Monday, June 30, 2014

DUA A KAGAWAD, NAGSAPATADA KEN NI MAYOR EDIBOY

Cabugao, Ilocos Sur – Nagsapata dagiti dua a kabarbaro a Kagawad nga isuda Kagawad Benedicto Salarzon iti Brgy. Cuantacla ken ni Kagawad Silvestra Watson iti Brgy. Nagsincaoan, Cabugao, Ilocos Sur iti Hunio 30, 2014 iti Opisina ti Municipal Town Executive.

Pinagsapata ni Mayor Edgardo S. Cobangbang, Jr. dagitoy dua a kabarbaro a Kagawad iti panangannongda iti pagrebbenganda iti  imatang da MLGO Officer Constancia L. Quinola, LGOO V  kasta metten da Punong Barangay Dencio Sonido ti Barangay Cuantacla ken ni  Punong Barangay Modesto Bringas ti Barangay Nagsincaoan. 
Agepekto ti panagtakem dagiti nadakamat a kabarbaro a Kagawad  iti Hulio 1, 2014. # (Web In-Action)

BIODEGRADABLE WASTES, MAPAGNUMARAN

Cabugao, Ilocos Sur – Agtultuloy latta ti panagoperar ti Luzon Green Art Technology, Inc. ken agtultutloy met a katinnulong ti LGU-Cabugao iti monitoring babaen kadagiti pannakabagi ti Solid Waste Management Program ti Munisipio nga idauluan ni MENRO-Designate Edgar S. Balangatan  iti napintas a pannakaidalimanek dagiti basura.

Malaksid iti inaldaw (as per schedule) iti pannakabunag dagiti basura babaen iti agrikrikus a Compactor Truck ket naipangruna a mapalagipan dagiti household member iti area coverage ti programa iti agtultuloy a napintas a segregasion-da (panamaglalasin)  nangruna iti kategoria ti “nabubulok” ken “di nabubulok”  a pakabuklan ti basura, segun pay ken ni Mr. Balangatan. 

Innayon pay ti Obserbasion  ti MENRO nga ipakpakat ti LGA Tech., Inc.  ita dagiti mayataday a Teknolohia ket maipangruna a pagbalinenda  dagiti nalaka nga agrupsa a rugit a maaramid nga organic fertilizer babaen iti panangusarda kadagiti maiyannatup a ramit ken makina iti Ecology Center.

Insupusop pay ni MENRO Balangatan nga iti panagbayag ti operasion ti LGA Tech., Inc. ket manamnama a pumintas ken lumawlawa ti operasion ken aramidenda ket makaparnuayda  ti pagsapulan dagiti tao iti lokalidad.

Segun pay iti MENRO a babaen itoy ket maadaptar dagiti   systematic, comprehensive ken  ecological solid waste management program a   mangitandudo ti resources conservation and recovery kadagiti biodegradable wastes (nabubulok a basura). # (Web In-Action)

15TH P4MP NATIONAL CONGRESS, NAGATENDAR TI FARMER PRESIDENT

Cabugao, Ilocos Sur - Naangay ti 15th P4MP National Congress idi  Hunio 24-26, 2014 idiay Crown Pavillion, Tuguegarao City babaen kadagiti kameng ti Pambansang Mannalon, Mag-uuma, Magbabaul at Magsasaka ng Pilipinas.  Ti Tema ti nasao a panagtitipon ket: “Matatag ng P4MP Tungo sa Progresibong Agrikultura at Pagharap sa Makabagong Ekonomiya”.

Napusgan   ni  Mr. Elmer G. Bromeo, Presidente ti Pederasion ti mannalon iti ili a Cabugao, Ilocos Sur a nagatendar kadaytoy a panagtitipon.

Iti Day 1 (Hunio 24, 2014), naluktan ti Farmers’ Congress babaen iti panangyam-ammo ni Mr. Renato A. Maguigad, Center Director, ATI-RTC 02 kadagiti delegado  ken nag-Welcome Message ni Mayor Jefferson P. Soriano, City Mayor, Tuguegarao ken nagpaay a Keynote Speaker ni Senator Cynthia A. Villar, Committee Chair on Agriculture and Food, Senate of the Philippines.

Iti Day 2 (Hunio 25, 2014),  naangay dagiti aktibidades para iti Kongreso ti Mannalon babaen iti naaramid nga  Synthesis, Impression and Insights dagiti pannakabagi ti Luzon, Visayas ken  Mindanao. Nagsapata pay dagiti Opisiales ti National P 4MP  ken nagsarita ni Representative  Anthony M. Bravo, Ph. D., NATCO Party List; Hon. Lucresio R. Alviar, Jr., CESO III,  DA-Regional Executive Director, Region 02 ken ni Hon. Asterio P. Saliot, Ph. D., CESO III, Director, Agriculture Training Institute (ATI). 

