TUMULONG A DODOKTOR, MAKIKAYSADA ITI PROGRAMA TI RHU-CABUGAO

Ni Dra. Mimi Pira-Sy ken ti maysa a kliyentena

Cabugao, Ilocos Sur - Apaman a nagtugaw nga Ama ti Ili ti Cabugao ni Mayor Ediboy S. Cobangbang, Jr., maysa kadagiti pakaseknan ti naiyuna nga inikkanna ti pannakataming ket iti benneg ti salun-at dagiti umili.

 Nadesignaran nga agagas da Dr. Mimi Pira-Sy ken Dr. Ivy Castro-Bello, agpada nga Obstetrician-Gynecologist a mangipangruna iti pakaseknan dagiti masikog ken sakit ti babbai. Mamindua iti makalawas nga agagasda iti Rural Health Unit ti Cabugao, aldaw ti Martes ken Huebes.

Imbatad ni Dr. Castro-Bello a kasapulan koma a makitinnulong dagiti inna a masikog ken adda an-annayenna a babbai iti 33 a barangays iti ili tapno makipasetda iti programa ti DOH-LGU-RHU tapno naan-anay a maasikasoda dagitoy ken ma-update ti pakaseknanda babaen iti pannakikoordinarda a patinayon iti Rural Health Unit ti ili. 

 

Iti sabali a bangir, natallugod met ti kaaduan nga umili nga addaan ti sakit ti ngipen aglalo dagiti di makapan iti pribado a Dentista a mapan agpakita iti an-annayenda ken ni Dr. Magno Sol, pannakabagi ti Provincial Health Office ti DOH a mangkitkita ti salun-at ti ngipen dagiti umili ti Cabugao.

Dinakamat met ti agkabannuag a Dentista a maipasagepsep koma iti publiko ti kinapateg ti panangtaripato ti ngipen ta saan a maisina daytoy a napateg a banag a kupikopan ti salun-at.

Nupay nakaempleoda dagitoy a dodoktor iti pagagasan ti Gobierno Probinsial ken Pribado nga Ospital, maragsakanda met a mangiburay ti serbisioda nangruna kadagiti nakurkurang ti gasatda a kailianda. Ibilangda a pakatenneban ti kabaelanda nga agagas ti pannakaited ti orasda nga agserbi iti Rural Health Unit (RHU) ti ili. 

 

Manamnama a maited pay ti prayoridad a pannakataming dagiti dadduma pay a serbisio a maited pakaseknan ti pannakamantener ti salun-at dagiti umili babaen iti Gobierno Lokal ti ili iti panangidaulo ni Mayor Ediboy. # (Joed Sajonia) 

Municipal Health Office ti Cabugao