WATERWORKS, TRABAHO KEN KOLEKSION, AGGIDDAN

Cabugao, Ilocos Sur – Iti pannakiuman ti Web In-Action idi Hulio 20, 2013, imbatad ni Waterworks Superintendent Engr. Nestor B. Somera nga agtultuloy latta ti ipaayda a serbisio kadagiti umili nga end-users iti danum a mainum nga aggapu iti Magarang Water  Springs,  Brgy. Cacadiran, Cabugao, Ilocos Sur.

Iti agdama, agdama a maipatpatungpal iti water rationing babaen iti schedule scheme ti 6 a barangay tapno makapagbibingay dagiti konsumidores iti masakupan ti service area ti waterworks iti  adda ita a suplay  ti  danum. Kabayatanna,  adda met latta dagiti connection line ti tubo a tarimaanenda gapu iti panagrukop wenno dadduma pay a pakaigapuan ti panagproblema  iti main line iti distribution line. Ngem maaksionan daras ken madagdagus a matarimaan dagitoy.

Innayon pay ni Engr. Somera nga ikagkagumaananda nga aksionan dagiti awag dagiti water-users uray aldaw ti Sabado ken Domingo agsipud ta inaldaw a nakasapulan ti danum iti panagbiag dagiti umili.

Insupusop pay ti Waterworks Superintendent  a madagdagus a mataming/masolbar  ti pakaseknan dagiti water consumers agsipud ta kankanayon latta met ti panagrekurida/monitor  dagiti Collectors, Pifefitters ken Personnel a masakupan ti Cabugao Waterworks System. # (Web In-Action)

LOCAL SUMMIT TI PHILHEALTH, NAGATENDAR NI MAYOR EDIBOY

Cabugao, Ilocos Sur – Babaen ti awis ti (Philippine Health Insurance Corporation) Philhealth Regional Office  1, Dagupan City, Pangasinan, maysa ti LGU-Cabugao a napili a local partner ti Ahensia ket nagatendar ni Mayor Edgardo “Ediboy” S. Cobangbang, Jr. idi Hulio 17-18, 2013 idiay Laoag City, Ilocos Norte.

Naimbitaran a maysa nga  Speaker ni Mayor Ediboy  iti  napateg a pakaseknan  ti  Maternal, Newborn and Child Health Local Summit for Regions 1 and CAR.

Daytoy a summit ket maibilang a local advocacy ti Philhealth babaen iti Millenium Development Goal (MDG) Team para iti maternal and child health benefits. # (Web In-Action).

EVALUATION AND MONITORING TI DENR, NAIWAYAT ITI LGU-CABUGAO

Cabugao, Ilocos Sur – Naaramid ti nagkammayyet nga evaluation ti Environment Management Bureau, DENR Regional 1 Staff nga idauluan ni Forester Edgardo Malasig, Environment Management Specialist, DENR Region 1 kasta metten  a binayabay ni MENRO Edgar  S. Balangatan iti pakaseknan ti implementasion ti Solid Waste Management Program iti tunggal Munisipalidad a makagungun-od ti pammadayaw a pakaibilangan  ti ili ti  Cabugao, Ilocos Sur.

Naaramid ti monitoring ken evaluation idi Hulio 16, 2013 babaen iti pannakabisita  ti 26 a barangays ti ili ti Cabugao a kangrunaan a nakapagtungpal iti pannakaipasdek ti Material Recovery Facility (MRF) a kangrunaan a nalibtawanda iti kallabes.

Segun ken ni MENRO Balangatan, nairaman a nabisita ti Vermicomposting/Vermiculture Bin iti compound ti  Municipal Plant and Nursery ken iti pagtaraknan ti alinta iti BACALL MPA, Brgy. Baclig, Cabugao, Ilocos Sur.

