Sunday, November 20, 2011

MASUSTENER TI DAYO ITI AGTULTULOY A PANNAKATARAWIDWIDNA

Cabugao, Ilocos Sur - Imbatad   ni Mr. Marciano Raciles, Presidente ti Cabugao Livestock Traders Association a katulongan ti Gobierno Munisipal a mangtartarawidwid kadagiti aktibidades ti Dayo  nga ikagumaananda a supusopan  ti  kurang  ti transaksion iti napalabas  a panag-dadayo babaen iti naregget a panagawisda kadagiti padada nga aggatgatang/aglaklako  ti animales kadagiti pay sabsabali a paki-daydaywanda.

Innayon ti Presidente nga iti kapatgan ket ti pannakasustener ti aktibidades a mapasamak ti Dayo ken manamnama a naan-anay a maipatungpal dagiti pagannurotan nga inyetnag  ti LGU pakaseknan ti pannakailako/pannakagatang  ken pannakailuas dagiti animales a napatan-ay iti las-ud ti Munisipalidad ti Cabugao.

Iti panagmitingda iti asosasionda, inramanda a tiningiting ti panangpapigsa ti ginnatang/linnako a mapasamak ta daytoy ti kangrunaan a mangbiag ti Dayo. Ikagumaananda pay a monitoren nga awan ti mailibas a ginnatang a di agdalan ti papelna ditoy  Dayo  tapno saan a maatiw ti panggep daytoy a maiyintek koma iti Livestock Inspector Office  ti  amin a pannakailako ken pannakailuas ti animales.
“Natural  pay laeng kas iti amin a banag a panangrugi, ngem inton manaynay,  papananna a dinto mapagsimpa  ti pagsaysayaatanna,” innayon daytoy beterano a Cattle Trader.


Kas iti sigud, adda met latta dagiti aglako ti burias, kalding ken kangrunaan  iti baboy ket agsasaruno ti umayda ipakilo iti opisina ti Slaughterhouse ken Dayo. Inlatak ni Mr. Bonifacio Socias, Sr., agob-obra iti Slaughterhouse ti Munisipio a nasurok a 30 a baboy ti maipakilo a sibibiag iti aldaw ti tienda a maideretso a maparti ken mailako idiay Merkado Publiko (NISTC). Sabali laeng ti lawlawasna ta nakasapulan ti karne a taraon ti tao ken di pulos agalus-os ti presiona. Dayta ti gapuna a nakaintek latta ti Municipal Livestock Inspector iti Slaughterhouse  a mangusisa kadagiti mairuar a karne sakbay a mailakoda tapno natalgedda a pagtaraon ti masa.

Mamati ni Presidente Raciles a dinto mapugsat ti Merkado ti animales ta adu met ti mairanud ken agpannuray ti pagbibiaganda  a pampamilia babaen kadagiti “koridor” ta maibilang met ti industria ti animales a dakkel ti mabatayanna  iti sektor ti Agrikultura.

Inulit nga imbaga ni Presidente Raciles ken inanamongan dagiti kakaduana iti asosasionda a kapatgan ket maannongda ti pagrebbenganda ken matun-oyanda  ti kangrunaan a kalikagum ti Gobierno Munisipal a pannakaipatungpal dagiti umisu nga annuroten iti pannakailako dagiti animales. # (Web Research)      




No comments:

Post a Comment