Monday, January 30, 2012

PAG-PATRULIA A BISIKLETA, NAITED ITI PNP-CABUGAO

Cabugao, Ilocos Sur  - Dua a baro a bisikleta ti naidonar iti LGU-Cabugao nga idauluan ni Mayor Edgardo “Ediboy” S. Cobangbang, Jr.  manipud kadagiti saan a pinainaganan nga indibidual nga immay nagbisita/bimmakasion  ditoy ili ti Cabugao. Dagitoy a bisikleta ket maited  kadagiti kameng ti Municipal Police Station nga idauluan ni COP William N. Nerona ket nayawat dagitoy kalpasan ti Flag Ceremony iti bigat ti  Enero 30, 2012 ditoy Munisipio ti Cabugao.

Inapresiar ni Mayor Ediboy ti pannakaawis  dagitoy a nagidonar gapu iti nakitada a kasapulan   dagiti Polis iti panangaywanda “police visibility”  ti linak ken talna para kadagiti umili. Impaganetget pay  ti Alkalde iti amin a taga-LGU nga ipariknada latta  ti nasayaat a panangpasangbay kadagiti  umay   iti Munisipio ken matulongan koma dagiti agipatpatungpal iti pannakadalus  ti aglawlaw ta  mangrugin nga  agsangpet  ti  balikbayans.
 
Kabayatan a maiyawat ti dua a baro a bisikleta kadagiti kameng ti PNP-Cabugao nga idauluan ni Chief of Police William N Nerona. Nairagup iti ladawan ni Mayor Ediboy, Vice Mayor Danny Q. Gazmen, SB Member Carlito S. Pano, M.D., ken  SB Member Josefina S. Vallejo.
Nagyaman met ni Hepe Nerona ken ni Mayor Ediboy ken iti imatang ti Pamilia-LGU iti naawatda  nga usarenda nga agpatrulia. Impeksana a babaen kadagitoy  ket mangpapintas pay  ti sistema ti panagpatruliada a mangtagiben/mangmantener  ti linak ken talna iti intero a Munisipalidad. # (Web In-Action)   

Saturday, January 28, 2012

NAIKKAN TI FINGERLINGS, 4-H CLUB TI BRGY. NAMRUANGAN

Cabugao, Ilocos Sur   – Paset ti direktiba ni Mayor Edgardo “Ediboy” S. Cobangbang, Jr. ti pannakapapigsa ti 4-H Club Cabugao  tapno maipokus ti  umisu/maasikaso   ti pakatulongan  kadagitoy a sektor.

Ti DA-LGU ti pannakaramay ti Gobierno Munisipal a mangigiya  ken mangtarabay kadagitoy nga out-of-school youths.

Idi Enero 26, 2012, inyawat ti DA-LGU nga imbagian ni Mrs. Milagros R. Paz, Municipal Fishery Coordinator ti 800 a Tilapia Fingerlings ti 4-H Club-Namruangan ket naibulosda  idiay naisibar a fishcage a nakubong ti iket sadiay  sabangan ti Karayan Cabugao.
Inted ti DA-LGU ti iket ken maipupok idinto ta iti pannakaiplastarna ti inaramid dagiti kameng ti 4-H Club. Pagrebbengan pay  ti gunglo ti  mangpadakkel  kadagiti fingerlings agingga a  maapitda. Kuna ni Mrs. Joenah G. Sevilleja, Municipal Coordinator ti 4-H Club nga indariragdan ken ni Kapitan Robertson Gorospe ti panangtulongna met   kadagiti miembros  kadagiti pakaseknanda iti proyektoda.

Imbatad ni Miss Lineth Ilar a mariknada ti naan-anay  a panangisakit ti Gobierno Munisipal kadakuada ken agyamanda  unay ken ni Mayor Ediboy. Plano dagitoy nga  agtutubo a kalpasan ti panangapitda ti pupokda a tilapia, agkiddawda  ti proyekto iti DA-LGU ken iti  Opisina ti Mayor para iti Hog Raising Project  ken kayatda ti makipaset kadagiti pa-training nga isayangkat ti NGO’s ken TESDA  idiay Barangay Turod.

Dagiti kameng ken opisyales ti 4-H club iti Brgy. Namruangan, Cabugao, Ilocos Sur
Innayon ni 4-H Club President Lineth  Ilar a naipanawen daytoy a proyektoda ta natalna ti sabangan ti Karayan Cabugao ken adda pakakumikomanda ta nanipud pay idi  bulan ti Disiembre 2011 a nabattaway ti itatapogda nga agkalap ta agdaweldawel ti baybay. # (Web In-Action)

“MAURAYTO TI PUONAN, ‘TULOY LATTA’T OPERASION!”

