DUA A PROYEKTO DITOY CABUGAO, NAINAGORASIONAN

Cabugao, Ilocos Sur – Naaramid ti Blessing ken Ribbon-Cutting ti dua a proyekto ti Gobierno Probinsial idi Nobiembre 5, 2014 ditoy ili ti Cabugao, Ilocos Sur.

Umuna a napanan ti grupo da Congressman Ronald V. Singson a binayabay dagiti Municipal Officials nga idauluan ni Mayor Edgardo “Ediboy” S. Cobangbang, Jr. ket sadiay Barangay Lipit a nakaangayan ti Blessing ken Ribbon-Cutting iti pannakaisibro ti Congressman Ronald V. Singson Building iti Lipit National High School nga addaan ti 2 a Classroom.

Naisaruno a nakaaramidan ti  Ribbon-Cutting ket iti baro a pasdek ti Barangay Multi-purpose Building sadiay Brgy. Nagsincaoan, Cabugao, Ilocos Sur iti dayta met la a petsa.

Ni Diputado Ronald V. Singson ti Umuna  a Distrito ti Ilocos Sur ti kangrunaan a nasangaili ken nanggetteng dagiti laso babaen iti panangbayabay ni Mayor Edgardo “Ediboy” S. Cobangbang, Jr. nga inimatangan dagiti Municipal Officials a naitaripnong  agraman dagiti Opisiales ken Kamkameng ti nadakamat a pageskuelaan ken barangay kas panagsaganadda  a timmabuno kadaytoy nga aktibidad. # (Web In-Action)

1st DAY TI UNIT MEET 2014, NAARAMID DAGITI GAMES

Cabugao, Ilocos Sur – Kalpasan nga ideklara ni Mr. Meneleo Palma, CSEE, EPS-MAPEH ti DepED-Ilocos Sur  iti pannakalukat ti pay-ayam ti 2014 Unit Athletic Sports Competition  ket narugian dagiti nakaeskediul a panagsalip dagiti Atleta iti uppat nga ili kadagiti sumaganad nga events: Basketball, Baseball, Table Tennis (B&G), Badminton (B&G), Taekwondo, Softball, Soccer, Volleyball (B&G), Sipa Takraw, Athletics, Arnis, Boxing,  Chess, ken Gymnastics. 

Kabayatanna, aktibo met a nakigamulo iti pay-ayam a mangrugi kadagiti kameng ti Screening Committee a buklen dagiti pannakabagi iti uppat nga ili kasta met dagiti kameng ti Clerk of Course/Recorder ken First Aide a buklen dagiti Unit 1 Nurses and Secondary School Nurses a nakadeploy iti game area.

Naregta met dagiti Announcer/Presentor iti School Stage a mangipakpakaammo iti  pagdurdur-asan ti salip, panagsagana dagiti sumaruno nga agsalip nga ili ken  dagiti nangatiw a Team kalpasanna, panawagan iti pakaseknan ti ay-ayam,  Atleta agraman dagiti agbuybuya.

Buklen dagiti Officiating Officials ti Tournament Managers ken kakaduada  iti benneg ti Elementaria ken High School     iti tunggal event.

Manamnama nga iti maikatlo nga aldaw, Nobiembre 7, 2014 ket maammuanen  dagiti nagballigi a Team iti tunggal event ken mangyalat iti Kampeonato kadaytoy a dinnayo.

Iti  Part 1V  ti Sports Competition ket maaramid dita ti Closing Program a pakaammuanto kadagiti nagballigi nga Atleta  ket maipresentardanto dagiti napili a makilaok iti masungad nga 2014 Ilocos Sur Division Sports Competition. # (Web In-Action)

TAEP, PLANO TI GOBIERNO PROBINSIAL A PAGLUTO ITI TABAKO

Inangay ti committee on agriculture nga idadauluan ni Bokal Pablito Sanidad, Jr. ken ti committee on trade and industry ni Bokal Jaime Singson ti consultative meeting kadagiti addaan rice mill iti probinsia tapno maammuan no adda umdas a suplay ti taep a pagluto iti bulong ti tabako.

Naangay daytoy agsipud iti plano ti gobierno probinsial a gumatang kadagiti makina nga agluto iti bulong ti tabako babaen iti taep.

Segun ken ni Gov. Ryan Singson, plano ti gobierno probinsial ti aggatang iti taep a pagluto iti tabako ket kayatna a maammuan no adda supisiente a suplay daytoy ken ti presioda.

Iti kallabes, maibelbelleng laeng iti kataltalonan dagiti taep dagiti mabayo nga irik sada mapuoran.

Ti panagluto iti tabako babaen iti makina nga agaramat iti baro a teknolohia ti maysa a maidurduron a pangtellay iti problema ti pagtungo kadagiti ordinario a pugon a maitudtudo a maysa kadagiti makaigapu iti pannakakalbo dagiti kabakiran. # (Adapted, Tawidnews)

14 RECIPIENTS, NAKAAWAT MANEN ITI EXTENDED AICS

Cabugao, Ilocos Sur – Naipaayan manen   ti  Extended Aid to Individual in Crisis Situation (Ex-AICS) a programa ti DSWD-Region 1 ken ti LGU-Cabugao para iti 14  a maseknan nga umili  nga agnanaed iti nadumaduma   a barangay ti ili a Cabugao, Ilocos Sur. 

