Friday, August 29, 2014

FINANCIAL MANAGEMENT, NALPAS ITI MAIKADUA NGA ALDAW

Cabugao, Ilocos Sur –Naballigi a naileppas ti Financial Management Seminar dagiti mannalon a masakupan ti NIA-Gaco National Irrigation Project (NIP) kadagiti Barangay ti Nagsincaoan, Cacadiran, Arnap, Lipit ken Cuancabal, Cabugao, Ilocos Sur  iti Function Hall, NIA-Gaco-NIP Building, Sitio Cabaroan, Brgy. Cuancabal, Cabugao, Ilocos Sur idi Agosto 28, 2014.


Indauluan dagiti Kapitanes ti lima a barangay dagiti mannalon a kameng ti Turnout Service Area Group (TSAG’s) a maserbisyuan ti irigasion iti masungad  iti umabot ti 700 ektarias ken nagseminarda  iti dua nga aldaw, Agosto 27-28, 2014 iti nasao a disso. Indauluan  met ni Ms. Lourdes M. Pagaduan, Senior Institutional Development Officer (SIDO) ti pito nga IDO’s a kaduana a naglektiur iti dua nga aldaw nga isuda Ronald  Verzola, Kristian Lopez, Dennis Serrano, Eleunilo Bumanglag, Estrelita Quila, Lenie Rose Depone ken Gerald Inovejas.


Naadal iti dua nga aldaw ti Overview of FMS, Importance, Objectives and Components, Financial Planning, Financial Recording, Simplified Bookkeeping, Financial Controlling, Financial Reporting ken Duties and Responsibilities in FMS.
Manamnama nga iti panagleppas ti nadakamat a seminar ket addanton pamalpalatpatan dagiti asosasion ti mannalon maipapan iti panagpataud ti pundo ken panangmanehar kadagitoy a sanikua  iti salinong ti NIA Gaco NIP.

Imbagian ni Mr. Edgar S. Balangatan, AT, ti DA-LGU Cabugao kas Banner Head/ Irrigation Development ti nasao nga Opisina iti nadakamat a seminar. # (Web In-Action)

OPISIALES TI NEW CABUGAO ONION AND GARLIC, NAGMITING

Cabugao,, Ilocos Sur -  Naangay ti miting dagiti Opisiales/Kameng ti  New  Cabugao Onion and Garlic Growers Association nga idauluan ni Mr. Henry B. Saliganan idi  Agosto 27, 2014 iti 2nd Floor, Municipal Building, Cabugao, Ilocos Sur.


Kangrunaan a natratar  ket iti pannakapaadda dagiti dadduma a nangruna a datos ken kasapulan ti pannakairehistro ti nasao nga Asosasion iti Department of Labor and Employment (DOLE) Region 1 kasta metten  ti pannakaala ti masterlist dagiti agtarigagay a bumulod ti puonanda nga agmula ken ni Mr. Paul Jonathan “PJ” Manalo, Manager ti Ilocos Multipurpose Cooperative.

Segun ken ni Mrs. Ester P. Aguimbag, Municipal HVCDP Coordinator nga adda 3 a baro a miembro a nainayon iti 37 a dati a kameng ket umaboten  ti 40 dagiti Miembros iti nasao nga Asosasion.


Dagitoy nga aksion ken inisiatiba ket maigapu iti panangparegta ti LGU Cabugao nga idauluan ni Mayor Edgardo “Ediboy” S. Cobangbang, Jr. iti pannakaparegget ti industria ti nateng partikular ti bawang ken lasona ditoy Munisipalidad ti Cabugao tapno manayonan ti matgedan dagiti mannalon ken agtultuloy a maital-o ti kasasaad ti panagbiagda. # (Web In-Action)

Thursday, August 28, 2014

PAY-OUT TI 4 P’s CARD HOLDER, MAAR-ARAMID

Cabugao, Ilocos Sur – Maang-angay  ti Pay-out ti bulan ti Mayo-Hunio 2014 kadagiti kameng ti Pantawid Pamilyang Pilipino Program (4 P’s) kadagiti 33 a barangay  iti ili a Cabugao, Ilocos Sur ita a bulan ti Agosto 28, 2014.