Kabayatanna, iti 1st Meeting  ti Municipal Agriculture and Fisheries Council (MAFC)-Cabugao iti Hunio 30, 2014 iti Municipal Hall, nadutokan a nagreport ni Mr. Bromeo ket imbinsana dagiti naadal ken nakitana iti nasao  a panagtitipon kadagiti kakaduana a nagmimiting.

Ti Pambansang Mannalon, Mag-uuma, Magbabaul at Magsasaka ng Pilipinas ket nagkaykaysa a ragup dagiti Asosasion a mangitantandudo ti interes dagiti mannalon iti amin nga aspeto ti Agrikultura tapno agtultuloy nga agbalinda a produktibo a para iti kagimongan ti Pilipino. # (Web In-Action)

Friday, June 27, 2014

TURN-OVER TI MEDICAL EQUIPMENTS, NAARAMID

Cabugao, Ilocos Sur – Naigannuat ti Turn-over dagiti Medical Equipments (Weighing Scale (Detecto) kasta metten iti  Stethoscope ken BP Apparatus) kadagiti barangay  iti ili ti Cabugao, Ilocos Sur. Buklen ti Action Team dagiti kameng ti Sangguniang Bayan nga isuda Atty. Bryan Jett S. Pano, Committee Chair on Health and Social Services; SBM Dr. Jemaima S. Tan-Yee, Committee Vice Chair ti nasao a Komite kasta metten da SBM Benedicto M. Savellano ken ni SBM Josefina S. Vallejo. Nakikaysa met dagiti kameng ti RN-Heals a  pannakabagi ti Municipal Health Office-RHU Cabugao. Nangrugi ti papanda a panagited kadagitoy a ramit idi Hunio 24, 2014 kadagiti 33 a barangay ti ili ti Cabugao. Nakikaysa met dagiti Opisiales ti Barangay iti pannakaited dagitoy a medical equipments.


Sakbayna, naaramid ti Ceremonial Turnover iti Municipal Conference Building iti imatang dagiti Barangay Health Workers (BHW’s), Barangay Nutrition Scholars (BNS),  Opisiales ti LGU-Cabugao ken pannakabagi ti Municipal Health Office nga idauluan ni Dr. Bernardino M. De Gracia III, OIC Municipal Health Officer ket napagkaykaysaan kadayta a taripnong iti pannakaiyeskediul ti aktual a pannakaisuro ti usar dagitoy a ramit kadagiti Barangay Health Center kasta met iti pannakatagiben dagitoy a naited nga aruatenda.

Dagitoy nga aksion ken inisiatiba ket bunga ti napintas a panagkammayet/koordinasion  dagiti Opisina ken Ahensia a maseknan iti salinong ti LGU-Cabugao, Ilocos Sur tapno nadardaras a maikkan ti atension iti pagkasapulan dagiti umili iti pakaseknan ti salun-atda iti 33 a barangay ti Munisipalidad. # (Web In-Action)

DEVELOPMENT SEMINAR TI 4 P’s, MAANG-ANGAY

Cabugao, Ilocos Sur – Maang-angay ti One-Day Seminar on Market Enterprise Development kadagiti kameng ti Pantawid Pamilyang Pilipino Program. Nairugi ti panagadal  iti Brgy. Namruangan ken Brgy. Dardarat, Cabugao, Ilocos Sur idi Hunio 26, 2014. Sumarsaruno met ti dadduma a barangay a kas iti Barangay Sabang ken Brgy. Pug-os iti Hunio 27, 2014.


Segun ken ni Engr. Yolando Q. Quiocho iti Business Development Division, Department of Trade and Industry (DTI)-Vigan City, a maaramid dagitoy a panagadal babaen iti pannakikammayetda  iti DSWD ken ti LGU-Cabugao nga ibagian ti Municipal Social Welfare and Development nga idauluan ni MSWD Officer Mrs. Lydia S. Gazmen. 

Daytoy a panagsanay ket paset ti agtultuloy a programa para kadagiti 4 P’s tapno masursuroda met ti agnegosio a mainayon iti matgedanda.


Sakbayna, naangay ti miting dagiti Parent-Leaders ti 4 P’s kadagiti barangay ti ili idi Hunio 25, 2014 iti Municipal Conference Building ket nagatendar ditoy ni SB Member Atty. Bryan Jett S. Pano, Committee Chair on Social Services ti Sangguniang Bayan tapno paregtaenna dagiti implementors ken beneficiaries a mangitultuloy daytoy a pro-poor program ti Munisipio.