Cabugao, Ilocos Sur  – “Maurayto  ti puonan, tuloy latta’t  operasion ti  Dayo”, imbatad ni Mr. Marciano “Amas”  Raciles, Presidente ti Cabugao Livestock Traders Association ita nga aldaw ti Dayo,  Enero 28, 2012.

Naipadanonen ti kalikagumda iti Gobierno Probinsial ken Munisipal, segun  iti Sekretario ti asosasion ti Dayo,   a pannakapaadda iti puonanda  tapno masupusopan  ti pagkurangan dagiti aggatang  kadagiti mai-dayo nga animales  ditoy Cabugao  iti aldaw ti Sabado.

Nupay kasta, mar-aramid latta met ti gagangay a panaglinnako ken panagginnatang dagiti agatendar iti Dayo, indibidual wenno bagonan ta saanda a mabalin a langanan ti di  dumagas a maki-Dayo ta daytoy metten ti inaldaw a trabahoda ken nayon a  pamagketanda ti pagbiaganda.


Iti nabiit pay a mitingda, imbaga ni Mr. Elpidio Mejia, Sekretario ti asosasion a kaaduan a kameng ti  nagdamag  no kaano  ti idadateng ti kalikagumanda  a  pagpuonanda. Nupay kasta, mangnamnamada  a mapaaktibonto  ti aktibidades ti linnako-ginnatang a kangrunaan nga aktibidades  iti panag-Dayo apaman nga adu ti kaduada nga aggatang. # (Web In-Action)

AWAN TI PAGKUNAAN KADAGITI AGIBAGNOS TI TRAPIKO

Cabugao, Ilocos Sur  –  Paset ti  programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ti pannakaipakat  ti sistematiko ken naurnos a trapiko a kakibin ti panagaktibo  ti  “economic activities” dagiti umili  a mangpaprogreso ti  Munisipalidad.

Ipampamatmat dagiti kameng ti Traffic Officers/Enforcers a naawagan  ti “Blue Boys”  iti alibtakda a mangiwardas ti naannayas a trapiko  no aldaw ti Tienda  idiay Merkado Publiko (NISTC) ken aniaman a pagteng a pagpupuniponan ti tao nga agdaliasat.

Daytoy ti kaaduan a kapaliiwan dagiti umili ket mabigbig daytoy nga akemda iti nasayud a panaggunay  ti tao, lugan, pasamak iti inaldaw.

Ti Traffic Officers/Enforcers wenno masasao a Blue Boys ket karamanda iti pakabuklan dagiti empleado iti masakupan ti Tiendaan kas mayalubog iti Memoradum Order manipud iti Ehekutibo a sanga ti Gobierno Munisipal idi Agosto 15, 2011.

Dagiti Blue Boys ket kaduada dagiti kameng ti  NISTC Task Force, Security, ken Utility a a mangmantener ti operasion ken mentenansia ti Tiendaan. # (Web In-Action)

Friday, January 27, 2012

NATARIMAAN A PASDEK TI ESKUELA, NATALGEDEN A PAGBASAAN

Cabugao, Ilocos Sur  – Maysa a  prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ket iti pannakasigurado  a  natalged ti   pasdek  a   pagyanan  dagiti ubbing nga  agad-adal iti elementaria iti  ili  ti  Cabugao. Maysa ti pagadalan ti Barangay Salomague ti  addaan ti umaboten  ti 20 a tawennan a pasdek nga us-usaren latta  idi  dagiti agbasa.

Babaen ti naregget a  kalikagum dagiti mangisursuro ken nagannak  iti Salomague Elementary School nga idauluan ni Mr. Ronel Ubaldo, Head Teacher 3, napatarimaan ti daan a Bagong Lipunan Building  iti nasao a pagadalan a no ar-arigen ket kabuteng  dagiti mangisursuro ken ubbing a pagklasean idi kallabes a tawen  gapu ta narukopen  ti bobedana a  tinidtid a bulo ngem  inkapilitan a ditoy  ti paklasean ti tallo a grado.

Ngem gapu ta kasapulanen a matarimaan, pinabaro ti Gobierno Munisipal ti tallo a kuarto a pasdek ti eskuela  babaen ti  panangaprobar ni Mayor Edgardo “Ediboy” S. Cobangbang, Jr.  a nakaigastosan   ti P800,000 tapno adda pagklasean ti Grade 4,5, ken 6 ti nasao a pagadalan itay panagseserrek ti Hunio 2011.

“Natalgeden ti riknami nga agklase ta napasayaat ti bubongan ti eskuela,” kuna ni Mr. Ronel Castaneda,  mangisursuro ti nasao a pagadalan. “Agyamankami ken ni Mayor Ediboy ken ti  Sangguniang Bayan.”