Naaramid ti turn-over daytoy a tulong   babaen ken ni Mayor Edgardo S. Cobangbang, Jr. ken dagiti maseknan a recipients   itay nabiit iti Opisina ti Municipal Mayor iti Cabugao Municipal Hall nga inimatangan dagiti Municipal Officials ken ni  MSWD Officer Mrs. Lydia S. Gazmen agraman ti pannakabagi ti DSWD Region 1.

Dagitoy a naited a tulong  ket nadagup iti  P187,000.00  a kantidad ket maaramatda iti nagduduma a pakasapulan a kas iti Burial, pang-Medical ken kanaigna a pakaseknan   ken nakaawatda maigapu iti kinakurapay a maibasar iti National Household Targeting System nga inwayat ti DSWD iti kallabes a Tawen. # (Web In-Action)

UNIT SPORTS COMPETITION 2014, NAG-HOST TI ILI A CABUGAO

Cabugao, Ilocos Sur – Naangay ti umuna iti tallo nga aldaw, Nobiembre 5-7, 2014 ti 2014 Unit Sports Competition iti nagtitipon a pageskuelaan (Elementaria ken Public High Schools) iti uppat nga ili kas iti Sinait, Cabugao, San Juan ken Magsingal, Ilocos Sur iti Nobiembre 5, 2014 iti Cabugao District Athletic Oval, Cabugao South Central School, Brgy. Bonifacio, Cabugao, Ilocos Sur a no sadino a ditoy ket nagpartisiparan  dagiti napili nga atleta a mangibagi ti tunggal pagadalan ti kada ili, Officiating Officials, Coaches, mangisursuro ken nagannak a nangtarabay kadagiti annakda a makisinnait iti dayta nga umuna nga aldaw ti panagsasalip iti nadumaduma nga sports events.

CLICK HERE TO VIEW MORE PHOTOS

Naaramid ti Parada dagiti delegado iti aglikmut ti Poblasion sakbay a ti panglukat a programa iti School Stage ti Cabugao South Central School.

Nagsaganad a nangited ti Words of Welcome da Mrs. Estrellita M. Siruno, Principal II, Cabugao North CS ken Unit 1 Chairman  ken ni Brgy. Captain Valentin S. Tuyor, Jr. ti Barangay Bonifacio. Anag ti panagsaritada iti nabara a panangpasangbayda kadagiti Opisiales ti Ili, Pagadalan, Bisita  ken Atleta iti ili ti Cabugao a makipartisipar iti nadakamat a dinnayo.

Naaramid ti Lighting of the Symbolic Torch babaen kadagiti Cabugao Soccer Players ti RIAA 2014.

Nangipaay ti Mensahe ni SBM Dr. Jemaima S. Tan–Yee, Committee Chair on Education. Unity and Friendship ti kaipapanan ti bugas ti panagsaritana.

Naisaruno ti Presentation of Athletic Delegates babaen kadagiti District Supervisors/Authorized Representatives ken Head of Delegation  ti uppat nga ili.

CLICK HERE TO VIEW MORE PHOTOS

Nagsarita  ni Mr. Meneleo Palma, CSEE, Education Program Supervisor  1, MAPEH ken PESS Division Coordinator. Pinagyamanan ni Mr. Palma ti suporta ti LGU-Cabugao nga idauluan ni Mayor Edgardo “Ediboy” S. Cobangbang, Jr. iti DepED ken iti  pannakaaramid ken pannakaisagana ti napintas nga Athletic Oval kas panagkuna ti DepED Official. Impaayna ti palagip kadagiti Officiating Officials ken Coaches para iti pay-ayamda.

Pinagyamanan pay ni Mr. Palma ti kaadda ti amin nga Opisiales a mangibagi ti tunggal ili iti Unit 1 no kastoy a mangrugi ti paliga.

Kalpasan ti Intermission Number ti CSCS Pupils ket kinadua ni Mrs. Estrellita M. Siruno ni Mayor Ediboy a nangisa  ti Unit 1 Athletic Flag.

Nangipaay ti mensahe ni  Mayor Edgardo “Ediboy” S. Cobangbang, Jr. Impeksa ni Mayor Ediboy ti ragsakna ket kunana a nakagasgasat ti ili a Cabugao iti isasangbay dagiti delegasion a naggapu iti tallo nga ili. Kimmablaaw iti amin a nagpartisipar ken pinagyamananna dagiti nagannak/guardians ken mangisursuro iti agtultuloy a kinaregtada a makitintinnarabay iti pannakaisagana daytoy a pagsasalipan dagiti atleta.

CLICK HERE TO VIEW MORE PHOTOS

Simmaruno ti pannakaisa ti bandera ti Delegation Flags babaen kadagiti Mamayores iti uppat nga ili a binayabay dagiti District PESS Coordinators-da.

Nangipaay ti Affirmation  of the Amateur  Athletic Oath ni Elijah Sivila, RIAA Taekwondo Athlete.

