OUTREACH-PROGRAM TI ANSAP N URSES DITOY CABUGAO, NABALLIGI

Cabugao, Ilocos Sur – Naangay ti Outreach Program ti Association of Nursing Service Administrators of the Philippines, Inc. (ANSAP)-Ilocos Sur Chapter nga idauluan ni Ms. Maridel Alcayaga, President/Nurse Supervisor, St. James Hospital, Vigan City ditoy ili ti Cabugao partikular iti Rural Health Unit (RHU)-Cabugao a nakipartisiparan  dagiti inna ken babbai nga interesado a maipaamiris ti paset ti aanakanda (PAP Smear Specimen Collection) nga awan ti baybayadanda idi Agosto 4, 2013.

Immuna a nag-courtesy call  ti grupo dagiti ANSAP Nurses ken ni Mayor Edgardo “Ediboy” S. Cobangbang, Jr. sa naaramid ti Lecture ti maipapan iti  “Reproductive Health and Diseases”  iti uneg ti RHU-Clinic. Naaramid pay  ti demonstration ken Check-up Proper kalpasanna. Timmulong met dagiti Nurse Personnel ti RHU nga idauluan ni Mrs. Janet Sison, Public  Health Nurse iti nasao nga aktibidad.

Iti pannakiuman ti Web In-Action iti dayta met la a petsa, imbatad ni Ms. Benilda Alamar, RN III,  Chief Nurse, Tagudin General Hospital a lima a tawendan a mangisaysayangkat iti kastoy a panagtulong babaen iti pannakikammayetda iti LGU’s ken iti  Pribado a sektor ditoy Umuna a Distrito ti Ilocos Sur.

Iti pannakaselebrar ti bulan ti Agosto 2013 a “Family Planning Month”, agkonsentrarda ditoy First District kadagiti  ili  iti eskediulda sadanto mapan idiay 2nd District, Ilocos Sur iti sumarsaruno a bulan.

Innayon ni Ms. Alamar a buklen dagiti kameng ti ANSAP dagiti Hepe ti Nurse Department kadagiti Public/Private Hospitals. Maysa met laeng daytoy a sanga ti Philippine Nurses Association, Inc.  a tumultulong iti pagsayaatan ti sektor dagiti babbai iti kagimongan. # (Web In-Action)

MANILA PALM TI MAINAYON ITI KATUDAY BOULEVARD

Cabugao, Ilocos Sur – Nakikaysa ti Barangay Salapasap, Cabugao. Ilocos Sur babaen iti panangidaulo ni Brgy. Captain Ronel Zamora ti panangtungpalda ti direktiba ti Local Chief Executive ti LGU-Cabugao iti pannakaisaknap ti panagmula ti Butchina (Manila Palm) kadagiti igid ti kalsada ti barangay ken dadduma pay a pampubliko a pagaaduan.

Namulaanen ti agsumbangir a paset ti nawatiwat a maaw-awagan ti Katuday Boulevard manipud batog ti Brgy. Bungro-Sitio Bugnay, Brgy. Salapasap iti Butchina babaen iti Tree Planting a naaramid dagiti bumarangay.

Imbatad ti kaaduan nga addaan ti kastoy ti klasena a mula a makatulong daytoy ta malaksid a mangted ti linong ket makaagas ken mabalin pay a saramsamen  dagiti bungana ken nalatak a mailaklako ita kadagiti Talipapa iti Kalsada Nasional a masakupan ti ili.

Kabayatanna, ipampamaysa met ti Municipal Plant and Nursery nga idauluan ni Mr. Robert S. Savella nga agbirok pay  ti maisemilia a Manila Palm ta adu latta ti agkalikagum nga agmula kadaytoy babaen iti panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr.

