Cabugao, Ilocos Sur – Paset ti panangalay-ay ti kasasaad dagiti nakurapay a pamilia ti panangpili kadagiti kualipikado a pakaipaayan ti tulong babaen ti programa ti Department of Social Welfare and Development a “Pantawid Pamilyang Pilipino Program” a nabansagan ti 4 P’s.
Maikanatad unay iti agdama a programa ti Gobierno Munisipal iti panangidaulo ni Mayor Ediboy S. Cobangbang, Jr. a panangited ti importansia kadagiti nakukurapay a pamilia tapno mariknada ti pateg ti Gobierno kadakuada ket makaritda a mangbaliw ti kasasaadda.
Segun ken ni Mrs. Lydia S. Gazmen, Municipal Social Welfare and Development Officer ti DSWD, adda lima a Barangays a napagtutunosan ti Gobierno Munisipal a makaawat kadaytoy a programa: ti Brgys. Sabang, Namruangan, Pug-os, Dardarat ken Daclapan, padapada a masarakan iti igid ti baybay ket adda naarisit a 478 a pamilya a mabenepisiaran.
Innayon ni Mrs.Gazmen a nangrugi daytoy a programa ti Gobierno Nasional idi 2009 ket agpatingga iti 2015. Malaksid iti “cash grant” a maited iti pamilia, maikkan ti libre a panagadal ti annak, regular a check-up ken bakuna ti agtawen 1-5, ken panagpurga iti 6-14 iti mamindua iti makatawen, dagiti nagannak ket agatendarda met iti seminar, panagplano ti pamilia, panagpakonsulta ti ina no masikog sakbayna ken kalpasan nga aganak a tarabayen ti mainumo a komadrona.
Iti umuna a Paskua ti baro nga administrasion, nangted pay ti Gobierno Munisipal ti grocery gifts ken sagut a pag-Noche Buena-an dagitoy a pampamilya ti 4 P’s. # (Source, Anara-ar Magazine 2010)
No comments:
Post a Comment