MITING TI LIGA NG MGA BRGY. SECRETARY, NAARAMID

Cabugao, Ilocos Sur – Naangay ti Monthly Regular Meeting ti Liga ng mga Barangay Secretaries - Cabugao, Ilocos Sur nga idauluan ni Mr. Amador Salom, Presidente ken agdama a Brgy. Secretary ti Brgy. Cuancabal, Cabugao, Ilocos Sur idi Mayo 4, 2014 iti Municipal Building.

Inasistiran ni Ms. Constancia “Connie”  L. Quinola, MLGO Officer ti LGU-Cabugao dagiti Sekretario ti Barangay a nagmiting.

Dagiti natratar ken napagnanamingan:

1.Bininsa ni COMELEC Officer II Veronica B.   Agcanas ti COMELEC-Cabugao iti pateg ti Update ken Biometric Registration dagiti botante kadagiti barangay iti pagilian  iti agdama babaen iti pammilin ti Commission on Elections (COMELEC).

Naasikaso pay ti pannakaisubmiter  ti linaon ti Data Capture Form para iti Barangay Governance Performance Management System (BGPMS).

Naidatag dagiti dadduma a  pakaseknan ket naballigi a natratar ken nasolusionan  dagiti kalikagumda. # (Web In-Action)

PANAGDALDALUS, PAKASEKNAN TI KAADUAN

Cabugao, Ilocos Sur – Agtultuloy nga idadauluan ti Grupo ti Clean and Green Program ti Munisipio  nga imatonan  ni MENRO-Designate  Edgar S. Balangatan iti pannakadalus dagiti public facilities and places iti Poblasion kasta met 

iti pannakaitandudo ti Environmental Management Program kadagiti barangay. Inggunamgunam ni Mr. Balangatan kadagiti Opisiales ti Barangay nga agpappapirma kenkuana  iti Clearance   nga  aramidenda  koma  dagiti bumarangay ti pasetda iti panagdaldalus  tapno makomplementaran ti ar-aramiden ti LGU ken dalusanda dagiti mabatoganda a paset dagiti  Provincial Road ken National Highway.

Kabayatanna, imbatad ni MENRO Balangatan a babaen iti regular a panagmonitor-da ket maar-aramid ti bayanihan iti regular coastal clean-up nga isayangkat  dagiti nadumaduma a sektor kadagiti barangay iti igid ti baybay.

Innayon ti MENRO a dagitoy nga inisiatiba ket ilungalong a kanayon dagiti Opisiales ti Munisipio ken iti Barangay tapno mamantener ti kinadalus ken mapaberde pay ti aglawlaw iti panangrugi ti tudtudo. # (Web Situational Report)

INAUGURATION TI COVERED COURT, NASANGAILI NI GOV. RYAN

Cabugao, Ilocos Sur – Nabendisionan ti kabarbaro a Covered Court ti Barangay Dardarat  nga inannong ni Most Reverend Ernesto Salgado, D.D., Archbishop Emeritus, Archdiocese of Nueva Segovia iti naaramid a Barangay Mass iti  bigat ti Mayo 5, 2014.

Naisaganad iti Seremonia ti Cutting of Ribbons babaen iti panangaramid ni Governor Ryan Luis V. Singson a binayabay da Mayor Edgardo “Ediboy” S. Cobangbang, Jr.; SP Member Jeremias “Jerry” C. Singson ken ni  Vice Mayor Deogracias Jose Victorino DJ” H. Savellano agraman dagiti kameng ti Konseho Munisipal,  Kakapitanes ti Barangay a nakipaset iti programa  nga idauluan ni ABC President, Brgy. Captain Thaddeus “Teddy” U. Soller iti pannakagetteng ti laso a mangipakita iti pannakaisibro ti nasao a pasilidad.

Iti panagsarita ni Gov. Ryan, kimmablaaw iti amin a naitaripnong kasta met kadagiti LGU Officials nga idauluan da Mayor Ediboy ken ni Vice Mayor DJ Savellano.

Innayon ti Gobernador a daytoy a naited a proyekto ket nagtaud iti RA 7171 kasta metten  iti bunga ti  gaget ken panagkaykaysa dagiti Opisiales ken lumugar iti Barangay Dardarat a nangkiddaw itoy. Pinagyamanan ni Gov. Ryan iti agtultuloy a  talek ken pammati dagiti umili ti Cabugao nga idauluan ni Mayor Ediboy ket insupusopna nga agtultuloy a tumulong isuna  iti pannakapadur-as dagiti barangay ditoy nga ili a pakaibilangan ita ti Barangay Dardarat.

