PAG-SERBISIO A LUGAN TI LGU, IMBILIN NI MAYOR EDIBOY A MAYALIKAKA

Motorpool ti Cabugao

Cabugao, Ilocos Sur – Paset ti direktiba ni Mayor Ediboy S. Cobangbang, Jr. ti pannakataripato dagiti amin a pangserbisio a lugan ti munisipio tapno mamantener a nasayaat ket maipanamnama nga umisu ti pannakausarna ken mabayag ti itdenna a pannakausar kadagiti umili.

Segun iti Mayor, dagiti umili ti nakaigapuan ti kaadda dagitoy a makinaria tapno mausar iti pannakaited ti serbisio kadakuada,. Kalikaguman pay ti Mayor a maannadan dagitoy iti pannakausarda ket maigaraheda iti Motorpool kalpasan ti naituding nga oras a pakaaramatanna  tapno maaywanan ken makliklikan ti personal a pannakausar dagitoy.

Naipasdek ti Motorpool iti abagatan-a-laud ti pasdek ti Slaughterhouse a pakaigarahean dagiti lugan ken Heavy Equipment. Kayat ni Mayor Ediboy nga aturen ti dati  a pannakaus-usar dagiti luglugan ta nadanonanna dagitoy a kaaduanna ti saan a nakakondision ken sobra ti pategda.

Iti sabali a bangir, nangpayalokar ti Ama ti ili iti Sangguniang Bayan iti pundo manipud iti Municipal Share ti RA 7171 a mausar iti pannakagatang ti baro a buldoser ken grader a mangtulong iti pannakasimpa ken pannakapasayaat kadagiti kalkalsada nangruna iti barbarangay  a kasapulan unay dagiti umili. # (Reposted from Tawidnews, February  18, 2011)