Friday, August 26, 2011

PROGRAMA TI LGU ITI PAGIKANAN, PINAREGTA TI LGU KEN BFAR

Cabugao, Ilocos Sur (Agosto 25, 2011) – Ti sektor ti pagikanan ti agdama ita a matultulongan ken mapasayaat babaen iti Gobierno Lokal iti panangilungalong ni Mayor Ediboy S. Cobangbang, Jr.

Idi Enero 18, 2011, nangted ti Bureau of Fisheries and Aquatic Resources (BFAR), Vigan City iti panangidaulo ni Rogelio Ragunjan, Chief, Fisheries Division, Provincial Agriculture Office iti 5,000 a fingerlings ti bangus sadiay Barangay Dardarat, Cabugao, Ilocos Sur babaen ti panangawat ti Dardarat Fishermen’s Association nga idauluan ni Rodel Anor.

Picture taken on 01-18-11: Ti pannakaiyawat ti Bangus Fingerlings kenni Brgy. Capt. Danny Garcia (L-2), babaen kada SBM Crescencio Sumagit, Jr. (L-3); ABC Pres. Thaddeus Soller (R-2); ken dagiti kameng ti DA-LGU.
Naulit a naikkan ti asosasion iti sabali a 5,000 a fingerlings idi Pebrero 25, 2011. Dagitoy nga inted ti BFAR ket paset ti programada a mangtulong kadagiti mangngalap a naapektaran iti Bagyo Juan a nakaigapuan ti nakadadelan dagiti pamupokanda ken pannnakabulos dagiti pupokda a Malaga fingerlings.
Iti report da Mr. Robert Savella ken Mrs. Milagros R. Paz, Fisheries Coordinator ken ni Mrs. Zenaida S. Andrada, Municipal Agriculturist ti DA-LGU, dagitoy a naited a 1,000 a fingerlings ket dandanidan makalap ket manamnama a masulnitanna dagiti bannog ken puonan dagiti mangngalap a naapektaran ti kalamidad ti Bagyo Juan. # (Joed Sajonia)

Picture taken on 01-18-11: Dagiti pagtarakenan ti Bangus Fingerlings ti Brgy. Dardarat

Wednesday, August 24, 2011

BARO A WEBSITE, NAI-LAUNCH

Cabugao, Ilocos Sur – Maysa iti naiduma  kadagiti  aktibidades  iti selebrasion ti panagkasangay ni Mayor Ediboy S. Cobangbang, Jr. idi Agosto 23, 2011 (Agosto18 ti petsa ti pannakayanak ti Mayor) ket iti pannakailunsad ti baro a Website ti LGU-Cabugao.

Paset ti arapaap ti Gobierno Munisipal ti maaddaan ti kastoy a pasilidad  tapno saan a paudi dagiti umili iti kabaruanan a teknolohia ti komunikasion ken mayataday unay iti kina-1st Class Municipality ti ili a Cabugao.

Imbatad ni Mr. Althone Alexis B. Borja, Information Technology Consultant ti LGU-Cabugao a nadisenio ti website ti Cabugao maibasar iti agdama a kasasaad ken situasion ti ili ket manamnama a makatulong iti pannakaited ti umisu nga impormasion ken datos   pakaseknan kadagiti maipaay  a serbisio a  pagsayaatan dagiti umili,  paganninawan ken pagulidanan kadagiti aramid ken balligi ti maysa a lugar ken situasion.

Inaklon ni Consultant  Borja nga impamaysa ti grupona a nangbukel ken nangtubay ti website a kas iti kalalangana ita agsipud ta nagusarda kadagiti   “pure computer codes” a saan a “templates” a kas iti us-usaren dagiti dadduma ken manual a wagas iti panangikabil ti “commands” ken “:codes”.  Innayon ti Consultant  ti akemna a mangmantener ti Website ken mangsanay ti kaduana a mangasikaso ti operasion daytoy.  

Buklen ti  Cabugao Website Team dagiti sumaganad:  Mr. Dario Roy O. Siruno, Web Content Manager; Mr. Althone Alexis B. Borja, Web Administrator; Mr. Alvin S. Solis, Assistant Web Administrator.
Ni Mayor Ediboy ti agpaay a  Chairman ti Website Team.

Napusgan met ni Mr. Jose Edwin S. Sajonia kas  Researcher/Web Writer.

