Wednesday, November 22, 2017

UPDATE TI AGRIKULTURA ITI PANAGMULAAN TI PAGAY

Cabugao, Ilocos Sur – Kalpasan ti Wet Season 2017 (Hunio-Nobiembre), nagmula manen dagiti mannalon para iti Dry Season 2017 (Nobiembre-Mayo 2018). 

Imbatad ni Mr. Nathaniel B. Galamgam, AT, Municipal Rice Program Coordinator  nga iti 300 ektaria a naitarget a matalon ket addan 207 ektaria a namulaan ti umabot ti 419 a bilang ti mannalon iti ili a Cabugao, Ilocos Sur iti Dry Season iti agdama.

Kabayatanna, iti naapitan manipud iti 2,246.5 Ektaria a namulaan ti pagay iti  Wet Season 2017 ket 2,242 ektaria met ti naapitan iti agdama.

Innayon ni Mr. Galamgam a nangrugi metten ti Dry Season 2017-2018 ket namulaan dagiti dati a mataltalon nangruna kadagiti adda iti irigasionna ken submerged area (lungog a paset) idinto a naisibar a pagmulaanda iti tabako, mais, nateng, legumes ken dadduma pay  a cash crops iti dadduma a dinisso ti talon iti masakupan ti ili. 

Dagitoy nga aksion ken inisiatiba ket gubuay iti napintek a programa ti Gobierno Munisipal nga idauluan ni Mayor Josh Edward S. Cobangbang tapno makomplementaran iti regtada nga agpataud iti umanay a suplay a pagtaraon ken mangnayon  iti masapulanda agsipud ta mayoridad dagiti umili ket agdepende iti agrikultura iti pagbiaganda. # (Web In-Action)

No comments:

Post a Comment