken iti Sitio Sab-ong, kapantokan a purok  ti barangayda.

Imbatad dagiti napagdamagan a lumugar iti Purok Namnama ken Sitio Sab-ong a dakkel ti pagnam-ayan nga indateng ti pannakasemento ti kalsada ta katudo man wenno kainitna  ket natalingenngen ti rikna dagiti lumugar nga agallatiw ken agdaliasat ta saanen a nalutlot ken natapok kas iti kallabes.

Impeksada ti panagyamanda iti Gobierno Munisipal ta nalakada payen  nga iruar dagiti produktoda iti pagdalananda.

Insupusopda a dagitoy a pagimbaganda ket resulta ti agtultuloy a pannakitimpuyogda iti Konseho ti Barangay ken iti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  tapno maipaayan dagiti bumarangay iti pagnam-ayanda nga agindeg iti lugarda. # (Web In-Action)

Sunday, April 28, 2013

AGTULTULOY TI QUARTERFINALS TI SK BASKETBALL TOURNAMENT

Cabugao, Ilocos Sur – Agtultuloy a maaramid ti Quarterfinals ti SK Basketball Tournament ti 31 nga SK Teams manipud iti 33 a barangays ti ili a Cabugao, Ilocos Sur.

Kabayatan  ti panagsasalip dagiti Top Teams  a nasagat iti Elimination Round, uming-inget ti salisal dagiti 12 nga SK Teams  a pakasagatan ti agsasalip para iti Semifinals.

Kabayatanna, iti malem ti Abril 28 met laeng ket naangay ti inawaganda iti “Battle of the Champions” a nakaitampokan ti panagsalip ti Basketball Team ti  dua nga ili ti Ilocos Sur: Vigan City ken Sta. Maria a nangabak iti Inter-Town Basketball Tournament nga inesponsoran da Ex-Congressman Ronald V. Singson ken Governor Luis “Chavit” Singson iti Probinsia ti Ilocos Sur itay nabiit.
Nangabak ti Basketball Team ti Sta. Maria ket naray-aw dagiti umili iti Cabugao a nangbuya iti makapatengngel-anges a panagbalubal dagitoy  iti  dangadang dagiti kampeon ti basketball iti First District ken Second District, Ilocos Sur. Kalpasan daytoy, naituloy ti Games iti SK Basketball Tournament a nakaaramidan ti sumagmamano pay a  nayeskediul babaen iti Committee on Games iti dayta a malem ken petsa. # (Web In-Action) 

PAGOPISINAAN TI LIVESTOCK TRADERS, MAUS-USAREN

Cabugao, Ilocos Sur – Iti pannaki-amad ti Web In-Action idi Abril 27, 2013, imbatad ni Mr. Dante Naval, Municipal Meat Inspector a pimmintas  ti operasion iti Municipal Slaughterhouse ken Livestock Office gapu ta addaanen iti agsinsin a pagopisinaan dagiti pannakabagi ti LGU Personnel ken Livestock Officers iti nabiit pay a nainagoraran a pasdek iti Cabugao Dayo.

Kabayatanna, nabun-as latta dagiti naidayo nga animales kas iti nuang ken baka. Iti kaaldawan ti Dayo iti Abril 27, 2013, naited dagiti dadduma a premio dagiti nangabak  iti pakontes ti PINAKA ti nuang ken baka a naangay idi Abril 20, 2013 babaen kadagiti Opisiales ti Cabugao Livestock Traders Association nga idauluan ni Mr. Marciano Raciles, Jr., Presidente.

Dinayaw  ni Mayor Edgardo  “Ediboy” S. Cobangbang, Jr. iti naregget a partisipasion dagiti Livestock Traders iti pammasangbay nga aldaw iti Cabugao Ragsak Festival idi Abril 20, 2013 a pannakainagorar ti baro a pasdek iti Dayo  ken baro a pagkiluan ti Municipal Slaughterhouse. # (Web In-Action)

 

Saturday, April 27, 2013

RABII TI PIESTA, NAISANGAYAN ITI KAADU TI NAGBUYA

Cabugao, Ilocos Sur – Naaramid ti Variety Show iti maudi a rabii ti panagpiesta ti ili a Cabugao, Ilocos Sur  iti Abril 25, 2013 iti Cabugao Central Park (CCP), Brgy. Bonifacio,  Cabugao, Ilocos Sur ket dupudop dagiti umili a nangsarabo ti idadateng dagiti Artista ti Pelikula a Filipino babaen ti panangesponsor ti GMA Network, Inc. 