Innayon ni Consultant Borja nga assideg ti pannaka-update ti linaon ti website malaksid kadagiti  “permanente a datos”  a pasetna ken saan a mai-post ti aniaman a mainayon nga impormasion no saan nga umuna nga  aprobaran ti Website Team. #

LAING TI BARANGAY 2011, NAILUNSAD BABAEN TI LGU-CABUGAO

Cabugao, Ilocos Sur – Inyusuat ti Gobierno Munisipal ti ili a Cabugao babaen ti panangitandudo ni Mayor Edgardo “Ediboy” S. Cobangbang, Jr.  ti  “LAING BARANGAY 2011” (Search for Outstanding Barangays in Cabugao  in 2011) tapno maikkan met ti pammadayaw ken regta dagiti katulongan ti Gobierno Munisipal nga agipatpatungpal kadagiti plano,  proyekto ken programa ti Administrasion.

Nailukat  ti  salip kadagiti 33 a barangays ti ili ket nairubuat daytoy iti pannakaselebrar ti panagkasangay ni Mayor Ediboy idi Agosto 23, 2011 a no sadino a ditoy ket naiwaras ti naipakete a  bukel ti nateng kadagiti kapitanes ti barangay kas pakauna a tignay mainaig kadaytoy a salisal.

Ti pasalip ket mayintek iti nadumaduma a pagbasaran  (indicators)  iti Health, Nutrition and Environmental Protection, Peace Security and Disaster  Risk Management and Social Welfare;  Education, Culture and Youth Development, Agricultural Productivity, Cooperative Development and Entrepreneurship, Governance and Administration.

Nangrugi ti assessment period manipud Enero  2011 agingga iti Nobiembre 2011. Maaramid ti  evaluation iti Agosto 2011 ket maipakaammonto dagiti mangabak a barangays  inton Disiembre 2011.
Mabukel ti Municipal Evaluation Team a mangisayangkat ti panagpili iti kalaingan iti nadakamat a kategoria.  Sakbayna,  naited ti kompleto a detalye ti pagalagadan  ken pagrukodan  (criteria) iti mapagsasalipan kadagiti 33 a barangays para iti naan-anay nga impormasion a pagbasaranda  ken aramidenda. # (Insurat ni JOED SAJONIA)

TITULO TI DAGA, INTED TI DAR-MARO ITI BARANGAY CARUSIPAN

Cabugao, Ilocos Sur – Paset ti aktibidad a naitampok  iti selebrasion  ti panagkasangay ni Mayor Ediboy S. Cobangbang, Jr. idi Agosto 23, 2011 iti gannuat ti Municipal Agrarian Reform Office(MARO)   nga idauluan ni Engr. Constante R. Raras ti pannakaparuk-at dagiti titulo ti daga nga ited ti opisinada kadagiti maseknan nga agindeg iti Barangay Carusipan, Cabugao, Ilocos Sur. 

Dagiti bumarangay a nakaawat kas  Agrarian Reform Beneficiaries (ARB’s)  ket dagiti sumaganad: Demetrio  Soberano,  Perlito Serna, Emiliano Naval, Leticia Somejo ken Oscar Pula. Aganay a 10.7986 ektarias ti kadagupan ti kalawa ti daga a naisagut.

Sakbayna, adda 65 a titulo (Emancipation Patent) nga inwaras ti DAR-MARO Cabugao iti 17 a katao iti Barangay Catucdaan idi Abril 8, 2011 ken 792 metro-kuadrado  iti dua a katao ti Barangay Sabang idi Abril 11, 2011.

Kas pannakikammayet ti opisina ti DAR-MARO  iti Gobierno Munisipal, imbatad ni Engr. Raras,  MARO-Caretaker  nga agtultuloy ti programa  ti   DAR a mangasikaso kadagiti maseknan nga umili a kualipikado a mangikut kadagiti suksukayen ken tartarawidwidanda a daga wenno lote no la ket ta  masakupan ti programa ti Agrarian Reform. 

Tamtamingen pay ti opisinada ti pannakabingbingay dagiti nalalawa a daga ken lote  ket maikkan  ti Titulo (Certificate of Land Ownership Award) wenno CLOA nga itden ti DAR . Naipatungpal daytoy a serbisio ti MARO  sadiay Barangay Maradodon a nakabingayan ti aganay  a 15.3 ektarias a daga ket naibunong ti titulona iti walo a katao kadaytoy a lugar. # (Insurat ni JOED SAJONIA)   

SELEBRASION TI KASANGAY NI MAYOR EDIBOY, NABUNGA

Cabugao, Ilocos Sur – Nabunga  ti  kaipapanan ti selebrasion ti panagkasangay ni Mayor Ediboy idi Agosto 23, 2011.