Kaaduan a barangay ken asosasion ket nagkiddaw kadaytoy a seedlings iti Municipal Nursery ket manamnama a mataripato ken mapadakkel dagitoy tapno matun-oyan ti panggep ti Gobierno Lokal a mapaadu met ti kastoy a pagkakitaan a mula iti Munisipalidad ti Cabugao. # (Web In-Action)

PUROK 5-6, BRGY. BUNGRO, NASEMENTO TI SERKANDA

Cabugao, Ilocos Sur – Iti pannaki-amad ti Web In-Action idi Agosto 1, 2013, imbatad dagiti kaaduan nga agnaed iti daytoy dua a Purok ti barangay a maragsakanda ta mairaman met a makongkreto ti kalsada a mamagkakamang iti Purok 5-6 ti Brgy. Bungro, Cabugao, Ilocos Sur.

Daytoy a proyekto ket inlungalong ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken napunduan kabayatan ti Termino  ni Congressman ken agdama itan a Gobernador Ryan Luis V. Singson ti Probinsia ti Ilocos Sur.

“Maragsakankami met nga uray iti sumrekan pay laeng  ti nasemento ket mangnamnamakami a maiyungpotto a makongkreto agingga kadagiti kabalbalayan. Agyamankami unay Apo,” kinuna ni Mr. Ernesto Solanio, maysa kadagiti panglakayen kadagitoy a Purok.

Insupusop ni Brgy. Captain Fermin Sarinas a kitkitaenda no kasano a mapasayaat dagiti kalsada a kumamang kadagiti purok iti barangay babaen iti pannakikammayetda iti LGU-Cabugao nga idauluan ni Mayor Ediboy tapno manam-ayan dagiti agdaliasat ken kangrunaanna  iti pannakairuar para iti merkado dagiti produktoda. # (Web In-Action)

NAIPARUAR A SEEDLINGS, MASULSULNITAN

Cabugao, Ilocos  Sur – Iti pannakiuman ti Web In-Action idi Hulio 30, 2013, imbatad ni Mr. Robert S. Savella, Municipal Plant and Nursery Coordinator a masulsunitanen dagiti naiparuar a seedlings agsipud iti naregget a panangipatuboda iti polyethelyne bag nga agpaay a pagpatubuan ti bukel ti Mahogany, nim tree ken agduduma ti klasena a bukel ti kayo a mabalin a pangkomplementar ti LGU-Cabugao iti kasapulan ti programa ti Regreening Program ken Reforestation kadagiti barangay, eskuela ken pribado nga indibidual nga agkiddaw.

Innayon ni Mr. Savella nga umaboten ti 5,000 ti bilang ti napatuboda a masagsagana a maiwaras kadagiti masanguanan a panagkasapulan.

Dagitoy nga aksion ken inisiatiba ket gubuay ti napintek a programa ti LGU-Cabugao iti Regreening Program babaen iti panangidaulo ni Mayor Edgardo “Ediboy” S. Cobangbang, Jr. tapno maannurot ti advocacy ti National Government ken iti panggep ti Gobierno Munisipal a mangpaberde iti aglawlaw. # (Web In-Action)

MUNICIPAL FISHPOND, SERBIANNA DAGITI MANNALON

Cabugao, Ilocos Sur – Iti pannaki-amad ti Web In-Action idi Hulio 30, 2013, imb atad ni Municipal Fisheries Coordinator Milagros R. Paz, AT a kapades ti  panagpessa dagiti breeders tilapia a mangpataud ti fingerlings a maited kadagiti agkalikagum a fishpond owner ken adda bassit a pamupokanna iti barangay.

Iti agdama, innayon ni Mrs. Paz nga addan P1,000 a naglakuanda iti fingerlings kadaytoy a lawas ket nairemit iti Tesoreria. Dagitoy a pamuonan ti tilapia ket naala sadiay CLSU, City of Munoz, Nueva Ecija babaen iti ipapan panangala da Mrs. Paz ken ni Mr. Robert  S. Savella sakbayna.

Innayon ni Mrs. Paz a naisangrat daytoy a Municipal Fiushpond a pagtuladan dagiti mannalon ken agpatanor ti fingerlings a maited ken mailako tapno adda met laeng pangsukat iti maawan a lamesna no lumakayen dagitoy.

