DEMO-FARM TI HYBRID A PURAW A MAIS ITI BARANGAY SAGAYADEN NORTE

Cabugao, Ilocos Sur (Nobiembre 17, 2011) – Tapno matakuatan no kasano a maipanawen ti panagmula ti puraw a mais (Hybrid Glutinous White Corn), nangaramid ti DA-LGU ti Demonstration Farm-na nga aglawa iti 1,500 square meters a masarakan iti Barangay Sagayaden Norte, Cabugao, Ilocos Sur.

Paset ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakatakuat dagiti posible a maimula a maipanawen nangruna dagiti  “off-season cash  crops”  a pakanayonan pay ti matgedan dagiti mannalon ken mangbalanse ti sirkulo dagiti produkto a mailaklako iti Merkado Publiko (NISTC).

 
Nangted ti Seminis/Monsanto Corporation ti bukel a maimula a managan ti Tender 58 nga maapit iti unos ti 60 nga aldaw manipud iti pannakaimulana. Tumulong met dagiti Teknisianda nga agmonitor ken mangtarabay iti Demo-Farm, segun ken ni Mrs. Ester Aguimbag, Demo-Farm Coordinator. Tumultulong met iti Demo-Farm a mangiwanwan kadagiti agas-asikaso a trabahador  da Mr. Edgar S. Balangatan, Municipal Technologist  ken Mr. Nathaniel Galamgam,  pannakabagi ti DA-LGU.

Tallo kaeskediulan (5 nga aldaw ti baet)  iti pannakaimula ti bukel (by plot ti aray dagiti naimula)  ket nangrugi  ti panagmulada iti umuna a lawas ti Oktubre 2011. Dandanin mabalin nga apiten  ti immuna, agsabsabong ti maikadua ken maikatlo. Manamnama a 5 tonelada ti maapit iti maysa ektaria, segun ken ni Mrs. Ester Aguimbag, Municipal Technologist ti DA-LGU ken Coordinator daytoy a Demo ken sinarurongan ni Mr. Eddy Sevilleja, nakapadasen ken Presidente  ti nalatak a Bungro Farmers’ Association, Barangay Bungro, Cabugao, Ilocos Sur.

Paset pay ti demo ti panangpada  iti naganus a pannakailako ti bungana (marketing aspect)  tapno mapasingkedan ti pammati a nanginngina nangruna ta maipanawen met a pagkasapulan dagiti aglaklako ti liningta ken tinuno a mais nangruna iti puraw  kadagiti lugar a pagdadanonan ti adu a tao.
Segun ken ni Mrs. Zenaida S. Andrada, Municipal Agriculturist, ti mais ti maikatlo ita a kaaduan a naimula ita a 2nd Crop 2011. Umuna ti tabako, pagay, mais sa nateng.

Ti  nakabingayan ti klase  (per ektaria)  ti naimula iti umabot a 2,271 ektarias a pagmulmulaan iti intero a Munisipalidad ket dagiti sumaganad: Tabako-1,649 Has;  Pagay-215  Has.; Mais-207 Has.; Nateng (agraman bawang, sandia, lasona ken dadduma pay)-200 Has., segun pay ken ni  Municipal Agriculturist Andrada. # (Rinetrato ken insurat ni JOED SABIO SAJONIA)