Cabugao, Ilocos Sur – Paset ti programa ti Gobierno Munisipal iti panangidaulo ni Mayor Ediboy S. Cobangbang, Jr. ti pannakatulong kadagiti mannalon babaen iti pannakaited ti puonan ken panangsurotda ti “Palay Check System” a pakabuklan ti kabaruanan a teknolohia ti panagtalon ken pannakaaramat dagiti mayataday a pasilidad ti panagapit.
Iti naaramid a Memorandum of Agreement (MOA) a pakaidokumentuan ti napagnunumuan, adda uppat a Palay Buying Stations a nakikammayet ken nakipinnirma tapno manamnama a magatang dagiti produkto dagiti mannalon iti nainkalintegan a presio ket mapakaritda pay a mangpapintas ti kalidad ti apitenda a pagay.
Buklen ti Tripartite Agreement (MOA) iti MLGU, Palay Buying Stations, ken Farmer-Cooperators. Saklawen ti MOA iti Wet Season Crop 2011 (Hunio-Nobiembre).
Ti naited a kapital ket umabot iti 3.650 a million a gatad a pakabenepisiaran ti 148 a bilang ti mannalon a mangsuksukay iti 148 ektarias met ti bilangna a pamagayan.
Naituding nga innem a bulan ti kapaut ti masakupan daytoy a proyekto ket 1% ti kada bulan laeng ti maigunggona iti naipabulod a puonan. Maigunamgunam ngarud ti panangbayad dagiti maseknan a mannalon dagiti nabulodda a puonan tapno addanto manen madadaan a mausar para kadakuada ken dadduma pay a mannalon iti sumaruno a panagtatalon/panagtatabako.# (Joed Sajonia)
No comments:
Post a Comment