Inimatangan met dagiti Mayores iti uppat nga ili agraman dagiti District PESS Coordinators ti DepED iti pannaka-iturn over dagiti Sports Equipments/Paraphernalia manipud iti tulong  da Congressman Ronald V. Singson ti First District, Ilocos Sur ken ni Governor Ryan Luis V.  Singson.

Ni Mr. Meneleo Palma, CSEE, EPS-MAPEH ti  nangibagi ken ni Jorge M. Reinante, CSEE, CEO VI, CESO V, Schools Division Superintendent a nangideklarar iti pannakalukat ti pay-ayam.

Nakikaysa met iti nasao a panagtataripnong da Mayor Alrico A. Favis, LGU-Magsingal; Mayor Benjamin V. Sarmiento, LGU-San Juan ken nagatendar met dagiti Bise Mayor kadagiti nadakamat nga ili kasta metten  dagiti Konsehalesda a dadaulo ti Committee on Education ken Committee on Sports ken   kasta pay dagiti kameng ti Konseho Munisipal ti ili a Cabugao nga idauluan ni Vice Mayor DJ Savellano. # (Web In-Action)

CLICK HERE TO VIEW MORE PHOTOS

FARM TRACTOR TI BACALL MPA, NABENDISIONAN

Cabugao, Ilocos Sur –Nabendisionan ti  Brand New Farm Tractor ti Baclig-Callaguip-Lusong Suyo   Multipurpose Association (BACALL MPA) nga idauluan ni Mr. Dominador Reynold S. Sabio, Presidente,  a nagun-odda babaen iti Agri-Pinoy Program idi Nobiembre 4, 2014 iti sango ti Munisipio ti Cabugao.

Inannong ni Rev. Fr. Felix A. Costales, Parish Priest, Cabugao Catholic Church ti pannakaikararag ken pannakabendision ti nasao a makinaria iti imatang dagiti Opisiales Lokal ti ili ken Empleado ti LGU-Cabugao nga idauluan ni Mayor Edgardo “Ediboy” S. Cobangbang, Jr.

Impeksa manen ni Mr. Sabio ti panagyamanna iti LGU-Cabugao nga idauluan ni Mayor Ediboy iti agtultuloy a panangtarabayda iti BACALL MPA iti pananggun-odda kadagiti post-harvest facilities ken makinaria a kasapulanda ken iti    pagsayaatan a masagrapda nga itden ti Farm Mechanization Program ti DA.

Nagatendar met dagiti Staff/Personnel  ti DA-LGU Cabugao nga idauluan ni Municipal Agriculturist Zenaida S. Andrada iti daytoy a panagtitipon. # (Web In-Action)

SUPPLEMENTAL FEEDING TI DAY CARE, NABISITA

Cabugao, Ilocos Sur – Nailunsad manen ti Supplemental Feeding Program kadagiti ubbing nga imatmatonan dagiti Day Care Workers kadagiti 31 a barangay ti Munisipalidad ti Cabugao nangrugi idi Agosto 2014.

Iti Nobiembre 4, 2014, nagbisita da MSWD Officer Mrs. Lydia S. Gazmen, SBM Atty. Bryann Jett S. Pano, Committee Chair on Social Services agraman dagiti pannakabagi ti DSWD-Municipal Link ket napanda kinita dagiti ubbing ti Barangay Baclig Day Care . Sinarabo ida dagiti Opisiales ti Barangay nga idauluan ni Brgy. Captain Carlos Vallejo Sison agraman dagiti nagannak ken mangisursuro kadagiti ubbing.

Sakbayna, mismo a dagiti Day Care Worker ti immay nagala ti kaibatogan nga alaenda a bagas a para iti  panagpa-Feeding-da iti ituyangda nga eskediul. Rinuk-atan met dagiti pannakabagi ti MSWDO dagiti naited a kasapulan dagiti Day Care Workers kadaytoy nga usuat.

Iti pannakiuman ti Web In-Action ken ni MSWD Officer Mrs. Lydia S. Gazmen itay nabiit, tinawen a maar-aramid daytoy a programa a para kadagiti ubbing ket inaldaw a maikkanda ti suplementar a pagtaraon babaen ti panangisagana dagiti Day Care Workers kadagiti maluto a maipasango.

Kabayatanna, dinayaw ni Dr. Bernardino M. De Gracia, Medical Officer III ti Municipal Health Office (MHO) dagitoy a gannuat ti MSWDO ken dagiti Barangay Day Care Workers a katulongan iti pannakatagiben ti salun-at  iti barangay tapno mapapigsa ti resistansia dagitoy nga ubbing kadagiti tumaud a saksakit a patauden ti panagbalbaliw ti klima. 

Iti sabali a bangir, naiwayat metten ti Feeding kadagiti undernourished  children kadagiti pageskuelaan a nakaeskediul babaen ti programa ti Cabugao DepED Cabugao. Daytoy a gannuat ket mangnayon pay iti pagsayaatan dagiti ubbing ken katulongan ti programa ti LGU Cabugao ken ti DSWD.  # (Web In-Action)