Segun pay  ken ni Mr. Ronel Ubaldo, Head Teacher 3,  manamnama a maikkan ti bobedana ti napabaro a pasdek iti panangngalay ti 1st  Quarter daytoy a  tawen 2012 kas pakabuklan manen  ti kalikagum  dagiti mangisursuro ken nagannak ken iti panangaprobar  ni  Mayor Ediboy babaen ti panangiyendorso  ti Sangguniang Bayan iti panangyuna da Vice Mayor Danny Q. Gazmen ken SB Member  Vicky S.  Serna, Chairman, Committee on Education. # (Web In-Action)

Dagiti agad-adal ti Salomague Elementary School

COMMUNITY SERVICE, PAGPILIAN TI AGLABSING TI ORDINANSA

Cabugao, Ilocos Sur – Ti Community Service Program ket itandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr., ken     nairaman  iti “The 2011 Code of General Ordinances of Cabugao, Ilocos Sur” a pinanday ti Sangguniang Bayan ken inaprobaran ti Municipal Mayor.

Nabukel  daytoy  nga imbes nga agbayad ti multa wenno mabalud  ti  nakaaramid ti kamali, agobra  laengen iti ammona a kuditen   iti makedngan  nga oras a kaibatogan ti multana.   Maibasar   daytoy  iti pannusa nga ipaulog dagiti amin a gagangay nga ordinansa (kas koma iti obstruction of the street, astray animals, anti-littering)  nga  inaprobaran  ti Sangguniang Bayan ti ili a Cabugao, Ilocos Sur ken maipakpakat agingga iti agdama.

Ti  kangrunaan a sagudayen  daytoy ket  ti sumaganad:

A.       Sakbay a maipan   iti korte wenno iti las-ud  ti  72 oras manipud  iti panaglabsing, maikkan ti pagpilian  ti maseknan  no  agboluntario nga ag- “Community  Service” wenno bayadanna ti multana.
B.       Ti Community Service Program ket naibasar kadagiti sumaganad a policy ken prinsipio:
1.      Marespetar  ti kalintegan ti tao ket babaen ti pannakarepormana,  bigbigenna  ti naaramidanna a  kamali  a   mangiturong  kenkuana  nga agaramid iti   nasayaat para iti Gobierno ken   iti padana  a tao.
2.      Ti  agserbisio   ket saan  a mapilit nga agisuot  ti  pagilasinan  nga isuna  ket  naglabsing.
3.      Ti   agserbisio ket  maikkan  ti kabaelanna    a trabaho.
4.      Ti  agserbisio ket agobra    iti pakaseknan  ti social services, value formation, environmental management, gender and development,  peace and order, engineering, health services, agriculture ken dadduma a paaramid  ti Gobierno Lokal  a pakausaran   ti kabaelanda.
5.      Ti  bilang ti oras a leppasen ti agserbisio   ket  ti sumaganad:
MULTA
a.       Multa a P500 agpababa ------- Walo (8) oras a Community Service.
b.      Multa a P501 agingga iti P1,000 ---- Sangapulo ket innem (16) nga oras a Community  Service.
c.       Multa nga aglabes iti P1,000 ------ Duapulo ket uppat (24) nga  oras a Community Service.
NO ADDA BALUDNA TI LINTEG A MALABSING
a.       Dua (2) nga aldaw agpababa -------- Sangapulo ket walo (18) nga oras a Community Service.
b.      Nalablabes ngem dua (2) nga aldaw ----- Duapulo ket uppat (24) nga oras a Community Service.
6.      Maawat ti  agserbisio para  iti lugarna iti  maiyannatup  ti kabaelanna a trabahuen   ken kapaut  ti panagtrabahona.
7.      Maikkan ti Sertipiko  ken Clearance ti nalpasen a nagserbisio.
8.      Adda   linteg a maipakat  iti menor de edad nga aglabsing  kas  sagudayen  ti RA 9344 – An Act Establishing a Comprehensive Juvenile Justice and Welfare System Creating the Juvenile and Welfare Council Under the Department of Justice, Appropriating Funds Therefore and for other purposes.
9.      Ti Community Service Program ket saan a bayad ti buis, ken dadduma  a  bayadan nga ipakat  ti Revenue Code ken ordinansa a pagpastrekan ti Munisipio.
10.  Ti Opisina ti Mayor ti  mangiyetnag ti annuroten ti pannakaipakat  daytoy nga Artikulo.

Thursday, January 26, 2012

PANAGBAKUNA TI ANTI-RABIES, AGTULTULOY

Cabugao, Ilocos Sur - Agtultuloy ti panagbakuna ti Anti-Rabies ti opisina ti DA-LGU  Livestock Section nga idauluan ni Dr. Melvyn Castro, DVM, Municipal Livestock Inspector nangruna kadagiti barangay ken  nakapasamakan ti  panagkagat ti nagita nga aso.

Paset daytoy a gannuat  ti direktiba ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  tapno maprotektaran ti umili iti  viral diseases.

