18TH FOUNDATION DAY ANNIVERSARY TI CABUGAO NHS, NASELEBRARAN

Cabugao, Ilocos Sur – Naselebraran ti 18th Foundation Day ti Cabugao National High School, Turod, Cabugao, Ilocos Sur idi Marso 1-2, 2012. Naidaton ti Thanksgiving Mass iti bigat ti Marso 1, 2012 babaen ti panangannong ni Rev. Fr. Felicisimo “Rudy” Ferrer, Kura Paroko ti ili.

Iti Marso 2, 2012, naaramid ti Motorcade iti bigat iti aglikmut ti Poblasion a nagtungpal iti compound ti Cabugao NHS. Nairugi ti Coronation  Ceremonies iti 10:00 A.M.  

Panglukat a sarita ti impaay ni  Mrs. Teresita Savella,  PTA President. Kimmablaaw ken nagyaman kadagiti immatendar iti nasao a selebrasion. Pannakitunos  para iti nadur-as a pagadalan ken naraniag a masakbayan dagiti agad-adal ti ibatad  dagiti nagannak iti selebrasion.

Kalpasan ti Entrance of the  Royal Court, impaay ni Mayor Edgardo “Ediboy” S. Cobangbang, Jr. ti mensahena iti amin a naitallaong. Kimmablaaw ken nagyaman ti naipakita a   ganetget  dagiti agad-adal, mangisursuro, ken nagannak  a mangselebrar ti pannakaipasdek ti pagadalan. Innayonna a batangda met Gobierno Munisipal  ti mangipaay iti mainayon a kasapulan iti pageskuelaan tapno maiyagpang pay  ti kalidad  ti edukasion a tagipatgen a ragpaten a  maipaay   kadagiti agtutubo para iti masakbayanda ken ti ili.

Nangipaay met ti  Inspirational Message ni Nag-Mayor Andrea “Dely” Soller-Tan ti Cabugao. Kimmablaaw ken nagyaman ti Pasado a Mayor ket dinakamatna  dagiti kakaduana a nangilungalong ti pannakaipasdek ti pagadalan. Ken  mamati a maisaganaan  ti kasapulan ti  edukasion ken  pannakaital-o ti panagbiag ti kaaduan a mabenepisiaran itoy.

Pateg ti adal  a mangparaniag ti masakbayan dagiti agtutubo ti anag ti mensahe dagiti opisiales ti DepEd a nagatendar.

Naiballaet dagiti intermission numbers  dagiti agad-adal.

Naisaad ti Korona ni His Royal Highness King Gerald Garcia 1st babaen ken ni Mayor Ediboy a binayabay ni Ms. Gemma Q. Tacuycuy idinto ta  da met Dr. Marino S. Baytec, Ed.D., CSEE, Schools Division Superintendent ken ni Ex-Mayor Dely Soller-Tan ti nangorona ken ni Queen Joan Ralna Corrales 1st. Da met Brgy. Captain Inocencio Sadac ken SB Member Jemaima Tan-Yee, M.D.  ti nangipan ti Capa ti Ari idinto ta da Vice Mayor Danny Q. Gazmen ken Mrs. Melvi Sajonia iti Reyna.

(L-R) Mr. Carlos Sison; Brgy. Capt. Inocencio Sadac; Mayor Ediboy;(BACK L-R) SK Federation President Benazir Sarmiento, SBM Jemaima Tan-Yee, M.D., SBM Carlito Pano, M.D.

 Ni Ex-Mayor Dely Soller-Tan

Nakoronaan met dagiti sumaganad:  1st Prince Nelson Sabugo babaen kada Mr. Jessie Pat Serna ken SB Member Vicky S. Serna; 1st Princess Kristine Mae Salarzon babaen ken ni SB Member Richard T. Alcid & Partner; 2nd Prince Samuel Balangatan babaen ken ni SB Member Josefina S. Vallejo & Partner; ken 2nd Princess Darlene Rapin babaen kada SB Member Carlito S. Pano, M.D. ken Mrs. Rocilyn S. Sabaten.