Immuna a nagpabuya dagiti Dancers ti Cabugao Cultural Troupe sakbay  dagiti Moviestars.

Nabara ti panangsarabo  dagiti kameng ti  Municipal  Officials ken umili ti Cabugao  kadagiti simmangbay nga  Artista a  kas kada Ruffa Mae Quinto, Dion Ignacio, Jonalyn Viray, Kris Bernal ken Rochelle Pangilinan.

Kimmablaaw  ni Mayor Edgardo “Ediboy” S. Cobangbang, Jr.  kadagiti umili  ken sangaili a nakipiesta.

Kalpasan ti panag-perform dagiti Artista, naiparang  dagiti naipabuya  nga impaaramid dagiti nalalaing a Hosts ti GMA a nagpartisiparan dagiti agbuybuya a nakaray-awan met dagiti umili a naitallaong. Naited pay dagiti give-aways a sagut ti GMA Kapuso kadagiti agbuybuya  kabayatan ti panagpabuyada. 

Nakikaysa met da Vice Governor Deogracias Victor “DV” B. Savellano, Mrs.  Dina Bonnevie-Savellano ken Hon. DJ Savellano iti karabiyan ti Piesta. # (Web In-Action)

 
CLICK HERE TO VIEW MORE PHOTOS
CLICK HERE TO VIEW MORE PHOTOS
CLICK HERE TO VIEW MORE PHOTOS
CLICK HERE TO VIEW MORE PHOTOS
CLICK HERE TO VIEW MORE PHOTOS
CLICK HERE TO VIEW MORE PHOTOS
CLICK HERE TO VIEW MORE PHOTOS
CLICK HERE TO VIEW MORE PHOTOS

Friday, April 26, 2013

SALA SA KALSADA, REPREP TI NAGBUYA NGA UMILI

Cabugao, Ilocos Sur – Nagdudupudop a nagbuya  dagiti umili iti agsumbangir  ti Kalsada Nasional iti panagsala dagiti nagaruat iti agkakagarbo nga ubbing ken agtutubo a nangsala iti kabukbukodanda nga Entry iti pakontes ti LGU-Cabuga0 iti “Sala ti Kalsada” a kas pangray-aw iti publiko iti kaaldawan ti Piesta ni San Markos Ebanghelista, Patron ti ili a Cabugao, Ilocos Sur iti kamalman ti Abril 25, 2013.

Nangrugi ti streetdance iti sango ti Munisipio babaen iti panangiwanwan ni SB Secretary Maxfel S. Suboc ken ni Municipal Tourism Officer Dario Roy Siruno iti  preparasion ken urnos  dagiti streetdancers. Tunggal grupo nga agsala ket tinarabay dagiti mangisursuro a mangiwanwan  kadakuada. Naregta met dagiti napusgan a Marshal ti LGU a mangtimon iti tao nga agbuya ken ti lumasatan  dagiti agsala iti National Highway.

CLICK HERE TO VIEW MORE PHOTOS
Immuna ti Mobile Patrol Car ti MPS Cabugao nga idauluan ni Chief of Police William N. Nerona ken nakitinnulong ti kapolisan, BPATS ken Blue Boys (Peace Personnel) a nangiwardas ti panaggunay  ti streetdancing.
CLICK HERE TO VIEW MORE PHOTOS
Nagtungpal ti streetdancing iti Cabugao Central Park (CCP), Brgy. Bonifacio, Cabugao, Ilocos Sur ket reprep ti tao a nagbuya iti agsumbangir ti kalsada ken iti napasamak a panagpabuyada iti ikub ti CCP. Naggigiddan a nagpabuya ti uppat a sona ti elementaria sa simmaruno ti dua a parang ti 5 a high schools ti ili ti Cabugao a nagpabuya.
CLICK HERE TO VIEW MORE PHOTOS
Sakbay a naipakaammo dagiti nangabak babaen iti tallo-katao a nadutokan a Hurado, impaay ni Mayor Edgardo “Ediboy” S. Cobangbang, Jr. ti mensahena. Kimmablaaw ken nagyaman ket intal-ona iti imatang ti kaaduan dagiti mangisursuro ken nagpartisipar  a nangurnos kadagitoy a pabuya ken mapagsasalipan kas maysa a mangparambak iti panagpiesta ti ili nangruna iti kaaldawan ti Patron ti ili,  ni San Markos Ebangheslista.

