PANAGMULA TI KAYO, AGTULTULOY A PROGRAMA TI LGU-CABUGAO

Cabugao, Ilocos Sur – Narayray pay laeng ti namnama ti kaaduan nga umili a  maatur ti apagdillaw a pannakaapektar ti nakaparsuaan ken aglawlaw itoy nga ili maigapu ta rumasrasay ti kayo iti bantay.
    

Nakikammayet ti Gobierno-Lokal babaen iti panangiwardas ni Mayor Ediboy S. Cobangbang, Jr. iti panagmula ti kayo kadagiti paset a nakalbo ti bantay kasta met kadagiti nakatiwangwang a lote iti patad babaen ti pannangted ti libre a maimula ti Tanim Kalikasan, Inc .,  pang-internasional ti sakupenna ken nakabase sadiay Washington State University, Washington D.C., USA agsipud ta agbalawdan iti nasaknap a didigra a parnuayen ti pannakaranggas ti nakaparsuaan ken aglawlaw.
    

Paset ti panagtulag ti LGU ken ti NGO ti napirmaan a  katulagan ti naregget a panagkuti dagiti matudingan nga agmula kadagiti nabisita a disso a mabalin a mulaan kadagiti 33 a barangays ti ili a Cabugao.
    

Narugian a naiwaras ti seedlings a maimula idi Hunio 6, 2011  ket nairugi iti Barangays Cuantacla, Cacadiran ken Maradodon. Umabot iti 13,700 ti bilang ti seedlings a naideliber iti dayta nga aldaw iti dua a barangay idinto ta 23,000 met ti maisaruno a maideliber iti Barangay Maradodon.  Mismo a ni SB Member Jemaima Soller Tan-Yee, Chairman, Committee on Environment and Natural Resources ti  nangidaulo ti grupo a nangyawat  kadagiti bumarangay ti pannakaasikaso dagiti maimula kabayatan a maisagana ti pagmulaan.
    

Agduduma ti klasena ti seedlings kas iti Mahogany, Gmelina, Narra, bittaog ken endemic class a kas iti Acling Parang.
    

Iti biang ti LGU, natarabay  dagiti napusgan nga agmula  babaen ti panangimaton ni Mr. Edgar Balangatan, Municipal Technologist iti pannakamula ti  aglawlaw iti Magarang Spring and Falls, kangrunaan  a pagggapuan ti mausar ken mainum a danum ti ili a Cabugao idi Hulio 2, 2011.
Kadagiti interesado a maikkan ti libre a mula, kontaken ni Mr. Gil de la Cruz, Field
Coordinator ti Tanim Kalikasan, Inc. a nakabase sadiay Pagdalagan, San Fernando City, La Union  ken masarakan ti Main Office-na iti Kamias, Quezon City.
            

Manamnama a maibunong ti nadakamat  nga NGO ti 1.5 milion a kaadu ti seedlings iti panagmumula a bulan ti Hunio-Hulio ita a tawen 2011 iti intero a Rehion Uno.# (Joed Sajonia)