Daytoy pay nga inspection ket mayannurot iti mandato a sinaguday ti  RA  9003 a pannakapataud koma ti Nursery, MRF ken kanaigna a ramit a para iti solid wastes management ti kada ili.

Dagitoy nga aksion ken inisiatiba a pangkomplementar ti LGU-Cabugao nga idauluan ni Mayor Edgardo “Ediboy” S.  Cobangbang, Jr. iti programa ti DENR ket agtultuloyda a maipakpakat kadagiti 33 a barangay iti naan-anay a pannakaannurot ti sinaguday ti RA 9003 (Ecological Solid Waste Management Act 2001). # (Web In-Action)

AD-ADU A SEEDLINGS, NAKIDDAW ITI ENRMO

Cabugao, Ilocos Sur – Iti pannaki-amad ti Web In-Action idi Hulio 18, 2013, impadamag  ni MENRO Edgar S. Balangatan, AT a naisangpet ti naaprobaran a kiddaw ti Munisipio a sangaribu (1,000) a bilang ti  seedlings kas iti Mahogany-200; Butchina-100; Tamarind-100; Bittaog-500; Acacia-100; Duhat (Lomboy)-50; Atis-25; Kalamansi-25.

Dagitoy a bilang ti seedlings ket rinuk-atan ti Provincial Environment Natural Resources Management Office (ENRMO) babaen ken ni OIC Raymond R. Sinay iti nadakamat nga Opisina ti Kapitolio-Probinsial.

Nupay kasta, naidirehir daytoy a rusat iti napintek a programa ni Governor Ryan Luis V. Singson iti pannakasalaknib ti aglawlaw babaen iti agtultuloy a panagmula iti sapasap  ti kayo.

Impakaammo ni MENRO Edgar S. Balangatan, AT  a kasapulan latta a manaynayonan ti reserba a seedlings tapno makomplementaran ti agtultuloy a programa ti Regreening ti LGU- Cabugao  nga idauluan ni Mayor Edgardo “Ediboy” S. Cobangbang, Jr. tapno maikkan ti kaipapanan ti programa ti Gobierno Probinsial nga idauluan ni Gobernador Ryan Luis V. Singson iti Tree Planting ken Reforestation. # (Web In-Action)

VEGETABLE SEEDS, NAIWARAS

Cabugao, Ilocos Sur – Naaramid ti pannakaiwaras dagiti agduduma ti klasena  a bukel ti nateng nga impaay ti High Value Commercial Development Program (HVCDP) iti Gobierno Lokal ti ili a Cabugao, Ilocos Sur babaen iti panangidaulo ni Mayor Edgardo “Ediboy” S. Cobangbang, Jr. kadagiti Pantawid Pamilyang Pilipino Program (4 P’s) Beneficiaries, 4-H Club Association Members, ken Barangay Nutrition Scholars tapno makomplementaran ti Munisipio iti Programa ti Gulayan sa Barangay/Backyard Gardening a makatulong pay iti mainayon a pagtaraon dagitoy a benepisiario nga ited ti Gobierno babaen kadagiti  associations.

Naiwaras dagiti nadakamat a vegetable seeds kalpasan ti naangay a Monthly Regular Meeting ti BNS (33 brgys.)  ken  ti 4-H Club Associations kasta met iti Family Development Session (FDS)  ti 4 P’s (33 brgys./by group)  iti Munisipio ken kadagiti barbarangay nga inyusuat ti MSWDO.

Dagitoy nga aksion ken inisiatiba ket paset ti panangpapigsa ti Green Revolution kadagiti maseknan nga umili a pakaiserbianna babaen iti panangilungalong ti Gobierno Munisipal nga idauluan ni Mayor Ediboy tapno manayonan ti pagtaraon dagiti ubbing ken umili ken  masursuruan dagiti kaamaanda  iti pateg ti panagmulmula iti pampamilia iti barangay. # (Web In-Action)

TECHNO-DEMO TI BRGY. SAGAYADEN, MARUGRUGIAN

Cabugao, Ilocos Sur – Marugrugianen ti Municipal Techno-Demo ti Brgy. Sagayaden Norte, Cabugao, Ilocos Sur babaen iti panangtarawidwid ni  Mr. Edgar S. Balangatan, AT/Techno-Demo Caretaker ditoy a deppaar ti pagtatalonan iti ili.