Napan dagiti 4 P’s Members kadagiti DSWD Affiliated ATM  iti ili ti San Juan ken Sinait, Ilocos Sur tapno alaenda dagiti Cash Conditional Transfer a mayataday kadakuada.

Imbatad da  Municipal Link Person,  Ms. Jessie Ann O. Tabut ken kakaduana iti Municipal Link Staff ti Cabugao Municipal Operation’s Office (MOO) - 4 P’s Cabugao a maibatay iti panagtulnog  dagiti 4 P’s  ti pakarukodan iti awatenda agsipud ta saan met a dole-out daytoy a maited kadagiti marigrigat.

Innayon pay ni Ms. Tabut nga adda ti DepED School Heads nga  ag-evaluate iti Education Aspect idinto ta iti DOH Staff (Nurses Deployment Program, BHW’s, BNS, Committee Health Team (CHT), Committee Chair on Health, Barangay Council) dagiti mangbukel ken mangibagi iti Health Aspect ti programa. 

Dagitoy nga aksion ken inisiatiba ket maigapu iti nasaknap a pannakaipakat ti programa ken iti pannakikammayet ti Gobierno Munisipal nga idauluan ni Mayor Edgardo “Ediboy” S. Cobangbang, Jr. kadagiti maseknan/tumulong  nga Ahensia a kas iti DSWD a katulonganda a mangipatungpal kadaytoy a programa para kadagiti marigrigat a kaamaan ti kagimongan. # (Web In-Action)

Wednesday, August 27, 2014

FINANCIAL MANAGEMENT, MAISEMINAR KADAGITI MANNALON

Cabugao, Ilocos Sur – Maang-angay ti Financial Management Seminar dagiti mannalon a masakupan ti NIA-Gaco National Irrigation Project (NIP) kadagiti Barangay ti Nagsincaoan, Cacadiran, Arnap, Lipit ken Cuancabal, Cabugao, Ilocos Sur  iti Function Hall, NIA-Gaco-NIP Building, Sitio Cabaroan, Brgy. Cuancabal, Cabugao, Ilocos Sur.


Indauluan dagiti Kapitanes ti lima a barangay dagiti mannalon a kameng ti Turnout Service Area Group (TSAG’s) a nakapilianda nga opisiales ken miembros a kadua ti NIA-Gaco NIP a mangmanehar iti operasion ti kanal ken asosasion  iti masanguanan nga aldaw.

Maangay ti Seminar iti dua nga aldaw, Agosto 27-28, 2014 iti nasao a disso ket indauluan ni Ms. Lourdes M. Pagaduan, Senior Institutional Development Officer (SIDO) ti pito nga IDO’s a kaduana nga aglektiur iti dua nga aldaw.


Manamnama a no malpas daytoy a seminar ket addanton pamalpalatpatan dagiti asosasion ti mannalon maipapan iti panagpataud ti pundo ken panangmanehar kadagitoy iti salinong ti NIA Gaco NIP.

Nagatendar ni SBM Benedicto M. Savellano, Committee Chair on Agriculture ket nangipaay ti mensahe babaen iti panangkablaawna kadagiti Opisiales ti NIA-Gaco ken dagiti mannalon a nagatendar. Impeksana pay ti pannakikaysa iti LGU-Cabugao iti nasayud nga implementasion iti programa ti irigasion ditoy Cabugao, Ilocos Sur.  # (Web In-Action)

FARM MACHINE & EQUIPMENT, NAITED

Cabugao, Ilocos Sur – Naiyallawat kadagiti Opisiales ti Catucdaan Farmer’s Association ken ti Arnap FA iti Waterpump ken Collapsible Dryer (31 bags @ 50kgs. capacity) kas panagsaganadda babaen iti panangiyallawat ti DA-LGU Cabugao Staff and Personnel kadakuada idi Agosto 27, 2014 iti sango ti Munisipio iti Cabugao, Ilocos Sur
.
Segun ken ni Mr. Nathaniel Galamgam, AT, dagitoy a ramit kas iti Kavico 80 Waterpump ket 85-15 Counterpart Scheme ti pannakaalana ken naipaay a “Grant” ti Collapsible Dryer.

