Thursday, November 9, 2017

PUBLIC HEARING TI REVISED LOCAL REVENUE TAX CODE TI ILI, NAANGAY

Cabugao, Ilocos Sur – Inangay ti Sangguniang Bayan iti ili ti Cabugao, Ilocos Sur ti dua nga aldaw a Public Hearing  iti pannakaipabaro ti Local Revenue Code babaen iti  panangangay ti Municipal Local Finance Council   ken iti Komite iti Sangguniang Bayan a mangtarawidwid kadaytoy a Public Hearing nga idauluan ni SBM Danny Q. Gazmen, Chairman,
Finance, Budget and Appropriation para iti amin a business owners iti ili a Cabugao tapno naan-anay a maammuanda iti aramidenda iti pannakaingato dagiti Buis, Fees ken Charges mangrugi iti Tawen 2018. Mandato daytoy a linteg a kada agleppas ti lima a tawen ket maipabaro wenno maingato ti bayadan iti buis para iti maysa a Gobierno Lokal sagudayen ti Kodigo Lokal 1991, segun ken ni SBM Gazmen.

Immuna a naangay ti Public Hearing idi Nobiembre 8, 2017 ket dagiti Kapitanes ti Barangay agraman dagiti Kagawad a mangig-iggem ti Ways and Means Committee iti kinonsulta dagiti kameng ti Municipal Local Finance Council nga ibagian ni Municipal Treasurer Lourdes A. Azcueta ken ni Municipal Accountant Anna Lyn Siababa ken ti Sangguniang Bayan a buklen da SBM Danny Q. Gazmen;  SBM Vicky S. Serna; SBM Dr. Jemaima S. Tan-Yee. Nairaman met a nagsarita ken nagsungbat kadagiti saludsod ni  Waterworks Irrigation Superintendent Engr. Nestor B. Somera maipapan iti pannakaingato ti bayad ti danum.

Kamalman iti dayta a petsa ket naangay ti Public Hearing idiay Food Court, NISTC Public Market a nagatendaran dagiti Stallholders ken Vendors. Naulit met laeng iti proseso ti pannakailawlawag dagiti sagudayen ti mapabaro a Local Revenue Code ti ili.

Iti Nobiembre 9, 2017, naangay ti Public Hearing para kadagiti Service Providers a kas dagiti Lending Institution; Banko; Private Companies; Communication Facilities; Resorts ken kanaigna a mangipapaay ti serbisio a naipasdek iti Munisipalidad ti Cabugao. Kasta met a naisaruno dagiti Dealers of Goods a kas iti General Merchandise & Enterprises ken kanaigna a negosio iti kamalman daytoy a petsa a naangay met laeng iti SB Session Hall. 

Kadagiti Open Forum a naaramid, kaaduan kadagiti nagatendar ti nangidatag ken nangipeksa kadagiti pakaseknanda ken suhestionda mainaig iti mabatayanda a negosio.

Naan-anay met ti pannakasungbat dagiti rimsua a saludsod ken naidokumento dagitoy a  mapagsasaritaan iti maaramid a deliberasion ti Sangguniang Bayan iti pannakaaprobar iti nadakamat a Local Revenue Code. # (Web In-Action)

No comments:

Post a Comment