Innayon ni Mr. Balangatan a saan a maibilang a problema ti panagbassit ti danum gapu iti nabattaway a panagtudona ita a panagtatalon ngem ketdi determinado-da  a maituloy iti pannakaaramid ti demonstration area ditoy a pagtatalonan tapno adda latta makitkita dagiti mannalon a lumablabas a mangpakarit kadakuada nga agmula iti kabaruanan a klase ti pagay.

Insupusop ni Mr. Balangatan a naregta latta  dagiti kakaduana a da Mr. Humprey  S. Catriz ken Mr. Noel Rania a kinatinnulongna manen iti naballigi a panagmulada ti mais ken cash crops itay napalabas a Main Crop Season 2013.

Kenkuana a  kas nabayagen a Technologist ket maibilang a pakasubokan ti inalat ti maysa nga agipatpatungpal dagiti nadumaduma a tubeng ti panagtalon kangrunaan ti panagkiddit  ti  danum ngem ketdi  ikagumaananda a rimbawan dagiti makalapped tapno adda maipakita a pagtuladan dagiti mannalon. 

Dagitoy nga aksion ken inisiatiba ket gubuay ti agtultuloy a panagtakuat kadagiti epektibo a wagas a mangkomplementar kadagiti programa  ti panagtalon babaen iti panangilungalong ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken iti partner-agency:   DA-Provincial, Vigan City  ken  ti DA-RFU 1, San Fernando City, La Union. # (Web Situational Report)

AGBALIN A PAGTULADAN TI GARDENING TI SINGIN A GREENHOUSE

Cabugao, Ilocos Sur – Kalpasan a mamulaan ti agabay a Greenhouse ti Munisipio iti asideg ti Municipal Plant and Nursery, naalibtak dagiti kakadua ni Mr. Obas Bill Y. Baclig, AT a da Mr. Gerry Tapuro ken Mr. Magno Tabil, agpada a JO’s a  mangdaldalus, mangrukrukit, mangsibog, mangpakalatkat ken mangisprey kadagiti naimula nga agdududma a nateng tapno napintasto ti panagbungada iti masanguanan.

Iti pannakaisar-ong ni Mr. Angel Padilla ditoy Munisipio itay nabiit, imbatad ti Regional Coordinator ti HVCDP nga aniaman a pakaseknan iti maimula a bukel ti nateng ket maki-koordinarda iti DA-Provincial Office maigapu ta nagparuk-atda ti bukbukel  ti nateng. Naipanawen unay iti panagmumula ti nateng a mangkulminar iti pannakaselebrar ti Nutrition Month iti bulan ti Hulio 2013.

Segun ken ni Mr. Baclig nga agserserbi a demonstration area ti vegetable production iti Greenhouse ken nangruna a pagtuladan dagiti asosasion kadagiti barangay tapno masustener ti Gulayan sa Barangay /Paaralan a dagitoy ti mairekrekomenda a maisalip kadagiti pakontes iti Probinsial ken Rehional a Kategoria.

Dagitoy nga aksion ken inisiatiba ket gubuay ti nagkakammayet a pannakaitandudo iti panagmula ti nateng babaen ti LGU-VCabugao ng idauluan ni Mayor Edgardo “Ediboy” S. Cobangbang, Jr. tapno   manayonan  ti pagtaraon dagiti umili ket  maiyadayoda iti malnutrision, maka-ekonomiada iti sidaen, makatgedda iti igatangda iti sabali a pagkasapulan iti merkadoda iti nateng. # (Web In-Action)