Nakikaysa dagiti Opisiales Lokal ti Cabugao iti pannakaiturn-over dagiti nadakamat a proyekto nga isuda Vice Mayor DJ Savellano, SBM Benedicto M. Savellano, ABC President,  Brgy. Captain Thaddeus U. Soller, SBM Dr. Jemaima S. Tan-Yee, SBM Jayhan Alcid Tan ken ni  SBM Vicky S. Serna agraman dagiti pannakabagi ti dua nga FA’s ken DA-LGU Cabugao. 

Paset pay laeng iti programa ti Farm Mechanization ti DA-RFO 1, San Fernando City, La Union kadagiti mannalon ti Cabugao, Ilocos Sur dagitoy a proyekto. # (Web In-Action)

FARM BUSINESS SCHOOL, BARO A PROGRAMA PARA KADAGITI MANNALON

Cabugao, Ilocos Sur – Naangay ti Project Launching ti Farm Business School  on Vegetable Production in Ilocos Sur babaen iti Pilot Area idiay Barangay Sabang, Cabugao, Ilocos Sur idi Agosto 22, 2014 a nagatendaran dagiti mannalon iti nasao a barangay.


Iti Part 1, naaramid ti Registration  of Participants, Visitors and Guests. Part II ti Opening Prayer ni Ms. Gina Bulseco, Farmer Participant. Welcome Message ni Brgy. Captain Atilano C. Saquiton ken Acknowledgement of the Participants, Visitors and Guests ni Mrs. Joenah G. Sevilleja, AT, FBS Facilitator.

Overview of the Project ni Dr. Melinda F. Mangabat, ATI Training Specialist III/Project Officer.

Nagmensahe ni Mr. Constante Botacion, Assistant Provincial Agriculturist. Dinakamatna ti pateg ti proyekto ken baro a programa dagiti mannalon a  mangiyagpang iti kaammuan dagiti mannalon iti pakaseknan ti panagpatanor ken napintas a merkado ti maimulada a nateng wenno cash crops.


Nangipaay met ti Mensahe ni Mayor Edgardo “Ediboy” S. Cobangbang, Jr. Dinakamatna ti pateg ti proyekto a mangnayon ti matgedan dagiti mannalon babaen iti pannakaigannuat dagiti proyekto a mayataday iti Farm Season ken panagbalin dagiti mannalon nga Entrepreneur ken Enterprise Profitability.

Dinayawna met ti regget ti DA-OPAG Ilocos Sur iti napintas a koordinasion ken pannakikammayetda  iti LGU-Partner nga agtultuloy a mangilunglungalong kadagiti programa ken proyekto a mangnayon iti pagimbagan dagiti mannalon iti Munisipalidad.


Iti maikatlo a parang ket naaramid ti Presentation of FBS Partners and Enrolees babaen ken ni Mrs. Sevilleja; Orientation Briefing to the Farmers Class ni Ms. Remedios Inovejas, OPAG-Ilocos Sur. Closing Remarks ni Mrs. Zenaida S. Andrada, Municipal Agriculturist ti ili a Cabugao, Ilocos Sur. # (Web In-Action)

Tuesday, August 26, 2014

BUWAN NG WIKA, SINELEBRARAN TI CABUGAO DEPED DISTRICT

Cabugao, Ilocos Sur – Naangay ti pannakaselebrar ti Buwan ng Wika nga addaan ti Tema: “Wika ng Pagkakaisa” ITI 26 A PAGADALAN TI Cabugao depED District  idi Agosto 22, 2014 iti Social Hall, Cabugao South Central School, Cabugao, Ilocos Sur a nagatendaran dagiti ubbing nga agad-adal, mangisursuro, nagannak, bisita, PTA Officials ken Municipal Officials nga idauluan ni Mayor Edgardo “Ediboy” S. Cobangbang, Jr.



Iti Programa, inaramid ni  Mrs. Melvi S. Sajonia, Principal II ti Cabugao South CS iti Bating Pagtanggap. Kalpasan dagiti Intermisyon Number dagiti agad-adal, nag-mensahe ni SBM Dr. Jemaima S. Tan-Yee, Committee Chair on Education. Kimmablaaw ken dinayawna ti maipakpakita a kinaresponsable dagiti ubbing a mangselebrar iti pannakaipasdek ti Wikang Pambansa. Innayonna a napateg a lagipen daytoy a naipatawid a saguday dagiti agad-adal a Pilipino. 


