Tuesday, November 21, 2017

PROGRAMA TI SALUN-AT ITI RHU, AGTULTULOY

Cabugao, Ilocos Sur – Ditoy ili a Cabugao, maiyeskediul  ti ipapan panagbarangay  dagiti Medical Personnel iti Cabugao Rural Health Unit (RHU)-Municipal Health Office (MHO)  a buklen dagiti Nurses ken RHU Medical Personnel  nga idauluan ni Dr. Mark-Lawrence T. Tirao, OIC Municipal  Health Officer.  

Agtultuloy  ti eskediulda a papan kadagiti barangay nupay agagasda latta met iti inaldaw ditoy RHU ta segun ken ni Dr. Tirao ket makitada iti listaanda dagiti saanen a makadawdaw-as ditoy RHU ket mismo a danonendan iti barangay.

Maibatay iti nagapuananen  ti RHU-Cabugao, maserbisyuanda dagiti barangay ket umuna a mapakaammuan dagiti bumarangay iti ipapan dagiti Medical Personnel tapno masaganaan dagiti pasiente iti panagturongda iti Health Station-da  ti barangay a pagagasan, segun ken ni Dr. Tirao. 

Dagitoy nga aksion ken inisiatiba ket parte iti pannakaidur-as ti serbisio ti salun-at kadagiti agnanaed iti aw-away wenno barangay iti ili a pannakaidanon ti serbisio babaen iti agtultuloy a  Programa ti Salun-at ti LGU-Cabugao nga idauluan ni Mayor Josh Edward S. Cobangbang.  # (Web In-Action)

No comments:

Post a Comment