Manamnama a no maikkan ti adal dagiti kameng ti 4 P’s ket agbalinda nga small-scale enterpriser a makatulong kadakuada, iti komunidadda ken iti ilida, segun pay ken ni Engr. Qiocho.


Daytoy nga aksion ken inisiatiba ket resulta iti napintas a koordinasion ti LGU-Cabugao, Ilocos Sur kadagiti Ahensia ti Gobierno a makatulong kadagiti programa a mangital-o ti kabibiag dagiti 4 P’s Beneficiaries. # (Web In-Action)

WAITING SHADE, MAINAYON A PAGNAM-AYAN TI PUBLIKO

Cabugao, Ilocos Sur -  Mainayon iti serbisio ti Department of Public Works and Highways (DPWH) iti naipasdek ken maus-usaren nga atiddog a waiting shade (loading and unloading area) a masarakan iti sango ti NISTC Public Market, Cabugao, Ilocos Sur.

Maibasar iti kapanunotan dagiti margetgoers ken commuters ket pagyamyamananda unay daytoy a pasilidad ti Gobierno a naipasdek iti igid ti National Highway ta mainayon a paglinonganda a katulongan pay dagiti waiting shed a naipasdeken  iti LGU-Cabugao iti sango ti Tiendaan ti ili.

Innayon pay dagiti kaaduan a nakapatpatang ti Web In-Action ket dayta ti mangipakita iti in-inut a panagdur-as ti ili ti Cabugao maigapu iti pannakailawa/pannakatarimaan ti National Highway a resulta met ti napintas a panagbulig  ti Ahensia ti DPWH  ken ti LGU a kapartnerna iti pannakaidur-as dagiti impraestruktura nangruna iti pannakapasayaat dagiti kalsada.

Manamnama nga iti pannakausar daytoy a naaramid a pasilidad ket mangnayon iti pagnam-ayan dagiti amin a makausar nangruna kadagiti umili ti Cabugao, Ilocos Sur, segun pay kadagiti Marketgoers. # (Web In-Action)

Thursday, June 26, 2014

PAY-OUT TI 4 P’s MEMBERS, 16 A BRGYS. TI MASERBIAN

Cabugao, Ilocos Sur – Naangay ti pannakaited ti gatad (over the counter) nga awaten dagiti Benepisiario ti Pantawid Pamilyang Pilipino Program (4 P’s) iti 16 a Barangay ti Munisipalidad ti Cabugao  idi Hunio 26, 2014 iti  Opisina ti 4 P’s Cabugao Municipal Operation’s Office (MOO),   Municipal Link, Cabugao, Ilocos Sur. Mabatayan ti dua a bulan ti inawat dagiti Recipients (Marso-Abril 2014) ket naited met dagiti Cash Cards kadagiti dadduma a Beneficiaries ket mapanda alaen ti mabianganda a gatad  iti LBP-San Juan ken Sinait iti eskediul a Hunio 26-27, 2014. 


Nasapa a dimteng dagiti 4 P’s Members ket nangalada iti Acknowledgment Receipt (AR)  kadagiti natudingan a DSWD Personnel sakbay a naited ti awatenda a gatad. 

Nakikaysa met da  Atty. Bryan Jett S. Pano, Committee Chair on Social Services; Ms. Ma. Theresa H. Calvo, MRB-Ilocos Sur,  Philpost Cabugao Postmaster Cesar Sivila
ken ni Mr. Robert S. Jaramilla, Philpost Representative-Magsingal, Ilocos Sur iti nasao a taripnong. 

Dagitoy a pagsayaatan dagiti recipients   ket nailungalong babaen iti agtultuloy a programa ti Gobierno Munisipal nga idauluan  ni Mayor Edgardo “Ediboy” S. Cobangbang, Jr.  tapno mairamanda  iti programa ti DSWD Cash Conditional Transfer nga itandudo ti Gobierno Nasional  ket masagrapda met ti pagsayaatan a para iti pagimbagan dagiti annakda ken ti pamiliada. # (Web In-Action)

KOORDINASION TI CLEAN AND GREEN ITI DPWH, AGTULTULOY

Cabugao, Ilocos Sur – Malaksid iti impraestruktura a proyekto a  maiwaywayat iti Kalsada Nasional, maysa pay napateg a panagkinnoordinar ti DPWH District 1,  Bantay Office, Ilocos Sur ken iti Clean and Green Program ti LGU-Cabugao. Segun ken ni Mr. Edgar S. Balangatan, AT, MENRO-Designate, a napairutan ita ti koordinasion dagiti nadakamat a grupo iti regular a pannakamantener ti kinadalus ti National Highway iti mabatogan ti Munisipalidad manipud iti Brgy. Sagayaden agingga iti Brgy. Pug-os.
 Innayon ni MENRO Balangatan a nayuna a nadalusan iti masakupan ti nag-Tree Plantingan ti Munisipio idi Hunio 12, 2014 iti mabatogan ti Sitio Cabaroan, Brgy. Cuancabal ken iti Sitio Sagayaden, Norte, Brgy. Sagayaden, Cabugao, Ilocos Sur.

