Friday, November 30, 2012

UNIT 1, GENERAL CHAMPION ITI PROVINCIAL ATHLETIC MEET 2012!

Cabugao, Ilocos Sur – Nangabak ti Unit 1 a buklen dagiti ili ti Cabugao, Sinait, San Juan ken Magsingal iti kalleppas a 2012 Provincial Atletic Meet a naangay iti Quirino Stadium, Vigan City, Ilocos Sur idi Nobiembre 26-29, 2012.

Dagiti resulta ti salip  iti kategoria ti Elementaria ket dagiti sumaganad:
  • Volleyball Boys and Girls –Champion; Athletic Boys and Girls-Champion; Taekwondo Girls and Boys- Champion. 
  • 2nd Place ti Softball, Baseball, Basketball ken Badminton-Boys ken 3rd Place ti Chess Boys.
Inyalat ti Unit 1 ti General Championship  kas iti sumaganad a nakabuklan ti inabakda: Over-all Champion-Elementary ken  2nd Place-Secondary.
Iti pannaki-amad ti Web In-Action idi Disiembre 2, 2012, impeksa  ni Mr. Ronel M. Ubaldo, District PESS Coordinator ti Cabugao DepEd  iti dakkel a panagyamanda iti suporta ti Gobierno Munisipal iti ili ti  Cabugao nga idauluan ni Mayor Edgardo “Ediboy” S. Cobangbang, Jr. iti delegasionda a napan nakidangadang iti nagduduma nga sports events a nakaipamatmatan  ti siglat, laing ken andur dagiti atleta a naikaysa iti panagkampeon ti sibubukel a Unit 1. # (Web Situational Report)

Thursday, November 29, 2012

FFS GARLIC TI BRGY. PUG-OS, AGIYADAL MET DAGITI LEARNERS

Cabugao, Ilocos Sur – Naangay ti Farmers Field School (FFS) iti Barangay Pug-os, Cabugao, Ilocos Sur a nagpartisiparan  dagiti Garlic Growers ti nadumaduma a barangay. Naipabus-oy kadagiti Learners a nagipresentar kadagiti nakalapda a datos iti Learning Field-da. Inlatak ni Mrs. Remedios Inovejas, pannakabagi ti OPAG nga iti FFS, ti maad-adalan ti teoria ket isuda  ti agipalawag iti duktalda iti Learning Field sa istudiarenda  iti Learning Area-da nga isu ti nag-sessionanda iti Nobiembre 29, 2012 iti Barangay Pug-os, Cabugao, Ilocos Sur.

Pinagdilig ni Mrs. Inovejas nga iti Techno-Demo ket maited/mayaplikar ti amin a kasapulanna idinto ta iti FFS ket ti kiddawen ti situasion ti maaramid. Aniaman ti pagbanagan/apitenda  iti naimulada iti panagleppas ti adalda ket dayta ti resulta a magun-odda.

Imbatad met dagiti lideres ti grupo a dida itulok nga awan ti maganab wenno maapitda iti namulaan a Learning Field-da. Naglektiur met ni Mrs. Ester P. Aguimbag, AT/DA-LGU ken nagsarita met ni Mr. Nereo S. Daproza, OIC/DA-LGU ket dinayawna ti panagannayas daytoy a nagbubuligan a proyekto ti LGU-Cabugao nga idauluan ni Mayor Edgardo "Ediboy" S. Cobangbang, Jr., DA-RFU 1 , ATI, OPAG-Ilocos Sur   ken Philrice (Munoz), Nueva Ecija ditoy Barangay Pug-os. # (Web In-Action) 

DIPUTADO RYAN, DIMMAR-AY ITI PHILHEALTH ID DISTRIBUTION

Cabugao, Ilocos Sur – Dimmar-ay ni Congressman Ryan Luis V. Singson, First District, Ilocos Sur ken dagiti kameng ti grupona  iti dakkel a  panagtataripnong  iti   pannakaiwaras ti Philhealth ID Cards kadagiti ag-2,509 a benepisiario nga agindeg  iti 33 a barangays  iti ili ti Cabugao, Ilocos Sur iti Cabugao Cultural and Sports Complex, Barangay Rizal, Cabugao, Ilocos Sur idi Nobiembre 28, 2012.

Napadayawan  ni Diputado Ryan a nagited  ti Philhealth ID,  nangipaima   iti Financial Assistance kadagiti Opisiales ti Cabugao Vegetable Producers and Traders Association, Inc. nga aggatad ti P500,000 ken ti pannakaiyawat  ti 295 a Laminated Sacks iti imatang dagiti 38 a Farmers Association (FA’s) Presidents ken naitallaong iti Complex  iti nasao met la nga ili.

Iti panagsarita ni Congressman Ryan Luis V.  Singson, impeksana a nakakumit  ti programana  a  tumulong kadagiti kaprobinsiaanna iti pakaseknan iti salun-at, impraestruktura, agrikultura ken edukasion babaen iti Priority Development Assistance Fund (PDAF)-na iti Kongreso.

