Monday, December 31, 2012

RIZAL BARANGAY FIESTA, NASELEBRARAN IDIAY COMPLEX

Cabugao, Ilocos Sur – Naselebraran ti panagpiesta ti Barangay Rizal, Cabugao, Ilocos Sur idi Disiembre 30, 2012 kas panglagip ti kinatan-ok ti Nailian a Bannuar a nakaipanaganan ti nadakamat a barangay ti poblasion.

Iti Disiembre 30, 2012, immuna   a naaramid ti Thanksgiving Mass iti St. Mark the Evangelist Parish Church sa Floral Offering iti sakaanan ti Rizal Monument iti Rizal Park, Barangay Rizal. Naikkan pay  ti sagut dagiti ubbing a nakikaysa ken ni Sir Joseph Simpao the Magician  iti  uneg ti Complex kas mainayon a  pangparagsak a mabuya iti panagpiesta ti barangay. 

Naaramid ti NISTC DCC Coronation Rites iti karabiyanna iti Cabugao Cultural & Sports Complex a nangpangayed ti Piesta. Naluktan ti programa babaen ti  Opening Prayer ni Mrs. Emerita Sunio ken Singing of the Philippine National Anthem and Intayon Cabugao Hymn nga indauluan ni Mrs. Corazon S. Suboc.

Welcome Address ti impaay ni Kagawad Gabriel “Gabby” G. Sunio. Kimmablaaw ken nabara ti panangawis ti Kagawad  iti amin a timmabuno a makipagrambak iti Piesta ti barangay.

Kalpasan ti Farewell March da 2011 Outgoing King Neil Kim Parbo ken Queen Lea Mae Aguilar, nag-Tula ni ubing Angelique Krisanta Yacap. Naisaganad ti iseserrek ti Royal Court nga indauluan da King Eithan Zachary Garcia 1st ken Queen Jessa Rondon 1st.


Nangipaay ni Mayor Edgardo “Ediboy” S. Cobangbang, Jr. ti Inspirational Talk ket nabara ti panangkablaawna kadagiti amin a nakipiesta a pakairamanan dagiti  Opisiales ti ili, bumarangay ti Rizal ken kabangibangna, bisita, Balikbayans, Barangay Officials ti Rizal nga idauluan ni Brgy. Captain Thaddeus “Teddy” U. Soller, Kakapitanes ti barangay a nakipagselebrar.

Dinayaw ni Mayor Ediboy ti maiduma  a kinaragsak ken kinaurnos ti  panagpiesta ti Barangay Rizal a maibilang a pannakasentro ti ili a Cabugao ken kasta met  ti agtultuloy a panagdur-as ti barangay.

Naiballaet ti pannakaipatayab dagiti musika babaen ti Apple Reign Band a nagsalaan dagiti Opisiales ti Ili ken Barangay kasta metten dagiti  nagannak kadagiti nakoronaan nga ubbing a nangituray ti panagrambak iti dayta a rabii.

Naisaad  ti Kapa ken Kinoronaan da Mayor Edgardo “Ediboy” S. Cobangbang, Jr.  ken SB Member Dr. Jemaima Tan-Yee ni Ari Eithan Zachary Garcia 1st idinto ta kinoronaan met da SPM Christian “Basi” Purisima ken Mrs. Marides de Leon-Soller ni Queen Jessa Rondon 1st.

Isem ken namnama para iti masungad a baro a Tawen 2013 ti anag  ti mensahe nga imburay  ni Bokal  Christian “Basi”  Purisima kadagiti naitallaong. Nagyaman ti Opisial ti Probinsia    iti pannakaawisna a tumabuno  ken nangipaay ti tulong ken pannakipagrambakna iti panagpiesta ti Barangay Rizal.


Naitarapnos iti pannakaited dagiti Sash, Boquet, Lei ken Trophy kadagiti innem a Prinsipe ken Prinsesa a nangbayabay kada King Eithan Zachary 1st  ken Queen Jessa 1st . Inakem dagiti nagannak, Opisiales ti Sangguniang Bayan, Barangay Captains ken Balikbayans iti pannakaiyawat dagitoy a pammadayaw kadagiti ubbing.

