Cabugao, Ilocos Sur – Naangay ti pannakai-turnover ti Payao Project kadagiti Recipients (7 nga Asosasion) ti mangngalap iti Pebrero 6, 2018 iti Barangay Hall, Barangay Salomague, Cabugao, Ilocos Sur.
Indauluan ni Mayor Josh Edward S. Cobangbang ti nadakamat a turnover ken inimatangan dagiti kameng/opisiales ti Pederasion ti mangngalap ti ili a Cabugao nga idauluan ni Presidente Magno Carbonel iti pannakaiyawat dagiti nadakamat a ramit-pagkalap (sag-innem a fishing gears dagiti asosasion).
Nangipaay ti Mensahe ni Mayor Josh Edward S. Cobangbang. Kimmablaaw ken nagyaman. Kunana nga itatta a tawen ket maipamaysa ti programa ti pagsayaatan dagiti mangngalap ken dinakamatna ti pakontes ti coastal management a programa ti Gobierno Nasional ket adda 30 Million ti premio ti mangabak. Ginuyugoyna ti agtultuloy a napintas a kammayet dagiti Asosasion iti LGU ken kadagiti maseknan nga Ahensia tapno insegida a maaksionan ken maited dagiti kalikagum dagiti mangngalap.
Nangipaay met ti mensahe da Barangay Captain Eliseo R. Serrano ken ni Mr. Magno Carbonel, Presidente ti Pederasion. Bugas ti mensaheda iti nalaus a panagyamanda iti LGU-Cabugao ken ti DOLE a mangited kadagitoy a proyekto dagiti kabarangayanda ken iti agtultuloy a panangtarabay ti LGU iti pannakasaluad ti kabaybayanda. Innayonda a salimetmetanda dagitoy a maited kadakuada.
Nakikaysa met da Municipal Fisheries Coordinator Nereo S. Daproza, nangited ti Overview ti proyekto ken ni Mr. Edgar S. Balangatan; ken kasta metten dagiti Kameng ti Konseho ti Barangay iti nadakamat a turnover ceremonies. # (Web In- Action)
No comments:
Post a Comment