Iti bigat ti Agosto 23, naaramid ti napagsasalipan a kategoria iti benneg ti elementaria ken haiskul mainaig iti selebrasion ti  Buwan  ng Wika a dinar-ayan dagiti mangisursuro ken dadaulo ti pagadalan kasta met dagiti taga-LGU. Naangay dagiti aktibidades iti Cabugao Cultural and Sports Complex.
         
Ti selebrasion ti Buwan ng Wika
Pannakaaward ti nangabak ti poster making contest elementary category
Iti malem, naaramid ti Inauguration Ceremony iti panangannong ni Rev. Fr. Jeric Jaramillo ti pannakabendision ti pannakaisibro ti baro a pasdek ti Departamento ti Hustisia nga inimatangan dagiti empleado ti Korte ken DOJ, Opisina ti Mayor, Sangguniang Bayan,  LGU, Kakapitanes, opisiales ti nadumaduma nga opisina ken ahensia, taga-Media  ken umili ti Cabugao.
    
Nagetteng ti laso babaen ken ni Governor Luis “Chavit” Singson a binayabay da Vice Gov.  DV  Savellano, Congressman Ryan Luis V. Singson,  Mayor Ediboy S. Cobangbang, Jr.,  RTC  Judge Nida B. Alejandro ken MTC Acting Presiding Judge Mario S. Domingo ti Cabugao.
    
Ribbon Cutting:(L-R) Mayor Ediboy; Vice-Gov. Dv Savellano; Judge Mario S. Domingo; Gov. Chavit Singson; Judge Nida B. Alejandro; 1st District Cong. Ryan Singson

Adda met a naitallaong da 3rd Assistant Provincial Prosecutor James Gerald Florendo ken ti asawana, Judge Leah Agrifina Ramirez-Florendo, Vice Mayor Danny Q. Gazmen, SB Members Vicky S. Serna, Benedict Savellano, Josefina S.  Vallejo, Dr. Carlito S. Pano ken ABC President, Brgy. Capt. Teddy U. Soller.
    
Nagyaman ni Mayor Ediboy itoy a pagteng ket inyawatna dagiti nadumaduma a bukbukel ti nateng kadagiti Kapkapitanes ti 33 a barangays a kas pakabuklan ti programa a nakinamingan da Gov. Luis”Chavit” Singson, Vice Gov. DV Savellano ken Congressman Ryan Luis V. Singson iti pannakaidur-as ti Agrikultura.
    
Naisaruno ti pormal a pananglukat  ni Mayor Ediboy ti panagoperar ti Website ti Munisipio a ditoy ti pakaammuan dagiti napapateg ken naan-anay nga impormasion maipapan  iti ili ti Cabugao. Gapu itoy, mayagpang ti kasasaad ti benneg ti komunikasion kadagiti umili iti imatang ti sangalubongan.
    
Dimmar-ay pay dagiti opisiales ken kamkameng ti Mayors’ League ti Probinsia ti Ilocos Sur  a nakipagselebrar iti nangayed nga okasion ti kasangay ni Mayor Ediboy.# (Joed Sajonia)

Monday, August 22, 2011

PHILHEALTH CARDS, NAITED KADAGITI UMILI A MABENEPISIARAN


Philhealth Distribution
Cabugao, Ilocos Sur – Nagdudupudop dagiti umili a napan immawat ti Philhealth Card nga inaplikaranda iti kallabes iti opisina ti LGU-MSWDO kadagiti nadutokan nga empleado ti opisina ti MSWD ken Barangay Nutrition Scholars (BNS) nga agasikaso ti pannakaisubmiter ti kasapulan a papeles sa maited ti nasao a kard iti bigat ti Agosto 22, 2011 iti pasdek ti Cabugao Cultural and Sports Complex, Brgy. Rizal, Cabugao, Ilocos Sur.

Sakbay a naiwaras ti nasao a kard, inlawlawag ni Mrs. Lydia Serna-Gazmen, Municipal Social Welfare and Development Officer dagiti annuroten ti panangala ti Philhealth Card.
Kangrunaan a pannakaited ti kard iti saan a pannakaipalubos ti agsukot wenno sangkapamilia a maaddaan ti kard tapno agwaras ken ad-adu ti mabenepisiaran nga umili aglalo kadagiti nakurkurang ti kabaelanna nga agpaagas.