Idi Enero 24, 2012, nakikammayet dagiti Livestock Technician ti CJ  Philippines, Inc.  iti Munisipio babaen iti “Vet Mission” ket nagturong ti grupo iti Barangay Namruangan, Cabugao, Ilocos Sur a nagbakuna iti dinguen nga aso. Umabot ti  100 nga aso, 3 bulan agpangato, nasalun-at ken saan a masikog, ti  napakaptan ti bakuna.

Dagiti  Teknisian ti CJ Philippines, Inc.  a  kadua ni Dr. Castro a nagbakuna:
  • Joey Tadena
  • Harvey Salgado
  • Lester Lucero
  • Edmund Macabeo
  • Baltazar M. Bajo, Jr.
  • Eliazar Ramos
  • Dr. Julius C. Pronuevo    

Kanaig daytoy, idi Enero 25, 2012,  immay  iti Munisipio  dagiti Beterinario a Doktor a naggapu iti DA-RFU 1, San Fernando City, La Union ket  intedda  ti animal rabies vaccine a pakaibakunaan   ti 1,000 nga ayup/taraken, segun iti Team Leader-da.

Sinango da Vice Mayor Danny Q. Gazmen, MA Zenaida Andrada ken Dr. Melvyn Castro dagiti bisita iti uneg ti opisina ti Mayor.  Paset daytoy ti pannakaidur-as ti kampania ti anti-rabies vaccine a pagbuligan ti Gobierno Lokal ken ti DA-RFU 1 nga idauluan ni Dr. Valentino Perdido, PhD., OIC Regional Executive Director, DA-RFU 1. Pinagyamanan ti Gobierno Munisipal babaen ti liderato ni Mayor Ediboy ken Vice Mayor Danny Q. Gazmen dagitoy a naited a pagbakuna.  # (Web In-Action)

DAGITI BETERINARIO A TAGA-DA-RFU 1
  • Dr. Annie Bares -  Regional Livestock Banner Coordinator, DA-RFU 1, San Fernando City, La Union
  • Dr. Constancia Diaz - Regional Anti-Rabies Coordinator
  • Dr. Catherine Simon - Veterinarian 2 Provincial Livestock Banner Coordinator
  • Mr. Pedro Nano, Jr. - DA-RFU 1 Employee    

CLEAN AND GREEN DRIVE, AGTULTULOY A MAIPAKAT

Cabugao, Ilocos Sur  – Agtultuloy nga ipatungpal ti opisina ti  Municipal Engineering kasta met iti DA-LGU ken MENRO ti Clean and Green Program kas pagwadan nga aramid a mapasamak  iti intero a Poblasion ken kadagiti barbarangay ti ili a Cabugao, Ilocos Sur.

Babaen ti panangiwardas da Engr. Crescencio C. Formoso, Municipal Engineer ken Mr. Edgar S. Balangatan, MENRO-Designate ken pannakabagi ti DA-LGU, nawaknitan ti sipar iti  agsumbangir a paset ti National Highway nga agpaabagatan babaen ti serbisio ti Grader. Mailepleppas metten  ti agpaamianan a direksion ti Kalsada Nasional. 

Maar-aramid pay ti panag-community service dagiti empleado ti LGU  a maiyintek ti panagdalus iti agsumbangir a paset  ti National Highway ken disso dagiti dadduma a  pasilidad ti Gobierno Munisipal  iti ikeddengda nga eskediul.

Paset daytoy ti direktiba ti Gobierno Munisipal nga idauluan ni Mayor Ediboy tapno mamantener ti kinadalus ti aglawlaw ti ili. # (Web In-Action) 

BARO A RAMIT, MAINAYON A MAUSAR DAGITI OPISINA TI MUNISIPIO

Cabugao, Ilocos Sur  -  Gimmatang ti Local Government Unit (LGU) ti ili a Cabugao  babaen ti panangaprobar  ni Mayor Edgardo “Ediboy” S. Cobangbang, Jr.,  iti dua a  baro a Photo Copier Machine. Ti basbassit ket mausar iti Opisina ti Mayor idinto ta   mausar  ti dakdakkel   iti  amin nga opisina  ti Munisipio kadagiti papeles a tamingenda. Ti dakdakkel a Photo Copier  ket naikumit iti opisina ti Municipal Assessor’s Office para iti pannakaaywanna ken operasionna.

Paset daytoy ti programa ti Gobierno Munisipal  a  pannakanayon ken  pannaka-upgrade  dagiti agdama a kasapulan a  ramit  iti Munisipio. # (Web In-Action)

Wednesday, January 25, 2012

DIPUTADO RYAN, GINETTENGNA TI RIBBON TI NAISIBRO A TRAKTORA

Cabugao, Ilocos Sur – Nabendisionan ti baro a Tractor (Massey Ferguson,  Multifunction Tractor) ti Turod Multipuspose Cooperative  babaen ti panangannong ni Rev. Fr. Felicisimo “Rudy” Ferrer, Kura Paroko ti ili a Cabugao idi Enero 24, 2012.