Irugi met ti DPWH Maintenance Section iti Brgy. Pug-os (Near Bimmeclat Bridge) ket makisinnabatda nga agdalus iti agsumbangir ti kalsada agraman dagiti rangtay a masakupan ti Kalsada Nasional.

Innayon ni Mr. Humprey S. Catriz, JO-Driver, a linawas a wanasenda ti stretch ti Sagayaden-Pug-os a pidutan ti selopin ken dadduma pay a ruot iti kalsada ken monitorenda met ti panagdakkel ti ruot ket apaman a mabalindan a dalusan ket ditoyen nga ag-grass cutter-da.

Daytoy a koordinasionda iti DPWH ket agtultuloy a mangpasayaat ti buya ti Kalsada Nasional a mayataday pay  iti pannakaipromot ti Turismo iti ili. # (Web In-Action)

WATERWORKS UPDATE, NAAMMUAN

Cabugao, Ilocos Sur – Iti pannakiuman ti Web In-Action iti Hunio 26, 2014, imbatad ni Waterworks Superintendent Engr. Nestor B. Somera nga agtultuloy latta ti ipaayda a serbisio kadagiti umili nga end-users iti danum a mainum nga aggapu iti Magarang Water  Springs,  Brgy. Cacadiran, Cabugao, Ilocos Sur ken ti Roma-Kinalian Source a mangserbisio manipud iti Brgy. Maradodon agingga iti Brgy. Alina-ay.

Iti agdama, maipatpatungpal latta  ti water rationing kadagiti barangay a maseknan  tapno makapagbibingay dagiti konsumidores iti masakupan ti service area ti waterworks ti  suplay  ti  danum. Kabayatanna,  adda met latta dagiti connection line ti tubo a tarimaanenda gapu iti panagrukop wenno dadduma pay a pakaigapuan ti panagproblema  iti distribution line. Ngem maaksionan daras ken madagdagus a matarimaan dagitoy.

Innayon pay ni Engr. Somera nga aksionanda  dagiti awag dagiti water-users uray aldaw ti Sabado ken Domingo agsipud ta inaldaw a nakasapulan ti danum iti panagbiag dagiti umili.

Insupusop pay ti Waterworks Superintendent  a madagdagus a mataming/masolbar  ti pakaseknan dagiti water consumers agsipud ta kankanayon latta met ti panagrekurida/monitor  dagiti Collectors, Pifefitters ken Personnel a masakupan ti Cabugao Waterworks Office. # (Web Situational Report)

Wednesday, June 25, 2014

BAMBOOCRAFT MAKING, MAINAYON A PAGSAPULAN

Cabugao, Ilocos Sur – Maiyataday iti programa ti Gobierno Lokal ti ili pakaseknan iti “One Town,  One Product” OTOP ket mairusrusat ita ti Bamboocraft Production   ket maysa ni Mr. Dennis de Guzman, akinkukua iti   Gladelyn Kubo and Bamboocraft a mangigannuat kadaytoy a gay-at ket  masarakan ti puestona  iti National Highway, asideg ti NISTC Public Market, Cabugao, Ilocos Sur.

Innayon ni Mr. De Guzman a makatawenen nga aglaklako ti produktona ditoy ili ti Cabugao ket naragsakan a nakaammo a ti kawayan ket daytoy ti maysa a kangrunaan a produktuen  ti ili ket kayatna ti tumulong a mangital-o kadaytoy nga industria. Babaen iti pannakikammayetna kadagiti kakaduada nga agar-aramid ti Kubo ken dadduma a kita ti muebles ti Kawayan ket maiyallatiwda pay ti Teknolohia ken Talentoda   nga agsangal ti Katre, Tugaw, Lamisaan, indayon ken nadumaduma ti  klasena  a mabalin a pagkakitaan ken partuaten  babaen iti pannakaaramat ti kawayan a materialesda.

Insupusop ni Mr. De Guzman a malaksid a makaparnuayda  iti panggedan  kadaytoy a gannuatda ket makatulongda pay a mangpapigsa iti panagpatan-ayan ti kawayan ta ngumato ti balor dagitoy a mula a mainayon iti matgedan dagiti mannalon.