Innayon ni Mrs. Gazmen a manipud Abril 2011 agingga iti Disiembre 2011 ti masakupan ti naited a Philhealth Card a pinunduan ti Gobierno Lokal ti ili a Cabugao babaen iti panangilungalong ni Mayor Ediboy S. Cobangbang, Jr.

Saan a mapilaw ti pannakaladawna ta mabalin met nga paisubli dagiti maseknan a nagsakit ti gastosda iti ospital no nasakawan ti bulan ti Abril 2011 ti petsa ti pannakapaagasda ken mapaadda dagiti maseknan dagiti kasapulan a papeles iti pannakaagasda, impatalged da Mayor Ediboy ken ni Mrs. Gazmen.

Impasingked ni Mayor Ediboy ti saan a pannakaupay koma dagiti saan a nakaawat nupay rebbengna a maikkan ta adda pay sumarsaruno a maited.

Nagyaman dagiti umili a naikkan ti kard kangrunaan dagiti sineknan ti sakit a “dengue” ta nakatulong kadakuada iti naggastosanda iti ospital. # Joed Sajonia

Ti panangited ni Mayor Ediboy  ti mensahe kadagiti Philhealth Beneficiaries. Innayonna ti Mayor "nga sigsigud nga iti Gobierno Munisipal ti agbaybayad ti bukodna nga Philhealth Cards ta saan a pundo ti politiko daytoy ngem naggapu ti kuarta kadagiti umili"
Bayat ti panangilawlawag ni Mrs. Lydia Gazmen ti pagannurotan ti panangala ti Philhealth Card

Friday, August 19, 2011

PANAGKASANGAY NI MAYOR EDIBOY, NASELEBRARAN

LGU Family
Cabugao, Ilocos Sur-  Napnuan rag-o ti pamilia ti LGU ken dagiti  umili ti Cabugao a nakipagselebrar iti  panagkasangay ni Mayor Edgardo “Ediboy”  S.  Cobangbang, Jr.  idi Agosto 18, 2011.
  
Iti bigat ti Agosto 18, naigiddan ti aktibidad ti panagidonar ti    dara (bloodletting) para kadagiti agkasapulan nangruna dagiti naapektaran  ti sakit a “dengue” babaen ti panangigannuat dagiti nurses ken medical technologists manipud iti Mariano Marcos Memorial Hospital, Batac City, Ilocos Norte ken pannakabagi ti Red Cross, Vigan City, Ilocos Sur ken tinulongan dagiti personnel ti Rural Health Unit, Cabugao nga idauluan ni Dr. Rudy M. Singson, Municipal Health Officer ti ili a Cabugao. 
   
Sakbayna, nabara ti panangkablaaw  ti  pamilia ti LGU iti flag ceremony idi Agosto 15, 2011 ket nagyaman ni Mayor Ediboy. Impeksana nga agbalin a simple ti panagselebrarna ken ti  dina pannakadenna dagiti kailianna iti kaaldawan ti kasangayna gapu iti di maisanud a pakaseknan.
   
Nupay kasta, inton Agosto 23, 2011 maaramid ti mapagsasalipan nga aktibidades ti ubbing ken estudiante iti elementaria ken haiskul sadiay Cabugao Cultural and Sports Complex  ken maigiddan ti pannakai-launch ti nainstolaren a pasilidad ti Website ti Munisipio a pakaimpormaran dagiti umili iti kallabes ken agdama a kasasaad ti ili ti Cabugao.
    
Malaksid  kadagitoy, maaramid pay dagiti tulong-sibiko nga aktibidad a kanaig ti panagselebrar ti kasangay ti Mayor kas iti medical assistance  ken kaarngina a wagas ti serbisio a pangtulong kadagiti umili. # (Joed Sajonia)


Wednesday, August 17, 2011

TECHNO-DEMO TI TALLO A HYBRID RICE MESTIZO, PROYEKTO A PAGTULADAN DAGITI MANNALON

Cabugao, Ilocos Sur – Hybrid a pagay ti naipamaysa ti Gobierno Lokal ti Cabugao babaen ti panangasistir dagiti Municipal Technologists ti DA-LGU iti demo-farm nga aglawa iti 1,500 metro-kuadrado sadiay Barangay Sagayaden, Cabugao, Ilocos Sur kadaytoy panagtalon ti Wet Season 2011 (Hunio-Nobiembre).