Nagidonar da Mr. & Mrs. William Gauthier ti Trophy para iti Reyna idinto ta ni Ret. US Navy & Mrs. Alfredo Somera ti nangidonar ti tropeo ti Ari.
Naipaay ti Tribute ken Dance  of  the Royal Court. Pangserra a sarita ti impaay ni Mrs. Felipa B. Asuncion, Principal 2 ti Cabugao NHS. Nagpaay met nga emcee da Mr. Fadh B.  Agbulos ken Mrs. Julita Alvarado.

Naidedikar met   daytoy a panagselebrar ken ni Nag-Diputado Mariano M. Tajon, First District, Ilocos Sur, dagiti Sangguniang Bayan Members iti termino ni Nag-Mayor Dely Soller-Tan gapu iti akemda iti pannakaipasdek ti nasao a  pagadalan agraman  ti Pamilia ni Dios-ti-aluadna a  Jesus Serrano a nangidonar iti lote ti eskuela-sekundaria. # (Web In-Action)

DADDUMA PAY A NAPADAYAWAN:

Ms. Judelyn  Azcueta, Miss Progress      
Mr. Carlo Elizaga, Mr. Love      
Miss Hazel Joyce Ines, Miss Unity      
Mr. Warlito Somejo, Jr., Mr. Cooperation      
Miss Hazelene Ballete, Miss Charity      
Mr. Klervin Soller, Mr. Humility      
Miss Noemi Soclo, Miss Hope      
Mr. Rey John Ancheta, Mr. Brotherhood      
Miss Krischelle Ramos, Miss Harmony      
Mr. Dominador Tabaco, Jr., Mr. Leadership      
Miss Jessa Nica Menor, Miss Brotherhood      
Mr. John Allen Baclig, Mr. Charity      
Miss Amanda Tabaco, Miss Cooperation      
Mr. Jan Vincent Garzola, Mr. Hope      
Miss Micah Jay Solis, Miss Faith      
Mr. John Rye Vallejo, Mr. Faith    

(L-R) SMB Richard Alcid; Vice Mayor Danilo Gazmen; SBM Benedicto Savellano and SBM Carlito Pano

MUNICIPAL ROAD GRADER, NABENDISIONAN

Cabugao, Ilocos Sur – Pinabendisionan ti agdama a Gobierno Munisipal nga idauluan ni Mayor Edgardo "Ediboy" S. Cobangbang, Jr. ti kagatgatang a Grader ti Munisipio babaen ti panangannong ni Rev. Fr. Felicisimo “Rudy” Ferrer, Kura Paroko ti ili idi Marso 1, 2012 ditoy arubayan ti Munisipio.

Inimatangan ti Pamilia LGU ken  umili a naitallaong  iti pannakabendision ti nadakamat a makinaria sakbay a maiyusar  nga agserbi para iti umili. Nakitaripnong met da Vice Mayor Danny Q. Gazmen, SB Member Benedict M. Savellano, SB Member Carlito S. Pano, M.D., ken SB Member Josefina S. Vallejo.

Naggapu ti naigatang iti makinaria  manipud iti Municipal Share ti R. A. 7171. # (Web In Action)  

FIRE PREVENTION MONTH TI BULAN TI MARS0

Cabugao, Ilocos Sur – Naaramid ti “kick off” activity  ti Fire Prevention Month ita a bulan ti Marso 2012 babaen iti Bureau of Fire Protection nga idauluan ni Inspector Elmer C. Acapuyan ket naaramid ti  lektiur maipapan itoy a topiko manipud  kadagiti pannakabagi ti BFP ken nagpartisipar ti Pamilia-LGU Cabugao  sakbay a naangay  ti Simultaneous Earthquake/Fire  Drill idi Marso 1, 2012 ditoy mismo a Munisipio.

Napatak ti temana a: “Makiisa, Makialam at Makipagtulongan upang Sunog ay Maiwasan!