Dagiti sumaganad ti nakoronaan a Prince ken Princesses ken dagiti  Opisiales a nangisaad ti Koronada:

1st Prince-Mark Ely Sunio-Kinoronaan da Hon. DJ Savellano ken SB Member Josefina S. Vallejo
1st Princess Alissa Joy Ballete- Kinoronaan da Vice Mayor Danny Q. Gazmen ken SB Member Dr. Jemaima Tan-Yee.
2nd Prince Josh Vicente- Kinoronaan da Atty. Rex S. Morales ken ti kaasmangna.
2nd Princess-Princess Sajonia-Kinoronaan da Balikbayan Ernesto Sabugo ken SB Member Vicky S. Serna.
3rd Prince-Raylvin Lanz Tamo- Kinoronaan da
3rd Princess- Marie Joy Fortes-Kinoronaan da Miss Jennifer Savellano ken ti kaasmangna.
4rth Prince-Axel Gian Savella-Kinoronaan da Mr. & Mrs. Eugenio Sunio.
4rth Princess Lavinia Agabao-Kinoronaan da Brgy. Captain Rogelio Siruno ken ti kaasmangna.
5th Prince-Darwin Morales, Jr.-Kinoronaan da Brgy. Captain Inocencio S. Sadac ken Kagawad Gloria Cobangbang.
5th Princess-Jan Mae Castro-Kinoronaan da SB Member Carlos V. Sison ken ti kaasmangna.
6th Prince-Johnderick Paligutan-Kinoronaan da Balikbayan Mr. & Mrs. Rudival Azcueta.
6th Princess-Krissa Mae Lopez-Kinoronaan da Mr. Ernesto Sabugo ken Kagawad Marina Acosta.

Naaramid pay ti intermission numbers dagiti kameng ti Cabugao Cultural Troupe,  nagpabuya pay iti sala ken kanta dagiti  babbalasang a sangaili ni Hon. DJ Savellano, parte ti SK ken Senior Citizens. Closing Remarks ti inakem ni Brgy. Captain Thaddeus “Teddy” U. Soller. Kimmablaaw ken pinagyamanan ti Kapitan  iti amin a timmulong ken nakipagrambak iti naballigi a panagpiesta ti Barangay Rizal. Nagpaay met nga Emcee da SB Secretary Maxfel S. Suboc, Mr. Jose V. Singson, Jr. ken Mr. Rudy Ilar. # (Web In-Action)

Sunday, December 30, 2012

PUMINPINTAS TI TURONGEN TI DAYO ITI UMAY A TAWEN

Cabugao, Ilocos Sur – Iti pannakiamad ti Web In-Action idi Disiembre 29, 2012 a maudi a Sabado ti Tawen 2012, imbatad ni Mr. Marciano Raciles, Jr., Presidente ti Cabugao Cattle Raisers &  Traders Association a manamnama ti puminpintas a panagannayas ti transaksion  iti Dayo iti Tawen 2013 ta naraatanen dagiti wagas a mangpapintas ti panagoperar ti Dayo kas iti sumaganad:
  1. Agtultuloy ti panagoperarna manipud nangrugi agsipud ta adda latta maidayo nga ayup iti kaaldawanna
  2.  Napintas ti pannakaibaut ti puonan ta maaywanan a naimbag ti pinansial  ken ti panagrikusna. 
  3. Maipromot ti Dayo gapu ti ipapan met pannakidayo ti dadduma a kameng iti sabali ket maadaptarda ti dadduma a wagas a mangpasayaat ti ginnatang-linnako. 
  4.  Suportado ti LGU ken pannarabay dagiti Opisiales-Lokal. 
  5.  Pannakaiwayat ti Lakbay Aral babaen ti tulong ti LGU ken pannakaangay ti Anibersario ken simple a Christmas Program a pangpatibkeran ti panagkakadua.
Insupusop pay ti kaaduan a Koridor a nairamenen iti panagbiagda daytoy a trabaho ket tumulongda a mangpadur-as ti livestock industry ti ili  a pakatulonganda met. # (Web Situational Report)

Saturday, December 29, 2012

BOTTOM-UP BUDGETING, NAYUSUAT DITOY CABUGAO

Cabugao, Ilocos Sur – Naaramid ti 1-day Seminar iti Policy Guidelines and Procedures in the Implementation of Bottom-up Budgeting (BuB) for the FY 2014 Budget Preparation a nagatendaran dagiti LGU Department Heads (MPDC, Budget, DA, MSWD ken MHO) kasta pay  dagiti pannakabagi ti Ahensia a mainaig iti programa  ken nadumaduma a sektor ti kagimongan kas iti organisasion ti  PWD’s, Senior Citizens, fisherfolks, ubbing, agad-adal, NGO’s, professional associations, media-groups, faith-based organizations ken  kaarngina nga asosasion iti masakupan ti Munisipalidad ti Cabugao  idi Disiembre 28, 2012 iti Ponce del Mar Beach Resort, Brgy. Pug-os, Cabugao, Ilocos Sur. 