Nagkatlo dagiti aktibidad ti panagselebrar. Naangay ti pakontes ti Pagbigkas ng Tula, Solong Pag-awit, Paggawa ng Poster, ken Pagbuo ng Mensahe sa tulong ng mga Salita iti kabigatan dayta a petsa.

Naisaganad a naiyam-ammo dagiti nagserbi a Hurado. Nailawlawag met dagiti Kriterya ti pakontes babaen kadagiti Pupils Facilitators ti programa.

Kalpasan dagiti Intermisyon Number, nangipaay ti Mensahe ni Mayor Ediboy ket kimmablaaw ken nagyaman ta napintas ti pannakaisagana daytoy a selebrasion ti Cabugao DepED District iti tinawen a panagselebrarna iti Buwan ng Wika. Pinadayawan ni Mayor Ediboy ti kinaregta  dagiti Teachers, agad-adal ken nagannak/Guardians ta awan ti pangisukatanna iti napintas a gapuananda kadagiti programada kadagiti pageskuelaan ken iti panagkaykaysada a mangpasayaat ti pagadalanda ken pannakikammayetda iti Gobierno Munisipal para iti pagimbagan dagiti pagadalanda.
Bininsa ti Ama ti Ili ti pateg ti Nailian a Pagsasao a kas maysa a napateg a ramit iti panangtun-oy ti nakaysa a kagimongan ti Pilipino partikular kadagiti umili ti Cabugao, Ilocos Sur.



Nakikaysa met dagiti Konsehal ti ili a kas kada SBM Dr. Jemaima S. Tan-Yee, Committee Chair on Education, SBM Vicky S. Serna, SBM Atty. Bryan Jett S. Pano, SBM Jayhan Alcid-Tan ken ni SBM Josefina S. Vallejo ket  nagserbida  pay a Hurado kadagiti nadakamat a pasalip a nangkulminar iti panagselebrar.

Kamalmanna, naaramid ti maikatlo a paset ti panagselebrar babaen iti pangserra a programa. Naipakaammo dagiti nangabak a nakikontes ket naited dagiti premioda babaen kadagiti nag-Hurado ti salip. # (Web In-Action)

MAIKADUA A SABADO TI MATH CLASS, NABALLIGI

Cabugao, Ilocos Sur – Naangay ti  Math Class iti tallo  a pageskuelaan ti Cabugao DepED District iti intero a Munisipalidad ti Cabugao idi Agosto 23, 2014. Dagiti tallo a pageskuelaan  ket   iti Cabugao North Central School a pannakasentro ti Math Class kadagiti pageskuelaan   kasta met iti Cabugao South Central School ken iti  Turod Elementary School.


Iti pannakiuman ti Web In-Action idi Agosto 23, 2014, imbatad dagiti kaaduan a nagannak/guardians  kadagiti napili nga ubbing a naanus a nagbantay iti ruar ti klase a maragragsakanda ta maipamaysa a masanay dagiti annakda iti Subject a Math.

Kadagiti met ubbing a nairaman kadaytoy a panagsanay ket kayatda met a takuatan ti kabaelanda ken maibilang a parte ti pannakadisiplinada daytoy nga aktibidad nga iwayat ti DepED.

Innayon dagiti mangisursuro a maobserbaran  a kaaduan kadagiti nagenrol nga agbasbasa ket pagduyosanda ti Matematika ken isuda ti kaaduan a maikonkontes iti sabali pay nga asignatura. # (Web In-Action)

Monday, August 25, 2014

TRANSAKSION, AGTULTULOY A NASAYUD ITI CABUGAO DAYO

Cabugao, Ilocos Sur –Maibatay iti pamanunotan  dagiti Opisiales/Miembros  ti Cabugao Livestock and Traders Association ket  puminpintas ti transaksion a mapaspasamak iti panaggiginnatang dagiti koridor ken dumadayo iti Cabugao Dayo  kadagiti bulan ti Tawen 2014.