Paset daytoy ti programa ni Mayor Ediboy S. Cobangbang, Jr. a mangparegget ti panagmula ti nangato ti kalidad ken apitna a pagay tapno mapadur-as ti produksion ken masapulan dagiti mannalon. Inggunamgunam pay ni Mayor Ediboy iti maysa a gundaway a pannakimitingna nga ag-project (agsirmata) koma dagiti mangibagi ti DA-LGU kadagiti maipanawen a klase ti mula: iti benneg ti kanatengan ken dadduma pay a cash crops para iti demo-farming.

Segun ken ni Mr. Edgar S. Balangatan, Techno-Demo Coordinator, dua a kompania ti bukel, ti Bayer ken Bioseed ti timmulong iti pannakairubuat ti demo-farm a pakapatanoran iti Bigante, NSICRC 124-H (mestizo 4, Jolli Rice NSICRC 162-H (mestizo 8), ken H 64 NSICRC 168-H (mestizo 11) a pakaapitan ti 240 agingga iti 276 kaban ti kada ektaria no mapatanor a nasayaat.

Naibunubon dagitoy a klase ti pagay idi Hulio 3,5,7, 2011 ket nairaep makabulan kalpasanna. Naabunuan dagiti nairaep idi Agosto 16, 2011 ket maobserbar agingga iti agdama ti wagas ti panagtan-ayda babaen iti panangiwanwan ni Mr. Balangatan ken panangbisita dagiti Teknisian ti kompania.

“Maysa a kapatgan a panggep ti demo-farm ti panangawis ti imatang dagiti mannalon a makakita ken mangammo ti mapabpabaro a teknolohia ti panagpatanor ti pagay ket no tuladenda ket manamnama nga agballigi ti panagtalonda,” impatalged ni Mr. Balangatan. # (Joed Sajonia)

Tuesday, August 16, 2011

PANNAKI-“DAYO”, PANNAKI-“DAP-AY” MET ITI KASASAAD TI PANAGBIAG!

L-R: Vice Gov. DV Savellano; ABC Pres. Thaddeus Soller; Mayor Ediboy; SBM Benedicto Savellano
Cabugao, Ilocos Sur -  Kabayatan ti pannakaresulta ti transaksion a maniobraen dagiti koridor, saan latta met a maliklikan ti naikaugalian a panagtutungtong dagiti makidayo iti kaaldawan ti Dayo iti nagsaruno a Sabado:  idi Agosto 7 ken 14, 2011.

Nagbalinen a ritual dagiti dumadayo ti nasingdat a panagpipinnadamag, panaglilinnangen, panagiinnammo tunggal Sabado a mangnayon pay ti kapadasanda a  saan laeng a mapan sumirpat, gumatang wenno aglako iti animales iti aldaw ti Sabado.    

Saan laengen a komersial, gumanansia, wenno makakuarta ti panggep ti pannakidinnayo no di pay ket sumirpat ti bumaro wenno bumalasang a nuang a kasinnukat wenno kaginnatang tapno agbaliw laeng ti mausar a pagtrabaho.
    
Mainayon latta met a maidusar dagiti tagilako a burias, kalding iti pagdadayoan. Adu ti masdaaw  uray ti maysa a Pasado Kapitan iti napintas a pannakairubuat ti baro a Dayo. Innayonna a makapaawis ti kasla panagtienda dagiti mannalon kas pakpakauna ti heneral a tienda ti aldaw ti Domingo iti Northern Ilocos Sur Trade Center (NISTC).
   
Kabayatanna, gimmatang ti BARANG-AY Livestock Farm iti pito a baka a Brahman para iti dispersal project ti nasao a pagtaraknan segun iti palawag ni Dr. Cesar Soller, DVM, ken Farm Manager.#

Dagiti makidaydayo ti Livestock Trade Center

Saturday, August 13, 2011

IWAS DENGUE FOGGING PROGRAM

Mayor Ediboy with the Staff of Cong. Ryan Singson and the Fogging Team during the Fogging Operation at Cabugao Institute
Preparation of the Fogging Machine

During the fogging operation at South Central Elementary School

(L-R) SBM Josefina Vallejo and Benedict Savellano; (Center) ABC Pres. Thaddeus Soller; (R-L) SMB Crescencio Sumagit and Vicky Serna - during the fogging operation

South Central Elementary School