Cabugao, Ilocos Sur – Kaaduan nga umili ti nagintek iti pagtaenganda ken iti simbaanda nangruna iti ala una ti malem (1:00 P.M.) idi Abril 6, 2012 a pannakaselebrar ti Biernes Santo a selebrasion ti pannakaparigat ken pannakatay ti pisikal a bagi ti Mannubbot a ni Jesukristo babaen kadagidi Hudio.
Kaimportantean a paset nga inimdengan ti sapasap ket iti “Siete Palabras” a pakabuklan ti balikas a napnuan kaipapanan iti biag ti Kristiano dagiti naasut a balikas iti ngiwat ti Mannubbot sakbay a nagsatan iti Krus.
Kalpasanna, naaramid ti pannakailibut ti Rebulto ti naidasay a Mannubbot iti aglikmut ti Poblasion a binayabay ti kaaduan nga umili. Dagiti saan a nakasurot iti libut ket nagtakder, nagurayda iti igid ti kalsada ken highway ken iti tawada a kabuyog ti nakapasged a kandela ket binuyada ken nakipagtamedda iti ar-aramiden dagiti nakiprosesion.
Iti sabali a bangir, dagiti laeng nailaw-an a bakasionista ti natagtagitao kadagiti resorts ken beaches ta napan nakipagpartisipar dagiti kaaduan nga umili iti aktibidades ti simbaanda. Manipud idi Mierkoles Santo, imbatad ti Municipal Police Station a “Very Normal” ti kasasaad ti linak ken talna iti intero a Munisipalidad iti pannakaselebrar ti Semana Santa. # (Situational Report, Web In-Action)
No comments:
Post a Comment