Kimmablaaw ken nagyaman ni Diputado Ryan kadagiti umili ti Cabugao nga idauluan ni Mayor Edgardo “Ediboy” S. Cobangbang, Jr. iti nabara a panangabrasada kadagiti napateg a maitulongna ditoy a deppaar.

Kinakuyog ni Congressman Ryan da Nag-Mayor Edgar Yabes ti Sinait, Mr. Deogracias Jose "DJ" Victorino H.  Savellano,  ken  ni Bokal Constante Oandasan.

Iti nasao a taripnong, naitabuno met da Vice Mayor Danny Q. Gazmen, SB Member Dr. Carlito S. Pano, SB Member Vicky S.  Serna, SB Member Josefina S.  Vallejo, SB Member Benedicto M. Savellano,  SB Member Carlos V. Sison, MSWD Officer Lydia S. Gazmen  ken DA-LGU OIC Nereo S. Daproza.

Nagpaay nga Emcee ni SB Secretary Maxfel S. Suboc iti naaramid a programa. # (Joed Sabio Sajonia)

Wednesday, November 28, 2012

PRODUCERS/TRADERS TI NATENG, NAKI-DIALOGDA KEN NI MAYOR EDIBOY

Cabugao, Ilocos Sur – Nakitaripnong dagiti Opisiales ti Cabugao Vegatable   Producers and Traders Association, Inc.  nga idauluan ni Mr. Armando Azcueta kadagiti Opisiales ti LGU Cabugao nga idauluan ni Mayor Edgardo “Ediboy” S. Cobangbang, Jr. iti mismo nga Opisina ti Mayor idi Nobiembre 27, 2012.

Iti nasao a panagtitipon, impadamag ni Mrs. Ester P. Aguimbag, AT/DA-LGU ken manartarabay kadagiti agmulmula ti nateng nga iggemen dagiti opisiales  ti baro a   Registration Papers  ti asosasion iti Securities and Exchange Commission (SEC) ket addan juridical indentity-na a maki-transact iti amin a maseknan nga Ahensia ken  Opisina para iti pagsayaatan ti sapasap nga agmulmula ti nateng iti ili  ti  Cabugao.

Innayon ni Mayor Ediboy ti dagus a  pannakaasikaso ti sangsangkamaysa a pagparadaan dagiti aglaklako/agibibiahe ti nadumaduma a nateng ditoy Cabugao idiay lauden ti National Highway iti batog ti Merkado Publiko (NISTC) tapno adda masnop a pagyanan dagiti mailako a nateng. 

Imbatad ni Mr. Eddy Sevilleja, Tesorero ti asosasion a manamnama a maawatda ita a lawas ti Financial Assistance nga aggatad iti P500,000 manipud iti LGU-Cabugao ket makatulong pay daytoy a pundo a mangipatungpal kadagiti programa ken proyekto a mangpasayaat iti sapasap a kameng ti asosasion.

Ita pay, pinagyamanan dagiti Opisiales ken kameng ti Asosasion  ti panagkakammayet  ti sektor ti agmulmula ti nateng ken ti agtultuloy a panangtarabay ti Gobierno Munisipal kadakuada.

Nakitabuno da Vice Mayor Danny Q. Gazmen, SB Secretary Maxfel S. Suboc ken SB Member Benedict M. Savellano, Committee Chair on Agriculture iti nasao a panagsasarita. # (Web In-Action)




Tuesday, November 27, 2012

MAPASPASAYAAT A KALSADA NASIONAL, PIMMINTAS TI PANAGDALIASAT


Cabugao, Ilocos Sur – Apaman a maipalubos a madalananen  dagiti  paset ti agdama  a matartarimaan a parte ti Kalsada Nasional iti masakupan ti ili a Cabugao, Ilocos Sur, sagsagrapenen dagiti motorista, commuters ken amin a klasena a nakalugan iti patad a  dumaliasat iti North  Manila National Higway Road nga agpa-amianan vice-versa.

Partikular ti serra-kurbada a  batog ti sumrekan nga agpa-Salomague Port, imbatad ti kaaduan nga agdaldaliasat iti pannaki-amad ti Web In-Action  a timmalged ken limmukay ti trapiko apaman a madalananen  ti naipalawa ken napasimpa a dalan  a pagkurbaan.

Iti sabali a bangir, nawaya ken naannayas metten  ti panagdaliasat ti amin a behikulo ken motorista  iti kalayakan a parte  ti Kalsada Nasional iti masakupan ti  Brgy. Sagayaden ken Brgy. Cuancabal, Cabugao, Ilocos Sur iti pannakaipalawa ken pannakasimpa ti madalanan.

Innayon dagiti napagdamagan a dagitoy ti saan a magatadan   a bunga  ti panagdur-as ken  epekto  ti napintas a panagkakammayet  ti Gobierno Lokal ken Ahensia ti Gobierno nga agipatungpal iti  benneg ti impraestruktura a serbisio  a  pagnam-ayan ken pagimbagan ti sapasap nga umili. # (Web Situational Report)