Imbinsa met ni Bokal Jerry C. Singson iti akem ti Hunta Probinsial a makitinnulong iti Gobernador iti pannakaaprobar dagiti kalikagumanda pay a  proyekto ket dinayawna ti tunos dagiti lumugar ken kammayetda kadagiti Opisiales ti ili tapno maaddaanda  iti kastoy a pasilidad. Impaganetgetna kadagiti lumugar a taripatuenda a nasayaat daytoy a naited kadakuada ket gapu ta pagayatan ken maiserbi iti kaaduan ket mangtedto manen ti Gobierno Probinsial iti mainayon a proyektoda.

Iti Mensahe ni Mayor Ediboy, kinablaawanna ti amin a naitaripnong kasta met  kadagiti Opisiales ti Gobierno Probinsial  nga idauluan ni Gov. Ryan. Impeksa ni Mayor Ediboy iti ragsakna ket innayonna  a saan a napaay   ti Gobierno Probinsial a nangted iti kastoy a proyekto iti Barangay Dardarat agsipud ta ammoda iti pagrebbengan ken obligasionda a makibinbinnadang iti pannakapaadda ti proyekto ti Multipurpose Hall. Iti agtultuloy a kinasayaat ti tunos dagiti lumugar ken dagiti balligida a kas bumarangay ket pagyamanan met ni Mayor Ediboy ta nagbalinda a kailianna  ida ken nairana  iti panawen ti panagserbida.

Napnuan ragsak met a nagyaman ni Dardarat Brgy. Captain Charles F. Garcia kada Gov. Ryan, Mayor Ediboy, Bokal Jerry, Vice Mayor DJ, dagiti kameng ti Konseho Munisipal, Kakapitanes ken kalugaranna a kaduana a nangimatang  iti pannakainagorar daytoy a proyekto. Inkumitna iti pannakataginayon ti kooperasionda a lumugar nangruna iti pannakataripato daytoy a napateg a proyekto a nagun-odanda.

Kalpasan ti programa, napagsasanguan iti naisagana a taraon ket naragsak dagiti lumugar a nakikinnablaaw kadagiti bisitada.

Ti Inauguration Ceremony ket paset ti walo nga aldaw (Abril 28-Mayo 5, 2014) a panangrambakda  iti Barangay Fiesta ti Barangay Dardarat.

Nakikaysa met iti Inauguration Ceremony  da SB Member Dr. Jemaima S. Tan-Yee; SB Member Vicky S. Serna;  SB Member Benedicto M. Savellano;  SB Member Dodgie S. Santella; SB Member Josefina S. Vallejo;  SB Member Jayhan Alcid-Tan; MPDC Florante Jara;  kameng ti DepEd; PNP-Cabugao; kameng ti Marching Band ti Salomague Elementary School;  Barangay Officials ken lumugar  ti  Barangay Dardarat. # (Web In-Action)

SEED PROCUREMENT TI MANNALON, TUMULONG TI DA-LGU

Cabugao, Ilocos Sur – Iti pannaki-amad ti Web In-Action  iti Mayo 5, 2014, imbatad ni Mr.  Nathaniel B. Galamgam, AT-DA LGU Cabugao ken Federated Farmer’s Coordinator   a  tumultulong dagiti empleado ti DA-LGU Cabugao kadagiti Asosasion ti mannalon iti panangpaaddada  iti Rice Seeds para iti panagtalonda iti Wet Season 2014 (Hunio-Nobiembre).

Segun ken ni Mr. Obas Bill Y. Baclig, AT,  Municipal Seed Inspector a naballigi met ti produksion dagiti Seed Growers ken Community Seed Banking a programada kadagiti mannalon ngem kasapulan latta iti panaggatang dagiti mannalon kadagiti rehistrado  a kompania nga agpatpatanor ti Rice Seeds kas iti Hybrid Seeds, Certified Seeds ken Registered Seeds nangruna iti Wet Season tapno mamantener ti adu a produksion ti irik iti Munisipalidad.

Dagitoy nga inisiatiba ket paset ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti  agtultuloy a panangipatungpal ti DA-LGU Cabugao iti pannakaidur-as ti Baro a Teknolohia ti pagay ken  panagtalon  iti benneg ti  Agrikultura iti Munisipalidad.   # (Web In-Action)

JOINT MEETING, MPOC-MADAC, NAANGAY

Cabugao, Ilocos Sur – Naaramid ti panagmiting dagiti kameng  ti Municipal Peace and Order Council (MPOC) ken ti Municipal Anti-Drug Abuse Council (MADAC) idi Abril 29, 2014 iti Opisina ni Mayor Edgardo S. Cobangbang, Jr. iti ili ti Cabugao, Ilocos Sur.

Immuna a naaramid ti Call to Order, sa iti Short Prayer ken Roll Call. Naisaganad ti Reading & Consideration of Minutes of Previous Meeting.