Agsipud ta mangrugrugida pay laeng ket manamnama nga ad-adu pay ti pagdur-asan ti negosioda ken iti hanay-da  iti sumagsaganad a panawen, segun pay ken ni Mr. De Guzman. Impeksana pay ti panagyamanna iti LGU-Cabugao ta mapermisuanda  a mangipromot ti Bamboocraft Production ditoy ili ti Cabugao, Ilocos Sur. # (Web In-Action)  

INTER-AGENCY COORDINATION, MAPABORAN DAGITI MANNALON

Cabugao, Ilocos Sur – Mapaboran dagiti mannalon iti ili ti  Cabugao, Ilocos Sur iti agsasaruno a pannakaiyusuat ti programa, aktibidades ken proyekto babaen iti panangigannuat ti DA-RFO 1, OPAG-Ilocos Sur ken ti Gobierno Probinsial, Agriculture Training Institute (ATI) Region 1 ken ti LGU-Cabugao nga idauluan ni Mayor Edgardo “Ediboy” S. Cobangbang, Jr. 
Iti update manipud iti rekord ti DA-LGU, dagiti sumaganad ti itineraria dagiti maseknan a maibaon nga agseminar ket dagiti maiyawidda nga adal ket maiyallatiwto manen kadagiti mannalon:

1.Training of Trainers on Farm Business School (FBS) kadagiti Agriculture Extension Workers (AEW’s) inton Hulio 23-27, 2014 (First Batch) ken Hulio 7-11, 2014 (2nd Batch) a maangay idiay ATI-RTC 01 Satellite Station, Batac City. Kangrunaan a panggep ti panagsanay ket iti pannakaigamulo dagiti mannalon iti panagnegosio ken iti  marketing ti produktoda a mainayon iti matgedanda.

2.Maibaon ti pannakabagi ti DA-LGU Cabugao iti maangay a Training on Feeds Formulation tt AEW’s and Swine Breeder Loan Distribution Program (Baboyan sa Likod Bahay) a maangay inton Hunio 30-Hulio 1, 2014 idiay Ilocos Sur Community College Training Hall, Vigan City. Panggep ti seminar iti panagaramidan  ti sustento ti swine para iti proyekto ti Sustainable Hog Enterprise.

3.Maangay ti 15th P4MP National Congress inton Hunio 24-26, 2014 idiay Tuguegarao City babaen kadagiti kameng ti Pambansang Mannalon, Mag-uuma, Magbabaul at Magsasaka ng Pilipinas. Maawis  ni Mr. Elmer G. Bromeo, Presidente ti Pederasion ti mannalon iti ili a Cabugao, Ilocos Sur.

Dagitoy nga aksion ken gapuanan dagiti nagkakammayet nga Ahensia ket agtultuloy a mangpasayaat ti panagbiag dagiti mannalon tapno maital-o ti kasasaadda a mayoridad a kameng ti kagimongan. # (Web Situational Report)

NAMANTENER TI SUPLAY TI NATENG ITI NISTC

Cabugao, Ilocos Sur – Saan a mapasamak ti panagkirang ti suplay a nateng iti NISTC Public Market ita a Hunio 2014  gapu ta adda latta maprodukto dagiti Off-Season Planters nangruna iti lugar a masasao a “Vegetable Bowl” ti ili nga isu ti Brgy. Salapasap.

Iti binigat  a panagbisita ti Web In-Action iti Tiendaan ti Cabugao, naregta ken nasapa a mapan aglako dagiti Vegetable Vendor and Traders iti partena  a masakupanda iti Tiendaan. Malaksid kadagiti maimulmula a cash crops nga adda met awan ti  klasena gapu ta rugrugida pay laeng a nagimula ket nawadwad ti suplay dagiti mainayon a pagbiag a kas iti uggot ti Saluyot, Balangeg, Bulong ti Marunggay ken kanaigna a bulbulong nga adda iti kategoria ti “Green and Leafy Vegetables”.

Imbatad ti kaaduan kadagiti aglaklako a saan a problema  ti presio ti nateng ta mabalanse babaen kadagiti  maapit iti Off-Season ken nasaknap iti Backyard Gardening a programa ti LGU-Cabugao kadagiti sektor a maseknan iti pagtaraon.

Dagitoy nga inisiatiba ket resulta iti nasaknap a programa ti Gobierno Lokal iti Vegetable Production babaen iti panangimaton ti High Value Crops Development Program (HVCDP) a pagkamkammayetan ti LGU-Cabugao ken ti DA-RFO 1. # (Web Situational Report)

Tuesday, June 24, 2014

AGTULTULOY DAGITI PROYEKTO ITI CABUGAO NORTH CS

Cabugao, Ilocos Sur – Segun ken ni Mrs. Estrellita M. Siruno, Principal II, Cabugao North Central School ken agak-akem nga OIC District Supervisor iti Cabugao DepED District nga agtultuloy dagiti proyekto a maar-aramid iti uneg ti pageskuelaanda.

