SEED PRODUCTION, AGDAWAN TI PSBRc 10

Cabugao, Ilocos Sur – Iti pannakiuman ti Web In-Action idi Agosto 5, 2013, impadamag ni Mr. Obas Bill Y. Baclig, AT/Municipal Seed Inspector nga adun ti agdawdawa a nadumaduma ti klasena a kita ti pagay nga immula dagiti Seed Growers ti ili a Cabugao. Dagitoy ket nayuna a nairaep ken adda madadaan a pananumanna ken irigasionda.

 
Iti ocular inspection a naiwayat, agdawdawa ti PSBRc 10 a mula ni Mr. Mr. Allan C. Serna iti Sitio Lusong Suyo, Brgy. Baclig, Cabugao, Ilocos Sur. Daytoy ket addaan ti iruigasion ket manamnama a masustener ti panagdakkel ti mula agingga a maapit dagitoy. Positibo a potensial a mapagbalin manen a pangalaan dagiti mannalon iti usarenda nga agtalon iti umay a Main Crop Season  iti  Tawen 2013-2014.

Innayon ni Mr. Baclig a monitoring ti kaaduan nga ar-aramidenna ket agtalek kadagiti Seed Growers iti kapabilidadda agsipud ta napnekandan iti adal iti panagpatan-ay ti pagay ken iti kinaadun ti seminar nga inatendaranda.

Dagitoy nga aksion ken inisiatiba ket gubuay ti napintas a panagkammayet ti DA-LGU ken dagiti Seed Growers kas mayataday iti direksion ken programa a kayat a tun-oyen  ti LGU-Cabugao iti Agrikultura  nga idauluan ni Mayor Edgardo “Ediboy” S. Cobangbang, Jr. tapno adda latta madadaan a suplay ti kasapulan a bukel para kadagiti mannalon iti sumaganad a cropping season. # (Web In-Action)

AKSION KONTRA DENGUE, NABALLIGI

Cabugao, Ilocos Sur – Iti pan nakiuman ti Web In-Action idi Agosto 5,  2013, imbatad ni Dr. Bernardino M. De Gracia, Medical Officer III ti Municipal Health Office-Cabugao  (MHO) a babaen iti progress report a nagapuanan  dagiti Medical Personnel iti barangay ken iti Poblasion ket bumabbaban ti puersa ti Dengue Outbreak gapu iti nagtitipon a pigsa dagiti nadumaduma nga Ahensia ken Opisina kas iti LGU, DILG, MSWDO, MHO, Barangay Councils, MDRRMC ken dadduma pay a sanga ti DOH a mangpasardeng kadaytoy a panagraira ti makadangran a sakit.

Iti rekord ti RHU-MHO-Cabugao, manipud Enero 2013 agingga iti agdama (bulan ti Agosto), 18 laeng ti nairekord a  bilang ti kaso ti kompirmado a dengue patients idinto a maipadpadamag met iti kaadda pay ti biktima kadaytoy a sakit a naipan iti pribado nga ospital iti ili.

Kabayatanna, kangrunaan a nangtiped iti panagngato ti insidente ti dengue ket iti naregget a kampania ken aksion ti Municipal Disaster Risk Reduction Management Council (MDRRMC)-Cabugao  kadagiti inggannuatda a dredging ti creeks, panangkeltay kadagiti itlog ti lamok a dengue kadagiti napilaw/nadanum  a disso, fogging, panagdaldalus, panangedukar kadagiti umili iti komunidadda iti anti-dengue a pamay-an.

Dagitoy nga aksion ken inisiatiba ket gubuay iti natimpuyog a koordinasion/kammayet  dagiti amin a sanga ti DOH ken ti  LGU-Cabugao nga idauluan ni Mayor Edgardo “Ediboy” S. Cobangbang, Jr. tapno madagdagus a maprotektaran dagiti umili iti aniaman  nga agdidiaya a peggad a sumangbay iti lokalidad. # (Web In-Action)

MATH CLASS, PANNAKAISAGANA ITI MATH CHALLENGE

Cabugao, Ilocos Sur – Naangay ti maikadua a Sabado ti Math Classes ti amin a napili nga ubbing a nalaing iti asignaturada  ti Matematika iti 26 a pageskuelaan ti Cabugao DepED District nga idauluan ni Public Schools Supervisor Helen V. Siruno.

Iti pannakiuman ti Web In-Action idi Agosto 3, 2013, kinuna dagiti kaaduan a nagannak a makumbinsirda iti daytoy a programa ti DepED ta malaksid a maasa ti kabaelan dagiti annakda ket manayonan pay ti exposure-da tapno mamuli a naimbag ti sariritda kadaytoy ng asignatura.

