Cabugao, Ilocos Sur – Iti pannakiuman ti Web In-Action idi Mayo 8, 2014, imbatad dagiti kameng ti Pug-os Fishermen Association nga idauluan ni Mr. Alfonso Asunio, Presidente nga adun ti mangrove seedlings a naimula iti batog ti Purok Sadiri, Barangay Pug-os, Cabugao, llocos Sur. Innayonda a kaaduan met ti nagbiag kadagitoy a mangrove seedlings.
Iti agdama, kapades nga agdakkel dagiti mangrove plants ket pinanagananda ditoy a nagmulaanda iti “Mangrove Sanctuary” tapno makipagtaripato dagiti tattao iti panagdakkelda.
Insupusopda pay a kalikagumanda a maitulad ti kabaybayanda iti dadduma a coastal barangay tapno adda proteksionda iti pegges ti ayus apaman nga agrangpaya dagiti mangrove plants.
Imbaga met ni Mrs. Milagros R. Paz, Municipal Fisheries Coordinator a natakuatan iti benneg ti Fisheries a makatulong daytoy a mula agsipud ta adu ti agkalkalap a matulongan iti pagikananda ken iti pannakatagiben ti rekursos-naturales a mapreserbar iti kabaybayan.
Dagitoy a gannuat ket parte ti panangilungalong ti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti agtultuloy a panagkammayetda iti Bureau of Fisheries and Aquatic Resources (BFAR) Regional Office 1 iti pannakatulong dagiti mangngalap ken agindeg iti igid ti kabaybayan iti pagbiaganda ken proteksionda iti kalamidad. # (Web In-Action)
No comments:
Post a Comment