Kalpasan iti dakkel a naited a  tulong ti LGU-Cabugao iti pannakailungalong a maipasdek ti kabukbukodanda nga School Stage ken Multipurpose Building, naipokus met ti inisiatiba ti Parents-Teacher Association (PTA)  iti pannakaipasdek ti Water Tank (dua a unit) a nainstolar iti uneg ti pageskuelaan a mangipaay iti naan-anay a suplay iti kasapulanda a danum iti pagadalan.

Innayon ni Mrs. Siruno a nagtaud iti pundo ti PTA ti naigastos kadaytoy a proyekto kasta metten  iti pannakapasayaat pay dagiti Comfort Rooms (CR) iti pageskuelaan.

Insupusop ni Mrs. Siruno a kasapulan a mapasayaat dagiti pasilidadesda maigapu iti umad-adu nga umay agbasa nga ubbing ditoy Cabugao North Central School.
Manamnama nga iti napintas a panagkammayet ti pageskuelaan, PTA, Komunidad, Nagannak ken iti Gobierno Lokal ket mapatuladan met dagiti dadduma a pagadalan a mangited  iti pagimbagan kadagiti agad-adal iti napintas nga ibunga iti agtultuloy a kooperasion dagiti nadakamat a maseknan a mangtaming iti pageskuelaan . # (Web In-Action)

WORKSHOP-MEETING TI DAY CARE, NAARAMID

Cabugao, Ilocos Sur – Naaramid ti Day Care Workshop on Supplementary Feeding Program kadagiti 32 a Day Care Workers ti ili a Cabugao, Ilocos Sur  idi Hunio 23, 2014 iti Municipal Conference Building, Cabugao, Ilocos Sur.


Ti panggep ti nasao a workshop ket iti pannakaisagana ti pakabuklan ti Budgetary Requirements iti Daily Menu para iti Supplementary Feeding Program ti nasao nga opisina ti LGU.

Kangrunaan a nangiwanwan kadagiti nag-workshop ket ni Mrs. Lydia S. Gazmen, Municipal Social Welfare Officer ti MSWDO-Cabugao. Segun ken ni Mrs. Gazmen, adda umanay nga alokasion a para kadaytoy a programa ti DSWD-LGU Cabugao para iti innem (6) a bulan a pannakaipatungpal ti proyekto. Innayonna pay a manamnama a marugian ti Feeding iti bulan ti Agosto 2014 ket maminlima a daras iti kada lawas ti pannakapakan dagiti ubbing kadagiti Day Care Centers iti ili ti Cabugao.


Dagitoy a gannuat ket resulta ti napintas a panagkammayet dagiti Opisiales ti LGU-Cabugao nga idauluan ni Mayor Edgardo  “Ediboy” S. Cobangbang, Jr., iti DSWD Regional Field Office 1, Day Care Workers ken dagiti  nagannak tapno maited  iti agtultuloy a napintas a serbisio kadagiti agtan-ay nga ubbing ket mahulma-da nga agbalin a mapangnamnamaan ken responsable nga umili. # (Web In-Action)

VACCINATION AND DEWORMING, AGTULTULOY A PROGRAMA

Cabugao, Ilocos Sur – Iti pannaki-amad ti Web In-Action ken ni Dr. Melvin G. Castro, Veterinarian  ti DA-LGU Cabugao itay nabiit, impakaammona  nga idanonda ti panagbakunada/panagpurgada   kadagiti ayup ken dinguen kadagiti barangay tapno masigud a maprebentaran dagiti rumsua a sakit ti animales sakbay iti matutudo a bulbulan.

Innayon ni Dr. Castro a  makikoordinarda iti Barangay Captain wenno lumugar a kabaelanna a mobilisaren dagiti adda ayup ken dinguenna tapno mabakunaanda/mapurgada. Malaksid iti grupo/barangay  a panagbakuna ken panagpurga ket maangay met iti indibidual depende iti pannakasango ti maseknan nangruna kadagiti adda sakit ti dinguen ken ayupda a kasapulan a makita ken maagasan.


Dagitoy nga aksion ken inisiatiba ket resulta ti nasaknap a programa iti Animal Care and Disease Prevention  ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno maidur-as ti livestock  sector  babaen iti pannakapapigsa ti  panagtartaraken a katulongan ti panagmulmula a pamastrekan dagiti mannalon. # (Web In-Action)

Monday, June 23, 2014

SECTORAL UPDATE ITI BRGY. BONIFACIO, NAAMMUAN

Cabugao, Ilocos Sur – Naangay ti miting ti Rural Improvement Club (RIC) idi Hunio 22, 2014 iti Barangay Hall ti Brgy. Bonifacio a no sadino a ditoy ket nagatendar dagiti kababaian ti nasao a barangay. Kangrunaan a trinatarda ken inaramidda ket iti reorganisasion daytoy a sektor a nakapilian dagiti baro nga opisialesna nga agtakem iti  Tawen 2014; napagsasaritaan iti  pangiserbianda iti pundoda; update ti recording ken pinansial a kasasaad ti asosasionda  ken uray pay iti membership status tii nasao a gunglo.