Kalpasan ti dua a Sabado a panag-Math Class-da  ket maangay iti Math Challenge a pagpartisiparan dagiti mapili nga ubbing kadagiti Grade Levels tapno masagat iti addaan iti maisalumina a kabaelan a maibaonto iti nangatngato a tukad ti pagsasalipan kadaytoy nga asignatura iti Provincial Level. # (Web In-Action)

NAURNOS A TRAPIKO, NADISIPLINA NGA UMILI

Cabugao, Ilocos Sur – Iti pannakiuman ti Web In-Action idi Agosto 5, 2013, imbatad ni Mr. Mario Roxas, Treasurer ti CISTODAI Saranay Association a kabayatan a mayur-uray ti pannakaipatungpal dagiti kalikagumda a pannakaadda ti masnop a pagparkingan ken paglinongan iti NISTC-Public Market, adda tentatibo a pagdurdur-asan ti napagnanaminganda kadagiti Opisiales ti Tiendaan itay nabiit kas iti pannakaidonar ti 10 a Tent nga ipaay  ti Globe TM.

Iti panagmonitorda ket adda metten nagdur-asan iti napagmimitingan/napagkaykaysaan a nabukel  iti Opisina ti CISTODAI babaen kada Mayor Edgardo “Ediboy” S. Cobangbang, Jr. ken ABC President Teddy U. Soller idi Hulio 27, 2013 kas iti sumaganad:

1.Pannakairehistro ti amin a traysikelan ken motor  idiay LTO ken maipabaro ti prangkisada iti Munisipio.

2.Masurot dagiti mapagtutulagan a Boundary ti pagpasadaan.

3.Matungpal ti P12 a plete ti maymaysa a pasahero, P10 ti maysa  no ad-adu ti pasahero. 

4.20% Discount wenno P10 ti Senior Citizen/Disabled nga adda ID-na.

5.P7 ti tunggal agbasbasa (Pre-School, Elementary, High School).

6.Lima laeng a pasahero  ti maipalubos a kargaen tapno maliklikan ti “overloading”.

Dagitoy nga annuroten ket naibasar iti Fare Guide nga inaprobaran ti Sangguniang Bayan idi Setiembre 19, 2011.

Innayon pay ni Mr. Roxas a naregget ti panagopisinada ta kayatda a maatendaran ti kasapulan dagiti kakaduada nga adda pay la a pagkurkuranganda ken maipatungpal a naiget dagiti pammilin ni Mayor Ediboy iti maximum a multa dagiti aglabsing ken pannakairehistro ti amin a motor ken traysikel tapno maliklikan ti kolurom a lugan.

Inulit nga imbaga ni Mr. Roxas ti panirigan ti Ama ti Ili nga maibasar ken maipakita  iti kinatulnog ti tao iti linteg ti transportasion ken trapiko iti kinadisiplina dagiti umili iti maysa a lugar. # (Web In Action)

SEEDLINGS TI GIANT IPIL-IPIL, 26 A BRGYS. TI NAKAGUN-OD

Cabugao, Ilocos Sur – Iti pannaki-amad ti Web In-Action idi Agosto 2, 2013, imbatad ni MENRO Edgar  S. Balangatan, AT nga adda 26 a barangays ti ili ti Cabugao iti naikkan ti Giant Ipil-ipil Seedlings nga inted ti DENR-ENRMO ken ti NTA  a kas lead agency iti  pannakailunsad ti Inter-agency Regreening Program iti sapasap a pagilian ti Pilipinas.

Innayon ni Mr. Balangatan a mainayon dagitoy a monitoren ti iggemna a benneg  ti LGU-Cabugao iti Clean and Green Program ken Solid Waste Management Program ket tingitingenda dagiti epektibo a pamay-an tapno masustener dagitoy a programa a kalikaguman ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a maipatungpal a nasingdat.

Agsipud ta pangtarikayo ti pagbalinan dagitoy a seedlings, nasirmata ti Alkalde Munisipal a nasayaat a mangted ti pagkasapulan ti pamilia  ken mangpataud iti pagtrabahuan dagiti bumarangay gapu ta kasapulan met ti tao a  mangmantener ken mangkita agingga a mabalin nga apiten dagitoy a maimula kalpasan iti uppat a tawen.

Dagitoy nga aksion ken inisiatiba ket gubuay ti napintas a pannaki-partner ti LGU-Cabugao nga idauluan ni Mayor Ediboy kadagiti Opisina ken Ahensia a maseknan ken makaited ti pagsayaatan dagiti umili ti Cabugao. # (Web In-Action)

BLESSING TI FACADE TI IFI, NAAWIS NI MAYOR EDIBOY

Cabugao, Ilocos Sur – Naaramid ti Blessing of the IFI Facade and Lighting of Candles iti Iglesia Filipina Independiente, Brgy. Quezon, Cabugao, Ilocos Sur idi Agosto 4, 2013.

