Cabugao, Ilocos Sur– Naangay ti binulan a miting dagiti Barangay Secretaries ken Treasurers iti 33 a barangays ti ili a Cabugao idi Nobiembre 4, 2011 iti Municipal Conference Hall a no sadino a ditoy ket nag-preside ni Liga ng Mga Barangay Secretaries League President Ronnie Bringas ti Barangay Nagsincaoan, Cabugao, Ilocos Sur.
Kalpasan ti miting, dagiti napagkaykaysaan ti grupo a mapasamak:
1. Pannakaorganisar ti eskediul ti agduty a Barangay Secretary ken Treasurer (dua a barangay nga aggiddan: bale uppatda amin) iti inaldaw iti opisina ti Liga ditoy Munisipio. Maipatungpal daytoy a panag-duty kada “office hours” mangrugi ti Lunes agingga iti Biyernes. Nangrugi ti panag-duty idi Nobiembre 8, 2011.
2. Pannakatulag ti Christmas Party ti Liga ng mga Barangay Secretaries ket napagnunumuan a maangay sadiay Barangay Salomague. Tentatibo nga eskediul: Disiembre 16, 2011.
3. Natratar a nasingdat ti pannakaaramid dagiti Monthly Reports dagiti Barangay Secretaries, Financial Reports dagiti Barangay Treasurer ken Committee Reports dagiti Barangay Officials.
Imbatad ni Liga President Bringas a babaen iti naynay a pannakatennebda nga agaramid ti dokumento ken papeles ket pumintas ti rekordda ken mabalinton nga iyabay kadagiti maibilang a kapintasan a rekordna a barangay.
Innayon pay ni President Bringas a kayatda a makasursuroda amin nga agusar iti computer iti panagidokumentoda tapno saanda a maarus iti umag-agpang a teknolohia ti komunikasion.
Adda nakasagana a desktop, lamisaan ken tugaw a madadaan nga usarenda iti opisinada iti Munisipio. Aw-awisen ni President Bringas dagiti kakaduana nga agagawada nga agsursuro yantangay mariknada iti panangikalikagum ken pannuporta ti Gobierno Munisipal iti pakaseknanda a sektor babaen iti liderato ni Mayor Edgardo “Ediboy” S. Cobangbang, Jr. a mangipaay kadagiti kasapulanda adda la ketdi mausar a madadaan, segun ken ni Presidente Bringas. # (Insurat ni JOED SABIO SAJONIA)
No comments:
Post a Comment