Pinagyamanan  pay ti Alkalde Munisipal ti adu a nagbuya nga umili nga immay ket binigbigna ti pateg dagitoy a pakontes a mangmuli ti napintas a kababalinda a makipagili dagiti ubbing ken agtutubo kasta met iti komunidadda para iti  natimpuyog  ken  dumurdur-as pay nga ili ti Cabugao.

CLICK HERE TO VIEW MORE PHOTOS
Inyalat ti Zone 1 ti Cabugao DepEd District ti Umuna a Premio iti kategoria ti Elementaria ken iti Lipit National High School iti nakagun-od ti First Place iti kategoria ti High School. Inawat dagiti Nag-Champion ti premioda ken napadayawan  met latta dagiti nagpartisipar a grupo iti  babaenda  ken naited dagiti  kaibatoganda a gunggona. # (Web In-Action)

CLICK HERE TO VIEW MORE PHOTOS

UN-VEILING TI MARKER TI GEN. ANTONIO A. LUNA MONUMENT, NAANGAY

Cabugao, Ilocos Sur – Napasamak ti seremonia  ti  pannakawaknit ti abbong ti Marker ti baro a Monumento ni General Antonio Luna y Ancheta Novicio idi  bigat ti Abril 25, 2013 babaen ken ni Mayor Edgardo “Ediboy” S. Cobangbang, Jr. a binayabay dagiti Konsehales ti ili nga idauluan ni Vice Mayor Danny Q. Gazmen.

Nakikaysa met iti nasao a seremonia  dagiti Opisiales ti Barangay nga idauluan ni Brgy. Captain Teddy U. Soller, ABC President kasta met dagiti kameng ken Opisiales ti  nadumaduma nga organisasion iti Munisipalidad agraman ti sibubukel a Pamilia ti Gobierno Lokal ti ili a Cabugao, Ilocos Sur.


Kalpasanna, naangay ti nabiit a  panagsaludsod ni ABS-CBN  Correspondent April  Rafales ken ni Mayor Ediboy iti sakaanan ti Monumento ni Gen.  Antonio A. Luna ket imbatad ti Alkalde Munisipal a kangrunaan a makagapu a naiyakar ken naisimpa ti paglugaran ti  Monumento ti nalatak a Filipino General ket iti pannakarisuten ti pagdulonan ti Munisipio ken ti Simbaan ken daytoy a disso ti maysa kadagiti nagnaan ti Nalatak a Bannuar idi panawen ti Rebolusion.


Kalpasan ti seremonia, nagtarus dagiti timmabuno iti Simbaan Romano Katolika ket inatendaranda ti Nasantuan a Misa (Liturgical Celebration)  a naidaton ken ni San Markos Ebanghelista, Patron ti ili a Cabugao ken para iti sapasap a   naituding  a maselselebraran iti   kaaldawan  iti Panagpiesta ti ili ti Cabugao iti Abril 25.

Inannong da Nueva Segovia Archbishop Ernesto Salgado, Dd.   ken Rev. Fr. Felix Costales, Kura Paroko ti ili iti naindaklan a Misa iti daytoy a petsa ti panagpiesta ti ili. # (Web In-Action)

RAFFLE DRAW TI FEDERATED FARMERS, NAANGAY ITI DA-LGU

Cabugao, Ilocos Sur – Naangay ti Raffle Draw ken pannakaited dagiti premio ken sertipiko ti pammadayaw iti mismo nga Opisina ti DA-LGU, Municipal Hall  idi Abril 25, 2013 a nagpartisiparan dagiti Opisiales ti Cabugao Federated Farmer’s Association nga idauluan ni Mr. Elmer Guerrero Bromeo.

Nagtinnulongan da Municipal Agriculturist Zenaida S. Andrada ken Mr. Nereo S. Daproza agraman iti DA–LGU Staff a tinarawidwidan  ti nasao nga aktibidad.


Naited dagiti  premio kadagiti Raffle Draw Winners kas iti maysa a Knapsack Sprayer, Water Jug ken 10 nga Organic Fertilizers. Kasta met nga inawat  ti tunggal asosasion iti Sertipiko ti Pammadayaw a naggapu iti LGU-Cabugao iti panangidaulo  ni Mayor Edgardo “Ediboy” S. Cobangbang, Jr. iti naregget a pannakipasetda iti pakontes ti Bahay Kubo ni Mannalon a nangabakan ti Baclig Farmer’s Association iti First Prize.

