Tuesday, December 12, 2017

CHRISTMAS PROGRAM 2017 TI CABUGAO SENIOR CITIZENS ASSOCIATION, NAANGAY

Cabugao, Ilocos Sur – Naangay ti Christmas Program 2017  ti  Cabugao Federated Senior Citizens nga idauluan ni Mr. Bonifacio Somera, Presidente iti Disiembre 12, 2017 iti Cabugao Cultural and Sports Complex, Brgy. Rizal, Cabugao, Ilocos Sur.

Iti Opening Program, nag-Welcome Talk ni Mrs. Constancia S. Sonido, Bise Presidente ti Senior Citizens. Inawisna ti amin a makipaset kadaytoy a panagselebrarda  iti pannakayanak ti Mannubbot a Mesias.


Nangipaay ti Mensahena ni Mayor Josh Edward S. Cobangbang. Nagyaman  ket kinablaawanna dagiti Lolo ken Lola a makipagselebrar iti Naindaklan a Pannakaipasngay ti Mesias. Kinunana a maysa kadagiti napateg nga ikkan ti importansia ita a panawen ket iti “Gift Giving” ket inayonna a dagiti Senior Citizens ket  isuda  ti pagsarmingan kadagiti napipintas nga ug-ugali a tuladen ti sapasap ket dakkel met iti pasetda a makipagrambak ken maikkan iti sagut ita a Paskua 2017.

Nangipaay met ti Mensahena da Vice Mayor DJ Savellano; SBM Bryan Jett S. Pano; Mr. Bonifacio Somera, Presidente, Cabugao Senior Citizen Association; ken ni MSWD Officer Mrs. Lydia S. Gazmen a nagatendar iti Christmas Program dagiti nataengan. Kangrunaan nga anag ti Mensaheda iti kaipapanan ti Paskua para iti sapasap ken panangited iti pammateg kadagiti nataengan a sektor.


Naiballaet a naipaay dagiti Intermission Number dagiti pannakabagi ti nadumaduma a Senior Citizen Barangay Chapter babaen iti Vocal Solo ken Group Dance.

Naisaganad ti pannakaaramid ti Raffle Draw. Indauluan da Mayor Josh Edward ken ni Vice Mayor DJ iti nagbunot iti napagasatan a numero iti Raffle Draw.

Buklen dagiti naisagut nga agkakapateg a premio nga inabak dagiti nagasat a nabunot ti  numerona a nataengan iti raffle ket dagiti Dry Iron (Plantsa); Desk Fan; TV; Cellphone; ken Cash. 

Inyawat met laeng da Mayor Josh Edward; Vice Mayor DJ ken ni SBM Bryan Jett S. Pano dagiti naipapremio. Isuda a tallo nga Opisiales ti Ili iti  naggapuan dagiti nadakamat a naipapremio.

Nakikaysa dagiti Staff ti  MSWDO  nga idauluan ni MSWD Officer Mrs. Lydia S. Gazmen ken Social Welfare Assistant Leonora G. Reintar iti daytoy a Christmas Celebration ti nataengan. # (Web In-Action)