Nakikaysa da Brgy. Captain Valentin S. Tuyor, Jr.; Kagawad De Vera, Cruz, Siruno ken Saturno iti nasao a panagtataripnong. Nagpaay a Facilitator ni Mrs. Joenah G. Sevilleja, AT, DA-LGU.

Kabayatanna,  aktibo met dagiti dadduma a sektor kas iti benneg ti mannalon, Person with Disabilities (PWD’s); 4 P’s ken kanaigna nga asosasion a makikamkammayet iti Konseho ti Barangay a mangipatungpal kadagiti aktibidades a mangidur-as ti hanay-da.

Aktibo pay dagiti Opisiales ti barangay a mangisungsong iti Backyard Gardening ket naaramid ti Vegetable Garden iti asideg ti Barangay Hall a pagtuladan dagiti lumugar.
Kabayatanna, aktibo ti Brgy. Bonifacio a mangipakpakat iti programa ti Clean and Green ken Solid Waste Management babaen iti pannakitinnulongda kadagiti pannakabagi ti Munisipio nga agdalus iti mabatoganda iti National Highway ken iti  pannakaiwanwan dagiti lumugar iti panangidalimanekda  iti basura babaen iti “Segregation Program” ti LGA Tech., Inc. kasta metten iti LGU-Cabugao.

Ti Brgy. Bonifacio ket tinawen a makagun-od iti adu a pammadayaw iti nadumaduma a Kategoria iti Salip ti Barangay iti Siglat Awards a programa ti Kapitolio Probinsial.  (Web In-Action)

FFS-NAGSANTAAN KEN FARM EXTENSIONIST UPDATE

Cabugao, Ilocos Sur – Maar-aramid ita ti Farmers Field School kadagiti mannalon iti Brgy.  Nagsantaan, Cabugao, Ilocos Sur  nga idauluan ni Mr. Roberto Sablay, Presidente.
Daytoy a proyekto ket nagkammayetan ti LGU-Cabugao,  ti DA-RFO 1, Agriculture Training Insitutte, OPAG-Ilocos Sur ken imatonan ti DA-LGU Cabugao.

Ti Season-Long Farmers-Field School on Sustainable Rice Production ket addaan ti 30 a mannalon nga agad-adal ken agaassideg ti taltalonda ket agadalda iti 4 a bulan (June 2014-October 2014).

Iti pannakaaramid ti panagadal ket ditoy a naipakat ti kabaelan dagiti Local Farmer Technician (LFT’s)  nga isuda Henry B. Saliganan ken Bert P. Vicente a tumulong ken ni Mr. Obas Y. Baclig, AT a mangtarawidwid kadaytoy a programa.

Dagiti nagapuananen ti panagadal ket dagiti sumaganad:

1.Distribution ti mausar ti panagadal kas iti Office Supplies.

2.Pre-test, Groupings, Election of Officers, Setting of Norms, Overview of the Program ken Principle of Palay-Check.

3.Naisaruno  ti Field Work (Seedbed Preparation), Keycheck 1, Fertilizer Computation (Soil Analysis Result) ken ti Field Work (Sowing) idi Hunio 20, 2014.

Ti kangrunaan a panggep dagitoy a panagadal ket tapno aktual a maipasagepsep kadagiti mannalon ti kaipapanan dagiti kabaruanan a Teknolohia ti pagay, maibaba iti gastos dagiti mannalon ken maingato ti matgedanda. Mainayon pay iti pannakatakuat ti kabaelan  dagiti mannalon a makabael nga agbalin a “Farm Extensionists” a katulongan ti Gobierno Lokal a mangipakat kaadagiti programa.

Kabayatanna, agtultuloy met iti napinget a pannakitinnulong ni SBM Benedicto M. Savellano, Committee Chair on Agriculture, Fisheries and Cooperatives a mangipatungpal kadagiti nagun-od ti LGU-Cabugao a programa ken pagsayaatan  para kadagiti mannalon. 

