Ti Departamento ti Salun-at ti Gobierno Lokal ti ili a Cabugao ket inlunsadna ti sapasap a pannakabakuna dagiti ubbing kadagiti 33 a barangays ti ili a Cabugao tapno mapaksiat ti panagsaknap ti kamuras a tinawen a mangsaplit kadagiti ubbing manipud nakurang a walo ti tawenna agingga iti siam ken amin a nagkasangay a masakupan ti Mayo 4, 2003 agingga iti Hulio 4, 2010.
Daytoy nga aktibidad dagiti empleado ti RHU-LGU ket nairugi idi Abril 4, 2011 agingga iti Mayo 31, 2011. Panggep daytoy a panagbakuna ti mangparmek ti rumsuaan ti kamuras agingga iti tawen 2012. Daytoy a programa ket naan-anay a sinuportaran dagiti Barangay Officials kadagiti 33 a Barangays a nagbakunaan dagiti empleado ti Departamento ti Salun-at.
Nabukel ti pito a grupo ket adda napusgan a Vaccinator, parasurat, mangted ti kapsula a Vitamin A ken Mangigiya ti papanan ti tunggal grupo.Tunggal mabakunaan nga ubbing ket maikkan ti sticker ti pagtaenganda ken kard a pakakitaan ti pannakabakunana.
Ti sibubukel a Gobierno Lokal ti ili a Cabugao babaen ti panangidaulo ni Mayor Ediboy S. Cobangbang, Jr. Ket sinuportaranna daytoy a gannuat babaen iti panangitedna ti uniporme dagiti nagbakuna kasta pay iti streamer ken naglugananda nga umaway. Inikkan pay ti Mayor ti merienda ken pangngaldaw dagiti nagbakuna ken timmulong met dagiti Barangay Officials kadagiti kasapulan dagiti nagbakuna.
Segun ken ni Mrs. Janet Sison, RHU Nurse, umabot iti 8,028 a kabalbalayan ti nabisita ken agdagup iti 6,606 ti bilang ti ubbing a nabakunaan ket 89.00 % ti kaibatoganna a nagapuanan ti grupo.
Dagiti empleado ti Rural Health Unit ket ituloyda a bisitaen ti 58 nga ubbing a dida nabakunaan gapu ta nagbakasion dagitoy nga ubbing iti sabali nga ili ken madamada a maag-agasan iti sabali a sakit babaen kadagiti Doktorda.
Daytoy nga aktibidad a panagbakuna ket maibilang a naballigi agsipud ta awan ti napasamak a saan a nasayaat kadagiti nabakunaan. #(Joed Sajonia)
No comments:
Post a Comment