NAIPANAWEN iti panagbuelo ti Bungro Farmers’ Association iti gannuat ti Gobierno Munisipal iti panangidaulo ni Mayor Edgardo “Ediboy” S. Cobangbang, Jr. a `pannakapatibker ken pannakapasayaat dagiti asosasion dagiti mannalon babaen kadagiti maited a subsidies ken mangsagrap kadagiti maidiaya a pabulod manipud iti LGU babaen ti nababa nga interes ken ti nadumaduma nga Ahensia kas iti Departamento ti Agrikultura (DA) ken ti Departamento ti Trabaho ken Pagsapulan (DOLE) panggep ti pinansial ken ramit a makina a pamuonan ti gunglo tapno magun-od ti naan-anay a balligi ti asosasion.
 |
| Ni Presidente Eddy Sevilleja ti Bungro FA |
Iti kalleppas a LAING TI BARANGAY 2011, napagnunumuan dagiti Hurado kalpasan iti naisayangkat nga ebaluasion a pinili ti Bungro Farmer’s Association kas naipangruna nga asosasion dagiti mannalon iti intero a Cabugao ken naiserreken a Finalist iti Search for Siglat Awardee 2011 iti Gobierno Probinsial ti Ilocos Sur. Iti benneg ti Kategoria ti LAING, awatento ti liderato ti Bungro FA ti premioda inton Disiembre 22, 2011 a panangselebrar ti Gobierno Munisipal ti “Ragsak Paskua 2011” (Christmas Program) sadiay Municipal Hall ti ili.
Nabangon ti gunglo idi 2003. Babaen ti napintek a liderato ni Mr. Eddy Sevilleja, Presidente, immuna a nakagun-od ti gunglo ti ramit a pagtalon (kuliglig) a pakabaloran ti P100,000. Naurnos ti rekord nangruna ti Book of Accounts a kangrunaan a pagbasaran ti kinaballigi ti maysa a gunglo. Nasayaat ti rekordda uray pay ti masterlist ti miembros ken accountabilities dagitoy.
Imbatad ni Pres. Eddy a kasapulan ti serioso ken panangipamaysa ti panangmanehar ti maysa a gunglo nupay kaipapananna ti maibukbok a sakripisio. Innayonna: “No pain, no gain!”
Nangrugi ti micro-lending ti gunglo idi Nobiembre 2010 ngem ti prayoridad a mapabulodan ket dagiti miembros ken sabsabali pay no la ketdi mapaaddada dagiti kasapulan a papeles ken adda madadaan a cash.
Dies porsiento ti interes ti kada 6 a bulan ti masublat a kantidad. Nabatad ken naindaklan ti epekto ti serbisio ti pautangda ta mangitunda ti naan-anay a bang-ar ti miembro a pangnayon ti kapitalna ken makasalbar ti kagipitan nangruna ti emerhensia a kasasaad ti maipabulod a kantidad.
“Agtultuloy a panagrikus ti tulong ti kaipapanan ti naitiempo a panagbayad ti nabulod tapno adda met latta madadaan a mausar a maitanggaya no adda agkasapulan,” kuna ni Presidente Eddy a sinarurongan ti nagaget a Tesorerona, ni Mr. Emigidio Jacob.
Isuda ti kaunaan a gunglo a nakagun-od ti Mini-Tractor a maipabulod kadagiti mannalon babaen ti panangpinansiar ti DOLE ken LGU. Gapu ta nagun-odda ti panagtalek dagiti agited ti makinaria, plano ti gunglo ti maaddaan ti dakdakkel a Farm Tractor. Isarunodanto pay a yusuat ti pannakapaadda ti Elf-Truck ta mausar daytoy iti gannuatda nga agnegosio ken aghauling.
Sinaguday ti MOA , masigsigit ti masapulan ti makinaria a pakaibinglayan iti management, driver-operator, para mentenansia ti makinaria ken “dividend” ti miembros. Ngem nababbaba ti charge no agpa-tractor ti miembro no idilig iti pagbayad ti saan a miembro.
 |
| Ti Mini-tractor a nagun-od ti Bungro FA babaen ti panaginnambag ti DOLE ken LGU-Cabugao ti naigatang |
“Sakarenyo ti pampamay-an ti Bungro FA,” kuna ni Mayor Ediboy kadagiti 13 a Farmers’ Associations (FAs) a kinagiddan ti Bungro FA nga inyawatan ti Mayor ti sag-P23,000.00 a tseke a pakauna a maipabulod kadagiti rehistrado a gunglo dagiti mannalon manipud iti pundo a nayalokar kadakuada babaen ti LGU a naggapu iti pundo ti RA 7171 idi Hulio 5, 2011 iti mismo a sango ti Presidencia (Municipal Hall) .
Nagserbi ti Bungro FA a paratignay/modelo ti dadduma a gunglo ti 33 a barangays ti ili a Cabugao babaen ti panangiwardas da MAFC Chairman Rogelio Barlolong ken Federated Farmers President Elmer G. Bromeo.
“Nasamsam-it pay a balligi ti marikna no maikkanka ti autoridad a pagtuladandaka ti kakaduam a gunglo,” impeksa ni President Eddy.
OPISIALES TI BUNGRO FA ITI CY 2010-2011
President – Eddy Sevilleja
Vice President – Reynaldo Ramirez
Secretary – Jonnel Velasco
Treasurer – Emigidio B. Jacob
Auditor – Victoriano Naval
Business Managers:
Dionel Suniega
Juanito Sosa
PIO:
Irene Racho
Jomar Suniega
Iti agdama, adda 37 a miembros ti Bungro FA.# (Rinetrato ken insurat ni JOED S. SAJONIA)
 |
| Makita iti ladawan ni Pres. Eddy (naka-stripes, blue) ti regtana kadagiti miting nga ituyang ti LGU-Cabugao ken NGO’s. (Rinetrato ni Joed Sajonia) |
No comments:
Post a Comment