Segun iti Joint Memorandum Circular No. 3, Series of 2012 iti DBM-DILG-DSWD-NAPC, maysa ti Munisipalidad ti Cabugao  kadagiti   Focus Municipalities ti nasao a programa.

Nakitinnulong ni MLGO Officer Constancia “Connie” L. Quinola kadagiti nangseminar a nangilawlawag ti pakabuklan ti nasional a programa ken para iti  pannakabukel ti Local Poverty Reduction Action  Team (LPRAT) a mangtingiting ken mangtinong pay  iti development needs ti ili a maikkan ti pundona babaen iti programa.

Natudingan ni MPDC Florante Jara a nangted ti pamanunotanna iti local situation iti  kinakurapay.
Ti LPRAT ket buklen dagiti mangipatungpal nga   idauluan ti Local Chief Executive (LCE) ket dagiti maiplano a maipatungpal a proyekto ket maaprobaran babaen  iti Sangguniang Bayan sakbay a maisubmiter iti Regional  Poverty Reduction Action Team (RPRAT) agingga inton Pebrero 15, 2013 para iti review ken validation. 

Ni Mayor Edgardo S. Cobangbang, Jr. ti Chairperson ken Co-Chairperson ni Mr. Remigio B. Sunico, Retired DepEd District Supervisor. Naaramid ti planning and workshop tapno Makita dagiti mainugot  a proyekto para  iti nadakamat a programa. # (Web In-Action) 

Thursday, December 27, 2012

INISIATIBO A MAIPAKPAKAT A PAGTULADAN

Cabugao, Ilocos Sur – Iti pannaki-amad ti Web In-Action iti Disiembre 27, 2012, imbatad ni Kagawad Vic Sesuca, Committee Chair on Environment ti Sangguniang Barangay, Barangay Salomague, Cabugao, Ilocos Sur nga inisiatibo ti ipakpakatda kas pangtulong ti Konseho ti Barangay ken kabarangayanda  tapno maannurotda ti programa ti LGU panggep ti Environmental Management.

Insupusop ni Kagawad Sesuca nga indauluanna ti pannakaaramid ti dadduma a kasapulan ti barangay kas iti Bio-intensive Gardening, Nursery, Herbary, Compost Pit ken dadduma pay a kanaigna a kasapulan ti programa.

Iti impakita ni Kagawad Sesuca a ladawan ti panangigannuat ti Komitena iti panangpaberde ti aglawlaw nangruna iti panagnayon ti mulada a mangrove iti katangriban, mamati a maaramidna met  ti pagrebbenganna iti Komite ti Konseho  nga idauluanna.

Ti Barangay Salomague ket maibilang a Tourist Destination ti deppaarna ti Amianan a Luzon. Idauluan ni Brgy. Captain Eliseo R. Serrano daytoy a Coastal Barangay ti ili a  Cabugao, Ilocos Sur. # (Web Situational Report)

Wednesday, December 26, 2012

2ND BATCH TI CIVIL SERVICE SEMINAR TI EMPLEADO TI LGU, NAANGAY

Cabugao, Ilocos Sur – Naangay ti 2nd Batch ti  Orientation on Strategic Performance Management System babaen ti panangisayangkat ti Civil Service Commission (CSC)  kadagiti amin nga LGU   Regular Employees ti LGU-Cabugao  iti Disiembre 26, 2012 iti  SB-ABC  Hall, Cabugao, Ilocos Sur.

Naglektiur ni Hon. Hedy Jose B.  Lardizabal,  Provincial Director, CSC Bantay, Ilocos Sur. Natratar dagiti kabaruanan a wagas ti panangrukod ti gapuanan ti indibidual ken grupo a kasasaad    dagiti   empleado   a mayataday iti direksion a mainugot a  turongen ti Ahensia wenno Opisina. Daytoy a programa ket maipakat iti umay a tawen 2013 ket kasapulan a makipaset dagiti nadakamat a maseknan kadaytoy dua nga aldaw  a seminar nga inwayat  ti Serbisio-Sibil.

Sakbayna, naisaguday  iti pammilin ni Mayor Edgardo S. Cobangbang, Jr. kadagiti LGU Officials ken empleados iti LGU-Cabugao a masapul nga atendaranda daytoy a maiwayat nga   Orientation  Seminar. # (Web In-Action)