Maibasar iti Memo a naggapu iti Department of the Interior and Local Government (DILG), nayeskediul a maaramid ti sangapagilian a   Motorcade iti 7:00 P.M. ken Simultaneous Earthquake/Fire Drill iti 9:00 A.M. iti Marso 1, 2012. Daytoy a panagwatwat   ket maaramid ti kada Quarter. Maibilang ti BFP Cabugao iti District 1 Cluster a buklen ti ili ti San Juan, Cabugao ken Sinait. Maaramidto pay ti Drawing and Poster making Contest inton Marso 6, 2012 nga ipatungpal ti BFP. Nagyaman da Inspector Elmer C.  Acapuyan ken kakaduana iti BFP  iti  tarabay  ti Gobierno Munisipal nga idauluan ni Mayor Edgardo ”Ediboy” S. Cobangbang, Jr. iti pannakaiyusuat dagiti aktibidades a para iti Fire Safety. # (Web In Action)

Ti panaglektura ni BFP Inspector Elmer C. Acapuyan kadagiti Empleyado ti munisipyo

DENTAL HEALTH CARE, INDANON TI RHU ITI BRGY. NAGSINCAOAN KEN REBBA-CACADIRAN

Cabugao, Ilocos Sur – Naaramid ti pannakaidanon   ti umisu nga  impormasion ti panangtaripato ti ngipen babaen iti panangiparang  ni Dr. Ma. Anastacia de los Reyes, DMD, pannakabagi ti DOH Provincial Office a nakadestino kada  aldaw ti Huebes iti RHU Cabugao, ti “module” ti dental structure ken  iti husto  a wagas  ti panagsepilio iti  mamitlo  ti inaldaw.
Nagserbisio ti nadakamat a grupo kadagiti ubbing iti Day Care Centers ti Brgy. Nagsincaoan ken Barangay Cacadiran kas nayeskediul idi Marso 1, 2012. Nagasistir da Ms. Cynthia Guimmayen, Dental Aide ni Dr. de los Reyes, Miss Giline Castillo ken Mrs. Shirley R. Solar, Personnel ti RHU Cabugao.
Kalpasan a maamiris ti ngipen ti ubing ket maited metten ti  sagut a naiselopin ken naglaon ti  toothbrush, toothpaste, tumbler ken Bear Brand Milk a naggapu iti LGU babaen ti panangiburay   ni Mayor  Edgardo “Ediboy” S. Cobangbang, Jr. ken kakibinna ti Komite ti Salun-at ken Serbisio-Sosial ti Sangguniang Bayan babaen ti panangibagi  da Vice Mayor Danny Q. Gazmen ken SB Member Carlito S. Pano, M.D., Chairman kadagitoy a napateg a Komite. # (Web In Action)

MITING-RAGUP: PAGPARTIAN, TIENDAAN KEN DAYO TI NATRATAR

Cabugao, Ilocos Sur – Ragup ti panagmiting dagiti agparparti ti baboy, nuang ken baka agraman dagiti livestock traders, koridor, agay-aywan ti pagpartian, pannakabagi ti LGU iti DA ken   NISTC idi Pebrero 29, 2012 a no sadino a ditoy ket natratar dagiti pakaseknan ken problema iti pagpartian, puesto ti kakarnean idiay tiendaan ken ti kasasaad ti Dayo iti agdama.

Nagpaay a nangiturong ti miting da Meat Inspector Dante Naval ken ABC President, Brgy. Captain Teddy U. Soller ken timmarabay met ni Vice Mayor Danny Q. Gazmen.

Iti pagpartian, dagiti sumaganad ti natratar ken napagnanamingan:

. Saan  a mabayag a maikubong ti maparti (24 oras sakbay ti pannakaparti) tapno maliklikan ti dupudop ken  panagi-innakar no adda  ti sakit ti ayup.

. Awanen ti  or-oras ti panagparti (uray ti rabii) basta maipakada iti agrebbeng iti Slaughterhouse  ken agbayad ti agparti iti pagrebbenganna iti LGU.

. Tingitingen dagiti aglako a  ti maparti nga ayup ket  agpadpada nga agsayaat   iti  agpauraga tapno maa-ayo met a gumatang ti agbirbirok ti partienna nga ayup/baboy.

. Kitaen met dagiti agpupuonan/agpappaparti a maikkan iti umisu a gunggona dagiti obrerosda tapno maliklikan ti sinnaur/kinnusit  iti aniaman a banag a pakainaigan ti panagparti.

. Nailista babaen ti Management  dagiti nasken a  a mainayon a pakaseknan  dagiti agpapauraga kas iti silaw  ken pannakataming  ti panagusaran ti danum idiay puesto ti tiendaan.