Naaramid ti programa ti  panagyaman ti Turod MPC nga idauluan ni Brgy. Captain Inocencio Sadac iti Barangay Multipurpose Hall iti dayta met la nga aldaw  a no sadino a ditoy ket nagatendar dagiti bumarangay,  dagiti mangisursuro iti Turod Elementary School ken Cabugao National High School, kasta metten dagiti empleado ti Kapitolio a nangbayabay ken ni   Diputado Ryan, dagiti empleados ti LGU Cabugao nga idauluan  ni Mayor Ediboy ken dadduma pay nga opisiales ti nadumaduma nga Ahensia.

Nakikaysa met  da Vice Mayor Danny Q. Gazmen, SB Member Vicky S. Serna,  SBM Josefina S.  Vallejo, SBM Dr. Carlito S.  Pano, SBM Richard T. Alcid,  SBM Benedict M. Savellano,  ABC President, Rizal Brgy. Captain Teddy U. Soller ken ni   Kapitan Danny Garcia ti Barangay Dardarat. 


Iti anag ti mensahe ni Mayor Ediboy, nagyaman iti dakkel a tulong ken agtultuloy a panangtedna ti proyekto para kadagiti mannalon ken iti umili  ti  Cabugao  ni Diputado Ryan Luis V. Singson ti Umuna a Distrito. Kimmablaaw ti Alkalde  ken dinayawna ti kinatunos  dagiti kameng ti Turod MPC a pagwadan ti dadduma nga asosasion. Nupay kasta,  binigbigna    ti akem ti Sangguniang Bayan a katinnulongna a mangpaadda iti “equity”  iti kiddawen  dagiti dadduma nga  asosasion ti mannalon a makinaria a para iti  pagsayaatanda. Pammaneknek ti lima nga asosasion ti mannalon a nakaawat iti nabiit iti makinaria babaen iti 85-15 % Equity Scheme iti Farm Mechanization Program ti DA.

Iti panagsarita ni Diputado Ryan, dinakamatna ti naan-anay  a panangilungalong ni Mayor Ediboy kenkuana dagiti proyekto a para  iti ilina ken  dagiti mannalon. Imbatad  ni Diputado Ryan a nupay iprayoridadna dagiti maidatag a kalikagum kenkuana iti Kongreso, dinto agsardeng  a  tumulong kadagiti imbilangna a kalugarannan  iti ili a  Cabugao ken  iti benneg ti Agrikultura agsipud ta dagitoy ti naipanawen a  kasapulan ita ti kaaduan a mannalon a  kaprobinsiaanna iti Ilocos Sur partikular iti Umuna a Distrito.


Imbaga met ni Provincial Agriculturist Teofilo Quintal iti panagsaritana  a gundawayan dagiti mannalon iti Farm mechanization ken maited a post harvest facilities a programa ti Department of Agriculture (DA)  agingga iti 2016. Innayonna nga aggapu ti inisiatiba iti asosasion ti mannalon ket no  mangtedda  ti resolusion, kasapulan met a naksaganan  ti asosasion  agsipud ta agdalan met iti ebaluasion. Imbagana pay ti pannakapapigsa ti Ilocos Sur Cooperative Bank babaen ti pannakikaysa ti sapasap  ken agpuonan  tapno adda pagbulodan  dagiti mannalon.

Kalpasan ti programa, ginetteng ni Diputado Ryan ti ribbon a mangipalnaad ti  pannakaisibro ti traktora ken binayabay da Mayor Ediboy, Vice Mayor Danny Q. Gazmen, dagiti kameng ti Sangguniang Bayan a nagatendar, ISECO Director Tirso “Bong” Savellano, opisiales ti Turod MPC ken Barangay Turod  ken dadduma pay nga opisiales ti Ahensia a naitaripnong.

Kalpasan ti ribbon cutting, napagsasanguan ti naisagana a pangngaldaw para iti sapasap a nagatendar. # (Web In-Action)

SAGOT-AYAT NI GOV. CHAVIT DITOY CABUGAO

Cabugao, Ilocos Sur – Naaramid ti pannakaiwaras dagiti bag a namarkaan ti CS (Community Services) a  naglaon iti epektos ken wall clock a nakailaminaan ti ladawan ti Ama ti Probinsia, Gob. Luis “Chavit” Singson iti tunggal bubongan kas paset iti sagutna iti sapasap  iti  selebrasion ti pannakadanon ti  panagkasangayna.