Binigbig ni Mayor Ediboy ti dakkel a partisipasion dagiti mannalon ken mangngalap ita a tawen iti panagpiesta ti ili ta impakitada  ti naballigi a panangakemda iti parteda  a  nangparagsak ti umuna nga aldaw ti panagpiesta ti ili: Agriculture and Fishery Day idi Abril 22, 2013. # (Web In-Action) 

Thursday, April 25, 2013

NARAGSAK TI ADMINISTRATION & BALIK-CABUGAO NIGHT

Cabugao, Ilocos Sur – Napunno ti ragragsak ti  Cabugao Central Park Auditorium iti pannakaselebrar ti Administration and Balik-Cabugao Night iti Abril 24, 2013 a nagpartisiparan dagiti Municipal Officials nga idauluan ni Mayor Edgardo “Ediboy” S. Cobangbang, Jr., Pamilia-LGU, Kakapitanes ti Barangay ken Opisiales ti Brgy-based Organizations, umili ti Cabugao ken kangrunaanna dagiti kailian a naggapu iti ballasiw-taaw manipud iti nadumaduma a nasion ken lugar iti lubong.

CLICK HERE TO VIEW MORE PHOTOS
Pinarungbo dagiti makapikapik a samiweng a pinaruk-atan ti Flecturn Band ket saan a kinabaelan a pinarukma dagiti di agmawmaw  a sonata iti alibtak ken regta  dagiti sumasala a nangipamatmat iti laingda a mangkumpas kadagiti agduduma a piesa a maipatayab ti Banda a nangpadaeg ti salonan.

Iti siglat  ni SB Secretary Maxfel S. Suboc a mangiwardas  ti salonan, innaganan ken pinagmartsana dagiti Balikbayans ket nag-mega walk-da iti lawlaw ti  salonan. Naibaet manen dagiti sonata   ket mainaganan dagiti mangidaulo kadagitoy nga Opisial wenno Balikbayan a napan nagsala.

Nangipaay ti Mensahe-na ni Mayor Ediboy ket nabara ti kablaaw ken panagyamanna  iti panangipateg dagiti Balikbayans ti awis ti Gobierno Munisipal  a makipagrambakda ita a Piesta. Impeksana iti panagraemna iti ayat ken  kabaelan dagiti Balikbayans a mangipapaay iti adu a proyekto a pagsayaatan dagiti umili  ti Cabugao ket  insupusopna a sapay koma ta agtultuloy dagitoy a mapasamak ita ken iti masanguanan a panawen.

CLICK HERE TO VIEW MORE PHOTOS
Naiballaet pay  ti Special number a panangipamatmat ti talento  dagiti Balikbayan nga agkanta  a nangray-aw iti publiko.

Naited ti pammadayaw ken premio dagiti nangabak a Float iti napasamak a Grand Parade iti Abril 24, 2013. Dagiti sumaganad a Cluster Barangay ti nagabak ket mismo a dagiti Municipal Officials nga idauluan ni Mayor Ediboy ti napan iti entablado a nagiyawat kadagiti premio.

First Prize (P50,000) – Cluster E, Brgy. Pug-os, Reppaac,  Nagsantaan; Second Prize (P30,000)- Cluster F, Brgys. Quezon, Bato,  Alina-ay; Third Prize (P20,000) - Cluster D, Brgys. Rizal, Bungro, Salapasap.

CLICK HERE TO VIEW MORE PHOTOS
Dagiti Consolation Prizes: (sag-P10,000)- Cluster A, Brgys. Sabang, Daclapan, Namruangan; Cluster i, Brgys. Cacadiran, Lipit, Nagsincaoan; Cluster J, Brgys. Aragan, Sisim, Carusipan; Cluster H, Brgys. Cuantacla, Arnap, Cuancabal; Cluster B, Brgys. Dardarat, Turod, Salomague; Cluster C, Brgys. Baclig, Pila, Marga-ay; Cluster G, Brgys. Bonifacio, Turod Patac, Sagayaden; Cluster K, Brgys. Maradodon, Cael-layan, Catucdaan.

Nakitaripnong met ni Hon. DJ Savellano ken dadduma pay a bisita a nakidanggay kadagiti Balikbayans ken LGU  a nakipagrambak iti dayta a rabii.  # (Web In-Action)