SAGAYADEN, Cabugao, Ilocos Sur – Umabot iti 200 a bilang ti mannalon ti nagatendar iti naaramid a Field Day iti Techno-Demo Project sadiay Barangay Sagayaden, Cabugao, Ilocos Sur idi Hulio 16, 2011. Daytoy a proyekto ket nagbuligan ti Gobierno Munisipal nga idauluan ni Mayor Ediboy S. Cobangbang, Jr. ken ti DA-Regional Field Unit (RFU) nga ibagian da OIC Regional Executive Director Renato A. Maguigad ken Regional Technical Director , Engr. Eduardo M. Gonzales ti Research and HVCDP Focal Person.
Ginetteng ni Vice Governor DV Savellano, kangrunaan a sangaili, ti laso a mangpasingked ti pannakalukat ti aktibidad iti imatang ni Mayor Ediboy, SBM Benedict Savellano, Chairman, Committee on Agriculture ti Sangguniang Bayan, dagiti agmulmula ti nateng, Barangay Officials, Agricultural Technologists ti Municipal, Provincial ken Regional Offices, dagiti dadaulo ti nadumaduma nga opisina ken ahensia, ken dagiti pannakabagi ti seed ken chemical companies.
Iti mensahe ti Bise Gobernador, dinayawna daytoy a gannuat ket kalikagumanna a maipatungpal dagiti naadal dagiti nagatendar tapno maaramid met kadagiti barbarangay a pagtuladan dagiti dadduma a vegetable growers ta napigsa a mangtulong ti kabibiag dagiti umili ti panagmulmula ti nateng nangruna ti hybrid ti klasena.
Simmaruno ti panangpasiar dagiti nagatendar ti nabantengan a plot wenno nagmulaan ti tunggal seed companies ket tunggal coordinator ipalawagna kadagiti agpaspasiar iti kaipapanan ti inaramidda a demo-garden.
Kalpasan ti panangrikusda ti ninanetangan, nagderetso dagiti nagatendar iti uneg ti Seguban Warehouse para iti pannakaangay ti programa ken lektiur dagiti seed companies. Iti mensahe ni RTD Gonzales ti DA-RFU 1, isublatda a paaktibuen ti agmulmula ti nateng ta supisiente ti produksion ti bagas iti Rehion Uno. In-inuten ti Gobierno nga isubli ti panaggarden babaen iti programada nga ipatungpalda a demo-farm ken uray pay iti pageskuelaan tapno maaramid ti “Gulayan sa Paaralan.”
Inyunay-unay ni RTD Gonzales a nateng koman ti imasetas iti sango ti pagtaengan saan ket nga orkidia tapno maisaknap ti kampania ti panagmula ti nasustansia a natnateng. “Magtanim ng gulay sa harapan, matuwa ka, masiyahan ka at may gulay ka pa!” innayon ti opisial ti DA-RFU.
Nagyaman met ni Mayor Ediboy iti mensahena iti amin a nakigamulo kadaytoy a proyekto. Imbagana a dakkel a pakaitan-okan ti pannakapili ti ili ti Cabugao nga umayan dagiti adda iti kabangibang a lugar a mangkita ken mangadaptar kadaytoy a naballigi a demo-farm project ti ili. Inulitna ti panangprobitsar dagiti mannalon kadagiti ahensia a makatulong kadakuada iti munisipal, probinsial ken rehional a benneg. Mangnamnama ti Mayor iti agtultuloy a kinasupisiente ti suplay ti nateng dagiti umili gapu iti daytoy a gannuat ti DA ken ti LGU.
Naisaruno ti panaglektiur dagiti dadaulo ti seed companies a kas iti Allied Botanical Corporation, East West Seed Company, Inc.,Ramgo International Corporation, ken Seminis Vegetable Seeds. Nagdemonstrar met iti kanatengan dagiti pannakabagi ti chemical companies kadagiti produktoda kas iti Du Pont,Planters Products, Syngenta ken Ramgo International Corporation.
Ti Techno-Demo Project on High Yielding Lowland Vegetables ket nagbuligan nga ingannuat ti LGU-Cabugao, DA-RegionaL Field Unit 1, Provincial Government, Ilocos Sur ken Philippine Seed Industry Association (PSIA). #
 |
| Cabugao Demo Farm |
No comments:
Post a Comment