. Saan a maipalubos ti pannakaiserrek ti dadael a karne wenno masasao a “botcha” ken uray Frozen meat no  awan ti pagipalamiisanna.

. Maipalubos a sumrek ti  pagiluganan ti ayup/dinguen iti uneg ti Slaughterhouse ngem maparitan ti panagbuggoda  ti lugan iti uneg daytoy.

Impeksa pay ni Meat Inspector Naval  ti pakaseknanna iti pammilin a  pannakaestrikto ti maiserrek  a  maparti a baboy nga aggapu iti sabali a probinsia. Kiniddawna a pagtitinnulonganda kadagiti partidor  a tamingen ken ibirokanda  ti solusion ti panagbaba  ti suplay a maparti para iti Merkado a posible a mangipababa ti koleksion ti sapul  ti opisina ti Meat Inspector.

Iti sabali a bangir, dagiti sumaganad met  ti natratar ken napagkaykaysaan iti pakaseknan ti DAYO:

 
. Maikkan ti asosasion ti puonan ngem babaen ti  grupo ti pannakaimanehar ti pundo ket  saan a babaen ti indibidual.

. Sinabado a ma-audit ti nagwerretan  ti kuarta: panaggatang/panaglako nga aramiden ti asosasion.
.  Masukisok ti ayan ti magatang a makalaka ti asosasion kas idiay Abra ken Cagayan tapno manamnama nga adda mapagket iti panagnegosio ti asosasion iti ayup.

. Singasing a pannakaipan ti numero ti pagibaudan ken maala ti nagan  ti aglako ti ayup iti las-ud ti pasdek ti Dayo.

. Tingitingen ti aglako ti gatangenna nga ayup a makapasayaat met  iti gumatang ken agur-uraga ken  uray  dagiti partidor.

. Maannurot ti nasayaat/mainugot  a pannakaimanehar  ti magun-od a pundo a pagpuonan ti asosasion. Manamnama nga iti sumaruno a Sabado a panag-Dayo ket maruk-atan ti nadakamat a pundo a mausar ti asosasion. 

Nalpas ti miting iti  alas kuatro pasado ti malem. # (Web In-Action)

SERBISIO-MEDIKAL ITI BRGY. ARNAP KEN CUANTACLA, NAILEPPAS

Cabugao, Ilocos Sur – Nagturong ti Barangay Health Clinic Group nga idauluan ni Dr. Lotygarda Tayao, Municipal Health Physician iti dua a barangay ti Munisipalidad ti Cabugao: Brgys. Arnap ken Cuantacla tapno idanonda ti panagbakuna kadagiti ubbing ken nataengan ken kabulbulonna metten ti panagamirisda/panagagasda kadagiti maasikaso a pasiente a mairana a mapan kadaytoy a medical caravan.

Kaaduan nga ubbing ti nabakunaan ti anti-measles, mumps,  rubella vaccine  idinto ta anti-pneumonia (Pneumo 23, pneumococcal vaccine) kadagiti nataengan tapno malapdan ti panagraira dagitoy a sakit ket agtultuloy a mananam dagiti umili ti kinasam-it  ti  biag nga itden  ti nasalun-at a bagi ken panunot.

Buklen dagiti nagasistir da:     Janette  Palaganas, Hazel Somera, Pamela Amor Raquenio ken Jeff Asuncion, agpapada a volunteer personnel ti RHU Cabugao.

Nupay kasta, adda met dagiti sagubanit a kasapulan ti pannakaobserbar ti kasasaadda ket maituloy ti pannakatamingda  iti papanda iti RHU Clinic ti ili  ken  segun iti pammalakad ni Dr. Tayao.
Maitultuloy daytoy a medical assistance kadagiti barangay babaen ti panangilungalong ti Gobierno Munisipal iti panangidaulo ni Mayor Edgardo “Ediboy” S. Cobangbang, Jr. ken kakibinna ti Komite ti Salun-at ken Serbisio-Sosial iti Sangguniang Bayan babaen kada Vice Mayor Danny Q. Gazmen ken SB Member Carlito S.  Pano, M.D., Chairman kadagitoy a nangruna a Komite. # (Web In-Action)