Segun kadagiti mangimanmanehar ti panagiwaras, narugian pay laeng ti distribusion kalpasan ti selebrasion ti panagkasangay ti Gobernador idi napan a tawen (2011)  ket immuna  a  naaramid sadiay Upland Municipalities  sa naisaruno iti Umuna a Distrito kalpasanna.

Ditoy ili a Cabugao, naaramid  ti panagiwaras ti sagut ni Gov. Chavit   idi Enero 23, 2012 a no sadino a ditoy ket binayabay ni Mayor Edgardo “Ediboy” S. Cobangbang, Jr.  ti grupo a nangibagi ti Gobernador.


Iti Enero 24, 2012, naituloy ti pannakaiwaras dagiti bag iti di pay naikkan ti sagut  a barangays   iti bigat ken nagleppas  iti uppat a barangays  ti Poblasion iti malem iti dayta met la a petsa. Sakbayna,   naipakaammo kadagiti maseknan nga umawat babaen iti claim stub   ti pannakaiwaras ti sagut.

Kanaig daytoy, dagiti opisiales ti barangay ti nangasistir kadagiti pannakabagi ti Gobierno Probinsial a nagyawat ti sagut kadayta a partikular a barangay.
Panagyaman met  ken ni Gov. Chavit ken ti Gobierno Munisipal  iti liderato ni Mayor Ediboy ti kangrunaan a pangsubadda   kadagiti naawatda a sagutda . # (Web In-Action)

Saturday, January 21, 2012

FIELD DAY TI BRGY.BUNGRO KEN SALAPASAP, NABUNGA!

Cabugao, Ilocos Sur – Naangay ti Field Day dagiti agmulmula ti nateng ken mais iti Brgys. Bungro-Salapasap,  Cabugao, Ilocos Sur idi Enero 20, 2012  a no sadino a ditoy ket nagatendar met  dagiti mannalon a naggapu iti nadumaduma a barangays ti ili a Cabugao.

Naitampok ditoy ti techno-demo ti Monsanto-Seminis, maysa kadagiti kompania a makaited ti kabaruanan a klase ti nadumaduma a  bukel.  Ti mais, tarong, sili ken sandia a kangrunaan nga imulmula dagiti mannalon ditoy a deppaar a mangbalanse  ti   suplay ken pagkasapulan iti merkado  iti naipanawen  a  panagmulada ti kangrunaan a napagsasaritaan.

Indauluan ti DA-LGU Cabugao dagiti mannalon a nangibayog ti programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. ken Municipal Agriculturist Zenaida S. Andrada babaen ti agtultuloy a  panagmula ti cash crops a nayon a maimula ken  makatulong pay iti matgedan ni mannalon.


Kalpasan ti panagpasiarda iti nakaraamidan ti demo-farm,  naangay ti programa ken panaglektiur dagiti Technician ti Monsanto-Seminis kasta metten a nagtestimonio  da Mr. Eddy Sevilleja ken Mr. Solmerin a dadaulo  ti panagmulaan  iti dua a barangays. Imbinsabinsada ti padasda ken balligida tapno adaptaren  met dagiti mannalon a nagatendar.

Kanaig daytoy, trinatar ni MAFC Chairman Rogelio Barlolong ti napateg nga akem ni mannalon a mangitag-ay ti napintas a kasasaad ti pamilia ken komunidad babaen iti panagmulmula. Innayonna a napintas nga addang ti panagpadas ti pangrugian a  kabaruanan a bin-i  nga ipromot  ti Monsanto-Seminis.  Dinakamatna pay ti pateg ti maaddaan  ti makinaria a makatulong iti  panagisaganaan  ti pagmulaan ket gundawayan koma dagiti asosasion ti mannalon iti “Farm Mechanization Program”  ti DA.

Binagi met ni Farmers Federated President Elmer G. Bromeo ti nangipaganetget ti  agtultuloy a tanipkel ti mannalon a mangprobitsar kadagiti programa ti nadumaduma nga Ahensia babaen ti pannarabay ti Gobierno Munisipal nga idauluan ni Mayor Ediboy.

Pannakaasikaso  ti organisasion ti mannalon ken  panagsaganada  iti pannakipasetda  iti umadani a Piesta ti ili ti Cabugao  ken dagiti aktibidades a maaramid iti kaaldawanda a mannalon,   ti inlawlawag ni Mrs. Joenah G. Sevilleja, Municipal  Technologist.

Naragsak a nagsisina dagiti mannalon/bisitas kalpasan a sinangoda ti naisagana a pangngaldaw. (Web In-Action)

Friday, January 20, 2012

KURANG A PROYEKTO TI BARANGAY SALOMAGUE, NABIROKAN

Cabugao, Ilocos Sur – Babaen ti programa   iti “Good Governance” iti  Gobierno Munisipal  nga idauluan  ni Mayor Edgardo “Ediboy” S. Cobangbang, Jr., napasubli ti  kurang  ti nakontrata a paset ti barangay road ti Barangay Salomague, Cabugao, Ilocos Sur babaen  iti panangyimplimentar ti napalabas nga Administrasion ni Pasado a Mayor, Dr. Diocaesar S.  Suero. Daytoy  ket naibasar  iti naiwayat nga inspeksion   ti  Commission on Audit (COA) ken iti Project Monitoring Committee (PMC)  iti kallabes a tawen.

