Cabugao, Ilocos Sur (Mayo 31, 2011) – Babaen ti programa ti National Tobacco Administration (NTA) a mangpasayaat ti kalidad ti produksion ti Birhinia a tabako ken mayagpang ti kabibiag dagiti mannalon babaen iti maikanatad a presio, nakikammayet ti Gobierno Lokal ti ili a Cabugao babaen ti panangidaulo ni Mayor Ediboy S. Cobangbang, Jr. ket nakipinnirma iti Memorandum of Agreement (MOA) idi Disiembre 28, 2010 iti nagbaetan ti MLGU, BUYER FIRM (BF), FARMER COOPERATORS (FCs) ken ti NTA.
Sagudayen ti katulagan ti panangpundo ti LGU ken ti BF babaen ti 50-50 counterparting scheme a maipautang kadagiti mannalon ti tabako babaen ti Tobacco Contract Growing System, programa ti NTA.
Babaen ti bileg ti Appropriation Ordinance No. 2010-09 iti Sangguniang Bayan a napetsaan ti Nobiembre 8, 2010, naaprobaran ti production assistance program kadagiti mannalon ti tabako ti ili a Cabugao.
Maibasar iti report ni Mr. Tomasito G. Taloza, Area Supervisor ti NTA, Cabugao Area Office, adda uppat (4) a nakikontrata ti market tie-up, 225 a Farmer Cooperators ken 163.25 ektaria a namulaan ti tabako. Umabot iti P5,304,930 ti naipabulod idinto ta 97.1% ti koleksion kadaytoy a nadakamat a gatad iti panagleppas ti panagtatabako. # (Joed Sajonia)
No comments:
Post a Comment