Nagpaay a Presiding Officer ni Mayor Ediboy, Chairman kadaytoy  nga Special Bodies  ti LGU-Cabugao. Timmarabay met ni MLG Officer Constancia  L. Quinola, LGOO V/Head Secretariat  ket dagiti sumaganad nga agenda ti natratar:

1.Peace and Order & Public & Safety Situation (1st Quarter 2014) babaen iti panangipaay ti PNP ken BFP kadagiti gapuananda.

2.Issues and Concerns on Peace and Order & Public Safety.

3.Suggestions of Strategies, To address issues.

4. Seal of Good Local Governance.

5.Other related matters.

Naballigi a nataming dagiti Agenda sakbay a na-adjourn ti miting.

Naigunamgunam pay  iti liderato ti MPOC ken MADAC iti madagdagus nga aksionda kadagiti maseknan kas iti Disaster Preparedness ken dadduma pay a pannakasaluad dagiti umili.  # (Web In-Action)

NAGLEPPAS TI BUNONG TI GANAGAN KADAGITI MANNALON

Cabugao, Ilocos Sur – Iti pannaki-amad ti Web In-Action iti Mayo 2, 2014, imbatad dagiti Personnel ti DA-LGU Cabugao a nagleppasen ti pannakaibunong dagiti ganagan iti

 33 a barangays ti ili ti Cabugao.

Maibatay iti rekord ti DA-LGU Cabugao, nangrugi ti distribution ti ganagan  idi  Abril 23, 2014 ken nagpatingga iti Abril 30, 2014  ket umabot iti 4, 379  a bilang ti  mannalon (ID Holder) iti naka-avail kadaytoy a programa ti LGU-Cabugao ken iti Gobierno Probinsial.

Ti agtultuloy a pannakaidur-as  ti Agrikultura ken pannakatulong kadagiti mannalon a mangital-o  iti kasasaadda iti maysa a prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agdama.  # (Web In-Action)

ADU A PRODUKSION TI PAGAY, TARGET TI DA-LGU ITI 2014

Cabugao, Ilocos Sur – Iti pannaki-amad ti Web In-Action iti Mayo 2, 2014, imbatad ni Municipal Rice Program Coordinator Nereo S. Daproza, AT a napagnunumuanda kadagiti kakaduada iti opisina ken dagiti Opisiales ti nadumaduma nga asosasion ti mannalon iti Cabugao dagiti maisayangkat iti Opisinada nga aktibidades para iti Rice Self-Sufficiency Program ti ili  iti  Wet Season 2014 (Hunio-Nobiembre).

Nupay kasta,  dagiti sumaganad dagiti inaramidda iti Tawen 2013 a nagballigian iti programa iti produksion ti pagay: 

1.Panangtulongda iti pannakaibunong dagiti Fertilizer Subsidies kadagiti mannalon nga naipaay ti Gobierno Lokal.

2.Technical Briefing iti Rice Production (Municipal-wide).

3.Technical Briefing in Rice Production: Techno-Demo Hybrid ken Techno-Demo Inbred

4.Benchmarking/Participatory Rapid Appraisal  in the Conduct of Farmer’s Field School-Rice, Seed to Seed Technology.

5.Technical Briefing (Plant Now Pay  Later), Rice Techno-Demo (LGU-DA Venture).

6.FFS-Participatory Plant Breeding on Rice: Producing Inbred Variety and Producing Hybrid Variety.  

Iti 2014, agtultuloy ti  pannakaitandudo ti Rice Self Sufficiency Program ti LGU-Cabugao ken DA-RFU 1  a paset ti programa iti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno mamantener   iti nawadwad nga apit dagiti mannalon ken supisiente latta ti pagtaraon dagiti umili iti Tawen 2014 ken iti masanguanan.

Segun ken ni Municipal Rice Program Coordinator Nereo S. Daproza, dagiti sumaganad ti maisagsagana a maaramid iti panagtalon para iti Wet Season 2014 (Hunio-Nobiembre): 1. Technology Promotion, Two (2) sites ti Regular Farmer’s Field School:  Brgy. Bonifacio ken Brgy. Daclapan;  2. 1 Site ti Farmer’s Field School; 2 sites for Techno-Demo, Ratooning Technology for Hybrid Seeds in Irrigated Areas - Inbred Seeds for Irrigated Areas.

Innayon ni Mr. Daproza a manamnama a mamulaan ti 719 ektarias iti Hybrid; 1,613 iti Certified Seeds; 8 ektaria ti Foundation Seeds-Registered Seeds  ken 33 ektarias iti maprobitsar iti  Community Seed Banking.

Insupusop pay ni Mr. Daproza iti pannakikammayet ti kompania ti Bayer Company iti LGU-Cabugao ket posible a maaramid dagiti Techno-Demo Sites iti Brgy. Maradodon (Sitio Caset), Brgy. Sagayaden, Brgy. Baclig ken Brgy. Rizal. # (Web In-Action)