“Pagyamananmi unay  a bumarangay  ken ni Mayor Ediboy ta nakorehir ken nabirokan daytoy a nagkamtudanda, ”  kuna ni Brgy. Captain Eliseo Serrano  ti Barangay Salomague.


Pinasingkedan ni Engr. Crescencio C.  Formoso, Municipal Engineer, a naitrabahon ti kontraktor  (N.A. Ibarra Construction) ti pagkuranganna.   # (Web Team)



NALPASEN TI KURANG A KALSADA TI BRGY. NAGSANTAAN

Cabugao, Ilocos Sur – Ti panagkakamang ti pannakakongkreto ti kalsada ti kangrunaan a kalikagum dagiti lumugar  ti Barangay Nagsantaan, Cabugao, Ilocos Sur iti panangidaulo  ni Brgy. Captain Mario Peralta.

Nupay kasta,  kaaduanen a paset ti barangay roads ti lugar  ket nasementon/mailepleppas ti nabatbati  babaen iti panangipatungpal ti  Gobierno Munisipal  nga idauluan ni Mayor Edgardo “Ediboy” S. Cobangbang, Jr.     Imbatad ni Kagawad Roberto  P. Sablay, Chairman, Committee on Agriculture, ti Sangguniang Barangay ken Presidente ti Nagsantaan Farmer’s Association a dakkel a nam-ayda a mannalon  ti pannakasemento dagiti kalsadada ta napintasen ti pangidaliasatanda  kadagiti produktoda ken  mabenepisiaran met dagiti pumasiar iti barangayda.


Kanaig daytoy, dakkel ti panagyaman dagiti lumugar iti pannakaitrabaho ti  nagkurangan ti proyekto nga inyimplimentar  ti napalabas nga Administrasion babaen ken ni Pasado a Mayor, Dr.  Diocaesar S. Suero. Ti pannakabirok ti nagkurangan ket nainayon a pagrebbengan ken  impaitrabaho  iti agdama a Mayor Edgardo S. Cobangbang, Jr.   Pinatalgedan daytoy ni Municipal Engineer Crescencio  C.  Formoso a naitrabahon  daytoy a nagkuranganda iti gatad a P145,913.04.


Babaen iti “Good Governance” a programa  ti Gobierno Munisipal nga idauluan ni Mayor Ediboy,  nagyaman  da  Brgy. Captain Mario Peralta ken dagiti kalugaranda  ta napasubli/mapunnuan  dagitoy a pagkurangan a nainayon a pagsayaatan ti lugarda.  # (Web Team)

UNGTO TI KALSADA TI REBBA-CACADIRAN, NAIRINGPASEN

Cabugao, Ilocos Sur –      Iti aktual nga inspeksion nga insayangkat  ti pannakabagi ti Commission on Audit (COA)  ken Project Monitoring Committee (PMC),  adda manen  natakuatan nga agkurang wenno mapukpukaw a paset ti naiproyekto a  kalsada a masarakan  sadiay Sitio Rebba, Barangay Cacadiran, Cabugao, Ilocos Sur babaen    iti panangyimplimentar iti napalabas nga Administrasion. Daytoy a proyekto ket napunduan iti P1,000,000 (Maysa a Million a Pisos). 

Babaen ti kalikagum dagiti agindeg ditoy a lugar  iti agdama nga administrasion, nainayon a pagrebbengan ni   Mayor Edgardo “Ediboy” S. Cobangbang, Jr.  ti nangbirok ti nasao a mapukpukaw a paset ti  proyekto. 


Kanaig daytoy,   pinasingkedan   ni Engr. Crescencio C. Formoso, Municipal Engineer,  nga  inaramiden  ti dati a  kontraktor  ti  nangileppas ti kurang daytoy a proyekto. # (Web In-Action)

BAYAD TI BUSINESS PERMIT, INGGANAT’ RABII TI ENERO 20

Cabugao, Ilocos Sur (Enero 20, 2012) -  Ita nga aldaw, Enero 20, 2012 ti maudi nga aldaw a panagipilaan ti papeles dagiti mangipabaro ti permisoda nga agnegosio iti las-ud ti Munisipalidad ti Cabugao. Kabayatanna,  kadagiti naglabas nga aldaw ket  nasayud  ti  papan panagipila ti papeles/panagbayad dagiti agtagikua iti negosio iti business permit-da  iti Munisipio  kas intuyang ti Gobierno Munisipal ti ili a Cabugao, Ilocos Sur. Malaksid ta naisem ken napasig dagiti empleado a masungad a mapagsaludsodan no adda  damagen,  napatak a nakapaskin iti diding iti sumrekan iti Municipall Hall ti Citizen’s Charter a mangibinsa ti proseso ken urnos ti panangsakada iti aniaman a papeles ken dokumento a kasapulan ti tunggal umili.

