Friday, July 1, 2011

4-H CLUB TI CABUGAO, MAPATIBKER KEN NAREORGANISAR

Kas paset ti direktiba ni Mayor Ediboy S. Cobangbang, Jr. a pannakapatibker/pannakapaaktibo dagiti gunglo nga adda iti salinong ti nadumaduma nga opisina ti LGU, nareorganisa ti 4-H Club ti ili a Cabugao babaen iti naaramid a miting iti Municipal Conference Hall idi Hunio 30, 2011 a nagatendaran ti 40 nga opisiales ti asosasion kadagiti 33 a barangays ti ili.

Iti mensahe ti Mayor, dinakamatna ti kinapateg ti pannakigamulo dagiti agtutubo iti pannakaidur-as ti pamilia ken kagimongan. Innayonna a dagiti agtutubo ket mangrugrugida nga ited ti kabaelan ken tulongda a mangmuli ti masakbayan ti ilida ket nasken laeng nga isuda ti mayuna a maikkan ti tulong ta ad-adu ti masakbayanda.

No mapasayaat ti kasasaad dagiti agtutubo babaen iti pannakigamuloda iti pannakaidur-as ti agrikultura a kangrunaan nga akemen ti 4-H Club ket mapapigsada ti “purchasing power” ti tunggal maysa ket sumayaat ti ekonomia gapu ta makatulongda iti pannakagatang dagiti produkto ti negosio ket iti maukkon ti Gobierno a taripa ket agsubli met la kadakuada babaen iti porma ti serbisio.

Naglektiur ni Mr. Marlon Viernes, Provincial Coordinator ti 4-H Club ti Probinsia ken empleado ti DA-Provincial Office idinto ta timmulong a nagilawlawag da Mrs. Zenaida S. Andrada, Municipal Agriculturist, Mrs. Joenah G. Sevilleja, Mrs. Dionisia Seatriz ken Mrs. Ester Aguimbag, agpapada a Municipal Technologists.

Nagatendar met da SB Members Vicky Segui-Serna ken Benedict M. Savellano, Chairman, Committee on Agriculture a mangtaming iti pakaseknan dagiti agtutubo agsipud ta panagmula ti nateng ti yunada nga igannuat.

Kalpasan ti lektiur, naaramid ti Action Plan for CY 2011 ken nagelektarda ti opisiales ti 4-H Club. Presidente, Germaine Gallano; Vice President, Lineth Ilar; Secretary, Jay-r Fernando Baclig; Ass't. Secretary, Remarie Ventura; Treasurer, May Ann Callejo; Auditor, Jess Azcueta; PIO, Kristoffer Cruz; Project Leader, Jayson Pacag.#(Joed Sajonia)

No comments:

Post a Comment