Cabugao, Ilocos Sur - NAARAMID ti dua nga aldaw a panagsanay iti pannakapatanor ken pannakaasikaso ti bunga ti mangga tapno maliklikan ti pannakalugi dagiti agpuonan ken agob-obra iti panagmangga a naangay idi Hunio 9-10, 2011 iti Municipal Conference Hall, Municipal Building, Cabugao, Ilocos Sur.
Nagatendar dagiti opisiales ken miembros ti Cabugao Mango Farmers Multipurpose Association (CMFMA) nga idauluan da Mr. Guarino Savellano, President ken Mr. Rodrigo T. Abad, Vice President dagiti 47 a miembros ken observers iti nasao a paseminar.
Dinayaw ni Mayor Ediboy S. Cobangbang, Jr. kas kangrunaan a paset ti mensahena ti regta ken ganetget ita dagiti mannalon nga agpatpatanor ti mangga iti ili ti Cabugao ta ammoda a probitsaren dagiti pagsayaatan nga itden ti dadduma nga asosasion a makasakup kadakuada ken kasta met iti Departamento ti Agrikultura iti Probinsial ken Munisipal a benneg.
Impasingked ti Mayor a kaduana ni SB Member Benedict M. Savellano, Chairman, Committee on Agriculture a mangilungalong sadiay Sangguniang Bayan ken mangidarirag ti pagsayaatan dagiti mannalon tapno maikkanda iti naan-anay a suporta kadagiti gannuatda a mangpasayaat ti organisasionda.
Inulit manen ti Mayor a pagbalinenna a “First Class Citizen” dagiti mannalon ken mangngalap iti ili ti Cabugao a mangbukbukel iti 83 porsiento ti dagup dagiti umili nupay saanna met a baybay-an ti pakaseknan ti 17 a porsiento a nabatbati.
Naglektiur iti nasao a paseminar da: Mr. Angel O. Padilla, Regional HVCDP Coordinator, Mr. Ricardo Tolentino, Presidente ti Regional Federated Mango Growers and Stakeholders Association, Miss Cecilia I. Sambrano, IPM Mango Facilitator, Dr. Emma Ines, Trainor/Consultant Beekeeping. Imbagian met ni Miss Editha S. Castillo, Ass’t Provincial Agriculturist ni Mr. Teofilo R. Quintal, Provincial Agriculturist a nangted ti mensahe ken naglektiur met pakaseknan ti mango production.
Iti maikadua nga aldaw, nayadal ti kabibiag ken galad dagiti uyokan babaen ken ni Dr. Ines, eksperto ti Beekeeping. Kunana a dagitoy ti kangrunaan a “pollinator” ti sabong dagiti mulmula a kaykayo ken ruot. Inlatakna a makatulong unay dagiti uyokan ket saan koma ida a ranggasan ta agpatanorda ti nakalidad ken nasam-it a bunga ti mangga.
Nagtarus dagiti nagseminar iti Mango Plantation ni Mr. Harry Segui iti Barangay Sisim, Cabugao, Ilocos Sur para iti actual demonstration ti panagganagan ken panagusar iti carbonated rice hull. Nagasistir da Miss Alma Castillo, Documentor ti DA-Provincial Office ken ni Mrs. Faith B. Sabio, Secretary ti CMFMA Secretary. Kalpasan ti pangngaldaw, naragsak dagiti nagpartisipar a nagsisina.# ( Insurat ni JOED SAJONIA)
No comments:
Post a Comment