Daytoy a programa ket napunduan babaen iti DA-RFO 1 ken iti LGU-Cabugao nga idauluan ni Mayor Edgardo “Ediboy” S. Cobangbang, Jr. tapno masustener ti pannakaidur-as iti kaammuan ken panagbiag dagiti mannalon nangruna kadagiti barangay a pakaipakatan dagiti kabaruanan a wagas ti panagmula. # (Web In-Action)

BOTTOM-UP BUDGETING (BuB) PROJECT, MARUGIAN DITOY CABUGAO

Cabugao, Ilocos Sur – Kalpasan iti Flag Raising Ceremony ti Pamilia-LGU Cabugao iti Hunio 23, 2014, paset iti panagsarita ni Mayor Edgardo “Ediboy” S. Cobangbang, Jr. iti panangibinsana kadagiti nagun-od ti LGU-Cabugao a proyekto ken pagdurdur-asan dagiti Opisina ken Ahensia  nga adda iti salinong  itoy.

Nagyaman ni Mayor Ediboy kadagiti kaduana nga agiyim-implimentar iti serbisio iti LGU-Cabugao ken kasta met kadagiti umili ta sumangbay iti pagimbagan para iti pagsayaatan ti sapasap kas iti sumaganad:

1.Maysa ti ili ti Cabugao a nakagun-od ti P50,000,000 babaen iti Bottom-up Budgeting (BuB) a nagkakammayetan nga ipatungpal  ti National Anti-Poverty Commission, DILG, DBM, ken DSWD a maipaay kadagiti LGU’s.

2.Daytoy a pundo ket maipatungpal para iti Farm-to-Market Roads (FMR’s) kadagiti barangay iti ili ti Cabugao ken dadduma pay a napapateg a pagkasapulan ti pundo para kadagiti umili.

Kabayatanna, dinakamat ni Mayor Ediboy ti pateg iti pannakapadakkel dagiti Seedlings iti Municipal Plant and Nursery sakbay a maimulada iti maangay a Tree Planting Activities ti Munisipio kadagitoy a bulbulan.

Impalagip pay ti Ama ti Ili kadagiti mangiturturong nga Opisina ti Waterworks-Cabugao ken iti NISTC Public Market iti panangitultuloyda iti napintas a pannakaipaay ti serbisio kadagiti umili.

Kanaig itoy, insupusop ni Mayor Ediboy ti manamnama a pagsayaatan a  maipatungpal iti benneg ti Fisheries. Pinaregtana ti DA-LGU iti pannakasustener ti napintas a gapuanan daytoy a parupa ti Munisipio iti benneg ti Agrikultura babaen iti agtultuloy a pannakaipatungpal dagiti proyekto ken programa nga ad-adaptaren ken pakikammayetan  ti LGU-Cabugao  iti DA-RFO 1 kas kadagiti maipasdek a Techno-Demo Farms, panagadal babaen iti Farmers Field School ken iti regular a  panangtarabayda kadagiti mannalon iti panagballigida iti panagmulada itoy a Wet Season 2014 (Hunio-Nobiembre) ken sumarsaruno a Cropping Season.

 Mangnamnama ni Mayor Ediboy iti agtultuloy latta a napintas a panagkakammayet dagiti Opisina ken Ahensia iti salinong  ti LGU-Cabugao tapno makomplementaran iti pakaseknan dagiti umili babaen iti   napintas a serbisio a maipaay kadakuada. # (Web In-Action)

Friday, June 20, 2014

MAU-USAREN TI eLIBRARY

Cabugao, Ilocos Sur – Naglukat ti Municipal e-Library idi Hunio 3, 2014 ket naipakaammo babaen iti Munisipio dagiti annuroten iti pannakausar daytoy a baro a pasilidad ti Munisipio iti publiko ken kadagiti institusion kas iti pageskuelaan ken kadagiti barangay a pagnanaedan dagiti umili ti Cabugao, Ilocos Sur. 


Iti pannakalukat ti nasao a pasilidad, nakikaysa met dagiti pannakabagi ti Konseho Munisipal   nga isuda SB Member Benedict M. Savellano, SBM Atty. Bryan Jett S. Pano ken ni SB Secretary Maxfel S. Suboc iti aldaw ti Hunio 20, 2014 a  nangkita ken nangpadas iti usar dagiti Imac Computers kas pannakidinnanggayda met kadagiti kailian a mangus-usaren  kadagitoy a moderno  a ramit-komunikasion iti Biblioteka.


Daytoy a baro a pasilidad ti Munisipio ket proyekto ti Cabugao Global Grand Reunion 2014  a nagpaayan  a Host ti LGU-Cabugao nga idauluan ni Mayor Edgardo “Ediboy” S. Cobangbang, Jr. ken nagatendaran dagiti Kameng/Opisiales  ti nadumaduma nga Asosasion ti  Cabugaoenians nga agnaeden iti Hawaii, Mainland USA, ken dadduma pay  a paset ti lubong. # (Web In-Action)