Cabugao, Ilocos Sur (Disiembre 9, 2011) – Dua ti nakaawisan ti atension ti Web-In Action iti naaramid nga ocular inspection iti 2 Hectares Cluster Techno-Demo on Palay Check System High Yielding Varieties: umuna ti nabaludbod a pamagayan ken ti nayabay a P1-Million newly-concreted farm-to-market road babaen iti Congressional Fund ni Diputado Ryan Luis V. Singson, First District, Ilocos Sur.
“Lutlot ken lasong idi, ading, manangdankami ti agbagkat wenno mangpasagad kadagiti maapitmi agingga idiay pagsimpaan ti dalan. Mainayon manen a gastosmi, a,” kuna ni Cresencio S. Salarzon, 60, natibo ken mannalon ditoy Barangay Marga-ay, Cabugao, Ilocos Sur a maysa kadagiti Farmer-Cooperator ti Techno-Demo. Sa innayonna: “Agyamankami kadagiti agtuturay, uray kankanayonda pay ketdin no kasta ti idiarda nga agited ti proyekto!”
“Dakkel nga nam-aymi, ading,” insupusop ni Gil Jacob Simbe, 58, taga-Marga-ay. “Mairaman metten dagiti taga-Salapasap a panglinteganda. Papananna a dinto agsalpot ti pannakasementona. Pipian ta nalpas ti kakaruanna.”
Daytoy nga FMR ket kamangenna ti kalawaan a pagtatalonan ti Barangay Marga-ay a makibeddeng iti Brgys. Bungro ti amianan-daya; Brgy. Salapasap iti laud-amianan; ken Brgys. Namruangan-Baclig iti abagatan (ballasiw ti Karayan Cabugao). Agduduma ti naimula ita iti pagtatalonan a kas iti lasona, sili, mais, ken pagay a mangipanamnama ti nawadwad a masapulan ni mannalon agsipud ta kapintas ti sumungad a paniempona a bulbulan.
“Mangnamnamakami ken ni Apo Mayor Ediboy nga mapagkakamangto ti pannakasemento dagiti kalsadami ditoy sentro ti barrio,” impeksa met ni Ama Leoncio J. Sajor, 76, ken agnaed ditoy Barangay Marga-ay. “Bantay ngamin idi daytoy lugarmi, Barok, ket nauneg nga lipit laeng ti dalan idi antis. Tatta, a, ket naparparanas ti dalan.”
Ti Barangay Marga-ay ket maysa ita kadagiti addaan ti napintas ti pananumanna nga aggapu iti irigasion. Kasla nakakipkipet ti pakabuklanna iti sumrekan ti barangay a kalsada ngem no makalas-udka ken makasalogka iti likud ti purok, maibaskag ti napanayag a pagtatalonan a dimmarapat iti Barangay Salapasap iti laud.
Dagiti lumugar ket agdama nga idauluan ni Brgy. Captain James Sumagit Sera. # (Web Research)
No comments:
Post a Comment