Innayonda a kaaduan nga animales a maparti iti Tiendaan (NISTC Public Market) kas iti nuang ken baka ket maaramid ti transaksion iti uneg ti Dayo. No adda man maiserrek nga aggapu iti ruar a maparti ket saanda nga ipalubos a maaramid daytoy ta maisalungasing iti napagtutulagan ti Asosasion a maiserrek iti Kaha ti Dayo ti pagbayad ti tunggal transaksion iti panagginnatang a kaibatogan ti  P200 tunggal ulo, segun ken ni Treasurer Rudy Quileza.

Kas iti sigud, nabun-as dagiti nuang ken baka a nai-dayo ket kaaduan ti nagatang a para-parti babaen kadagiti kameng ti Cabugao Meat Vendors/Butcher’s  Association iti NISTC- Public Market, Cabugao, Ilocos Sur.

Kalpasan ti panagmiting dagiti kameng ti livestock association itay nabiit, napatibker manen ti panagkakaduada ken pannakausar  dagiti puonan iti panaggatang nga agtultuloy a mangingato ti masapulan ti asosasion  ken pakabenepisiaran met dagiti kameng iti  agdama. Daytoy nga asosasion ket agtultuloy a tartarabayen ti LGU-Cabugao a mangipromot ken mangkomplementar kadagiti programa/proyekto  para iti pagsayaatan dagiti agtartaraken iti dinguen ken ayup a mainayon a pagsapulanda iti benneg ti industria ti livestock. # (Web In-Action)

Friday, August 22, 2014

GROUNDBREAKING KEN RIBBON CUTTING, NASANGAILI NI GOV. RYAN

Cabugao, Ilocos Sur – Naaramid ti Groundbreaking Ceremony iti maipatakder a 2-Storey Building ti Sangguniang Bayan  Hall iti amianan ti pasdek ti Municipal Hall ti Cabugao, Ilocos Sur iti Agosto 21, 2014 a nagatendaran dagiti Opisiales ti LGU-Cabugao nga idauluan da Mayor Edgardo “Ediboy” S. Cobangbang, Jr. ken ni Vice Mayor Deogracias Jose Victorino H. Savellano agraman dagiti kameng ti Konseho Munisipal, Barangay Captains, Department/Section Heads ti LGU-Cabugao, PNP-Cabugao, Barangay Council Members ken dagiti lumugar ti Barangay Rizal ken dagiti LGU Personnel a  timmulong a nagisagana kadagiti masapsapul ken nangpasangbay kadagiti nagsangpet a bisita.


Nasangaili ni Gov. Ryan Luis V. Singson ket  kaduana  ni Mayor Ediboy ken dagiti Opisiales ti Gobierno Munisipal a nangbayabay kenkuana iti pannakaaramid ti  nasao a seremonia. Kalpasan ti panangisulbong ni Governor Ryan Luis V. Singson iti Time Capsule iti pannakaipatakder ti nasao a pasdek iti imatang dagiti umili ti Cabugao, Ilocos Sur a nagatendar.  

Immallatiw dagiti nagatendar ket  naaramid ti Cutting of Ribbon iti pannakaisibro ti baro a pasdek ti Barangay Hall iti Barangay Rizal, Cabugao, Ilocos Sur. Kadua ni Gov. Ryan ni Mayor Ediboy ken binayabay dagiti SB Members nga idauluan ni Vice Mayor DJ Savellano kasta metten ni ABC President Rizal Brgy. Captain Thaddeus U. Soller ken ti Konseho ti Barangay iti pannakainagorar ti nasao a pasdek a masarakan iti amianan ti Cabugao Cultural and Sports Complex iti nasao met la a barangay.


Kalpasan ti Cutting of Ribbon, naisaruno iti panangbendision ni Rev. Fr. Felix Costales, Kura Paroko ti Cabugao Catholic Church iti nasao a pasdek nga inimatangan dagiti Opisiales ti Ili, Barangay ken Probinsia ken dagiti nagatendar iti Groundbreaking Ceremony. Indauluan pay ni Rev. Fr. Costales ti ababa a kararag a pagyaman iti Apo sakbay a napagsasanguan dagiti nagatendar  iti naisagana a taraon iti pangngaldaw nga insagana ti Barangay Rizal. # (Web In-Action)