Kanaig daytoy, ti naannayas  a pannakaiwanwan dagiti umili babaen iti naipaskin a pagbasaran (Citizens Charter)  ti maysa a nangbigbigan   ti Department of the Interior and  Local Government (DILG)  iti Gobierno Lokal ti ili a Cabugao  nga idauluan ni Mayor Edgardo “Ediboy” S. Cobangbang, Jr.  kas recipient ti “The Seal of Good Housekeeping”.
Nupay kasta, kaaduan  metten  dagiti mapan agbayad  ti nasanayen iti aramidenda nupay adda bassit nagbaliwan ken nainayon a papirmaan. Dagiti dadduma ken baro nga agtagikua ti negosio ket nadarasda la  a masurotan ti turongen ken aramidenda ta mapagsasaruno laengen a manglamisaan nga empleado  ti mangiwanwan iti aramidenda. 

Naituyang a mabalin a maikamakam iti panagipila ti papeles ti pagbayadan agingga iti rabii  ti Enero 20, 2012 kas naituding iti pakaammo. 

Daytoy  a panagbayadan  ti permiso ket maysa nga obligasion ken pagrebbengan nga ituyang ti linteg tapno agoperar a legal ti negosio ken maprotektaran met ti Gobierno Lokal ti interes dagitoy nga agnegnegosio. # (Web In-Action)

 

Thursday, January 19, 2012

RAMIT PARA AGRIKULTURA , NAAWAT TI LIMA NGA ASOSASION TI MANNALON

Cabugao, Ilocos Sur – Lima a rehistrado  nga asosasion ti mannalon a masakupan ti DA-LGU   ti immawat iti tallo a klase ti makinaria a ramit (3 a Hand Tractor with heavy duty trailer,  1 a Lakas Kuliglig Thresher, ken 1 a Taro Rice Reaper) manipud iti Farm Mechanization Facility Program ti Department of Agriculture, Regional Field Unit 01 babaen iti 85-15 % equity scheme (85% iti dagup a mabayadan  ti bagi  ti DA-RFU 01 idinto ta 15%  met ti LGU) ita a  Enero 19,  2012. Sakbayna,  natudingan dagiti pannakabagi ti asosasion a napan nangilugan  kadagiti nadakamat a makinaria manipud idiay DA-ATI Provincial Center, Batac City, Ilocos Norte.

Naidagas dagiti makinaria a ramit iti Munisipio ket kinita  ni Mayor Edgardo “Ediboy” S. Cobangbang, Jr.  ken  binayabay  da  Municipal Agriculturist Zenaida  S. Andrada ti DA-LGU ken ABC President, Rizal Brgy. Captain Teddy U. Soller  a nangimatang ti panangyawid dagiti opisiales ti asosasion dagitoy a makinaria a nagun-odda babaen iti panangtarabay ken panangtulong ti Gobierno Munisipal kadakuada.


Dagitoy a nagun-od dagiti asosasion  ti mannalon ket resulta ti naregget  a panangpatibkerda ti asosasionda ken panangsurotda  iti programa ti Gobierno Munisipal ken DA-RFU 01 tapno mayagpang ken mayadaptar  iti kasasaadda a mannalon iti dumurdur-as a teknolohia iti benneg ti Agrikultura a makasakup kadakuada. #  (Insurat ni JOED S. SAJONIA)

Dagiti sumaganad ti nagan ti asosasion ken ti nagun-odda a ramit a makinaria:
Rizal Farmers’ Association
1  Unit Taro Rice Reaper coupled with Honda GX 20 3.5 hp. Gasoline engine
New-Cacadiran-Rebba Farmers’ Association
1 Unit ACT Hand Tractor Model Isabelo coupled with Yanmar TF70 7hp diesel engine with heavy duty trailer
Cattle Farmers Multi-purpose Association (Brgy. Baclig)
1 unit Lakas Kuliglig Thresher/Husker-Sheller, Model LK 300 STD coupled with 16 hp Briggs & Stratton Gasoline Engine
Nagsantaan Farmers’ Association
1 Unit ACT Hand Tractor Model Isabelo coupled with Yanmar TF70 7hp diesel engine with heavy duty trailer
Arnap Farmers’ Association
1 Unit ACT Hand Tractor Model Isabelo coupled with Yanmar TF70 7hp diesel engine with heavy duty trailer