Cabugao, Ilocos Sur - Saan latta a paudi ti aktibidad ita ti Federated Senior Citizen ti ili a Cabugao nga idauluan da Office of the Senior Citizen Affairs, Ret. DepEd District Supervisor Remigio B. Sunico ken ni Retirado a Prinsipal Constancia Sonido, Presidente para ita a Tawen 2019.
Kinapudnona, ti sektor ti Senior Citizen iti maysa kadagiti maik-ikkan iti importansia ken atension babaen iti LGU gapu ta kasapulanda iti pannakabitibit a mayalubog iti linteg a mangsakup kadakuada.
“Awan bayadan ti agmiembro ti Senior Citizen ngem ti laeng Saranay ti pagbayadanda uray ta napintas met ti tulong a maipaay no dakes la ti gasat ti maseknan,” imbatad ti OSCA Head kas nayon a pangpalagipna kadagiti nataengan a saan pay a nakiraman kadakuada iti ili ti Cabugao.
Sumagmamano kadagiti benepisio a sagsagrapen ita dagiti Senior Citizens ket iti kada tallo a bulan a pension (para kadagiti kualipikado a nataengan); diskuento ti plete, medisina, pannakaagas, magatang a kasapulanda, pannakaibilangda a parupa nga asosasion ti kagimongan, ken umun-unada a maserbian no mapanda agsakada ti papeles iti kada opisina.
Kangrunaan itoy ket iti libre a Philhealth a maited kadagiti indigent Senior Citizens.
Iti biang ti Pederasion, mainayon a benepisio a maawat ti Senior Citizen ket ti panagkontribusion dagiti Opisiales ti sagsangagasut a pisos no matay ti opisial.
Kangrunaan unay ti Senior Citizen a makaabot iti 100 a Tawen ket mapadayawan ken maikkan iti Plake ken gunggona a P100,000 Cash babaen iti Gobierno Nasional. # (Web In-Action)
No comments:
Post a Comment