Kangrunaan a nasangaili ket ni Mayor Edgardo “Ediboy” S. Cobangbang, Jr. Immuna a naaramid ti ababa a programa iti uneg ti Simbaan sakbay iti Blessing nga inannong ni Rev. Fr. Joseph A. Badua, Parish Priest.

Kalpasan ti pannakakanta ti National Anthem, nag-Welcome Remarks ni Mr. Fidel Sinampaga, Laymen President/Parish Council Member  ket impeksana ti ragsakna iti panagatendar  ti Ama ti Ili a makikaysa iti Blessing iti nainayon a pasdek  ken  linong iti parupa ti Simbaan. Imbinsana a maigiddan met iti panangselebrar ti Simbaan IFI-Cabugao   iti 111th IFI Founding Anniversary  iti intero a Pilipinas ken iti Diocese of LUISA (La Union, ILocos Sur, Abra) a nakaikappengan  ti IFI-Cabugao kadaytoy a blessing activity.

Indanon ni Rev. Fr. Badua ti pakomusta ken pagyaman ni Rt. Rev. Vermilion C. Tagalog, Bishop, Diocese of LUISA ta saan a nakadar-ay. Naiballaet met dagiti intermission number dagiti Youth of the Iglesia Filipina Independiente (YIFI) ken ti  Women of the Iglesia Filipina Independiente (WIFI).

Iti mensahe ni Mayor Ediboy, nagyaman ken kimmablaaw kadagiti Parishioners ti IFI-Cabugao. Dinayawna ti kinatimpuyog dagiti kamkameng ta ikagumaananda a paprogresuen ti Simbaanda babaen iti nasged a pammatida iti relihionda ken iti lideresda.

Nakipagkablaaw met ni Mayor Ediboy iti maika-onse a dekada (111 a tawen) ti IFI ket kunana a  dayta ti mangipakita iti naruay a naglasatan ti simbaan a  pakakitaan iti natibker a pundasion ti pammati ken simbaan a mangibagnos iti panagsayaat ti pamilia dagiti kameng ken napintas a pannakipagilida kadagiti komunidadda. 

Kalpasan ti programa  ket naaramid ti pammendisir ni Rev Fr. Joseph A. Badua iti mabatogan ti baro a pasdek  babaen iti pannakikaysa ken panangimatang  ni Mayor Ediboy,  dagiti Opisiales ti Parish Council ken dagiti  kamkameng ti Parokia a naggapu iti barangay ken iti Poblasion.

Kalpasan ti Closing Prayer, impeksa ni Rev. Fr. Joseph A. Badua ti nasged a panagyamanna iti Ama ti Ili kadagiti proyekto a maisaysayangkat iti Simbaan Aglipayano. Innayon ti Kura Paroko a dagitoy a pagimbagan ket maisagut dagiti kamkameng nga umili ti Cabugao gapu iti suporta ti Ama ti Ili kadagiti napapateg a gannuat a mangidur-as iti naespirituan a benneg ti umili.

 Naaramid ti Fellowship Snack a nakairamanan dagiti amin a nagatendar iti dayta  a  naballigi nga aktibidad. # (Web In-Action)

AGAS KEN PANANGEDUKAR PAY TI PANGGEP TI RHU

Cabugao, Ilocos Sur –  Malaksid iti panagagas nga inaldaw nga ar-aramiden ti Rural Health Unit (RHU)-Cabugao manipud iti Lunes agingga iti Biernes ket maar-aramid met ti Education Campaign (print) iti  pakaseknan ti amin nga aspeto ti salun-at kadagiti bumarangay babaen iti Kalusugan Pangkalahatan Program  nga ipatpatungpal ti LGU-Cabugao nga idauluan ni Mayor Edgardo “Ediboy” S. Cobangbang, Jr. babaen iti MSWDO, Municipal Health Office, RN Heals, Kalusugan Pangkalahatan Health Team kadagiti barangays nga idauluan ti Chairman, Committee on Health, Sangguniang Barangay, BNS, BHW’s, ken timonan met laeng ti Barangay Captain a kangrunaan a tumulong a mangidarirag iti Alkalde Munisipal iti pagdurdur-asan ti benneg ti salun-at iti barangayda.

Kabayatanna, nawarasan met dagiti kliente iti babasaen a napauluan ti Family Health Guide ken Gabay ng Pamilya Tungkol sa Philhealth kas paset ti estratehia dagiti implementors tapno nadaras a maawatan dagiti maseknan a maserbian ken mamuli ti kapanunotanda iti pateg ti programa ti Gobierno a pannakaikalikagum ti panagsayaat ti salun-at ken pamilia ti sapasap. # (Web In-Action)