Dagitoy nga aksion ken inisiatiba ket gubuay ti napintek a programa iti Fisheries ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno masustener ti pannakaidur-as ti sektor ti pagpupokan ti ikan  a mangnayon iti matgedan dagiti mannalon iti coastal barangays ken iti takdang. # (Web In-Action)

VERMICOMPOSTING, MABALINDA MANEN NGA APITEN

Cabugao, Ilocos Sur – Iti pannaki-amad ti Web In-Action idi Hulio 31, 2013, imbatad ni Mr. Nathaniel Galamgam, Municipal Organic Focal Person nga inaldaw nga asikasuenda dagiti Vermicompost materials iti ligason dagiti mapakan a Night Crawler kasta metten dagiti dandanin maapit a bunton ti compost a mabalin a mausar iti aniaman a pakaibanaganna iti pagtatalonan.

Innayon ni Mr. Galamgam a katinnulongna met laeng nga agtaming dagiti JO’s nga agob-obra iti Municipal Plant and Nursery kas kada Ms. Arcelie Serrano ken Mrs. Marjorie Castillo. Kalikaguman ti Focal Person a masustener ti pannakaidur-as daytoy a wagas ti panagpaadu ti natural a pataba tapno inton maperpekto dagiti mannalon ket mabigbigdanto ti dakkel a pagsayaatan nga ited ti Organic Agriculture/Farming.

Dagitoy nga aksion ken inisiatiba ket gubuay ti napintek a programa ti LGU-Cabugao iti Organic Agriculture babaen ti panangilungalong ni Mayor Edgardo “Ediboy” S. Cobangbang, Jr. tapno maiyintekda dagiti programa ken proyekto a mangkomplementar kadaytoy a nailian a pannakaisaknap ti organic farming tapno mapalag-anan dagiti mannalon iti gastos ken maingato iti matgedanda babaen iti adu a maapitda. # (Web In-Action)

SEEDLINGS DISTRIBUTION, MAIPATUNGPAL

Cabugao, Ilocos Sur -  Maiwaywayat ita ti pannakaiwaras dagiti Giant Ipil-ipil Seedlings kalpasan iti naangay a Ceremonial Inter-agency Tree Planting idiay Barangay Sabang, Cabugao, Ilocos Sur idi Hulio 30, 2013.

Dagiti Ahensia a mangipaay kadagitoy a maimula a seedlings ket pagkammayetan  ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken ti National Tobacco Administration (NTA)-Vigan City  a lead agency kadaytoy a programa iti National Regreening Program a maipatpatungpal.

Maibasar iti rekord ni MENRO Edgar S. Balangatan a mangidadaulo iti pannakaiwaras dagiti seedlings ket naikkanen dagiti barangay ti Sabang, Nagsantaan, Bato, Aragan, Alina-ay, Lipit, Cuantacla, ken Bungro. Sumarsaruno a mawarasan dagiti dadduma a barangay kadagiti masungad nga aldaw depende iti naituding nga eskediulda.

Innayon ni MENRO Balangatan nga umaboten ti walo ribu a kapuon ti seedlings ti naiwaras ket manamnama a maimula dagitoy babaen iti panangyuna dagiti Opisiales ti Barangay ken lumugar ken agraman iti pannakapaungar  ken pannakapatan-ay dagitoy a maimula. Insupusop pay ni MENRO Balangatan a maimpormarandanto dagiti seedlings planters ti  sinaguday ti katulagan  iti  panangpatanor kadagitoy a seedlings tapno adda met laeng kaipapanan ti panggep ti Gobierno a mamagsantak ken mangpaberde iti aglawlaw a mangalay-ay iti simparat a paltuaden ti klima.

Dagitoy nga aksion ken inisiatiba ket  gubuay ti naregget a panangilungalong ti Gobierno Munisipal maipapan iti Regreening  ken  iti Reforestation Program  nga matonan ti MENRO-Cabugao ken  idauluan ni Mayor Edgardo “Ediboy” S. Cobangbang, Jr.  ditoy Cabugao tapno maigiya dagiti umili a mangabrasa iti natan-ok a panggep ti Gobierno Lokal  a mangsalbar iti masakbayan dagiti sumarsaruno a henerasion ti sapasap nga umili. # (Web In-Action)